Ezekiel 20 (TOMA)

1 Kona dɔfelasiɛi ma alu dɔɔlusiɛi ma volo puugɔi ma, Izilayɛle ɠɛwolai tanigaani ti ʋaani ti gàazaɠa, ti Ɠɔoɠɔ GALAGI yiimai ɠwɛɛ. Ti zeini kàkala. 2 Ɠɔoɠɔ GALAGI ɓɔɛni pɔ̀, é ɠɛ mà: 3 «Ɗa ʋe, zunui, ɓɔɛ Izilayɛle ɠɛwolaiti pɔ, ɗa ɠɛ ti ma: ‹Ɠɔoɠɔ GALAGI wooi ɠaa: Wo yiilɔɔʋɛ ʋaazu gàazaɠasu? Eɠɛʋelei gè vulua la ga ɠite, gè la vaa bu, wo ʋa gaazaɠa!› Maliɠii Ɠɔoɠɔ GALAGI wooi ɠana. 4 «Ɗa ʋe, zunui, ta-lukpɔi ɠaaleʋe! Mina inɛinɛ è naa ɠɛ! Ti-mɛmɛwolani ta luʋa ʋele ɲɔiti, kɔzɔba vaiti ti ti ɠɛɛni, ti ɠula kɛlɛma! 5 Ɗa ɠɛ ti ma: ‹Maliɠii Ɠɔoɠɔ GALAGI wooi ɠaa: Siɛgi zu gè yiimazeɠeni la ga Izilayɛle, gè minazeɠeni Zakɔɓe mavofodaiti pɛ bɛ. Gè ɓɔɠɔ lɛɛni ga tiye Ezipete yooi zu, gè minazeɠe ti ʋɛ, gè ɠɛ ti ma: Nà ga Ɠɔoɠɔ GALAGI, wa-ƓALAGI. 6 Naama volo ná, gè yeewuzeɠeni, gè ɠona ti ʋɛ, ga nà ti ɠulazu Ezipete yooi ʋa, gè lo ti luɠɔ, ti li zooi naa zu nii gè kɛʋele ɓɛtɛai ti ʋɛ, ʋɛ nɔnɔi ta kɔin gulɔi ʋooʋaai ná, pagai zooi pɛ ba. 7 Gè ɠɛni ti ma: Wo pɛ à kɔzɔba vaiti pili ya wo ɠaazulogai ti ʋa, à mina mɔ ɓɔɠɔ ɠɔzɔ pɛ ga Ezipete ɠɔɔɠɔ gani nɔɠɔiti kɔɔ vai. Nà ɠa gè ga Ɠɔoɠɔ GALAGI, wa-ƓALAGI. 8 « ‹Kɛlɛ ti ɓakani zèa, ti la ɠɛni kɛɛni ti ʋa ɠolo bɛ̀. Ti tanɔpɛ ge la ɠɛni ɠɛlɛni kɔzɔba ɠalagiti ba ti ɠaazuloni ba, ti la ɠɛni ɠɛlɛni Ezipete ɠɔɔɠɔ gani nɔɠɔiti ba. Gè ɠigaiziɛni ga gè nà-ziiɠaawanai yei ti ma, gè zeeli kwɛgi ma Ezipete yooi nɔ zu. 9 Anɛɛ naa ʋe, dàaseigi maaʋele ɠa gè la naa ɠɛɛni la, ga tɔ̀ɠɔi a ʋa ɠoloɠolo zii ɠiligiti zea ti zeini ti zaama, mazɔlɔɔ gè ɓɔɠɔ lɛɛni ga tiye zii ɠiligi naati gaazu, ga nà ti ɠulazu Ezipete yooi ʋa. 10 Gè ti ɠulani Ezipete yooi ʋa, gè li ga tiye teʋebai zu. 11 Gè nà-tɔgiti feeni ti ya, gè nà-deveiti dɛɛni ga tiye, niiti ti zo fai zobo feezu nuiti bɛ, ti zɛnvui wo ga ti maaʋele. 12 Gè nà-dooɠo foloiti feeni ti ʋɛ, ti ɠɛ ga kpɔfaamai ma ʋoogi gi yɔɠɔzu, ga ti suɠwɛɛ ga nà ga Ɠɔoɠɔ GALAGI, é ti ɲadesu. 