Ezekiel 36 (TOMA)
1 «Ɗa ʋe, zunui, GALA gooi wo Izilayɛle ɠizeiti ma, è ɠɛ ti ma: ‹Izilayɛle ɠizeiti, à woilo Ɠɔoɠɔ GALAGI laawooi ma. 2 Maliɠii Ɠɔoɠɔ GALAGI wooi ɠaa: Wo zili nui ɠa ɠɛɛzu wo ma, Kpukɛ! Wɔlɔwɔlɔ ɠizei tɛiti ti ɠɛa ga gɔnɔ. 3 Naa maaʋele ma, Ezekiyɛle, GALA gooi woni, è ɠɛ ma: Maliɠii Ɠɔoɠɔ GALAGI wooi ɠaa: Gè pɛtɛgɛ ga adaʋɛ pɛ, ti wo ɠoloɠologa, ti wo maaɓɔle, wo ʋa ɠɛ ga zou ɠiligiti tɔnɔ, wo ɠɛɛni ga ɲɛɛɠulasu anii, ti ɗa wo ʋoomu. 4 Tama, Izilayɛle ɠizeiti, à woilo Ɠɔoɠɔ GALAGI laawooi ma: Maliɠii Ɠɔoɠɔ GALAGI wooi ɠaa gizeiti faa zu, ta gize goiti, ta ziɛiti ti yeizu, naa ʋɛɛ nɛmɛiti ta adaʋɛti ba ti ɠoloɠologai, ta taaiti ti zuwogai, ti-maaɠoolii zu yooiti ti looni ti ma, ti ti ʋoomu, 5 Maliɠii Ɠɔoɠɔ GALAGI wooi ɠaa: Gaamazu nà ɓɔɛzu nà-ziiɠaawana wolai zu zii ɠiligiti daalɔɠɔma, ta Edɔme ɓɔɔɓɔ daalɔɠɔma. Ti kɛɛni ga ti ɠoozunɛ vai, ti nà-zooi zeɠe ga tɔnɔ, wɔinzeɠemai zu ti yiimaʋɛ, ti loo ma, ti kɛ ga laamiizuʋɛ. 6 Naa ɠa é ba, GALA gooi wo é ʋilɛ Izilayɛle yooi ʋa. Bo gizeiti ma, ta gize goiti, ta ziɛiti ti yeizu, ta pɛtugiti ga: Maliɠii Ɠɔoɠɔ GALAGI wooi ɠaa: Nà ɓɔɛzu nà-ziiɠaawanai zu ga toloi, mazɔlɔɔ zii ɠiligiti ti ɓaaɠulani wo ma. 7 Naa ɠa é ba, Maliɠii Ɠɔoɠɔ GALAGI wooi ɠaa: Gè yeelɛa geezu, gè minazeɠe, zii ɠiligi tɛiti ti wo-maaɠoolii zu, ɓaa ɠa ɠula ti ma, tɔungi maayei. 8 « ‹Tama wa ʋe, Izilayɛle ɠizeiti, guluiti ti wo ma, ti-ɠaalaa niinɛi ɠa lɛ ga ʋolu, ti gwaai wo nà-nuɓusɛiti bɛ ti ga Izilayɛle, mazɔlɔɔ nágo ʋe na, ti ɠale ma. 9 Nà ɠaaɓaazu wo ma, gè ɠaaʋote wo ma, tii ɠa ɠɛ wo ma ʋolu, ani zuwui vaza wo ma. 10 Nuɓusɛi ɠa mɔin wa-yooi ɠa, Izilayɛle ʋɛlɛyeɠeiti pɛ. Nuiti ta zei taaiti pɛ su, mazɔlɔɔ ʋɛti náti ti woloni, ta lo ʋolu. 11 Nuɓusɛiti ta toganiiti ta mɔin adaʋɛ pɛ. Ta mɔin gola, ti ɓuɠu, nà wo wola mɔin, eɠɛʋelei é ɠɛni la mɔungi, nà faanɛɛiti kɛ wo ʋɛ, é leʋe naa ʋa nii gè ɠɛni kɛɛzu kaite. Wa suɠwɛɛ naazu ga nà ɠa gè ga Ɠɔoɠɔ GALAGI. 