Job 17 (YAPE)
1 Ke chugur nga tungun e yafos rog. Ke mo’maw’ ni nggu pogofan;ke gonowrug u puluwog kemus ni ba low e be son nigeg. 2 Gu be guy feni almirin ni be moning nigeg e girdi’ ni gubin. 3 Got, gu be riyul’ ko tin gu be yog mu fanay e thin rog.Dariy be’ nra fol ngog ko tin gu be yog. 4 Ka mu ning laniyan’rad da ku ra nanged e tin ni bfel’;are dab mu pag ngar gelgad ngog. 5 Ba tabnathin ni yima yog nra bannag be’ e fager rok ni bochan e salpiy,me aw e gafgow riy ngak pifak. 6 Ma chiney e ke cheal e girdi’ ka ra tabnathin nigedgag;yad be thuw nga dakenag. 7 Gafgowan’ rog e bayi ning owcheg;pa’ag nge eg e kema’ ngabang. 8 Pi’in yad be yog ni yad ba yul’yul’ e ka ra ngatgad,ma go’ ka ra turguyed ni gag e dagnang Got. 9 Pi’in yad ma leamnag ni bfel’ e ngongol rorade ka ra tared u wan’rad ni yad e ba sororad. 10 Machane fa’an yad ra yib ni yad gubin ngar sak’iygad nga p’eowcheg,ma dariy ta’abgayad ni gu ra yog nib gonop. 11 Pi rran rog e ke thumur; pin’en ni ug leamnag e de yag;dakuriy ban’en ni be lagan’ug ngay. 12 Ma pi fager rog e yad be yog nnep’ e aram e rran;yad be yog nike chugur e tamilang,machane gu manang ni ku gu bay u fithik’ e lumor. 13 Fayleng ni tafen e pi’in karm’ad e kemus e chin’en ni ka be legan’ug ngay,ni aram e gin bay gu pageg riy nga but’ nggu mol u fithik’ e lumor. 14 Bay gu pining fare low ko yam’ ni chitamag,ma pi fakl’ud ni yad be longuyege bay gog ni yad e chitinag nge pi walageg ni ppin. 15 Bu uw e gin ka bay ban’en riy ni ku ra lagan’ug ngay?Mini’ e be guy ban’en ni nge lagan’ug ngay? 16 Lagan’ e dabi un ngogu nap’an ni gu rayan nga’ar ko fayleng ni tafen e yam’.