Numbers 35 (TOMA)
1 Ɠɔoɠɔ GALAGI ɓɔɛni Moize ʋɔ, Moaɓe nɛmɛiti su, Zuludɛn ɠobaʋɛ, Zeliko letemaʋɛ. 2 É ɠɛni ma: «Devei ve Izilayɛle nuiti zea, ga ti va bu, ti taai tanigaa ve Levi nuiti zea ta-yooi zu, nii ti sɔlɔɔgai ga tɔnɔ, ʋɛti ta zoo ti zei náti. Wa náti maaɠooliiti fe Levi nuiti zea. 3 Naama laaiti ta ɠɛ ga ti-zeizuʋɛ. Ti-maaɠooliiti su ɠɛ ga ta-logani losuʋɛti, ti-yeaɠɔligiti ti ɠɛ ná, ta ta-logani ɓulugiti. 4 Taaiti maaɠooliiti su, niiti wo ti veezu Levi nuiti zea, zooi ɠa ɠɛ ba, é ɠaku ma ga mɛtɛlɛ undɔɔlugɔ (500), é tɔɔzei siɠigiti ma, é li poluʋelei maaɠoolii kpein su. 5 Wa kɔɠɔ, wo kwɛgi la taa ʋoluʋelei, ga mɛtɛlɛ waagila (1.000), é ɠaku ma kpoloo, taai ɠa ɠɛ zaamazuʋɛ. Ʋele ɠana zooi a ɠɛ la, ta-laaiti maaɠoolii zu. 6 Wa yeelo taa lɔzita ʋa, wo fe Levi nuiti bɛ, ti ɠɛ ga maaʋela wosuʋɛ, nui niiti ti nu ʋaazu, ti la gaaɠilini ma, ta zoo ti ʋela, ti li ná, é ʋɛɛ taa ʋuunaanigɔ maazu felegɔ (42) ɠiligaa ʋa. 7 Taaiti wo ʋaazu ti veezu Levi nuiti bɛ, tiegɔi ɠa ɠɛ ga puunaanigɔ maazu lɔsaʋa (48), é ʋɛɛ ti-maaɠoolii ma yooiti ba, ti ɠilagilagi pɛ. 8 Taaiti wo ʋaazu ti zeɠezu Izilayɛle nuiti ta-yooiti su, mɔinɗa ɠa ɠula naati zea, niiti gola ti ya, tago nɔ ɠa a ɠula naati zea, niiti é la mɔinni ti ya. Bolodai ɠilagilagi ɠa ná-taai ta ve Levi nuiti bɛ, eɠɛʋelei a zoloo da sɔlɔɔgi ma, é ʋaazu bosu.» 9 Ɠɔoɠɔ GALAGI ɓɔɛni Moize ʋɔ, é ɠɛ ma: 10 «Ɓɔɛ Izilayɛle nuiti pɔ, è ɠɛ ti ma: Siɛgi zu wo Zuludɛn ɓudɛzu la, wo lɛ Kanaan yooi zu, 11 wa yeelo taai tanigaani ba, ta ɠɛ wo ʋɛ ga maaʋela laaiti, ni nu a nu ʋaana, é la gaaɠilini ma, é ʋela, é li ná. 12 Naama laaiti ta ɠɛ wo ʋɛ ga maaʋela laaiti, ɲamai ʋotokula nui ʋa, naa ɠa a kɛ nu ʋaa nui mina za, aisa é ʋa ɠula kɛlɛma nuɓusɛiti gaazu, ná-tukpɔi ɠaa ʋa leʋe. 13 Wa yeelo taa lɔzita ʋa, ti ɠɛ ga maaʋela laaiti, 14 wa taa saʋagɔ ve Zuludɛn ʋoluʋelei, wo taa saʋagɔ ve Kanaan yooi zu. Naati ta ɠɛɛzu ga maaʋela laaiti. 