1 Kings 9 (TOMA)
1 Salomɔn ɓegai ma ga Ɠɔoɠɔ GALAGI zei ʋɛlɛi lo, ta masa pɛlɛi, ta nii kpein é ɠɛni pɔ ga é to, 2 Ɠɔoɠɔ GALAGI ɠulani bɛ kɛlɛma ná zeizu velesiɛi zu, eɠɛʋelei é ɠulani la bɛ kɛlɛma Gaɓaɠɔn. 3 É ɠɛni ma: «Gè woiloga ɗa-ƓALA falii ta ɗa-maanɛɛnɛ wooi ma, nii è daazeeliai mà. Pɛlɛi nii è togai bɛ̀, gè kɛa ga ada ɲadegai, ʋɛ nà yɛ ná eyɛsu ɠɔ. Nà wɛlɛ ma yeenɔpɛ, ta zìi ɠa ɠɛ ná. 4 Ɗa ma, ni ɗa ziɛna gàazu, eɠɛʋelei è-ɠɛɛ Davide ziɛni la ladalai ta sɔledai zu, è naati pɛ kɛ, niiti gè è levea ti ma, ni ɗa ɠolona nà-deveiti ta nà-tɔgiti bɛ, gè ti veai è ya, 5 nà ɗa-masa kpɔkpɔgi zei kpɛ Izilayɛle unda eyɛsu ɠɔ, eɠɛʋelei gè minazeɠeni la è-ɠɛɛ Davide ʋɛ, siɛgi zu gè ɠɛɛni la ma: ‹Nu ɠa ɠɛ zɔlɔɔsu nɔ ɠɔ è-mavofodaiti saama, nii a ɠɛ zeizu Izilayɛle masa kpɔkpɔgi ɠa.› 6 Kɛlɛ ni wa ʋoluavena bà, wa wo-mavofodaiti, ni wo la ɠoloni nà-tɔgiti ta nà-deveiti bɛ, gè ti zeiɗai wo ma, ni wa liina, wo gala kiligaa lɛbi, wo nɔkɔ ti wu, 7 nà Izilayɛle nuɓusɛiti kula zooi naa ʋa, nii gè feai ti ya, pɛlɛi nii gè kɛai ga ada ɲadegai, dàaseigi yɛ fai zu ná, nà pili ya poun, é zeɠe gàazu, Izilayɛle ɠa ɠɛ ga ɲɛɛɠulasu ani ta bɛlɛlala ani etea nuɓusɛiti pɛ bɛ. 8 Nuiti ta ɠɛna leʋega Ɠɔoɠɔ GALAGI zei ʋɛlɛi nii ɠoba, koloɠologai, daa ɠa vɔ, é ɗa foei vɛ. Nuiti ta ɗa ɠɛ ɓɔɠɔ ɠaazaɠasu, ti ɗa ɠɛ ma: ‹Leeni vaa zu Ɠɔoɠɔ GALAGI zooi nii ta pɛlɛi nii zogai ɠani?› 9 Gooɠaaʋotegi ɠa ɠɛ ga: ‹Mazɔlɔɔ ti ɠɛlɛa ta-ƓALAGI, Ɠɔoɠɔ GALAGI ʋa, nii é ti-mɛmɛwolani kulani Ezipete yooi ʋa, mazɔlɔɔ ti ʋilɛga gala kiligiti polu, ti nɔkɔ ti wu, ti ti lɛbi, naa ɠa é kɛai Ɠɔoɠɔ GALAGI niima maanɔɠɔiti pɛ seiɗai la ti ma.› » 10 Salomɔn kɛɛni ga kona ʋuufelegɔ (20) pɛlɛ felegɔiti to fai ma: Ɠɔoɠɔ GALAGI zei ʋɛlɛi ta masa pɛlɛi. 11 Tɛi Tiil masagi Yilame ɠa é sɛdele guluiti, ta sipɛlɛ guluiti, ta zanugiti feeni Salomɔn ʋɛ, eɠɛʋelei Salomɔn ɠɛni pɔ la, masagi Salomɔn ɓalaa taa wola ʋuufelegɔ (20) veeni Yilame ʋɛ, Galilé yooi zu. 12 Yilame zeɠeni Tiil ga é taaiti ka, niiti Salomɔn ti veai bɛ. Kɛlɛ taai naati ti la ɠɛni ɛnɛkɛni. 13 É ɠɛni ma: «Taai ma zii ɓɛgeleni ka è ti veai bɛ̀ ɠani, nɛ̀ɛɲɔɠɔi Salomɔn?» É ti laasei pɛɛni ga Kaɓule yooi (nii poluʋɛ ga «tosu la ba»), daaseigi naa ɠa é ti ʋa zaaɠaza. 