Luke 22 (BBT1E)

1 Sai ne Phiia ajiie pha Iweb chie pha ishak nui thog shii, nyie yi Hiiadun pha ji ro. 2 Khophabi nane Iphey yua pha masdothek ne branthek shii rum, chiih-è ithek ne lumuii doh ne Isu shii ug ne ua mua bidiang. 3 Chiihphado sakhathong è Judas iliing shii khud, snanyi Samoythek è jia shii hanyie shii Iskharioth ro è beng muii pha ji ro. 4 Ji-è Judas yi boh phabi shii nane misiahò khan pha dumuiithek shii wuii srane Isu shii nyie khi-èrek ne zum mua ne nathek shii phi mua pha ji yao. 5 Ithek ne sang ne aishii bang phi pha ro è yao. 6 Judas è ji nuii srane jao ne sho, chiih-è branthek è athieg yi pha chua wie shii Isu shii zum ne ithek shii phi pha rek. 7 Sai ne Phiia ajiie pha iweb chie pha inai thog mage shii Hiìadun pha ji shii chie pha shiishaiduiithek ua. 8 Isu è Phithar nane Jon shii airo Hiìadun pha michie ji khriig rek iang bo è yung ne thoh ge. 9 Ithek è aishii sai, na è gathek shii khi hà khriig rek bo è yang lei? 10 Ai è chang, ithek rajan iliing hà wuii thog shii, hò-aphuii jia kho jariie han pha si ruii phro. Ai khi pha hò shii khud lei ne ai idoh shii khud gieng bo. 11 Chiih-è hò muspho jishii sai bo, Masdo è yao muii ro, ithong nane samoythek Hiìadun pha michie chie pha ùgud khi hà lei? 12 Ai è ithek shii lakhung pha uguno hà boh wie ùgud jia doh yi phro, thiisa hà zab khriig rek ne ruii pha mua phro. 13 Isu è ithek shii nyie khi-èrek yao lei ne ji duiine doh chiih-è ithek Hiìadun pha michie deb rek iang. 14 Ishak thog mage shii, Isu è awai rog shii boh pha samoythek noh ne thiibliie shii dug. 15 Ai è ithek shii yao, guro diig rey pha ishak athog ba pha ibi shii gu ithek rog shii dug ne Hiìadun pha ji chie pha now ro! 16 Ji-è gu nathek shii yao, Hamangkhung-aphuii ro Sajathua pha miyao ji izai arey sapho shii ne gu dinne achie phro. 17 Chiihphado Isu è gog ji chiing srane, Hamangkhung-aphuii shii laso phi ne chiih-è yao, “Hì pha gog yie srane nawaithek chung thang ne niing bo. 18 Gu ithek shii yao phro Hamangkhung-aphuii pha Sajathua pha ji athog sapho shii ne gu hì pha phuii aniing phro.” 19 Chiihphado ai è iweb dum jia chiing sra Hamangkhung-aphuii shii laso phi ne ji srane, ithek shii phi ne yao, “Nathek shii phi pha iweb hì ne guro siu ro. Gu shii now pha hì rek bo.” 20 Ji duiine ne iweb pha idoh shii ai è ithek shii gog phi ne yao, nathek shii noi ramuii pha hì pha gog ne Hamangkhung-aphuii ro iwo shiinyie shii guro ifai è è cheb ne phi phro. 21 “Jishii riig bo! Hanyie è gu shii zum yi pha rek pha ji ne ichiih gu rog thiibliie shii dug ne um ro! 22 Bran Dufuii ne Hamangkhung-aphuii è yang pha duiine iy phro, jimagunde gu shii zum pho ne khinyama diig rey ruii phro!” 23 Chiihphado awaithek chung jao ne sai rai, hì è rek ramuii pha ji ne hanyie lei? 24 Chiih-è ithek duchoi shii hanyie boh lei ne sai srane awaithek chung khnaing rai. 25 Isu è ithek shii yao, Hamangkhung-aphuii shii athieg pha sajathek ne branthek lakhung shii blu rek, chiih-è bohkhohphothek è yao gathek ne branthek pha ijak ro. 26 Jishii hì duiine nathek ne arek rabo; ji è nathek duchoi shii hanyie boh ji ne zab è ìu rey ruii phro, chiih-è dumuii ne khiao rey phro. 27 Chiih-è boh ne hanyie ga, chie ne dug pha ji boh ba, chiih-è michie phi pha ji boh ba? Dug pha jia ji boh ro. Jishii gu ne ithek duchoi shii khiao duiine ne ro. 28 Nathek de gu diigchiao rek shii gu rog shii um gieng; 29 Chiih-è gu aphuii è gu shii bohkhoh pha rangsua phi pha duiine, ithek shii de gu è ji duii pha rangsua phi phro. 30 Nathek de guro Sajathua hà guro thiibliie shii chie niing ne rai ruii phro, chiih-è nathek ne biangthek shii dug srane Israel pha snanyi jadthek shii bohkhoh ruii phro. 31 Simon, Simon! Yoi mage bo! raigpho è phiug shii igam è isug shii yoh rek pha duiine ithek shii wie è awie pha ji è yoh rek pha Sakhathong è rangsua muajong ro. 32 Jishii Simon, naro migi è achiih yi pha, gu na shii siajong phi ro, chiih-è nane gu shii idoh khid shii na nawai khuiinothek shii migi chuh rek noh bo. 33 Phithar è chang, “Ithong, gu de narog shii phatheg hà wuii ne narog shii iy gieng pha deb ro!” 34 Isu è yao, gu na shii yao, Phithar, “Khe a-ìo ba pha ibi shii na è gu shii athieg ro è uom chiing yao ruii phro.” 35 Chiihphado Isu è awai