Ezra 2 (ACOWAARC)
1 Hagi Babiloni kini ne' Nebukatnesa'ma Juda vahe'ma zamavareno Babilonima kinama huzmante'nea vahe'mo'zama Babiloni mopama atre'za Jerusalemi vute'za, mago mago vahe'mo'a Juda mopafima kuma'ama meterema hu'nere vuno eno hu'ne. 2 Hagi anampina kegava huzmante'za magokama e'nazana kva vahe'mokizmi zamagi'a, Jerubabeliki, Jeshuaki, Nehemaiaki, Seraiaki, Rilaiaki, Modekaiki, Bilshaniki, Mispariki, Bigvaiki, Rehumi'ene Ba'anaki hu'za e'naze. Hagi Israeli venenema e'nazana ama hampri'za krente'naze. 3 Hagi Parosimpinti'ma fore hu'naza venenea 2tausen 172'a e'naze. 4 Sefatiampinti'ma fore'ma hu'naza venenea 372'a e'naze. 5 Aramumpinti'ma fore hu'naza venenea 775'a e'naze. 6 Hagi Jeshuane Joapu naga'ma Pahat-Moapumpinti'ma fore hu'naza venenea 2tausen 812'a e'naze. 7 Elamumpinti'ma fore'ma hu'naza venenea 1tausen 254'a e'naze. 8 Hagi Zatumpinti'ma fore'ma hu'naza venenea 945'a e'naze. 9 Zakaimpinti'ma fore'ma hu'naza venenea 760'a e'naze. 10 Banipinti'ma fore'ma hu'naza vene'nea 642'a e'naze. 11 Hagi Bebaimpinti'ma fore'ma hu'naza venenea 623'a e'naze. 12 Hagi Azagatimpinti'ma fore'ma hu'naza venenea 1tausen 222'a e'naze. 13 Hagi Adonikamumpinti'ma fore'ma hu'naza venenea 666si'a e'naze. 14 Hagi Bigvaimpinti'ma fore'ma hu'naza venenea 2tausen 56si'a e'naze. 15 Adinimpinti'ma fore'ma hu'naza venenea 454'a e'naze. 16 Atana mago agi'a Hezekaiakino, agripinti'ma fore hu'naza venenea 98'a e'naze. 17 Bezaimpinti'ma fore hu'naza venenea 323'a e'naze. 18 Jorapinti'ma fore hu'naza venenea 112fu'a e'naze. 19 Hashumimpinti'ma fore hu'naza venenea 223'a e'naze. 20 Gibarimpinti'ma fore hu'naza venenea 95'a e'naze. 21 Hagi Judama me'nea kumatamimpima, kumate kumate'ma vanaza vahe'ma hampri'za krente'nazana, Betlehemu kumate vahera 123'a venene e'naze. 22 Netofa rankumate vahera 56si'a venene e'naze. 23 Anatoti rankumatetira 128'a venene azageno, 24 Azmaveti rankumatetira 42'a venene e'naze. 25 Hagi Kiriat-arimi rankumateti'ene Kefira rankumateti'ene Beroti rankumateti venenea 743'a e'naze. 26 Hagi Rama rankumateti'ene Geba rankumatetira 621ni'a vene'ne e'naze. 27 Hagi Mikmasi ran kumatetira 122'a venene e'naze. 28 Hagi Beteli rankumateti'ene Ai rankumatetira 223'a venene e'naze. 29 Nebo rankumatetira 52'a vene'ne e'naze. 30 Hagi Magbisi ran kumatetira 156si'a venene e'naze. 31 Hagi Elamu rankumatetira 1tausen 254'a vene'ne e'naze. 32 Hagi Harimi ran kumatetira 320'a venene e'naze. 33 Hagi Lodi kumateti'ene Haditi kumateti'ene, Ono rankumatetira 725'a venene e'naze. 34 Hagi Jeriko rankumatetira 345'a venene e'naze. 35 Hagi Sena rankumatetira 3tausen 630'a venene e'naze. 36 Hagi pristi eri'zama eneri'za vahe'ma eterema hu'nazana, Jeshua naga'nofipima Jedaia ne' mofavre naga'ma pristi eri'zama eneriza nagara 973'a venene azageno, 37 Imeri nagapima pristi eri'zama eneri'za venene nagara 1tausen 52'a azageno, 38 Pashuri nagapima pristi eri'zama eneriza venenea 1tausen 247ni'a azageno, 39 Harimi nagapima pristi eri'zama eneriza venenea 1tausen 17ni'a venene e'naze. 40 Hagi Livae nagara, Hodavia naga'nofipinti, Jeshuane Katmielikizni ne' mofavre nagara 74'a e'naze. 41 Hagi Asapu nagapintima zagame'ma nehaza venenea 128'a venene e'naze. 42 Hagi Salumuma Aterima, Talmonima, Akubuma, Hatitama, Sobai naga'pintira ra