13 « ‹Kɛlɛ Izilayɛle nuiti ti wuzeɠeni dàalɔɠɔma teʋebai zu. Ti la ɠɛni ziɛni ga nà-tɔgiti, nà-deveiti ti ʋɛlɛʋɛlɛni ti ɠaazu, niiti ti zo fai zobo feezu nuiti bɛ, ti zɛnvui wo ga ti maaʋele. Ti ɠɛni nà-dooɠo foloiti maaɲɛɛi ʋuuzu ma ga kɛʋele ɲɔu. Gè ɠigaiziɛni mɔnɔ ga gè nà-ziiɠaawanai yei ti ma teʋebai zu, gè ti-ma zuwu ɠaaleʋe. 14 Kɛlɛ dàaseigi ɠa gè luani la, ga tɔ̀ɠɔi a ʋa ɠoloɠolo zii ɠiligiti zea, niiti gè ti ɠulani Ezipete yooi ʋa ti ɠaazu. 15 Nà ɠa gè yeewuzeɠeni, gè ɠona ti ʋɛ teʋebai zu, ga gè la mɔ loga ti luɠɔ, gè ʋa li ga tiye zooi zu gè feeni ti ʋɛ, ʋɛ nɔnɔi ta kɔin gulɔi ʋooʋaai ná, pagai zooi pɛ ba. 16 Gè naama ɠonai woni, tɔɔzei ti la ɠɛni kɛɛni ti ʋa nà-deveiti so, ta nà-tɔgiti, ti ɠɛni nà-dooɠo foloiti maaɲɛɛi ʋuuzu ma, ta-ɠɔɔɠɔ gani nɔɠɔiti faa ɠa é ʋilini ti-yii ʋolu. 17 Kɛlɛ ti maawɔin ɠa é sòni gola, gè la ti ɠoloɠoloni, gè la ɠɛni ti-ma zuwu ɠaaleʋeni teʋebai zu.› » 18 «Anɛɛ naa ʋe, gè ɠɛni ti-lointi ma teʋebai zu: ‹À mina ziɛ ga wo-ɠɛɛni ta-lɔgiti, ta ta-leveiti ti ti ɓɛtɛni ɓɔɠɔ ʋɛ, à mina ɓɔɠɔ ɠɔzɔ ga ta-ɠɔɔɠɔ gani nɔɠɔiti kɔɔ vai. 19 Nà ga Ɠɔoɠɔ GALAGI, wa-ƓALAGI. À ziɛ ga nà-tɔgiti, wo ɠolo nà-deveiti bɛ. 20 À dooɠo foloi maaɲɛ, é ga kpɔfaamai ade yɔɠɔzu, poogi à ɠwɛɛ da ga nà ɠa gè ga Ɠɔoɠɔ GALAGI, wa-ƓALAGI.› 21 «Kɛlɛ dointi ɓalaa ti ɓakani zèa. Ti la ziɛni ga nà-tɔgiti, ti la nà-deveiti soni, niiti ti zo fai zobo feezu nuiti bɛ, ti zɛnvui wo ga ti maaʋele. Ti nà-dooɠo foloiti maaɲɛɛi ʋuuni ma. Gè ɠigaiziɛni naazu ga gè nà-ziiɠaawanai yei ti ma, gè nà-ziiɠaawanai lɛ ga tiye teʋebai zu. 22 Anɛɛ naa ʋe, gè yeezeɠeni ma, gè la naa ɠɛɛni, dàaseigi maaʋele ma, tɔ̀ɠɔi a ʋa ɠoloɠolo zii ɠiligiti gaazu, niiti gè ti ɠulani Ezipete yooi ʋa ti ɠaazu. 