2 Chronicles 4 (TOMA)

1 Salomɔn boni ga ti zalaɠa ɠulazuʋɛ ɓɛtɛ ga kɔlu ɓɔigi, kogi ɠɛ ga mɛtɛlɛ puugɔ, sakpai ɠɛ mɛtɛlɛ puugɔ, gaaɠooza ga mɛtɛlɛ lɔɔlugɔ. 2 Naa ʋoluma, é ziɛ liɠi wolai ɓɛtɛni ga kɔlu ɓɔi gaawuungai. Kiliɠiligai, koozuʋɛ zɔligi ɠɛni ga mɛtɛlɛ lɔɔlugɔ, gaaɠooza ga mɛtɛlɛ felegɔ ta tukpɛ (2,5), ma ɠakumai ɠɛ ga mɛtɛlɛ puugɔ maazu lɔɔlugɔ (15). 3 Nikɛ zinɛ ʋaaɠulabai ɠakuni kɔbuʋɛ, puuvelefelegi (20) ɠa é ɠɛni mɛtɛlɛ ɠilagilagi pɛ ma, ma ɲɛkpɛi ɠɛni fele, é ma ɠɔlu ɓɔigiti gaawuunni ʋɔɔma ta tazai ma ɠɔlu ɓɔigi. 4 Ziɛ liɠi wolai ɓɔɠɔi ɠɛni zeini nikɛ zinɛ ʋaaɠulaba puugɔ maazu felegɔ (12) ɠa, saʋagɔi ɠaaʋoteni ga lɛkpɛmaʋɛ nu ɠɔʋɛzu ʋelei, saʋagɔ ɠaaʋote ga folo liizu ʋelei, saʋagɔ ɠaaʋote ga lɛkpɛmaʋɛ nu yeezazu ʋelei, saʋagɔi ɠaaʋote ga folo ɠulazu ʋelei, ti ʋoluavegai ɓɔɠɔ ʋa tazai wu. 5 Tazai ɠaaɠilini ga zeelo daa ɠila, dakɔlɔgi ɓɛtɛni eɠɛ ziawɔi nii kpɛtɛai ga bulɛgi ma ʋuai ɠazaʋi pelei, litɛlɛ waaungila waaʋuufelegɔ (120.000) ɠɛɠala a la ʋu su. 6 É taza wola puugɔ ɓɛtɛni, dɔɔlugɔi ɠɛni zeini GALA sei ʋɛlɛi yeezazu ʋelei, dɔɔlugɔi zeini kɔʋɛzu ʋelei, ani gba vai zu, tiya ɠa gala zalaɠai ma zɔɔlaiti pɛ ti ɠɛni gbazu ti zu. Ziɛ liɠi wolai ma ge ɠɛni ga zalaɠa ɠula nuiti maagbazuʋɛ. 7 Salomɔn zanu fitina zei anii puugɔ ɓɛtɛni, é zoloo kazaʋigi ma nii sɛʋɛai, ti naati sei GALA sei ʋɛlɛi ma ʋɛlɛ wolai wu, dɔɔlugɔi nu yeezazu ʋelei, dɔɔlugɔi nu ɠɔʋɛzu ʋele. 8 É taɓalii puugɔ ɓɛtɛni, ti naati ɓalaa sei GALA sei ʋɛlɛi ma ʋɛlɛ wolai wu, dɔɔlugɔi nu yeezazu ʋelei, dɔɔlugɔi nu ɠɔʋɛzu ʋele. É ɲama vaza aniɲaka ungila (100) kpɛtɛni ga zanugi. 9 É koi zaamaʋɛ ɓɛtɛni zalaɠa ɠula nuiti bɛ, naa ʋɛɛ koi zaama wolai ʋa, ta ma ʋɛlɛla wolaiti, ti kpogiti siɛni ga kɔlu ɓɔigi. 10 Ziɛ liɠi wolai kiliɠiligai naa ɠɛni zeini GALA sei ʋɛlɛi yeezazu ʋelei, lɛkpɛmaʋɛ nu yeezazu ʋelei ta folo ɠulazu ʋelei yɔɠɔzuʋɛ. 11 Ɠulame-Aɓi zuʋu zo aniɲakaiti ta pɛluiti ta ɲama vaza aniɲakaiti kpɛtɛni. Ʋele ɠana é masagi Salomɔn ná-botiiti kpein gaaɓelani la, nii naa feeni zea GALA sei ʋɛlɛi vai zu: 12 kpɛdɛ felegɔ ta ta-zeiga felegɔi ti ɠiliɠiligai, ti zeizu ti unga, kɔlu ansa ʋɛlɛʋɛlɛ felegɔ niiti ti seiga ɠiliɠiligiti ma, 13 gelenade gulu waai ʋaaɠulabai, naa unnaanigɔ (400) niiti ti ɠɛni zɛlɛni kɔlu ansa ʋɛlɛʋɛlɛgiti ba, ga ma ɲɛkpɛ velefele, 14 wotoloiti ta taza wolaiti niiti ti ɠɛni zeini wotoloiti ga, 15 ziɛ liɠi wolai nii tɔ ɠila é ɠɛni ɓɛtɛ ʋelei ma, ta nikɛi ʋaaɠulaba puugɔ maazu felegɔi (12), niiti ziɛ liɠi wolai ɠɛni zeini ti ma. 16 Ɠulame-Aɓi zuʋu zo aniɲakaiti, ta pɛluiti, ta sua zɔɔ mitɛ wolaiti kpɛtɛni. Ɠɔoɠɔ GALAGI zei ʋɛlɛi wu zɔɔlai niiti kpein ti ɠɛni ga kɔlu ɓɔigi maaloungai, é ti ɓɛtɛni masagi Salomɔn ʋɛ. 17 Ti ti ɠaawuunni, ti ti ʋu penɛ yeɠeiti su, Zuludɛn ma nɛmɛ wolai zu, Sukɔteni zɔɠɔzuʋɛ ta Seleda. 18 Salomɔn niima zɔɔlaiti pɛ kpɛtɛni gola mɔin, nu la ɠɛni zooga é ʋa kɔlu ɓɔigi wuɲɛgi ɠɔɠɔ, tɔɔzei gola mɔinni. 19 Salomɔn zɔɔma zɔɔlaiti kpɛtɛni GALA sei ʋɛlɛi vaa ma: ansansegiti kulazuʋɛ ga zalaɠai, naa maaziɛni ga zanugi, ta taɓalii nii ɓului ɠɛni laazu ga Ɠɔoɠɔ GALAGI ʋɛ, 20 fitina zei aniiti ti ga zanu kitei, ta ma fitinaiti, niiti maanɛɛni ga ti ɠaa ɗa zo ʋelegi deveai la, ada ɲadega wolai ɠakalaʋɛ, 21 ta tufa waa ʋuaiti baaɠulabaiti, fitinaiti, ta bɛɛngiti, ti pɛ ti ga zanu kitei, 22 salaʋa zo sɔɔlaiti, ɲama vaza aniɲakaiti, ansanse seɠe ɲakaiti, ansanse gala liɠiiti, ti ga zanu kitei, zanu kalagiti kpogiti faa ma pɛlɛ ɠoozuʋɛ ada ɲadega wolai ma ʋɛlɛlaʋɛ ta GALA sei ʋɛlɛi laaʋɛ ma ɓogiti faa ma.

2 Chronicles 4 (TOMA)

In Other Versions