2 Chronicles 34 (YAPE)
1 Josiah e meruk e duw yangren me mang pilung nu Judah, me gagiyeg u Jerusalem ni guyey nge ta’reb e duw. 2 Me rin’ e tin nib m’agan’ SOMOL ngay; i folwok ko ga’ rok ni aram David ni Pilung, ri i fol u gubin e motochiyel rok Got. 3 U lan e re duw ni gaman e meruk ngay nike pilung Josiah, nnap’an ni kab pagel, me tabab i liyor ngak Got rok e ga’ rok ni aram David ni Pilung. Ma aningeg e duw nga tomuren me tabab i gathay yungin ntagil’ e tayfan rok e pi’in ndar nganged Got, nge pi pow rok Asherah ni fare got ni bpin, nge urngin e liyos. 4 Ir e yog mi ni buthug fapi altar ni un tayfan Baal riy, nge fapi altar ko incense ni bay’ u charen. Mi ni pirdi’iy fapi ya’an Asherah nge ngal’ ni ab, ma ku errogon gubin e liyos, ma aram mi ni wereg fapi ab nga daken e malang rok e pi’in karm’ad ni ur maligachgad ko pin’em. 5 Me urfiy Josiah yilen e prist ndar nanged Got u daken fapi altar ni ur maligach gad riy. Pin’ey ni rin’ e tabgulnag bayay yu Judah ngu Jerusalem. 6 Ku aray e n’en ni rin’ u lan fapi binaw nge yungin ntafen Manasseh, Efraim, nge Simeon ni gathay nge yan nga lel’och nge mada’ nga Naftali. 7 Ma ga’ngin yang u lan fare gi nug ko ley ni lel’och fare nam rok fare pilung e buthug e altar nge fapi pow rok Asherah nga but’, me bilbilig nge yochyang gubin fapi altar ko incense. Ma aram me sul nga Jerusalem. 8 U lan ragag nge meruk e duw ko gagiyeg rok Josiah u Judah, nga tomuren nike tabgulnag fare nam nge fare Tempel ni aram e ke taleg e tayfan rok e pi’in ndar nanged Got, me l’oeg Josiah ni Pilung dalip i pumo’on ni ngar ngongliyed bayay e yungin ke kireb ko fare Tempel rok SOMOL ni Got: i Shafan nib mo’on ni fak Azaliah, nge Maaseyah ni governor nu Jerusalem, nge Joah nib mo’on ni fak Joahaz ni be’ nib tolang. 9 Pi salpiy nike kunuy e pi Levite nma matnag u lan fare Tempel e ni pi’ ngak Hilkiah ni ir e Prist ni Th’abi Ga’. (Ni mokun u pa’ e girdi’ nu Efraim nge Manasseh nge pi’in kabay u ley ni lel’och fare nam rok e en pilung, ngu pa’ e girdi’ nu Judah, Benjamin, ngu Jerusalem.) 10 Re salpiy ney e ni pi’ ngak fa dalip i pumo’on nib milfan ngorad e yungin ke kireb ko fare Tempel ni ngan falagin rogon, ma aram miyad pi’ ngak 11 e pi tadimow naun nge pi’in nma ubung e malang ni ngar chuw’iyed e malang nge ren ni ngan fanay ngan ngongliy e yungin ke kireb ko fapi naun nde ayweg e pilung nu Judah ke kireb. 12 Pi pumo’on ni ur ngongliyed fare maruwel e ri yad ba yul’yul’. Aningeg e Levite ni aram i Jahath nge Obadiah ko fare ke girdi’ rok Merari, nge Zekariah nge Meshullam ko fare ke girdi’ rok Kohath e yad e uroged rogon e re maruwel ney ni nge yan ko pi pumo’on nem. (Gubin yu Levi ni go’yad ba salap ko musik.) 13 Ma boch e Levite e ba milfan ngorad e gachowor ma yad be tay murung’agen e yu raba’ i maruwel, ma boch e ma ayweg babyoren e maruwel ara matnag. 14 Nap’an ni yibe fek fapi salpiy u lan fare senggil ni un cha’riy riy nga wean, me pir’eg Hilkiah fare ke babyoren e Motochiyel rok SOMOL, fare Motochiyel ni pi’ Got ngak Moses. 15 Me ga’ar ngak Shafan, “Ku gu pir’eg fare ke babyoren e Motochiyel u lan e Tempel.” Me pi’ fare ke babyor ngak Shafan, 16 me fek Shafan fare ke babyor i yan ngak e pilung. Me yan i ga’ar ngak, “Kug mu’ gad i ngongliy urngin e tin mu ta’chiylen. 17 Ku gu feked fapi salpiy ni un cha’riy u lan e Tempel ku gu pi’ed ngak girdi’en e maruwel nge pi’in yad be tay mrang’agen e maruwel.” 18 Ma aram miki ga’ar, “Ba’aray rog ba ke babyor nike pi’ Hilkiah ngog.” Me be’eg fare ke babyor nib ga’ laman ngak fare pilung. 