14 Kilo waasaʋagɔ undɔɔlugɔ (3.500) ɠa Yilame teʋeni Salomɔn ma zanugi zu. 15 Masagi Salomɔn duɔla wotii zeini kpasu, Ɠɔoɠɔ GALAGI zei ʋɛlɛi lo fai zu ta masa pɛlɛi, ta pɛtugi laave fai, nii daa ga Milo, naa ʋɛɛ Zeluzalɛme ziɠigi ʋa, ta Ɠasɔɔl, naa ʋolu Megido, é ʋɛɛ Gezɛɛl ʋa. 16 Ezipete masagi Falaɠɔn liini Gezɛɛl zosu, é abui loni taai ʋa, é Kanaan nuiti paa, niiti ti ɠɛni zeini taai naa zu. É taai naa veeni ná-doun anzanui ʋɛ ga vulu ɠɛɛzu vaanɛɛi, siɛgi zu naa zeini la Salomɔn ʋɛ ga anza. 17 Naa ɠa é kɛɛni Salomɔn taai naa loni ʋolu, é Ɓɛte-Ɠolon buu ʋelei loni ʋolu ɓalaa, 18 é Ɓaalate ta Tamaal loni ɓalaa, teʋebai ma you zɛʋɛi ma, zooi zu. 19 É taai naati kpein toni, ti ɠɛni bɛ ga ani makɛsuʋɛti, ta taai niiti ná-kɔɔɠɔ wotoloiti ti ɠɛni ti zu, naa ʋɛɛ ná-soo ɓizɛ zalaʋusuiti ɲiizu laaiti ba. Nii kpein é ɠɛni pɔ ga é to ga pɛlɛ, é ti loni Zeluzalɛme taazuʋɛ, ta Liɓan ɠizei ma, ta ʋɛ kpein é ɠɛni zeini naa unda. 20 Zii ɠiligi tanigaa ti ɠɛni dɛ zooi zu naama ziɛgi zu: Amool nuiti, Ɠɛte nuiti, Felɛze nuiti, Ɠeve nuiti, ta Yeɓuse nuiti, ti tanɔpɛ ti la ɠɛni ga Izilayɛle nu, 21 niiti ti-mavofodaiti ti yɛni zooi zu mazɔlɔɔ Izilayɛle nuiti ti la ɠɛni zooni ti ʋa ti zuwuɠaaleʋe, tiya ɠa Salomɔn duɔla wotii niiti daani ti ma, zaaɠaza naa ɠa ti daawu. 22 Kɛlɛ Salomɔn la ɠɛni Izilayɛle nu nɔpɛ seɠeni ga duɔ, é ti ɠɛɛni ga salaʋusuiti, ta ná-botiɠɛ nu wolaiti, ta salaʋusu ɠundiɠiiti, ta ná-kɔɔɠuluɓaiti, naa ʋɛɛ kɔɔɠɔ wotolo ɓizɛ nuiti ta ná-soo ɓizɛ zalaʋusuiti ba. 23 Nu undɔɔlugɔ puulɔɔlugɔ (550) ɠa Salomɔn toni ná-botiɠɛ nuiti untuɠɔ, niiti ti ɠɛni botii ɠɛɛzu. 24 Siɛgi zu Falaɠɔn ná-doun anzanui ɠulani la Davide ná-taa wolai zu, é lati ná-pɛlɛ wolai wu nii Salomɔn toni bɛ, názu ɠa Salomɔn pɛtugi laaveni da, nii daa ga Milo. 25 Salomɔn ɠɛni gala zalaɠaiti ta ziilɛi zalaɠaiti kulazu ná zeizu ɠɛ saʋa konagi zu, zalaɠa ɠulazuʋɛ é naa ɓɛtɛni Ɠɔoɠɔ GALAGI ʋɛ, é ɠɛni ansansegiti galazu zalaɠa ɠulazuʋɛ, nii é ɠɛni Ɠɔoɠɔ GALAGI ɠaazu. Ʋele ɠana botii ɠɛni ɠɛɛzu la GALA sei ʋɛlɛi wu. 26 Masagi Salomɔn keingiti kpɛtɛni Ɛsiyon-Geeɓɛɛl, Elate ɠobaʋɛ, Seeli Kpoloɗɛi ɠa Edɔme yooi zu. 27 Fenisi nuiti ti ga kpoloɗɛ ɠa wotiɠɛ nuiti, ta ti kpoloɗɛi ɠwɛɛ gola, Masagi Yilame naati teʋeni, ga ti ɓɔ Salomɔn ná-botiɠɛ nuiti ba. 28 Ti liini Wofiil, ti ʋa ga zanugi, nii a la leʋe kilo waapuugɔ maazu felegɔ (12.000) ʋa.