1 Samuel 20 (TOMA)

1 Davide ʋelani, é zeɠe Nayɔte, Lama ɠobaʋɛ. É liini, é Zonatan ɠaazaɠa, é ɠɛ ma: «Leeni ɠa gè kɛa? Nà-faaɠaazagi ɠa ga leeni, kotoi ɓɛgele ɠa gè kɛa è-ɠɛɛ laalɔɠɔma, é ɠɛɛzu é pàa?» 2 Zonatan gooɠaaʋoteni, é ɠɛ ma: «Naa li poun! È la zaa. Kɛ̀ɛ la dɛ faa nɔpɛ kɛɛni, ni é la boni mà. Lee vaa zu mu kɛ̀ɛ nii lɔɔɠuzu bà? Faa nɔpɛ ge la naazu.» 3 Davide ɠɛni ma: «Nà ɠonazu è ʋɛ ga è-ɠɛɛ kwɛni ga bɔ̀ɔlai ɠa ga ɗe, toɠa ɠɛ ɠisiɛni nɔ ga: ‹Kɛni Zonatan mina faa ɠwɛɛ niima vai zu, ni naa laade, zii ɠa ɓɔlɔ.› Kɛlɛ gè ɠonaa Ɠɔoɠɔ GALAGI ma, nii é vulua, ta ɗa ɓalaa ma, ɗɛi è vulua, nà bosu è ma ga kɔɠɔ lo daa ɠila nɔ ɠa é gi yɔɠɔzu gá saai.» 4 Zonatan ɠɛni Davide ma: «Nii nɔpɛ è pɔ, bo mà, nà kɛ è ʋɛ.» 5 Davide ɠɛni ma: «Lina ɠa é ga alu toga niinɛi ma vɛtii, maanɛɛʋɛ gè daami wo masagi ná-taɓalii ɠa. Kɛlɛ va bu, gè li, gè lɔɔɠu dɔɓɔi zu, eyɛsu foloi zaʋasiɛi kpɔkɔ. 6 Ni è-ɠɛɛ a kaana ga gè la ná, ɗa ɠɛ ma: ‹Davide màanɛɛnɛʋɛ ga gè ɓe ba, é li fala ná-taazu Ɓɛteleyɛme. Mazɔlɔɔ ná-pɛlɛyeɠei pɛ ka zalaɠai ɠulazu, nii ta ɗa kula kona-o-kona.› 7 Ni a ɠɛna ma: ‹Naa ʋagɛ,› naazu ziilɛigi ɠa bɛ̀ ɗa-wotiɠɛ nui. Kɛlɛ, ni a yiiɠaawanana, kwɛɛ ga é devea ga é pàa. 8 Ɗa wooɠɛɠiladai lɛ ga ze naazu, nɛ̀i gè ga ɗa-wotiɠɛ nui, mazɔlɔɔ de minazeɠea ɓɔɠɔ ʋɛ ga nɛɛbɛi, Ɠɔoɠɔ GALAGI laaseigi zu. Ni nà ɠɛ ga sɔba nu faa nɔpɛ su, pàa ɗa ɓɔɠɔi, kɛlɛ mina li ga ze è-ɠɛɛ ʋɔ.» 9 Zonatan ɠɛni ma: «Naama ɠigi maaɠooza bà poun! Ni nà kwɛɛna ga kɛ̀ɛ ɠa pɔ é faa ɲɔu ɠɛ ga ɗe, nà bo è ma.» 10 Davide ɠɛni Zonatan ma: «Ni è-ɠɛɛ ɠa è wooɠaaʋotena ga ɲɔuɗa, ɓɛ ɠa è teʋesu ga é bo mà?» 11 Zonatan ɠɛni Davide ma: «Ʋa, de li dɔɓɔi zu.» Ti felegɔ ti liini dɔɓɔi zu. 12 Zonatan ɠɛni ma: «Gè minazeɠea Ɠɔoɠɔ GALAGI laaseigi zu, Izilayɛle ná-GALAGI, ga lina, ɓaa lina a leʋena, niima yeeɠɛɠalai nɔ ma, nà kɛ̀ɛ ɠoozu ɠaazaɠasu, gè ná-kisiɛiti kwɛɛ. Ni ná-kisiɛiti pagɛ, é ʋilɛ è ʋa, naazu nà bo è ma. 13 Kɛlɛ, ni kɛ̀ɛ ɠa pɔ é faa ɲɔu ɠɛ ga ɗe, gè la kɛɛni, gè ʋa bo è ma, Ɠɔoɠɔ GALAGI sò ná-ziiɠaawanai pɛ su. Nà