Numbers 16 (TOMA)
1 Kolé, Yiseɠaal ná-doun zunui, Keɠate ná-pɛlɛyeɠei wu, Levi ná-bolodai zu zunui ta ɠɛni de, é Luɓɛn ná-bolodai zu zunu saʋagɔ ʋɛɛni ɓɔɠɔ ʋa, Datan ta Aɓilame, Eliyaɓe ná-doun zunuiti, ta Won, Pelɛte ná-doun zunui, 2 ti wuzeɠeni Moize laalɔɠɔma, ti Izilayɛle nuiti nu unfelegɔ puulɔɔlugɔ (250) ʋɛɛni ɓɔɠɔ ʋa, niiti ti ɠɛni ga nuɓusɛiti ta-ɠundiɠiiti, ti ɠɛni ga ɓalaa nuiti tɛnɛ nuiti maaɓɔgiti su, ti ga nuiti unfemai ti ʋɛ. 3 Ti ɠaalɛɛni ba Moize ta Aalɔnni daalɔɠɔma, ti ɠɛ ti ma: «É kula ɠɛa! Nuɓusɛi kpein ka ɲadegai, Ɠɔoɠɔ GALAGI ɠa ade pɛ ba. Zobogi ɓɛgele ɠa é wo ya, ga wo zei Ɠɔoɠɔ GALAGI ná-bɛbɛi ɠa ɲii?» 4 Siɛgi zu Moize naama yelilomaiti mɛnini da, é laaʋɛɛni zooi ma. 5 Naa ʋolu é ɓɔɛni Kolé ʋɔ, ta polu nuiti, é ɠɛ ma: «Lina sobu, Ɠɔoɠɔ GALAGI ɠa naa lɛ, nii é ga nɔnɔi ta nii ɲadegai, a zoo maaɓuɠazu ba, nii é yiimazeɠezu la. 6 Wɛlɛ nii wo ʋaazu kɛɛzu, Kolé ta polu nuiti kpein ta ansanse gala liɠiiti seɠe, 7 ti ti laave ga abulekaiti, ti ansansegi ʋu ga, Ɠɔoɠɔ GALAGI ɠaazu. Nii Ɠɔoɠɔ GALAGI a yiimazeɠe la, naa ɠa ɲadegai. É kula ɠɛa, Levi ma zuwuzuiti!» 8 Moize ɠɛni Kolé ma mɔnɔ: «À woilo gòoi ma ga pagɔ, Levi nuiti! 9 Naa ɠa wo ɠaazu ga faa go ɓaa, ga Izilayɛle ná-GALAGI yiimazeɠe ga woye yɛ, Izilayɛle nuɓusɛiti saama, é zobo fe wo ʋɛ, wo maaɓuɠa ba, wo ɗa botii ɠɛ Ɠɔoɠɔ GALAGI ná-seɠe ʋɛlɛ ɲadegai wu, wo lo nuɓusɛiti untuɠɔ, wo botii ɠɛ tɔun bɛ? 10 É ma zobogi veeʋɛ wo ʋɛ ga wo ɗa maaɓuɠa ba, wa è-ɠɛɛleaiti, Levi nuiti. Naa ɠa wo zalaɠa ɠula nui losuʋɛ ɠaiziɛzu mɔnɔ? 11 Naa ɠa é kɛa ɗa-o, ɗa-nuiti-yo, wo gilia ba, wo wuzeɠe Ɠɔoɠɔ GALAGI laalɔɠɔma! Mazɔlɔɔ Aalɔn ɠa ga ɓɛ, wo ʋa ɠɛ unsuyelii losu daalɔɠɔma?» 12 Moize nu leʋeni ga ti Datan loli ta Aɓilame, Eliyaɓe ná-doun zunuiti. Kɛlɛ ti ɠɛni ma: «Gi la liizu! 13 È gi ɠula zou ʋagɔi ʋa, ʋɛ nɔnɔi ta kɔin gulɔi ʋooʋaai ná, é ʋa ga giye teʋebai zu ga gi za, faa go ɠana ɓaa? Ɗa ɠɛɛzu mɔnɔ, è zei gi unda ɓaa? 14 È la ʋaani ga giye zou zu, ʋɛ nɔnɔi ta kɔin gulɔi ʋooʋaai ná! È la kpalagaa veeni gi ya, ɓaa kpelea ga gɔnɔ. Ɗa niima nuiti kpein kaazu ga gaazuɠole nuiti? Ɓa-o, gi la liizu pɛ!» 15 Moize wola yiiɠaawanani, é ɠɛ Ɠɔoɠɔ GALAGI ma: «Mina yeezei ta-vebɛ zalaɠai wu! Gè la tanɔpɛ kɔli kulani zea, folo ɠila ɓalaa, anɛɛ soovale gila kpalaa, gè la dɛ faa ɲɔu ɠɛɛni ga taɠila ɓalaa!» 16 Moize ɠɛni Kolé ma: «Ɗa-o, è ʋolu nuiti-yo, é ɓɔ Aalɔn ʋa, à ɠula kɛlɛma lina Ɠɔoɠɔ GALAGI ɠakala. 