12 Nà va bu, nà-nuɓusɛiti, Izilayɛle nuiti, ti ziɛ wo ma, ti wo zeɠe ga tɔnɔ, wo la mɔ zooga wo ʋa ti-lointi kula ti ya. 13 « ‹Maliɠii Ɠɔoɠɔ GALAGI wooi ɠaa: Nuiti ta ɠɛɛzu ma: Izilayɛle yooi ɠa ná-nuɓusɛiti undaaʋilisu, é ná-nuɓusɛiti bala ti-lointi ma, 14 Tama, é zo niizu ma, zooi la mɔ nuɓusɛi undaaʋiliga, é la mɔ nuɓusɛiti balaga ti-lointi ma,› » Maliɠii Ɠɔoɠɔ GALAGI wooi ɠana. 15 « ‹Gè la vaa bu, è ʋa zii ɠiligiti ta-ʋoomu goomɛni mɔnɔ, nuɓusɛ ɠiligaa ti la mɔ ɓaaɠulaa è ma, è la mɔ ɗa-you ɠaa nuiti kɔɠɔi ziɠaa,› » Maliɠii Ɠɔoɠɔ GALAGI wooi ɠana. 16 Ɠɔoɠɔ GALAGI ɓɔɛni pɔ̀, é ɠɛ mà: 17 «Ɗa ʋe, zunui, siɛgi zu Izilayɛle nuiti ti ɠɛni zeini la ta-yooi zu, ti kɔzɔni ga ti luʋa ʋeleiti, ta ti-ziɛ ʋeleiti. Ti luʋa ʋelei ɠɔzɔni gàazu eɠɛ anzanui ná-alu kaa ɠɔzɔi. 18 Ti zooi ɠɔzɔni ga nu ʋaa vaiti ti ti ɠɛɛni, ta kɔɔɠɔ gani nɔɠɔiti kɔɔ vai. Naa ɠa é kɛɛni gè yiiɠaawanani ti ma. 19 Gè ti zuvazani nuɓusɛiti saama, zou ɠiligiti su. Gè ti lukpɔɠaaleʋeni, é zoloo ti luʋa ʋeleiti ma, ta ta-ɠɛɛwotiiti. 20 Tama, zou ɠiligi kpein ti zeelini su, dàasei ɲadegai ɠa ɓaa ɠɛni ɠulazu ma, ta-vaaɠaazagi maaʋele ma. Ti ɠɛni ɠɛɛzu ti ma: ‹Ɠɔoɠɔ GALAGI ná-nuɓusɛiti be, ná-zooi ɠa ti zeɠeai su.› 21 Naa ɠa é wanani mà, dàasei ɲadegai Izilayɛle nuiti ti ɓaaɠulani ma ga ta-vaaɠaazagiti zii ɠiligiti saama, ʋɛti ti liini naati. 22 «Naa ɠa é ba, ɠɛ Izilayɛle nuiti ma: ‹Maliɠii Ɠɔoɠɔ GALAGI wooi ɠaa: Ni nà pɔ gè losu ɠɛ, wo maaʋele laade, ee, Izilayɛle nuɓusɛiti, kɛlɛ dàasei ɲadegai maaʋele ʋe, nii wo ɓaaɠulaai ma zii ɠiligiti saama, ʋɛti wo liini náti. 23 Dàasei golai ɓaaɠulaai ma zii ɠiligiti saama, nà ná-ɲadedai ɠula kɛlɛma, dàaseigi nii wo ɓaaɠulaai ma ti zaama. Zii ɠiligi naati ta suɠwɛɛ naazu ga nà ɠa gè ga Ɠɔoɠɔ GALAGI, siɛgi zu nà nà-ɲadedai lɛɛna la ga tiye, ga nà-kɛɛwotiiti maaʋele wo letemazu,› » Maliɠii Ɠɔoɠɔ GALAGI wooi ɠana. 24 « ‹Nà wo ɠula zii ɠiligiti saama, gè wo ɠaalɛ ba, wo ɠula zooiti pɛ su, gè ʋa ga woye ʋolu wa-yooi zu. 25 Nà ziɛ ɲadegai vaza wo ma, wa ɠole, nà wa-ɲadetalai ɠula wo zaama, ta wa-zale ɠɔɔ vaiti. 