Leviticus 16 (TOMA)
1 Ɠɔoɠɔ GALAGI ɓɔɛni Moize ʋɔ, Aalɔn ná-doun zunu felegɔiti saa ʋoluma, niiti ti ɓɔɠɔ lɛɛni ga Ɠɔoɠɔ GALAGI. 2 Ɠɔoɠɔ GALAGI ɠɛni Moize ma: «Ɓɔɛ è-liɛ Aalɔn ʋɔ, naa ɠa a kɛ, é mina ɗa lɛ yeenɔpɛ ada ɲadega wolai, kwɛpele seɠezuɠoozagi ʋoluʋɛ, kesui lakulugi ɠakalaʋɛ, nii é minazeɠe kesui la, naa ɠa a kɛ é mina za, mazɔlɔɔ nà ɠulazu kɛlɛma tonaɓiingi zu kesui lakulugi maazuʋɛ. 3 «Pɛtɛ ʋelegi Aalɔn a zoo lɛɛzu la ada ɲadega wolai: Toɠa nikɛ zinɛ ɓokpa gila seɠe ga koto gba zalaɠai, ta baala sinɛ ɠila ga gala zalaɠai. 4 Toɠa seɠewuzeɠe ɲadegai loo ɠɔba, é ga gezei, é ma ʋɛlɛ kpuɠagi lɛ ɓɔɠɔ ma, é zaamaɠili ga geze zaamaɠiligi, é ma wɔɔlɔgi lɔ unba. Zalaɠa ɠula zeɠeiti kana, niiti a ɓɔɠɔ maaɠili ga tiye, é maagba ʋoluma. 5 Toɠa boli zinɛ felegɔ ɠula Izilayɛle ʋɛbɛi ya ga koto gba zalaɠai, ta baala sinɛ ɠila ga gala zalaɠai. 6 «Aalɔn ɠa koto gba vai ɠɛ ga ná-nikɛ zinɛi, toɠa ná-kotoi gba ta ná-pɛlɛyeɠei. 7 Toɠa boli zinɛ felegɔiti seɠe, é ʋa ga tiye Ɠɔoɠɔ GALAGI ɠakala, GALA daaɠomi seɠe ʋɛlɛi laaʋɛ. 8 Aalɔn ɠa kpakutoomai ɠɛ ga boli zinɛ felegɔiti, gilagi ɠɛ ga Ɠɔoɠɔ GALAGI nɔnɔi, gilagi ɠɛ ga nii kotoi yɛsu da, é lii la. 9 Aalɔn ɠa boli zinɛi maaɓuɠa ʋa, niigi kpakui loozu ma Ɠɔoɠɔ GALAGI ʋɛ, é naa ɠula ga koto gba zalaɠai. 10 Boli zinɛi niigi kpakui loozu ma, ga kotoi yɛ da, é lii la, naa ma vului ɠa ʋilɛ Ɠɔoɠɔ GALAGI ɠakala, naa ɠa a kɛ, é koto gba vai ɠɛ, ta yeeɓe ba, é li teʋebai zu, kotoi yɛ da. 11 «Aalɔn ɠa koto gba vai ɠɛ ga ná-nikɛ zinɛi. Toɠa koto gba vai ɠɛ tɔ ɓɔɠɔi ʋɛ, ta ná-pɛlɛyeɠei. Toɠa ná-koto gba nikɛ zinɛi ɠɔdaaleʋe. 12 Toɠa ansanse gala liɠii ta zeɠe, daavegai ga abulekaiti, seɠeai zalaɠa ɠulazuʋɛ Ɠɔoɠɔ GALAGI ɠaazu, ta é zeeɲɛ felegɔ zeɠe ansansegi ma vukɔi zu. Toɠa li ga naama aniiti kwɛpele seɠezuɠoozagi ʋoluʋɛ. 13 Toɠa ansansegi ʋu abui ɠa Ɠɔoɠɔ GALAGI ɠaazu, naa ɠa a kɛ ansansegi ma luului kesui lakulugi maalɔɔɠu, nii é zeele woo ɠesui maazu, naazu é la mɔ za pɛ. 14 Toɠa nikɛ zinɛi ma ɲamai zeɠe, é faza ga yeeɓeɠai kesui lakulugi ɠakala ʋelei, folo ɠulazu ʋelei, é ɲamai vaza ga yeeɓeɠai, ná zeizu ɠɛ lɔfela, kesui lakulugi ɠakala ʋelei. 15 Toɠa koto gba woli zinɛi ɠɔdaaleʋe nuɓusɛiti bɛ, é li ga ma ɲamai kwɛpele seɠezuɠoozagi ʋoluʋelei. Ʋelei nɔ é kɛai la ga nikɛ zinɛi ma ɲamai, zekana nɔ a kɛɛ la ga naa ma ɲamai, toɠa faza kesui lakulugi ma ta kakala ʋelei. 16 «Ʋele ɠana a koto gba vai ɠɛ la ada ɲadega wolai ʋɛ Izilayɛle nuiti ta-ɠɔzɔba vaiti faa zu, ta ta-lɔ koloɠologiti kpein maaʋele zu, ti kotoi ɠɛai ga ti maaʋele. Toɠa kɛ ɠana nɔ GALA daaɠomi seɠe ʋɛlɛi ʋɛ, mazɔlɔɔ toɠa kɔzɔba nuɓusɛiti saama. 