mono nonkafante'ma kvama hanaza vene'nea 139ni'a e'naze. 43 Hagi ra mono nompima eri'zama erisaza vahe'ma e'nazana, ama'i naga'nofipinti e'naze. Zihama, Hasufama, Tabaotima, 44 Kerosima, Siahama, Padonima, 45 Lebanama, Hagabama, Akubuma, 46 Hagabuma, Salmaima, Hananima, 47 Gidelima, Gaharima, Reaiama, 48 Rezinima, Nekodama, Gazamuma, 49 Uzama, Paseama, Besaima, 50 Asnama, Meunimima, Nefusimima, 51 Bakbukima, Hakufama, Harhurima, 52 Bazlutima, Mehidama, Hashamama, 53 Barkosima, Siserama, Temama, 54 Neziane, Hatifa naga nofipinti'ene hu'za e'naze. 55 Hagi kini ne' Solomoni eri'zama eri'naza vahepinti'ma e'naza vahe'mokizmi naga nofi'mofo zamagi'a amanahu me'ne, Sotaima, Hasofereti'ma, Perudama, 56 Ja'alama, Darkonima, Gidelima, 57 Sefatiama, Hatilima Pokeret-Hazebaimine, Ami nagapinti'ene hu'za e'naze. 58 Hagi ra mono nompima eri'zama eri'naza vahe'ene, Solomoni eri'zama eri'naza vahepinti'ma fore hu'naza vahe'ma e'nazana ana makara 392'a venene e'naze. 59 Hagi mago'a vahe'ma Tel Mela ran kumateti'ene Tel Harsa rankumateti'ene Kerubine, Adanine, Imeri rankumateki hu'za e'naze. Hianagi Israeli vahepina ina naga nofipinti e'nazafi zamagra erinte'amara osu'naze. 60 Hagi ana vahera, Delaiama, Tobiama, Nekodakizmi ne' mofavre nagaki'za 652'a venene e'naze. 61 Hagi pristi eri'zama e'neriza nagapintima Jerusalemima age'zama refako hu'za zamage'nazana Habaiama, Hakozima, Barzilai nagaki'za zamagia omnenege'za, pristi vahera fore hugara osu'naze. Hagi Barzilai naga nofi'mokizmi nezamageho'a, Gileadi ran kumateti Barzilai mofa ara eri'neanki'za, e'inahu hu'za naga nofi'zamimofo zamagia nehaze. 62 Hianagi ana 3'a vahe'mokizmi nagara Israeli vahepina ina naga'nofipinti e'nafi zamagia onke'naze. Ana hu'negu agru osu'naze hu'za zamatrazage'za, pristi eri'zana e'ori'naze. 63 Hagi Juda vahe'mokizmi gavana ne'mo'a ana vahekura i'o huzamantege'za Ra Anumzamofonte'ma ofama eri'za e'naza ne'zampintira one mani'nazageno pristi vahe'mo'za Urimie nehaza havene Tamimie nehaza havereti Ra Anumzamofo avesi'zama kenakura satu zokago re'za ketesage'za, ana ne'zana negahaze. 64 Hagi ana maka Israeli vahe'ma mopa zamire'ma ete'za e'nazana 42tausen 360'a vahe e'naze. 65 Hagi ana agofetura eri'za veara ana makara 7tausen 337ni'a azage'za, zagame'ma nehaza vahera venenene a'nenena ana makara 200'a e'naze. 66 Hagi hosi afuzmia 736si'agi miulie nehaza donki afura 245fu'agi, 67 435fu'a kameli fu'taminki, tonki afura 6 tausen 720'a afutaminki hu'za zamavare'za e'naze. 68 Hanki Israeli vahe'mo'zama Ra Anumzamofo mono noma ko'ma Jerusalema me'nere'ma etage'za, mago'a naganofite'ma ugota hu'naza vahe'mo'za Ra Anumzamofo mono noma ko'ma oti'nea nomarure'ma ete mono noma azerioti'zama kisaza zantamina, zamavesite ofa ami'naze. 69 Hagi rama'ama ante'nemo'a rama'a nemigeno, osi'ama ante'nemo'a osi'a amitere higeno ana maka golimofo kna'amo'a 500'a kilo higeno, silvamofo kna'amo'a ana makara 2tausen 800'a kilo hu'nea nemi'za pristi vahe kukena 100'a ami'naze. 70 Hagi pristi vahe'ma Livae naga'ma zagame'ma hu vahe'ma ra mono nonkafante'ene, ra mono nompima eri'zama eneriza vahe'mo'zane mago'a vahe'mo'zanena ran kumazamire vu'za umani emani hu'naze. Anama hazage'za ruga'a Israeli mopafima ranra kumatamima me'nea kumazmirega vu'za umani emani hu'naze.