ɓe è ʋa, è li ziilɛigi zu. Ɠɔoɠɔ GALAGI ɠɛ è ʋa, eɠɛʋelei é ɠɛni la kɛ̀ɛ ʋa. 14 Ni nà dɛ vulua, ziɛ bɛ̀ ga Ɠɔoɠɔ GALAGI ná-wooɠɛɠiladai, nii a kɛ gè mina za. 15 Ɗa-wooɠɛɠiladai mina zeɠe màvofodaiti ba, anɛɛ ɓalaa, Ɠɔoɠɔ GALAGI ɠa è zili nuiti pɛ kulazu eteai zu.» 16 Zonatan minazeɠegi ɠɛɛni ti yɔɠɔzu ta Davide ná-pɛlɛyeɠei. Kpegai ma, é ɠɛ ma: «Ni ɗa minazeɠegi nii ɠoloɠolona, Ɠɔoɠɔ GALAGI ɠa è loɠa ga è zili nuiti ta-ɓakɔi.» 17 Naa ʋoluma Zonatan ɠɛni Davide ma, é ɠona ga toɠa nɛɛ ʋɛ eyɛsu ɠɔ. Mazɔlɔɔ Zonatan Davide nɛɛni ʋɛ eɠɛ tɔ ɓɔɠɔi. 18 Zonatan ɠɛni ma: «Lina, ta kwɛɛsu ga è la ʋaani alu toga niinɛi ma vɛtii zu, tɔɔzei è-zeizuʋɛ ɲakai ɠa ɠɛɛzu lee. 19 Lina a leʋena, li ʋɛ è lɔɔɠuni ná, siɛgi zu niima vaiti pɛ tɔɔzeini la, ɗa lɔɔɠu Ezɛle ɠɔtui ɠobaʋɛ. 20 Nà mɛɛin ʋilisu saʋa kɔtui ʋɔ pelei, gè ɗa tete anii ta ma. 21 Naa ʋoluma, nà nà-botiɠɛ zunu loungoi leʋesu, ga é ti zeɠe. Ni nà ɠɛna ma: ‹Wɛlɛ, mɛɛn ɠaeiti ta è ʋoluʋelei, ɠale ma, è ti zeɠe,› naazu, ɗa zoo ʋaazu, mazɔlɔɔ fai pɛ pagɛ è luɠɔ. Gè ɠonaa Ɠɔoɠɔ GALAGI ma, nii é vulua, ga faa nɔpɛ ge la ná, nii ɗa lua ba. 22 Kɛlɛ ni nà ɠɛna zunu loungoi ma: ‹Li poun, mɛɛn ɠaeiti maaɠoozaʋɛ è ʋa,› naazu, li, mazɔlɔɔ Ɠɔoɠɔ GALAGI ɠa é pɔ ga è li. 23 Wooi ɠana de giliai ba, ɓɔɠɔ yɔɠɔzu, ɗa-o, nà-o, Ɠɔoɠɔ GALAGI va bu, de yɛ wooɠɛɠiladai zu, eyɛsu ɠɔ.» 24 Davide liini, é lɔɔɠu dɔɓɔi zu. Alu toga niinɛi ma vɛtii ɠula yeei, kpɔkɔi, masagi liini, é zei taɓalii ɠakala daami wosuʋɛ. 25 Masagi zeini seizuʋɛ, ʋɛ a ɗa ɠɛ ná pɔlɔma, é ʋoluzei pɛlɛi ʋa, Zonatan zei é ɠaaʋote ma, Aɓenɛɛl zei Sayile ɠoba, kɛlɛ Davide zeizuʋɛ ɲakai ɠɛni de. 26 Sayile la ɠɛni faa nɔpɛ boni naama voloi, é ɠɛni ɠisiɛzu ga naa ɠa ɠɛ kɔzɔba vai ta ɠɛɛni kazemazu. 27 Kɛlɛ, fɛtii ma voloi velesiɛi, Sayile Davide zeizuʋɛ ɲakai ɠaai ma mɔnɔ, é Zonatan ɠaazaɠani, é ɠɛ ma: «Toɠa ɠale gè la Davide ɠaazu daami wosuʋɛ, wogi, ta za?» 28 Zonatan gooɠaaʋoteni, é ɠɛ ma: «Davide gòla màanɛɛnɛʋɛ ga gè ɓe ba, é li Ɓɛteleyɛme. 