Joel 4 (TOMA)

1 «Gaamazu, naama voloiti,siɛgi zu gè Zuda ta Zeluzalɛme nuiti gaaɠalesu da ma ta-you wɔlɔmai zu, 2 nà zii ɠiligiti kpein gaalɛ ba,gè ti yei pɛtugi zu, nii daaseigi ga: ‹Ɠɔoɠɔ GALAGI ɠa tukpɔɠaaleʋezu›.Nà tukpɔi laalɛ ti wu miná,tɔɔzei nà-nuɓusɛiti ta nà-pogani vaa zu, Izilayɛle nuiti,niiti ti ɠɛa ti vazani zii ɠiligiti saama,ta nà-zooi vaa zu, nii ti ɠɛa gaaɠwɛɛni ʋa. 3 Ti nà-nuɓusɛiti gaaɠwɛɛʋɛ ʋa ga kpakutoomai,ti zunu loungoiti pɔdiʋɛ, ti koloɠolo anzanuiti geya ga ma walii,ti anzanu loungoiti pɔdi, ti dɔɔi ɠeya ga ma walii, ti kpɔle. 4 «Wa ɓalaa, Tiil ta Sidɔn laa wolaiti,naa ʋɛɛ Filisiti ɠoʋi laaiti kpein ba,leeni ɠa wo kolizu mà?Wa pɔ wo potokula ɠɛ ga ze ɓaa? Ɓaa wo laalɛ bù?Ni naa ʋe, su la ɠooza,gè wa-ɠɛɛwotiiti ma ɠasɔi laa wo unma. 5 Wo nà-walii ta nà-zanugi unmaʋɛ,naa ʋɛɛ nà-sɔɔla ɓiigiti ba,wo li ga tiye wa-ɠala pɛlɛiti bu. 6 Wo Zuda ta Zeluzalɛme zei wo nuiti pɔdiʋɛ Gɛlɛki nuiti ma,nii a kɛ wo ti maaɠooza ta-yooi ʋa. 7 Kɛlɛ nɔ̀un, ʋɛ wo ti ʋɔdiai ná,nà ti zeɠezu miná, gè ʋa ga tiye,wa ma, faa ɲɔi nii wo kɛa ga tiye,gè naa ɠaaɠale ma wo ma. 8 Nà wo-loun zunuiti ta wo-loun anzanuiti pɔdi Zuda nuiti ma.Tiya ɓalaa ti naati pɔdi Saɓa zei wo nuiti ma,zooi naa zu nii maaɠoozaai.»Mazɔlɔɔ Ɠɔoɠɔ GALAGI ɠa é boni. 9 À zeze ga nii zii ɠiligiti saama:À kɔɔi ɠɛʋele ɓɛtɛ!À kɔɔɠuluɓaiti buzeɠe!Salaʋusuiti nuiti kpein, ti li kɔɔɠɔzuʋɛ,ti lɛ, ti ɲɛpii ɠɔ. 10 À wa-ɠaliiti gain ga boɠa zɔkpɔiti.À wa-molo leʋe woɠaiti gain ga kpɛɛinti.Zɛbɛsulala nui ɠɛ ma: «Nà ga kɔɔɠuluɓai!» 11 À suvilɛ, wo ʋa,wɔi kpein wo ga zii ɠiligiti, wo ná maaɠoolii zu,wo ɠaalɛ ba.Ee, Ɠɔoɠɔ GALAGI,ɗa-ɠɔɔɠɔ nuiti teʋe ti laalɔɠɔma ná! 12 «Zii ɠiligiti ti ʋilɛ pelei ma,ti ɗa li pɛtugi zu, daaseigi ga: ‹Ɠɔoɠɔ GALAGI ɠa tukpɔɠaaleʋezu›.Miná ɠa gè zeizu ná, gè zii ɠiligiti tukpɔɠaaleʋe,niiti ti Izilayɛle maaɠoolii zu. 13 À soo lufa leʋe woɠai zeɠe, mazɔlɔɔ moloi mɔa.À dɔɔ ɠae ɠaaɠolo, mazɔlɔɔ dɔɔɓɔi kpɛtɛzuʋɛ laavega.Diɠi wolaiti daavega, é ʋooʋa ma,mazɔlɔɔ ta-vaa ɲɔi wɔɔlɔʋɛ.» 14 Bɛbɛi ɠaawɔɔlɔʋɛ tukpɔɠaaleʋe ʋɛtugi zu.Mazɔlɔɔ Ɠɔoɠɔ GALAGI ná-foloi maaɓuɠaa,yeei é ʋaazu tukpɔi ɠaaleʋezu la náʋɛ. 15 Foloi ta alugi ti zuɓidia,somideɠaiti ti ma zezei ɠulaa ti ʋa. 16 Ɠɔoɠɔ GALAGI ɠa zikɔzu Siyɔn,gooi ɠa ɠulazu Zeluzalɛme,geeɠɔlɔgi ta zooi ta ɓalizu.Kɛlɛ Ɠɔoɠɔ GALAGI ɠa ɓaazu ná-nuɓusɛiti ma,toɠa ga Izilayɛle nuiti dɔɔɠuzuʋɛ. 17 «Wa suɠwɛɛ naazu ga nà ɠa gè ga Ɠɔoɠɔ GALAGI,wa-ƓALAGI, é zeini Siyɔn, nà-gize ɲadegai ma.Zeluzalɛme ɠa ɲade, wɛɛinti ti la mɔ leʋega ná. 18 Názu, dɔɔ niinɛi ɠa ɠɛ ɠulazu gizeiti ba,nɔnɔi ɗa yei gize ɓufɛgiti kakazuʋɛti,ziɛ yei ʋeleiti kpein ta laa su Zuda yooi zu,ziɛungi laa ɠa leʋe po Ɠɔoɠɔ GALAGI zei ʋɛlɛi wu,é ɗa yei Akasia nɛmɛi zu. 19 Ezipete yooi zu ɠa voo ga nuɓusɛi,Edɔme yooi ɠɛ ga teʋebai,tɔɔzei tooma vai ʋa, ti kɛai ga Zuda yooi,ta sɔbalala nuiti ma ɲamai ʋu vai ti kɛai ná. 20 Kɛlɛ Zuda yooi ta Zeluzalɛme zulaa ɠa ve ɠɔ ga nuɓusɛi. 21 Nà ti maavaayɛsu, tɛiti ti-ma ɲamai ʋuai,gè la ɠɛa dɛ ti maavaayɛni.Ɠɔoɠɔ GALAGI zeizuʋɛ ɠa ɠɛ ga Siyɔn.»

Joel 4 (TOMA)

In Other Versions