Ezra 6 (TOMA)
1 Naazu masagi Daliyuse devei veeni ga ti gaiziɛi wo Ɓaɓilɔne zɛʋɛiti ta ani ɓii makɛ ʋɛlɛi wu. 2 Ɛkɛɓatane taazuʋɛ, Mɛde ɠoʋii laa wolai nii siɠigi ma, miná ɠa ti sɛʋɛ ɓiligi gila kaani ná, nii sɛʋɛi ʋɔnɛni ma ɠani: 3 «Siluse ná-kona mɔungi masa fai zu, é niima levei woni, GALA sei ʋɛlɛi maanɛɛʋɛ é lo ʋolu Zeluzalɛme, naa ɠɛ ga ʋɛ zalaɠaiti ta ɠɛ ɠulazu ná, toɠa losu tosu wɔlɔmai nɔ, gaa ɠaaɠoozazu ga mɛtɛlɛ ʋuusaʋagɔ (30), kogi ɠɛ ga mɛtɛlɛ ʋuusaʋagɔ (30), 4 kɔtu zaɠaai ma ɲɛkpɛ saʋagɔ, gulu niinɛi ma ɲɛkpɛ ɠila. Naama walii kpein ka ɠulazu masagi ná-naavolo makɛsuʋɛ. 5 Naa ʋoluma zanu sɔɔlaiti ta wali zɔɔlaiti kpein Neɓukadenɛzaal ti ɠulani GALA sei ʋɛlɛi wu Zeluzalɛme, é ʋa ga tiye Ɓaɓilɔne, ti pɛ maanɛɛʋɛ ti ɠale ma, ʋɛ ti zeɠeai ná, ti la GALA sei ʋɛlɛi wu Zeluzalɛme.» 6 Naa maaʋele ma, Daliyuse niima zɛʋɛi leʋeni ziɛ wolai Efelate folo liizu ʋelei you zɛʋɛ ɠundiɠii Tatenayi ma, ta Setaal-Ɓozinayi, ta ti-wɔɔlaiti kpein: «À yeeɠula fai naa zu. 7 À Zuifuiti zɛna dɔin, ti GALA sei ʋɛlɛi lo, Zuifuiti ta-you zɛʋɛ ɠundiɠii ta ta-ɠɛwolaiti ka ti tosu, tosu wɔlɔmai. 8 Nɔ̀nɔ ma levei ɠa gè bosu, ʋelei wa ziɛ la Zuifuiti ta-ɠundiɠiiti tetemazu, GALA sei ʋɛlɛi lo fai zu. À ɠaaɓa, pɛlɛi lo walii kpein ge ɗa ve ti ya falafala, é ɠula masagi ná-naavolo makɛsuʋɛ, nii é zɔlɔɔsu maazoloo ganii zu é ɠulazu ziɛ wolai Efelate folo liizu ʋelei ma yooi zu, naa ɠa a kɛ botii mina lo pele zu. 9 Kɛni wo kɛ ʋele-o-ʋele, wo ɗa naa ve zalaɠa ɠula nuiti zea folo-o-folo, nii ta ɓɛdɛ ma, ti dɛɛ ga woye, é ɠɛni ga: nikɛ zinɛ ɓokpagiti, baala sinɛiti, baala ziʋoiti, gala zalaɠaiti faa zu é veezu GALAGI ʋɛ é geeɠɔlɔgi zu. Ʋele nɔ ɠana wa kɛɛ la ɓalaa é ʋilɛ moloi, kpoloi, dɔɔi ta gulɔiti ba. 10 Ta zoo naazu ti ɗa geeɠɔlɔgi zu ƓALAGI yiima zalaɠaiti kula, ti ɗa GALA fali masagi yɛnvui, ta ná-dointi zɛnvuiti ta-vaa zu. 11 Devei taɠili ka mɔnɔ gè feezu: Nu nɔpɛ é devei nii ɠoloɠolosu, ta kpɛdɛ gila kula ná-pɛlɛi wu, ti sɛlɛ ba, ná-pɛlɛi ɠa valibo ga kaʋa ziɠigi. 