23 «Kɛlɛ anɛɛ naa ʋe, gè yeewuzeɠeni, gè ɠona ti ʋɛ teʋebai zu, ga nà ti vazasu nuɓusɛiti saama, zou ɠiligiti su. 24 Gè ɠonani, tɔɔzei ti la ɠɛni nà-deveiti soni, ta nà-tɔgiti, ti nà-dooɠo foloiti maaɲɛɛi ʋuuni ma, kɛlɛ ti-ɠɛɛni ta-ɠɔɔɠɔ gani nɔɠɔiti nɔ ɠa ti ʋilini ti-yii ʋolu. 25 Naa ɓalaa ɠa é kɛɛni, gè tɔgiti feeni ti ya, é la faa ʋaa ti ma, gè deveiti fe ti ya, ti la ɓena zoo ti ʋa zɛnvui wo ga ti maaʋele. 26 Gè ti ɠɔzɔni ga ta-vebɛaniiti, nii é ɠɛni ga ti-loun mɔungiti gala vai ga zalaɠai. Naa ti lɔɔni kidaaʋili golai zu, ti suɠwɛɛni naazu ga nà ɠa gè ga Ɠɔoɠɔ GALAGI. 27 «Naa ɠa é ba, ɗa ʋe, zunui, ɓɔɛ Izilayɛle nuɓusɛiti pɔ, è ɠɛ ti ma: ‹Maliɠii Ɠɔoɠɔ GALAGI wooi ɠaa: Wo-mɛmɛwolani ti ɓaaɠoni mà, ti ɓɔɠɔ lɛ ga wooʋalada nuiti tètema. 28 Gè loni ti luɠɔ, gè li ga tiye naama yooi zu, gè ɠonani ga nà feezu ti ya. Ti gizeiti pɛtɛni miná, ta gulu wolaiti ti ɠaaɓiiliai. Miná ɠa ti ta-zalaɠaiti kulani ná. Ti zìiɠaawana vaiti kɛɛni ná, ta-vebɛani vaiti su, ta zalaɠaiti ti makugi nɛai, ta dɔɔ zalaɠaiti ti ɠɛni ti ʋuuzu ya. 29 Gè ɠɛni ti ma: Zalaɠa ɠula adaʋɛti wa ɗa li náti, naati ta ga leeni? É zo naama yee ma eyɛsu za, naama adaʋɛti daasei ka ga zalaɠa ɠula adaʋɛti.› 30 «Naa ɠa é ba, bo Izilayɛle nuɓusɛiti ma: ‹Maliɠii Ɠɔoɠɔ GALAGI wooi ɠaa: Wo la ɓɔɠɔ ɠɔzɔzu nɛi ɓaa, ga wo-mɛmɛwolani kɛʋele? Wa bɛ̀ ga wooʋalada nuiti, wa koloɠologi ɠɛɛzu siɛgi zu wo ta-ɠɔɔɠɔ gani ɲɔiti dɛbizu la! 31 Niizu niina, wa ɓɔɠɔ ɠɔzɔzu, wa ʋaana ga zalaɠaiti ta wo wo-lointi kula ga zalaɠaiti kɔɔɠɔ gani nɔɠɔiti bɛ. Naa maaʋele ma, Izilayɛle nuiti, wa kaazu ga nà vaa bu, wo gàazaɠa? Eɠɛʋelei gè vulua la ga ɠite, gè la vaa bu wo ʋa gàazaɠa pɛ,› » Maliɠii Ɠɔoɠɔ GALAGI wooi ɠana. 32 «Wa-ɠigaiziɛi wo bosu, naa la ʋaazu ɠɛɛzu, wo ɠɛɛzu ma: ‹Gá pɔ gi ɠɛ ga zooi zɔiti kɛʋele, gi ɠɛ ga zɔɔma nuɓusɛiti kɛʋele, gi ɗa kɔɔɠɔ ganigiti kɔ, ti ga guluiti ɓaa kɔtuiti.