29 Kɛɛʋɛ mà: ‹Nà è maanɛɛnɛzu, yeeɓe bà, gè li. Mazɔlɔɔ, gá zalaɠa ɠulazu pɛlɛyeɠei wu, gá-laazu, dìɛ tòligɛ ma vai ma. Naa ɠa é ba, va bu bɛ̀, gè li gè ɠaazula nà-nuiti ma.› Naa ɠa é kɛa, Davide la fɛti laamii woni è ʋɔ bɛ.» 30 Sayile wola yiiɠaawanani Zonatan ma, é ɠɛ ma: «Ɗa ga tuʋa ʋele ɲɔu anzanui ta kololala anzanui ná-doun zunui. Gè suɠwɛɛ ga è Izayi ná-doun zunui ɠɛa ga è-wɔɔlai, ɗa-unfe kana, è-lee ná-unfe ge ɠɛ lee. 31 Kɛlɛ, woilo nii ma, gè bosu è ma: Ni nu laali nuu ɠa vulua, è la ɠɛa ziilɛi su pɛ, è la masadai zɔlɔɔga eyɛsu pɛ. Naa ɠa é ba, nu leʋe naa luɠɔ, ti so, ti ʋaa la pɔ̀, kɛni é za.» 32 Zonatan kɛɛɠɛ Sayile wooɠaaʋoteni, é ɠɛ ma: «Lee vaa zu é zaazu? Lee ɠa é kɛa?» 33 Sayile ná-kpɛɛin ʋilini ga é Zonatan zɔ. Zonatan gaaɠaani naazu ga kɛɛɠɛ deveʋɛ ga é Davide ʋaa. 34 É wuzeɠeni ga ziiɠaawanai, é la daami woni naama voloi. Tɔɔzei zii ɠɛni zoolɛzu ga Davide ná-faa, kɛɛɠɛ ɠɛni poomusu ga gola. 35 Poluma zobui, Zonatan liini dɔɓɔi zu, ʋɛ ti zolooni ná ma, ta Davide. Botiɠɛ zunu loungo ɠila ge ɠɛni polu. 36 É ɠɛni naa ma: «Ɓizɛ, è li, mɛɛn ɠaeiti gè ti ʋilisu, è ti yɛʋɛ.» Botiɠɛ zunu loungoi ɓizɛni, Zonatan mɛɛn ɠae ɠila pilini, é kpudɛ naa maazu. 37 Zunu loungoi maaɓuɠaai ma, mɛɛn ɠaei ɓadɔzuʋɛ ʋa, Zonatan ɠɛni ma: «Mɛɛn ɠaei maaɠoozaʋɛ è ʋa. 38 Li ga suvilɛ, mina yɛ miná!» Zonatan ná-botiɠɛ zunu loungoi mɛɛinti gaalɛɛni ba, é li ga tiye maliɠii ʋɔ. 39 Zunu loungoi la ɠɛni faa nɔpɛ gaaɠaani, kɛni Zonatanni ta Davide ɠa ti ɠɛni gaaɠaazu yɔɠɔzu. 40 Zonatan ná-mɛɛin ta ná-mɛɛn ɠaeiti feeni ná-botiɠɛ zunu loungoi ya, é ɠɛ ma: «Li ga tiye taazu.» 41 Zunu loungoi liai ma, Davide ɠulani dɔɔɠuzuʋɛ kɔtu ziɠigi ʋoluʋɛ, é nɔkɔ ná zeizu ɠɛ saʋa, Zonatan ɠakala, é unpilɛ zooi ma. Ti felegɔ ti ɓɔɠɔ nɛɛnɛni, ti lɛbi wɔlɔzu, Davide ɓɔɔɓɔ ge wola wɔlɔni. 42 Naa ʋoluma, Zonatan ɠɛni Davide ma: «Li ziilɛigi zu. Ɠizɛ bɔɔla vai ma minazeɠegi zu, de felegɔ de boga yɔɠɔzu, Ɠɔoɠɔ GALAGI laaseigi zu, de ɠɛ ma: ‹Ɠɔoɠɔ GALAGI va bu, de yɛ wooɠɛɠiladai zu, eyɛsu ɠɔ, ɗa-o, nà-o, ta de-mavofodaiti!› »

1 Samuel 20 (TOMA)

In Other Versions