Leviticus 24 (TOMA)

1 Ɠɔoɠɔ GALAGI ɓɔɛni Moize ʋɔ, é ɠɛ ma: 2 «Devei ve Izilayɛle nuiti zea, ga ti ʋa è ʋɔ ga wolive wulɔ ʋagɔi, kpɛtɛai fitinai vaa zu, naa ɠa a kɛ wo yeeyɛ fitinaiti ba, yeenɔpɛ ti mina za. 3 GALA daaɠomi seɠe ʋɛlɛi wu, kwɛpele seɠezuɠoozagi ɠakalaʋɛ, nii é zeele woo ɠesui ɠakalaʋɛ, miná ɠa Aalɔn a sei ná, fitinaiti ti so, é zo kpɔkɔi ma, eyɛsu geelaalao, Ɠɔoɠɔ GALAGI ɠaazu. Toɠa ga ɠɔoɠɔ tɔgi, wo-mavofodaiti kpein bɛ. 4 Toɠa fitinaiti kɛʋele ɓɛtɛ, fitina zei anii ɠa, é ga zanu kitei, ti ɗa zo yeenɔpɛ Ɠɔoɠɔ GALAGI ɠaazu. 5 «Ɗa ɓulu vukɔ ʋagɔi zeɠe, è ɓulu puugɔ maazu felegɔ (12) ɓɛtɛ, ɓului ɠilagilagi ɠa ɠɛ ga kilo lɔzita. 6 Ɗa ti ɠɛʋele ɓɛtɛ zanu kitei ma laɓalii ɠa, Ɠɔoɠɔ GALAGI ɠaazu, ga seizu felegɔ. 7 Ɗa ansanse kitei ta ʋu seizu ɠilagilagi ma. Naa ʋolu ɗa ansanse kitei ɠala Ɠɔoɠɔ GALAGI ɠaazu, ɓului ʋotogi zu, eɠɛ ɠizɛsui. 8 Dooɠo foloi ɠilagilagi, ta ɗa ɓului naati kɛʋele ɓɛtɛ yeenɔpɛ Ɠɔoɠɔ GALAGI ɠaazu. Toɠa ga minazeɠegi é yɛsu ná ɠɔ, Izilayɛle nuiti ta-vaa zu. 9 Ɓului naati ta ɠɛ ga Aalɔn ta ná-doun zunuiti tɔnɔ, ta ti mi ada ɲadegai ta, mazɔlɔɔ toɠa ɠɛ ti ʋɛ ga vebɛani ɲadega wolai, naati saama, niiti ti ɠalazu, Ɠɔoɠɔ GALAGI ɠaazu. Toɠa ga ɠɔoɠɔ tɔgi.» 10 Yeeta, Izilayɛle anzanu ɠila ta Ezipete zunu ɠila, ti-loun zunui ʋaani Izilayɛle nuiti saama. Kpɔɛi leʋeni ti-ʋuuzuʋɛ, Izilayɛle anzanui naa ná-doun zunui ta Izilayɛle zunui ta ti yɔɠɔzu. 11 Izilayɛle anzanui naa ná-doun zunui woo ɲɔiti boni GALA daalɔɠɔma, é koto. Ti ʋaani la Moize ʋɔ. Dee laaseigi ɠɛni ga Selomite, Diɓili ná-doun anzanui, Dan ná-bolodai zu. 12 Ti makɛni ga pagɔ, eyɛsu deve zɔlɔɔ Ɠɔoɠɔ GALAGI ya. 13 Ɠɔoɠɔ GALAGI ɓɔɛni Moize ʋɔ, é ɠɛ ma: 14 «À woo ɲɔu wo nui ɠula wo-ʋuuzuʋɛ ʋa. Niiti kpein ti gooi mɛnigai, naati ti yeeiti pɛɛ unma, naa ʋoluma bɛbɛi kpein ge sɔ ga kɔtui, é za. 15 Ɗa ɓɔɛ Izilayɛle nuiti pɔ ga, nu-o-nu a ná-GALAGI ɠotona, naama nui ɠa ná-kotoi ma ɠasɔi zeɠe. 16 Zɔi nɔpɛ a woo ɲɔu wona Ɠɔoɠɔ GALAGI laaseigi laalɔɠɔma, ta naama nui ʋaa, bɛbɛi kpein ka sɔ ga kɔtui, é za, é ɠɛni ga seikɔɠɔma nu ɓaa zou loun, tɔɔzei é woo ɲɔi woga GALA daaseigi laalɔɠɔma. 17 «Zɔi a nu ʋaana, ta naama nui ʋaa. 18 Zɔi a sua ʋaana, toɠa potogi ve ga suai ta. Zɛnvui ʋoto ka ɠɛ ga zɛnvui. 19 Ni nui ta a seiɲɔɠɔi maawanana, toɠa ɠɛ la, eɠɛʋelei tɔ ɓɔɠɔi é kɛa la ga zɔi. 20 Nii a nu ɠaei ɠale, naama nui ɠaei ɠa ɠale, nu ɠaazuɠɛzɛi ʋoto ka ɠɛ ga nu ɠaazuɠɛzɛi, nu ɲiiga ʋoto ka ɠɛ ga nu ɲiiga. Ta naama maawanai ɠɛɠalai ɠɛ ga naa, nii é kɛa ga zɔi. 21 Zɔi a sua ʋaana, toɠa potogi ve. Kɛlɛ zɔi a nu ʋaana, ta naama nui ʋaa. 22 «Tɔ gilagi nɔ ɠa seiɗai wo ma, seikɔɠɔma nu ʋɛɛ zou loun ʋa, mazɔlɔɔ nà ga Ɠɔoɠɔ GALAGI, wa-ƓALAGI.» 23 Moize ɓɔɛni Izilayɛle nuiti pɔ. Ti woo ɲɔu wo nui ɠulani ti-ʋuuzuʋɛ ʋa, ti sɔ ga kɔtuiti, é za. Izilayɛle nuiti ti kɛɛni ɠana, eɠɛʋelei Ɠɔoɠɔ GALAGI ma levei veeni la Moize ya.

Leviticus 24 (TOMA)

In Other Versions