17 Nu nɔpɛ ge la yɛga GALA daaɠomi seɠe ʋɛlɛi wu, siɛgi zu é lɛɛzu la ga é koto gba vai ɠɛ ada ɲadega wolai, eyɛsu é ɠula ná. Toɠa koto gba vai ɠɛ tɔ ɓɔɠɔi ʋɛ, ta ná-pɛlɛyeɠei, ta Izilayɛle ʋɛbɛi kpein bɛ. 18 «A ɠɛna ɠulaa, toɠa li zalaɠa ɠulazuʋɛ, nii é Ɠɔoɠɔ GALAGI ɠakala, é koto gba vai ɠɛ, zalaɠa ɠulazuʋɛ ʋɛ, é nikɛ zinɛi ta boli zinɛi ma ɲamai zeɠe, é siɛ zalaɠa ɠulazuʋɛ minɛiti ma, maaɠoolii pɛ su. 19 Toɠa ɲamai vaza ga zeeɓeɠai, ná zeizu ɠɛ lɔfela, zalaɠa ɠulazuʋɛ ma. Toɠa kole, é ɲade, Izilayɛle nuiti ta-ɠɔzɔba vaiti faa zu. 20 «Siɛgi zu é ɓesu da ga koto gba vai ɠɛ ada ɲadega wolai ʋɛ, ta GALA daaɠomi seɠe ʋɛlɛi ʋɛ, ta zalaɠa ɠulazuʋɛ ʋɛ, toɠa boli zinɛi ma vului maaɓuɠa ʋa. 21 Aalɔn ɠa yee felegɔiti pɛɛ boli zinɛi ma vului unmaʋɛ, é laa zɔ ga maazu ga Izilayɛle nuiti ta-vaa ɲɔiti kpein, ta ta-lɔ koloɠologiti kpein, niiti ti kotoi ɠɛa ga ti maaʋele. Toɠa ti la boli zinɛi unma, naa ʋolu, é kpɛ, é li teʋebai zu, zunu ɠila ge ɓɔ ba, nii kɛʋele ɓɛtɛai. 22 Ta-vaa ɲɔiti ta yɛ boli zinɛi ʋa, ti kpɛ, é li teʋebai zu, é li zooi naa zu, ʋɛ ná ɲakai. 23 «Aalɔn ɠa lɛ GALA daaɠomi seɠe ʋɛlɛi wu, é geze zeɠeiti kula, niiti é ɠɛa ti looni tɛɛzuʋɛ ada ɲadega wolai. Toɠa ti la ná. 24 Toɠa maagba ada ɲadegai ta, é ná-seɠeiti seɠe ʋolu. Naa ʋolu toɠa ɠula, é ná-gala zalaɠai ɠula, ta nuɓusɛiti ta-ɠala zalaɠai, é koto gba vai ɠɛ ɓɔɠɔ ʋɛ, ta nuɓusɛiti bɛ. 25 Toɠa koto gba zuai ma wulɔi ɠala zalaɠa ɠulazuʋɛ. 26 «Zɔi a bolii ɓɛ, nii kotoi yɛgai da, naa ɠa ná-seɠeiti gba, é maagba, naa ʋoluma toɠa lɛ niina ti-ʋuuzuʋɛ. 27 Koto gba zalaɠai ma nikɛ zinɛi ta koto gba woli zinɛi niiti ti ti-ma ɲamai zeɠeai, ti ʋaa la ada ɲadega wolai koto gba vai zu, ta li ga tiye ti-ʋuuzuʋɛ ʋoluʋɛ, ti ma ɠɔlɔiti gala abui ɠa, ta ma zuai, ta ma ɓooiti. 28 Zɔi a gala, naa ɠa ná-seɠeiti gba, é maagba. Naa ʋolu toɠa lɛ niina ti-ʋuuzuʋɛ. 29 «Nii ɠa ɠɛ wo ʋɛ ga ɠɔoɠɔ tɔgi, alugi lɔfelasiɛi ma volo puugɔi ma, wa zugi zo, wo la boti nɔpɛ kɛa, é ɠɛni ga zou loun, ɓaa wɛɛin nii é ga seikɔɠɔma nui wo zaama. 30 Mazɔlɔɔ naama volo ná, ta koto gba vai ɠɛ wo ʋɛ, naa ɠa a kɛ wo ɲade. Wa ɲade wa-ɠotoiti kpein faa zu, Ɠɔoɠɔ GALAGI ɠaazu. 31 Toɠa ɠɛ wo ʋɛ ga dooɠo folo wolai, wa zugi zo. Toɠa ɠɛ wo ʋɛ ga ɠɔoɠɔ tɔgi. 32 «Koto gba vai ɠa ɠɛ zalaɠa ɠula nui ya, nii gulɔi ziaai ma, feai bɛ̀ ga é ʋilɛ kɛɛɠɛ ʋotogi zu zalaɠa ɠula vai zu. Toɠa ɓɔɠɔ maaɠili ga zalaɠa ɠula zeɠeiti, ti ga gezei. 33 Toɠa koto gba vai ɠɛ ada ɲadega wolai ʋɛ, ta GALA daaɠomi seɠe ʋɛlɛi ʋɛ, ta zalaɠa ɠulazuʋɛ ʋɛ. Toɠa koto gba vai ɠɛ ɓalaa zalaɠa ɠula nuiti bɛ, ta nuɓusɛiti kpein bɛ. 34 «Toɠa ɠɛ wo ʋɛ ga ɠɔoɠɔ tɔgi, koto gba vai ɠa ɠɛ, naa ɠɛ ɠila kona-o-kona, Izilayɛle nuiti ta-ɠotoiti kpein faa zu.»Naa ɠɛɛni, nii Ɠɔoɠɔ GALAGI ma levei veeni Moize ya.