Proverbs 21 (TOMA)

1 Masagi yii ɠa Ɠɔoɠɔ GALAGI yeezu, eɠɛ ziɛi é yeizu,é ɗa lii la, ʋɛ nɔpɛ ná nɛai bɛ. 2 Ɛsɛ ka ɗa ɠisiɛ, ga nii kpein é kɛɛzu pagɛ,kɛlɛ Ɠɔoɠɔ GALAGI ɠa é de-ɠɛɛ vaiti ma ungi ma lukpɔi ɠaaleʋezu. 3 Nui a telebo fai ta sɔle fai ɠɛɛna,naa ɠa fizɔgai Ɠɔoɠɔ GALAGI ɠaazu, é leʋe zalaɠaiti ba. 4 Gaazulɛɛi ta waso zɛnvui,faa ɲɔu ɠɛ nuiti ta-eteai kpein ka ga kotoi. 5 Zɔi é yeemaleʋebosu, é faazeikpasuiti kɛ, naa zɔlɔɔgi zu ɠa wɔɔlɔ,kɛlɛ zɔi é faiti kɛɛzu ga gaazuɓadii, naa ɠa li é lɔ pului zu. 6 Niiti ti ta-ɓɛtɛi zɔlɔɔsu zɛɛi zu,ta ga faaɠaaɠalala nuiti ti ɓizɛzu, ti lɔ saai zu. 7 Faa ɲɔu ɠɛ nuiti ta-zuɲɔi ɠa ɗa li ga tiye,mazɔlɔɔ ti la vaani bu, ti ʋa ladalai ɠɛ. 8 Ɲamaba nuiti ta ɗa ʋilɛ pele ɠɔɔngugi ʋolu,kɛlɛ lada nuiti siɛ ʋelei zɔlegɛ. 9 Fizɔgɛ nu zei fiilɛ zosuʋɛ sokogi zu pɛlɛ ɠɔmaʋɛ,wo ʋa li ɓɔsu zeizu ma, wa kpɔɛleʋe anzanui. 10 Faa ɲɔu ɠɛ nui yiimai ɠa ga faa ɲɔu ɠɛɛ vai,anɛɛ bɔɔlai ɓɔɠɔi, é la loga maazu. 11 Maaɠolo ɓakɔi a zeelina waso nui ma, zɔi é la dɛ faa mɔinmɔin kwɛɛ, naa ɓalaa ɠa ɗa ɠi sɔlɔɔ,ɗa ɠima nui ɠalana, toɠa ɗa faaɠwɛgi zɔlɔɔ. 12 Telebo nui ɠa ɗa ɠida naa kpein bu, nii é ɠɛɛzu faa ɲɔu ɠɛ nuiti ta-ʋɛlɛi wu,siɛgi zu ti lɔɔzu la maanɔɠɔi zu. 13 Nui nii é la woilosu maawɔin nui ná-kpee wooi ma,tɔ ɓɔɠɔi ɠa kpeei loo, é la gooɠaaʋote sɔlɔɔga. 14 Faanɛɛi é ɠɛɛzu dɔɔɠuzu, naa ɠa ɗa ziiɠaawanai ɠaayei.Lobɛanii é leʋesu dɔɔɠuzu, naa ɠa ɗa ziiɠula golai ɠaayei. 15 Toɠa ga koozunɛ vaa telebo nui ʋɛ, sɔle fai a ɠɛna ɠɛa,kɛlɛ naa ɠa ga nimiza vai faa ɲɔu ɠɛ nui ʋɛ. 16 Nui nii é zeɠezu ɠi pagɔi ma ʋelei ʋa,ná-dooɠo bosuʋɛ ɠa ɠɛɛzu ga gɔvɛiti ta-maaɓɔgi zu. 17 Zɔi ɓɔɠɔyiimai nɛai bɛ, toɠa kpalai ɠwɛɛ,zɔi é ɓɔɠɔ veai dɔɔi ya, ta etea ɠaazuɠulapɔi, é la ɓɛtɛa eyɛsu pɛ. 18 Faa ɲɔu ɠɛ nui ɠa é ga telebo nui unmɔɔ ganii,yaava nui ɠɛ ga sɔle nuiti tɔnɔi. 19 Fizɔgɛ nu zei zooi ta zu naa vɔai,è mina zei kpɔɛleʋe anzanui ɠoba, ziiɠaawanaai. 20 Ɠima nui zeizuʋɛ, nu ɠa ɗa ani naavolo ʋagɔiti ka ná, ta gulɔ makɛgaiti,faaɠaaɠalala nui ɠa ɗa naati suvaza, niiti ti zea. 21 Zɔi é ɠaaɓaazu, é ɠɛ ga telebo nu, ta wooɠɛɠila nu, sii zu ɠa ɠooza,toɠa leve ga telebo nu, é unfemai zɔlɔɔ. 22 Ɠima nui ɠa laalɛɛna taa wolai wu, nii salaʋusu ɠɛzɛɠɛzɛgiti ti maaɓɛɛzu,é siɠigi loka, nii taai ɠitogai ba. 23 Zɔi é ɓaazu daaʋɛ maazu ta nɛgi,naa ɠa ɓɔɠɔ ɠizo kidaaʋili faa mɔinmɔin ma. 24 Ɲɛɛɠulasu nui ɠa ga waso nui, ta gaazulɛɛ nui,nii waso dateʋegai diizu faiti kɛɛ vai ma. 25 Ɲaka nui ɠa ɗa za, tɔɔzei ziima vaiti daa la zeelizu,mazɔlɔɔ é la pɔ é ʋa yeeʋɛɛ faa nɔpɛ ba. 26 Yeenɔpɛ, toɠa gaazuɠulapɔi laawu,kɛlɛ telebo nui ɠa ɗa ti pɛ kwɛɛ, é la ta makɛga ɓɔɠɔ ʋɛ. 27 Faa ɲɔu ɠɛ nuiti ta-zalaɠai ɠa ga ziimaziɛ ganii,sɔnaga ta ʋaana kulazu ga kisiɛ ɲɔi. 28 Zɛɛ zeelei undaa ɠa ʋili,kɛlɛ zɔi é gaamai wosu, nii é mɛnini, zobo ka naa ʋɛ siɛnɔpɛ su é ɓɔɛ. 29 Faa ɲɔu ɠɛ nui ɠa ɗa ɓɔɠɔ ɠula ga lada nu,kɛlɛ sɔle nui ɠa ɗa ɠaaɓa siɛ ʋelei ma. 30 Nuɓusɛi ná-ɠimalai, ta ná-keleɠelegi ta ná-faazeikpasui,naati tanɔpɛ ge la zooga, é ʋa li Ɠɔoɠɔ GALAGI yiimai laalɔɠɔma. 31 Ta ɗa sooiti maaɠili kɔɔɠɔ voloi laalɔɠɔma,kɛlɛ pilɛ sɔlɔɔ fai ɠa Ɠɔoɠɔ GALAGI yeezu.

Proverbs 21 (TOMA)

In Other Versions