Job 13 (TOMA)

1 «Ungo, gaamazu, naati kpein, gè ti ɠaani ga nà ɓɔɠɔi gàazuʋɛ.Gè ti mɛnini ga nà ɓɔɠɔi gòiyeɠeiti, gè ti ɠaaɠa ga pagɔ. 2 Nii wo kwɛɛ, gè naa ɠwɛɛ nà ɓalaa,gè la kula bu wo ʋɛ ga tago ɓalaa. 3 «Kɛlɛ Zɛbɛi-Pɛ-Maliɠii ɠa gè wɔinni gè ɓɔɛ pɔ,GALA ɓɔɠɔi ɠakalaʋɛ ɠa gè pɔ gè ɓɔɠɔ maalobo ná. 4 Wɔun wa, bɔ̀ɔlaiti, zɛɛi ɠa wo kpɛtɛzu,wo kpein wa ga zɛɛ zale ɠula nuiti. 5 A la vizɔ wo ma, wo maaɠɛ kpɔ suɠila!Wa la ɠɛ ga ɠima nuiti. 6 Nà wo maanɛɛnɛzu, à woilo nà-kpaazaɠa wooi ma,wo ɠida tùkpɔ wooiti bu. 7 Wa ɠisiɛzu ga GALA ka wo botii ɠɛɛzu bɛ ga faa maaʋegai?Wa maalobosu ga kazemazu vaiti ɓaa? 8 Wa pɔ wo lo GALA polu?Wa pɔ wo daalukpɔi lo bɛ? 9 Ni a ɠɛna é wo vɛɠɛlɛfɛɠɛlɛ, toɠa ɠɛ nɛi ga faa ʋagɔ wo ʋɛ?Nu la GALA yaava, eɠɛʋelei nu a nui yaava la. 10 Gaamazu, toɠa zeliiti to wo ma,ni topolu ɠa wo kɛɛzu dɔɔɠuzu. 11 Wo la luazu GALA ná-maayikii ʋa ɓaa?Maaluai é bosu, naa la wo zasuɓalizu ɓaa? 12 Kalagi niiti wo lɛɛzu ti ma kenein kenein, ta-ɠulanumai wola lɔiʋɛ eɠɛ zuʋui,wa-wooɠaaʋotegiti ta ga aniiti ti ɓɛtɛai ga penɛi. 13 «À maaɠɛ dɛɛ kpɔ, wo ɓe bà! Nà ɠa gè pɔ gè ɓɔɛ!Nii a ɠɛ ga ze, naa ɠɛ ga ze. 14 Nà ziiɠulakoozui ɠɛɛzu,gè ɠikula zɛ̀nvui zu. 15 GALA ge pàa, ni naa ɠa é pɔ, kito nɔpɛ ge la mɔ bɛ̀.Kɛlɛ tɔun gaazu, nà sìɛ ʋelei maalobo. 16 Tɔun vɔlɔ, naama ɠɛʋelei mu ka zoo é kìzo.Mazɔlɔɔ woovele nu nɔpɛ ge la lɔɔzu zɔlɔɔga tɔun pɔ bɛ. 17 À woilo naa ma fɔɔn, nii gè ʋaazu bosu.À ɠida bu, gòoiti poluʋɛ lɔ wo woizu ga pagɔ. 18 Mazɔlɔɔ kɛ̀ʋele ɓɛtɛʋɛ ga gè ɓɔɠɔ maalobo.Gè kwɛɛ ga nà-gaamai ʋe. 19 Ɓɛ ɠa é wɔinni é sàkpe názu?Kɛ̀ʋele ɓɛtɛʋɛ, ni gè la ʋeeni, gè maaɠɛ kpɔ ta gè za. 20 «Nà-GALAGI, faa felegɔ nɔ ɠa gè ɠɛ è kɛ bɛ̀,nà zoo naazu gè ɠula kɛlɛma è ʋɛ. 21 Mɔunpa, è-yeei é wuizu mà gola, naa zeɠe màazu,mina mɔ ɓe maalua ɠasɔi ʋa, é ʋa gàalua. 22 Naa ʋolu, ɓɔɛ pɔ̀, nà è wooɠaaʋote,ɓaa mu nà ɓɔɛ, è gòoɠaaʋote. 23 Faaɠaaza golai, dielegɔ ɠa gè kɛai, ta kotoi?Nà-kotoiti dɛɛ ga ze, ta nà-tɔ koloɠologiti. 24 Leeni vaa zu è ɠaazulɔɔɠuzu bà,è ɗa pɛ̀tɛ ga è zili nu? 25 Ɗa pɔ è daai ɲiikpi, nii é ɓalizu?Ɗa pɔ è ʋilɛ daa vɔɔi ʋolu, è kpɛ? 26 Mazɔlɔɔ ɗa tùkpɔɠaaleʋezu ga woo wanaiti,è ɗa nà-nu niinɛlai ma vaaɠaaza golai ma ɠasɔiti da ùnma. 27 È kɔ̀ɠɔ felegɔiti pɛ gilia ga kɔlui,è ɠaazulo bà kpaan sìɛ ʋeleiti pɛ su,è ɗa kɔ̀ɠɔʋo gaiziɛ. 28 Nuɓusɛi zu ɠa lulusu, eɠɛ gului duulai,eɠɛ seɠei ɓaɠaɓaɠai miizu.»

Job 13 (TOMA)

In Other Versions