12 GALAGI nii é zeini Zeluzalɛme, naa masagi ɓaa zooi naa ɠoloɠolo, nii é yeewuzeɠezu é devei nii zeɠe ma, ga é GALA sei ʋɛlɛi nii ɠolo é Zeluzalɛme. Nà ɓɔɠɔi Daliyuse, nà ɠa gè devei nii vea, kɛni é ziɛ ga pagɔ.» 13 Naa ʋoluma ziɛ wolai Efelate folo liizu ʋelei you zɛʋɛ ɠundiɠii Tatenayi, ta Setaal-Ɓozinayi, ta ti-wɔɔlaiti kpein, ti ziɛni ga masagi Daliyuse ná-devei nɔ. 14 Zuifuiti ta-ɠundiɠiiti ti iɲɔdɔɔi zɔlɔɔni GALA goo wo nuiti Azé ta Ido ná-doun zunui Zakali ta-lɛnɛ gooiti su, ti ɗa li luɠɔma pɛlɛ logi zu, eyɛsu ti gaaɓela, eɠɛʋelei Ɠɔoɠɔ GALAGI deveni la, ta eɠɛʋelei Pɛɛlese masagiti Siluse, ta Daliyuse, é ʋɛɛ Aaletazɛɛlesɛse ʋa ti deveni la. 15 GALA sei ʋɛlɛi ɓeni alugi daa ga Adaal, naa ná-folo saʋagɔi ma, masagi Daliyuse ná-kona dɔzitasiɛi ma masa fai zu. 16 Izilayɛle nuiti, ta zalaɠa ɠula nuiti, ta Levi nuiti, naa ʋɛɛ nuɓusɛi mɔtai pɛ ba ti ɠulaai duɔlai zu, ti ʋa, ti GALA sei ʋɛlɛi laalaoni ga koozunɛɛi. 17 GALA sei ʋɛlɛi naa laalao fai zu, ti zalaɠaiti kulani: nikɛ zinɛ ungila (100), baala sinɛ unfelegɔ (200), baala ziʋo unnaanigɔ (400), ta boli zinɛ puugɔ maazu fele (12) koto gba vai zu Izilayɛle nuiti pɛ bɛ, é zoloo ta-woloda puugɔ maazu felegɔiti (12) ma. 18 Ti zalaɠa ɠula nuiti seini su ʋelei ta-zeikpasui la, Levi nuiti ɓalaa ʋelei ta-ɠaaɠwɛsui la, GALA ná-botiɠɛ vai zu Zeluzalɛme, ʋelei sɛʋɛai la Moize ná-sɛʋɛi zu. 19 Niiti kpein ti ɠulani duɔlai zu, ti ʋa, naati ti Pake fɛtii ɠulani alu mɔungi ma volo puugɔ maazu naanigɔi (14) ma. 20 Zalaɠa ɠula nuiti ta Levi nuiti ti ɓɔɠɔ ɲadeni ʋɔɔma, ti pɛ ti ɲadeni. Levi nuiti ti Pake suaiti kɔdaaleʋeni naazu nuɓusɛi pɛ bɛ, ti ɠulaai duɔlai zu, ta ti-ɠɛɛlointi bɛ zalaɠa ɠula nuiti, ta tiya ɓɔɠɔi ʋɛ. 21 Izilayɛle nui niiti kpein ti ɠulaai duɔlai zu, ti ʋa, ti Pake daamii woni ʋɔɔma, ta niiti kpein ti ɓɔɠɔ ɲadeni, ti yeeɓe zii ɠiligiti ta-ɠɔzɔba vaiti pɛ ba, ta ti ʋilɛ ti ʋolu Ɠɔoɠɔ GALAGI yiima vai ɠɛɛ vai zu, Izilayɛle ná-GALAGI. 22 Folo lɔfela laawu fɛtii ɠulani, nii ta ɗa ɓului mi su, nii lɛʋɛ la su, ti kɛɛni ga koozunɛ wolai, mazɔlɔɔ Ɠɔoɠɔ GALAGI Asiili masagi yii latini ti ma ga pagɔ, é ɓɔ ti ʋa GALA sei ʋɛlɛi lo fai zu, Izilayɛle ná-GALAGI.