26 Nà zii niinɛ ve wo ʋɛ, gè zɛnvu niinɛ ʋu wo-yiimaʋɛ. Wo-yii nii kpaai eɠɛ kɔtu, gè naa ɠula wo-ɓusɛi zu, gè maavalibo ga faaɠaaɠaa yii. 27 Nà nà-Zɛnvui ʋu wo-yiimaʋɛ, gè zobo fe wo ʋɛ, wo zoo wo ɠolo nà-tɔgiti bɛ, wo nà-deveiti so gè ti veeni wo ya, wo ziɛ ga tiye. 28 Wa zei zooi naa zu, gè feeni wo-mɛmɛwolani bɛ. Wa ɠɛ ga nà-nuɓusɛiti, gè ɠɛ ga wa-ƓALAGI. 29 Nà wo ɠula wa-vaa ɲɔiti pɛ su. Gè la mɔ pului loa wo ma, kɛlɛ nà moloi ɓɛtɛ, wo ɗa kula gola molo leʋei zu. 30 Nà gwaa wuluiti gaawaaiti mɔin gola, ta kpalaga aniiti, eyɛsu pɛ zii ɠiligiti ti la mɔ ɲɛɛɠulaa wo zu, ti ʋa ɠɛ ma wa ɓɔlɔzu ga pului. 31 Naazu wo-ɠi ka loo wo-ziɛ ʋele ɲɔiti su, ta wo luʋa ʋele ɲɔiti, wo yiiɠaawana ɓɔɠɔ ma ga wa-vaaɠaaza golaiti ta wa-ɠɔzɔba vaiti wo ti ɠɛɛni. 32 Gè la naa ɠɛɛzu wo maaʋele ma,› » Maliɠii Ɠɔoɠɔ GALAGI wooi ɠana. « ‹Kɛni wo ɠɛ naa zuɠwɛɛ! À unfe gaamazu ga wo luʋa ʋelei, Izilayɛle nuɓusɛiti! 33 « ‹Maliɠii Ɠɔoɠɔ GALAGI wooi ɠaa: Siɛgi zu gè wa-vaaɠaaza golaiti gbazu la wo ʋa, nà taaiti sulaave ʋolu ga nuɓusɛiti. Ʋɛti náti goloai, mináti ta lo ʋolu. 34 Zooi ti yeeɓeni ba, tii ɠa ɠɛ miná, teʋe nuiti ti la mɔ zou ɠaa kɛlɛi wogai ba. 35 Nuiti ti ɗa ɠɛ ma: Zooi tɛi ge ɠoloɠoloni, kɛlɛ é ʋaga eɠɛ Edɛn kpelei. Taai tɛiti ti ɠoloɠoloni, ti zuwo, ti ɠɛlɛ ti ʋa, ti loga ʋolu, ti zulaave ʋolu. 36 Zooiti ti yɛsu ná wo-maaɠoolii zu, ta suɠwɛɛ ga nà, Ɠɔoɠɔ GALAGI, gè taaiti toga ʋolu, niiti ti ɠoloɠoloni, gè kpeleiti suziin, ʋɛti kɛlɛi woni naati ba. Nà, Ɠɔoɠɔ GALAGI, nà ɠa kpɔ̀ɛai, nà kɛ nɔ. 37 « ‹Maliɠii Ɠɔoɠɔ GALAGI wooi ɠaa: Wɛlɛ, nà va bu Izilayɛle nuiti ti kpɔbai ɠaiziɛ zèa. Nà ti wooɠaaʋote, ti mɔin gola, eɠɛ nuɓusɛ ɓulugiti. 38 Taaiti ti ɠoloɠologai za, ti zulaa ɠa ve ga nuɓusɛ ɓulugiti, eɠɛʋelei Zeluzalɛme a ɗa ɠɛ la, ta-zalaɠa ɠula yeeiti, zalaɠa loganiiti ta ɗa ziɛ eɠɛ kooɠoa. Ta suɠwɛɛ naazu ga nà ɠa gè ga Ɠɔoɠɔ GALAGI.› »