Deuteronomy 20 (TOMA)

1 Siɛgi zu wo liizu la kɔɔmaʋɛ wo zili nuiti daalɔɠɔma, wo sooiti ka, ta kɔɔɠɔ wotoloiti, ta kɔɔɠɔ nuiti, ti mɔinɗai wo ʋa, à mina lua ti ʋa. Mazɔlɔɔ Ɠɔoɠɔ GALAGI wa-ƓALAGI nii é wo ɠulani Ezipete yooi ʋa, naa ɠa wo ʋa. 2 Wa ɠɛna ɠɛʋele ɓɛtɛa ga wo ʋa kɔɔi lɔɔzei, zalaɠa ɠula nui ɠa maaɓuɠa wo ʋa, é ɓɔɛ kɔɔɠɔ nuiti pɔ. 3 Toɠa ɠɛ ma: «À woilo ma, Izilayɛle nuiti! Wo ʋaa za, ga wo kɔɔi ɠɔ wo zili nuiti daalɔɠɔma. À mina iɲɔteʋe wo-yiimaʋɛ. À mina lua, wo zasu mina ɓali, wo-ɠigi mina zupu ti ɠaazu. 4 Mazɔlɔɔ Ɠɔoɠɔ GALAGI wa-ƓALAGI ɠa losu wo luɠɔ, é kɔɔi ɠɔ wo ʋɛ wo zili nuiti daalɔɠɔma, naa ɠa a kɛ é wo ɠizo.» 5 Naa ʋoluma, kundiɠiiti ta ɓɔɛ kɔɔɠɔ nuiti pɔ, ti ɠɛ ti ma: «Nui ta ɠa wo zaama nɛi ɓaa, nii é pɛlɛ niinɛ logai, é la dɛ daalaoni? É ɠale ma ná-taazu, a ʋa za kɔɔmaʋɛ, nu ɠili ge ʋa niinɛ mɔunpa. 6 Nui ta ɠa wo zaama nɛi, nii é leezɛn ɓelei leʋeai, é la dɛ ma waa mɔungi ɠulani? É ɠale ma ná-taazu, a ʋa za kɔɔmaʋɛ, nu ɠili ge ʋa ná-leezɛn ɓelei ma waa mɔungi ɠula. 7 Nui ta ɠa wo zaama nɛi, nii é anzanui ta maazogai, é la dɛ fuluni? É ɠale ma ná-taazu, a ʋa za kɔɔmaʋɛ, taɠili ge ʋa ná-anzanu maazogai zei.» 8 Kundiɠiiti ta ɓɔɛ kɔɔɠɔ nuiti pɔ mɔnɔ, ti ɠɛ ti ma: «Nui ta ɠa wo zaama nɛi, nii é luazu, iɲɔteʋeai? É ɠale ma ná-taazu, a ʋa kɛɛɠɛleaiti iɲɔteʋe ga ɓɔɠɔ ɠɛʋele.» 9 Siɛgi zu kundiɠiiti ti ɓesu da ga ɓɔɛ kɔɔɠɔ nuiti pɔ, ta kundiɠiiti sei niina nu ɓulugiti unda. 10 Siɛgi zu wo liizu la taai zosu, wo bo taazeigiti ma ga, ti ɓɔɠɔ ve wo ya, kɔɔɠɔ vaa mina ɠɛ ba. 11 Ni ta vaana wo ɠisu vai wu, ti taai laalao wo ʋɛ, ta-nuɓusɛiti kpein ta ɠɛ ga wa-wotiɠɛ nuiti, ti ɠɛ ga wa-luɔiti. 12 Ta ɠɛlɛna wo ɠisu vai ʋa, ti kɔɔi laalɛ wo wu, wa lati taai ma, wo sei kɛlɛ su. 13 Ɠɔoɠɔ GALAGI wa-ƓALAGI ɠa dɔ wo yeezu, wa zunuiti kpein paa ga boɠa zɔkpɔi. 14 Kɛlɛ anzanuiti, ta doungoiti, ta toganiiti, ta kɔɔzoganiiti wa ka taazuʋɛ, wa naati kpein seɠe ɓɔɠɔ ʋɛ. Kɔɔzoganiiti wa ti ɠula wo zili nuiti zea, wa naa zeɠe, Ɠɔoɠɔ GALAGI wa-ƓALAGI ɠa é naa veezu wo ʋɛ. 15 Zekana wa kɛ la ga naama laaiti kpein ti maaɠoozaai wo ʋa, niiti ti la ɓɔni naama yooi ʋa, nii wo zeini su. 16 Kɛlɛ naama laaiti ma nuɓusɛiti, niiti Ɠɔoɠɔ GALAGI wa-ƓALAGI ta-yooi veai ga é ɠɛ wo ʋɛ ga wɔnɔ, nii kpein é yɛnvuzu ná, à mina tanɔpɛ zɛ vulua. 17 Wa niiti kpein suwuɠaaleʋe, niiti ti ga Ɠɛte nuiti, ta Amool nuiti, ta Kanaan nuiti, ta Felɛze nuiti, ta Ɠeve nuiti, ta Yeɓuse nuiti, eɠɛʋelei Ɠɔoɠɔ GALAGI wa-ƓALAGI ma levei veeni la wo ya, 18 naa ɠa a kɛ, ti mina wo ɠala ga ta-ɠɔzɔba vaiti ti kɛɛzu, ta-ɠalagiti dɛbi vai zu, wo ʋa ta ɠɛ ti ɠɛʋele, wo ʋa kotoi ɠɛ Ɠɔoɠɔ GALAGI wa-ƓALAGI laalɔɠɔma. 19 Siɛgi zu wo taai zeizu la kɛlɛ su, suɠooza, aisa wo ʋa so, à mina zoovɛ ʋɛɛ maaɠoolii zu wuluiti ba, ti waazu. Wa zoo wo ti-ma waaiti ta mi, kɛlɛ à mina ti ʋɔ. Mazɔlɔɔ dɔɓɔzu wului la ga nuɓusɛi, nii wa li kɔɔi loozu ma. 20 Gului niiti ti la gwaa woga, nu ʋa ma waai mi, naati nɔ ɠa wa zoo wo ti ʋɔ. Wa zoo wo ti zeɠe, ti ɠɛ ga gului, wo kɔɔɠɔ zɔɔlaiti kpɛtɛ ga tiye taai naa laalɔɠɔma, nii wo maalatigai, wo zei ma, é kɔɔi ɠɔɔzu wo laalɔɠɔma, eyɛsu é loo bu.

Deuteronomy 20 (TOMA)

In Other Versions