19 Nap’an ni rung’ag fare pilung e thin ko fare ke babyor, me guchthuy e mad rok nike kirban’ 20 ma ba’aray e n’en ni yog ngak Hilkiah, nge Ahikam nib mo’on ni fak Shafan, nge Abdon nib mo’on ni fak Mikayah, nge Shafan ni fare tayol u kort, nge Asayah ni ir e ta’ayuw rok fare pilung: 21 “Mmarod ngam fith’ed laniyan’ SOMOL ni fan ngog nge fapi girdi’ ni kayad bay u Israel ngu Judah. Ngam nanged mrang’agen e tin be yog e re ke babyor ney. Ke damumuw SOMOL ngodad ni bochan e da i fol e pi chitamngidad ko thin rok SOMOL ma darir rin’ed e tin ni be yog e re babyor ney nthingar nrin’.” 22 U tan lungun fare pilung, ma aram me yan Hilkiah nge fapi cha’ ra fithed lanyan’ be’ ni bpin ni Huldah fithingan, ni ba profet ni i par u lan e gin nib tabgul u Jerusalem. (I Shallum ni figirngin nib mo’on ni fak Tikvah ma tutuw rok Harhas ni ir e i tay mrang’agen fapi wuru’ e mad nib n’uw u Tempel.) Miyad weliy ngak fare bpin e n’en ke buch, 23 me yog fare bpin ngorad ni ngar sulod ngak fare pilung ngar pi’ed ngak 24 e re thin ni ba’aray nike yib rok SOMOL: “Bay gugechignag yu Jerusalem nge gubin e girdi’ riy ko pi buch wa’athan ni kan yoloy ngalan fare ke babyor ni kan be’eg ko fare pilung. 25 Kar n’aged gag ma ka ra pi’ed e maligach ngak yug boch e got, ere ka ra k’aringed e damumuw ngog nga urngin e tin kar rin’ed. Dabki paslag e damumuw rog nike puw ngak yu Jerusalem. 26 Ba’aray e n’en ni ngog ngak fare pilung i Gag SOMOL ni Got rok yu Israel: Gur e mu motoyil ko n’en ni kan yoloy ngalan fare ke babyor, 27 ma ga pi’ keru’um ko denen rom ma ga sobut’ nigem u p’eowcheg, ni ga be guchthuy e madrom ma ga be yor, nnap’an ni mu rung’ag rogon ni kugog ni nggu gechignag yu Jerusalem nge girdi’ riy. Ku gu rung’ag e meybil rom, 28 ma re gechig ni nggu fek nga daken yu Jerusalem e dabi yib nge mada’ ko ngiyal’ ni kamum’. Bay gu pagem nga mum’ u fithik’ e gapas.”Me sul fapi pumo’on ngak Josiah ni Pilung ni ka ra feked e re thin ney. 29 Ma aram me pi’ fare pilung e thin nge yan ngak urngin e tayugang’ nu Judah ngu Jerusalem ni ngar mu’ulunggad, 30 mranod u ta’bang ko fare Tempel, nike un e prist nge pi Levite nge tin kabay e girdi’, ni tin ni bfel’ rogon nge tin nib gafgow. Me sak’iy fare pilung nga p’eowcherad ni yad gubin me be’eg fare ke babyoren fare m’ag ni ga’ngin ngorad nib ga’ laman, ni fare babyor nni pir’eg u lan e Tempel. 31 Me sak’iy nga to’oben fare duga’ ko pilung nge ngongliy ba m’ag u thilrow SOMOL ni ngi i fol rok, ngi i ayweg e pi motochiyel rok nge tin ke ta’chiylen u polo’ i gumircha’en nge leam rok, ma ngki i rin’ e tin bay u lan fare m’ag, ni bod ni ka ni yoloy u lan fare ke babyor. 32 Miki yog ngak girdi’en e Benjamin nge gubin e pi’in ku yad bay u lan yu Jerusalem ni ngar micheged ni ngu’ur folgad ko fare m’ag. Ma aram e pi girdi’ nu Jerusalem e ra folgad ko pin’en nthingar nrin’ ni bay ko fare m’ag ni ka ra ngongliyed u thilrad e Got rok e pi chitamngirad kakrom. 33 Josiah ni Pilung e gathay gubin e liyos nib sonogor ni immoy u lan tafen e girdi’ nu Israel, ma n’umngin nap’an ni i par nib fos, e i yog ngak e girdi’ ni ngu’ur pigpiggad ngak SOMOL, ni fare Got rok e pi chitamngirad kakrom.
In Other Versions
2 Chronicles 34 in the ANTPNG2D
2 Chronicles 34 in the BNTABOOT
2 Chronicles 34 in the BOATCB2
2 Chronicles 34 in the BOGWICC
2 Chronicles 34 in the BOHNTLTAL
2 Chronicles 34 in the BOILNTAP
2 Chronicles 34 in the BOKHWOG
2 Chronicles 34 in the KBT1ETNIK
2 Chronicles 34 in the TBIAOTANT