Psalms 38 (TBIAOTANT)

undefined Devit kamaghɨn ifonge, God an osɨmtɨzibar gan dagh nɨghnɨgham. Kamaghɨn an onger akar kam osiri. 1 O Ikiavɨra Itir God, nɨ anɨngagharim ikɨ, egh nan ataran markɨ.Nɨ adarim nan ikɨ, egh nɨ ivezir kuram na danɨngan markɨ. 2 Nɨ uan baribar na gasegha,na abɨrazɨ kɨ iraghu.Nɨ uan agharimɨn na mɨsoghezɨ, kɨ iraghu. 3 Nɨ adarim nan itima, kɨ mɨzazir ekiam isi.Nan arazir kuram bangɨn,nan namnam arɨmariam bar anevara. 4 Nan arazir kuraba bar na avaragha gɨfa,ezɨ osɨmtɨzir kaba mati kɨ bizir avɨrir maba ateri ezɨ da bar oseme.Ezɨ kamaghɨn, kɨ da ateran iburaghburaki. 5 Kɨ arazir onganir bar kuram gami.Kamaghɨn amizɨ, nan mɨkarzimɨn itir duaba emimiziba ikia bar kuri. 6 Nan navir averiam osɨmtɨzir ekiam ikia, egha bar moghɨra na itaragha ghuaghiri,ezɨ kɨ nguazimɨn fuaghav iti.Kɨ dughiabar zurara a gɨnɨghnɨgha aziavɨra iti. 7 Nan mɨkarzim fei, mati avim nan mɨkarzimɨn isima,arɨmariam bar na akuatɨ. 8 Arɨmariam bar guizbangɨra na akuatɨzɨ, kɨ onganigha bizitam gɨnɨghnɨzir puvatɨ.Mati bizir mam nan navir averiamɨn ikia na dɨkabɨri.Nan navir averiam osɨmtɨzir ekiam an itima,kɨ mɨzazim isava arai. 9 O Ikiavɨra Itir God, nɨ nan ifongiar ekiam gɨfo.Nan navir arerer kam nɨn modozir puvatɨ. 10 Nan dɨghorim bar pamten nan ingari.Nan gavgaviba gɨvazɨ,nan damazimning nan pɨrizɨ kɨ ua deragha garir puvatɨ. 11 Ezɨ nan namakaba ko nan roroaba, me nan duabar ganan atiatigha,nan boroghɨn izan aghua.Nan adarazi uaghan nan saghon iti. 12 Gumazir na mɨsueghtɨ kɨ aremeghasava amiba,me na bagha azuazim guragha gɨfa.Gumazir na gasɨghasɨghasava amiba,me zurara pazavɨra na damuasavɨra mɨgei.Egha me dughiabar zurara na gasɨghasɨghasavɨra akabav sosi. 13 Kɨ gumazir kuarim onganizimɨn mɨn ikia, egha me barazir puvatɨ.Kɨ gumazir mɨgeir puvatɨzimɨn mɨn ikia, akam akarigha mɨgeir puvatɨ. 14 Guizbangɨra, kɨ gumazir kuarir onganimɨn mɨn ikia,egha men akaba baragha da ikarvazir puvatɨ. 15 O Ikiavɨra Itir God, kɨ nɨghnɨzir gavgavim nɨn ikia nɨ mɨzuai.O Ekiam, nɨ nan God, nɨrara uabɨ nan mɨgɨrɨgɨaba ikarvagham. 16 Kɨ nɨn azangsɨsi,“Nan apaniba na abɨrazir bizir kam bagh bar akongeghsɨ, nɨ men amamangarɨghan markɨ.Kɨ irɨzir bizir kam, me a mɨkɨm na dɨpova bar akongeghan markɨ.” 17 Nɨ fo, mɨzazir ekiar kam nan ikia kamaghɨra iti,ezɨ kamaghɨn kɨ irasava ami. 18 Kɨ datɨrɨghɨn uan arazir kurabar gun nɨ mɨgei,da bar osɨmtɨzir ekiam nan navim ganɨdi. 19 Nan apanibar mɨkarziba bar deragha gavgafi.Gumazir avɨriba pura nan apanim gamua nan aghua. 20 Kɨ arazir aghuibar me gamima, me arazir kurabar na ikarvasi.Kɨ arazir aghuimɨn gɨn zui, ezɨ me bizir kam bagha nan apanim gami. 21 O Ikiavɨra Itir God, nɨ na ataghɨraghan markɨ.Nɨ nan God, nɨ nan saghon ikian markɨ. 22 O Ekiam, nɨ nan Akurvazir Gumazim.Nɨ zuamɨra na bagh izɨ nan akuragh.

Psalms 38 (TBIAOTANT)

In Other Versions