› 33 Eɠɛʋelei gè vulua la ga ɠite, nà masadai ɠɛ wo unda, gè sɛ̀bɛi ta nà-zobogi ɠula kɛlɛma, gè yeeɓe nà-ziiɠaawanai ʋa,» Maliɠii Ɠɔoɠɔ GALAGI wooi ɠana. 34 «Nà wo ɠula nuɓusɛiti saama, gè wo ɠaalɛ ba, wo ɠula zooiti su, ʋɛti wo vazagai náti, gè sɛ̀bɛi ta nà-zobogi ɠula kɛlɛma, gè yeeɓe nà-ziiɠaawanai ʋa. 35 Nà li ga woye yɛ teʋebai zu, zɔɔma nuɓusɛiti gaazu ɠɔpoluma, ade lo ɠaazu, gè wo lukpɔ. 36 Ʋelei nɔ gè wo-mɛmɛwolani tukpɔni la teʋebai zu, Ezipete yooi ɠobaʋɛ, zekana nà kɛ la ga woye, wa ɓalaa,» Maliɠii Ɠɔoɠɔ GALAGI ɠa é boga. 37 «Nà wo leʋe nà-tukpɔi wu, gè li ga woye ʋolu nà-minazeɠegi ʋɔ bɛ. 38 Nà kololala nuiti kula wo zaama, niiti ti wuzeɠeni dàalɔɠɔma. Nà ti ɠula zooiti ba, ʋɛti ti náti seikɔɠɔmai zu, kɛlɛ ti la ɠalega ma Izilayɛle yooi zu pɛ. Wa suɠwɛɛ naazu ga nà ɠa gè ga Ɠɔoɠɔ GALAGI. 39 «Wa ʋe, Izilayɛle nuiti, Maliɠii Ɠɔoɠɔ GALAGI wooi ɠaa: ‹À liina, wo wa-ɠɔɔɠɔ gani nɔɠɔiti dɛbi! Kɛlɛ naa ʋoluma, kɛni nɔ wo ɠolo bɛ̀, wo ɓe dàasei ɲadegai ɠoloɠolosu ga wa-vebɛaniiti wo ti ɠulazu ga zalaɠaiti kɔɔɠɔ gani nɔɠɔiti bɛ. 40 Tama Izilayɛle yooi zu nuɓusɛiti pɛ ta lɛbiyai ve bɛ̀ nà-gize ɲadegai ma, Izilayɛle ná-gize ɠaaɠoozagi ma. Nà yeezei wo wu miná ga pagɔ, gè bo wo ma ga wo ʋa ga anii pɛ pɔ̀ niiti wo ti veezu bɛ̀, ta wa-vebɛani mɔungiti, ani ʋagɔi kpein,› » Maliɠii Ɠɔoɠɔ GALAGI wooi ɠana. 41 « ‹Nà wo ɠula nuɓusɛiti saama, gè wo ɠaalɛ ba, wo ɠula zooiti su, ʋɛti wo vazagai náti. Wa zìima eɠɛ gulɔ maku nɛɛnɛgi. Nà nà-ɲadedai ɠula kɛlɛma ga wo maaʋele zii ɠiligiti gaazu. 42 Wa suɠwɛɛ naazu ga nà ɠa gè ga Ɠɔoɠɔ GALAGI, siɛgi zu gè ʋaazu la ga woye ʋolu Izilayɛle yooi zu, gè ma ɠona woni wo-mɛmɛwolani bɛ ga nà fe wo ya. 43 Miná ɠa wa ɠisiɛ ná wo-ziɛ ʋele wɔlɔmaiti su, ta wo luʋa ʋeleiti ti wo ɠɔzɔni. Wa lɛɠɛ ɓɔɠɔ zu, tɔɔzei faa ɲɔi pɛ ba wo kɛɛni. 44 Wa suɠwɛɛ naazu ga nà ɠa gè ga Ɠɔoɠɔ GALAGI, siɛgi zu gè wo zosu da ɠana, dàaseigi maaʋele ma, gè la ʋaazu wo zosu ga wo luʋa ʋelei ta wo-ziɛ ʋele ɲɔiti, Izilayɛle nuɓusɛiti,› » Maliɠii Ɠɔoɠɔ GALAGI wooi ɠana.

Ezekiel 20 (TOMA)

In Other Versions