15 Naama laa lɔzitaiti ta ɠɛɛzu ga maaʋela laaiti Izilayɛle nuiti bɛ, ta wɛɛinti, naa ʋɛɛ seikɔɠɔma nuiti ba, nu-o-nu nii a nu ʋaana, é la gaaɠilini ma, miná ɠa a ʋela, é li ná. 16 «Ni zunui ta a seiɲɔɠɔi loɠana ga kɔlu ani, naa za, toɠa ga nu ʋaa nu. Ta nu ʋaa nui naa ʋaa. 17 Ni a sɔɔna ga kɔtu, naa za, toɠa ga nu ʋaa nu. Ta nu ʋaa nui naa ʋaa. 18 Ni a doɠana ga gulu, naa za, toɠa ga nu ʋaa nu. Ta nu ʋaa nui naa ʋaa. 19 Ɲamai ʋotokula nui ɠa nu ʋaa nui naa ʋaa, siɛgi zu é maazɔlɔɔsu da. 20 Ni zunui ta a zɔɔna seiɲɔɠɔi ʋa ga wɔinzeɠemai, ɓaa é ani zeɠe, é pili ma ga kisiɛ ɲɔi, saa vaa ɠula su, 21 ɓaa ni a doɠana ga yeei, sili vaa zu, saa vaa ɠula su, toɠa ga nu ʋaa nu, ta paa. Ɲamai ʋotokula nui naa ɠa nu ʋaa nui naa ʋaa, siɛgi zu é yeezeelizu la ma. 22 «Kɛlɛ ni zunui ta a zɔɔna seiɲɔɠɔi ʋa, é la gaaɠilini ma, é la daani ɠisu, ɓaa é anii ta ʋili ma, é la daani ɠisu, 23 ɓaa é la naa ɠaazu, eyɛsu é kɔtui loo ma, naa ʋolu ɠɛ ga saai, é la ga siliɲɔɠɔ, é la faa ɲɔu ɓɛtɛzu daalɔɠɔma, 24 nuɓusɛiti ta tukpɔɠaaleʋe, é zoloo tɔgi ma, nu ʋaa nui ta ɲamai ʋotokula nuiti zɔɠɔzu. 25 Nuɓusɛiti ta nu ʋaa nui ɠizo, ti kula ɲamai ʋotokula nui ya. Nuɓusɛiti ta gaaɠale ma maaʋela laai zu, ʋɛ pelaai, é li ná. Toɠa yɛ ná eyɛsu zalaɠa ɠula ɠundiɠi wolai, nii gulɔ ɲadegai ziaai ma, naa za. 26 «Ni nu ʋaa nui a ɓudɛna maaʋela laai ma ɠwɛgiti maazu, ʋɛ pelaai, é li ná, 27 ni ta ɠomina ta ɲamai ʋotokula nui taa ʋoluʋɛ, naa paa, é la ɠɛa ga sɔba nu, nu ʋaa vaa zu. 28 Mazɔlɔɔ, nu ʋaa nui maanɛɛʋɛ, é yɛ maaʋela laai zu, eyɛsu zalaɠa ɠula ɠundiɠi wolai za. Zalaɠa ɠula ɠundiɠi wolai zaa ʋoluma, nu ʋaa nui ɠa zoo é ɠale ma ná-poganii unda. 29 «Deveiti kana wo ma vaa zu, wo-mavofodaiti kpein su, ʋɛ nɔpɛ wa zei ná. 30 Ni nui ta a nu loɠana, é za, ta nu ʋaa nui ʋaa, zeeleiti gooi ma. Kɛlɛ zeele ɠila ge la kula ɠɛa, peelalai ʋa ve nui ya ga ti paa. 31 «À mina yeezei walii wu, nu ʋaa nui yɛnvui vaa zu, nii maanɛai ga é za, mazɔlɔɔ kɛni ti naama nui ʋaa. 32 À mina yeezei walii wu, wo ʋa pelei ve zea, é ʋa ɠula maaʋela laai ʋa, é ʋa ɠale ma ná-zooi zu, aisa zalaɠa ɠula ɠundiɠi wolai ʋa za. 33 À mina zooi ɠɔzɔ, ʋɛ wo ʋaazu zeizu ná, mazɔlɔɔ ɲamai ɠa ɗa zooi ɠɔzɔ. Koto gba vaa la ɠɛa ɲamai ná-faa zu nii puai, kɛni naama nui ɲamai, nii é ɲamai ʋuai. 34 Wo la zooi naa ɠɔzɔa, ʋɛ wo ʋaazu zeizu ná, ʋɛ nà ɓalaagi gè ʋaazu zeizu ná, mazɔlɔɔ nà ga Ɠɔoɠɔ GALAGI, nii é zeini Izilayɛle nuiti saama.»