17 Wo ɠilagilagi, ansanse gala liɠii zeɠe, è ansansegi ʋu su, è ʋa Ɠɔoɠɔ GALAGI ɠakala. Wa ʋa ga ansanse gala liɠi unfelegɔ puulɔɔlugɔ (250), ɗa-o, Aalɔn-o, wo ɠilagilagi ɠa nɔnɔi zo ya.» 18 Ti ɠilagilagi, ti ta-ansanse gala liɠii zeɠeni, ti abulekaiti pu su, ti ansansegi ʋu ga. Ti pɛ ti loni GALA daaɠomi seɠe ʋɛlɛi laaʋɛ, Moize ɓalaagi ta Aalɔn. 19 Kolé bɛbɛi ɠaalɛɛni ba ti laalɔɠɔma GALA daaɠomi seɠe ʋɛlɛi laaʋɛ.Naazu, Ɠɔoɠɔ GALAGI ná-lɛbiyai ɠulani kɛlɛma bɛbɛi kpein bɛ. 20 Ɠɔoɠɔ GALAGI ɠɛni Moize ta Aalɔn ma: 21 «À ɠula niima nuɓusɛiti saama, nà ti undaaʋilisu ɠaniɠanigi nɔ!» 22 Kɛlɛ Moize ta Aalɔn ti laaʋɛɛni zooi ma, ti maanɛɛnɛi wo, ti ɠɛ ma: «Ee, GALA! GALAGI nii deve kpɛtɛaniiti kpein zɛnvui ma, ɗa ʋaazu bɛbɛi kpein sosu ga nu ɠilagi ná-kotoi?» 23 Ɠɔoɠɔ GALAGI ɠɛni Moize ma: 24 «Ɓɔɛ nuɓusɛiti pɔ, è devei ve ti ya ga ti maaɠooza Kolé ta Datan ta Aɓilameni ta-zeɠe ɠotaiti ba.» 25 Moize wuzeɠeni zooi ma. Izilayɛle ɠundiɠiiti ti ʋilɛni polu, ti li Datan ta Aɓilame ʋɔ bɛ. 26 É ɠɛni nuɓusɛiti ma: «À maaɠooza kotoba nui tɛiti ta-zeɠe ɠotaiti ba. À mina vɔɔɠu ti-yeaɠɔligi tanɔpɛ ba, ni wo la wɔinni, wo undaa ʋa ʋili ta-ɠotoiti faa zu!» 27 Naazu, ti maaɠoozani Kolé ta Datan ta Aɓilameni ta-zeɠe ɠotaiti ba.Datan ta Aɓilame ti ɠulani, ti lo ta-zeɠe ɠotaiti daaʋɛ, ta ti-anzaiti, ta ti-loun zunuiti, ta ti-lounlointi. 28 Moize ɠɛni ma: «Nii ɠa wa kwɛɛ da ga Ɠɔoɠɔ GALAGI ɠa é tèʋega, ga gè kɛɛwotii niiti kɛ, gè la faa nɔpɛ kɛɛzu ɓɔɠɔ ʋɛ ɠana nɔ. 29 Ni niima nuɓusɛiti ta zaana ga nu zaa ʋele nɔ, eɠɛʋelei deveai la nuɓusɛi ma ga é za, naazu Ɠɔoɠɔ GALAGI laade é ʋa vali mà, é ʋa tèʋe. 30 Kɛlɛ ni Ɠɔoɠɔ GALAGI a fai ta ɠɛɛna, nii kɛɠala la dɛ ɠɛɛni, ni zooi a laalaona, é ti ɓɔle ta ti-yeaɠɔligiti kpein, ti ma vului yei gɔvɛalaazu, wa kwɛɛ naazu ga nui niiti ti ɲɛɛɠulaʋɛ Ɠɔoɠɔ GALAGI zu.» 31 Moize ɓeni nɔ ga woo ɠaaɓela, zooi ʋalini ga Datan ta Aɓilameni kɔɠɔwu. 32 Zooi laalaoni, é ti ɓɔle, ta ta-ʋɛlɛyeɠeiti, ta Kolé ná-nuiti, ta ti-ɠɔligiti. 33 Naama nuiti ti yeini gɔvɛalaazu ga ti ma vului, ta tɔnɔiti kpein. Zooi laaɠuluni ti ma ʋolu. Pele ɠana ti ɠaalani da, nuɓusɛiti saama. 34 Ta-ɓee wooi mɛnigai ma, Izilayɛle nuiti kpein ti ɠɛni loni ná maaɠoolii zu, ti ɓizɛni, ti ɗa kpeei loo, ti ɠɛ ma: «Ade ɓizɛ, zooi mina ade ɓɔle, ada ɓalaa!» 35 Abui ɠulani Ɠɔoɠɔ GALAGI ʋɔ bɛ, é zunu unfelegɔ puulɔɔlugɔiti (250) gala, niiti ansansegi ɠɛni ti ya.