samoythek shii sai, gu è nathek shii biia, baneb nane lakhia ayie yi pha thoh ge pha ishak shii ithek asiok pha rey ne bey? Ithek è chang, gathek shii nyie de diig arey ro. 36 “Jishii thiih” shii ne, Isu è yao, hanyie shii biia nane baneb um phothek yie ruii bo; chiih-è hanyie shii khamriie oi arone nawaithek yung liu srane muduii pheg ne yie ne wuii bo. 37 Ji-è gu nathek shii yao, jigigam shii yao pha duiine, aishii ne mugo pho rog shii luajong muii ro. Gu shii nyie yao pha ji ne izai rey phro, nyieliieshii jigigam shii zey pha ji ne izai thog sha ruii ro. 38 Samoy jia è yao, riig mage bo Ithong! Ichiih shii khamriiethek nyi um ro, ai è chang, ji nyia ne khriig sha phro. 39 Isu ji pha rajan shii thoh srane idang awai mirek pha ji duiine sumaro phiing hà wuii dun, chiih-è samoythek de ai rog shii wuii gieng. 40 Ithek ji pha ithua hà thog mage shii, ai è ithek shii yao, “Nathek shii chuajan hà achiih yi pha sia bo.” 41 Chiihphado è ai ithek è lubao fen shii nyathog mua sbo ruang hà wuii srane lagiung niing ne sia. 42 Ai è yao, “Aphuii,” Na è yang arone hì pha diig gog ne gu è yie muii bo. Jishii gu miiyang è asi ro, na miiyang ji rey bo. 43 Hamangkhliie shii jia è wuii thog srane aishii chuh rek phi. 44 Din ne de ai lubu bajo diig now srane bajo gang è siaramuii shii; airo hanyua ne ifai chen pha duiine nyiak lakhung shii chenramuii ro. 45 Ai sia ched srane idoh dun shii, airo samoythek yi duhug rek srane men pha doh. 46 Ai è ithek shii yao, nathek nyie rek ne men phlei? Nathek sieng srane chuajan hà achiih yi pha sia mage bo. 47 Isu ji yao ramuii shii snanyi Samoythek è jia Judas beng muii pha ji è bran iphiing shii noh srane, Isu shii wuii ne ai mizia shii khichiug. 48 Jishii Isu è yao, “Judas, nane mizia khichiug srane Bran Dufuii shii zum ne bey?” 49 Hanyie ai rog shii um pha samoythek è nyie reyramuii pha ji riig srane, ithek è Isu shii sai, “Ithong khamriiethek rek ne ithek shii che mage habey?” 50 Chiih-è samoy jia è Kho Phabi pha khiao jia shii airo phazoi pha kho hab chie mage. 51 Jishii Isu è yao, “Ji khriig sha phro!” Ai è ji pha bran kho shii khoh srane gang phi. 52 Chiihphado Isu è boh phabi shii chiih-è Jewthek misiahò ragia rek pha dukhothek nane ragia rekpho nane kho thiihchiih aishii sow pha wuiiphothek shii sai, nathek gu shii mugo pho ro è now srane khamriiethek nane muchang yie ne wuii ne bey? 53 Gu ne idang nathek rog Misiahò shii rai, jishii nathek è gu shii zum pha abidiang. Igiia pha blu è bokho mage shii, jishii nathek ishak ne hì bey? 54 Ithek è Isu shii zum srane kho phabithek hò hà noh dun shii Phithar de ruang è ai idoh luagieng. 55 Sibiang pha duchoi shii bai fu srane ithek ang ne rairamuii shii Phithar de ithek rog shii bai anggieng. 56 Khiao bimi jia è ai thiihchiih shii ithek rog shii dug ne rai pha doh mage shii ai è wie riig srane yao, hì pha bran de Isu rog shii um phro. 57 Jishii Phithar è asi ro è yao, “Hò-amuii jishii yao, gu ne aishii athieg ro!” 58 Iùjia pha idoh shii bran jia è Phithar shii riig srane yao, “Na de ai rog shii um phade ne!”Jishii Phithar è ji pha bran shii chang, “gu asi ro!” 59 Chiih-è ishak jia rey pha idoh shii gai bran jia è de sriid è yao, hì pha bran de izai Isu rog shii um chak ro, nyieliieshii ai de Galili ro. 60 Jishii Phithar è ji pha bran shii chang, na nyie yao ramuii pha ji ne gu athieg ro!Ai ji nya yao ramuii shii khthiie khe de èo dang phro. 61 Ithong è Phithar shii rei srane wie riig mage shii, Phithar shii Ithong è aishii sudoh biu khe phuii a-ìo ba pha ibi shii na gu shii uomchiieng athieg ro è yao ruii phro è yao pha ji now khlei. 62 Phithar fuang hà wuii srane bajo khiwegkho ne cho. 63 Isu shii ragia rek pha bran ji è aishii zuang srane ai mirek jithek nui. 64 Ithek è ai mieg shii chiiag srane aishii sai, na shii hanyie muzuang lei? Than riig bo! 65 Ithek è aishii bajo makhak-riing yao. 66 Hamiang rey mage shii, dukhothek, boh phabithek nane Iphey yua pha masdothek ò si, chiih-è Isu shii limiang moe hà noh. 67 Ithek è yao, “Gathek shii yao riig bo,” Nane Masi bey? Ai è chang, gu è nathek shii yao magunde, nathek è gu shii migi anow phro; 68 Chiih-è gu ithek shii musai sai magunde nathek gu shii achang phro. 69 Jishii sudoh è thiwing Bran Dufuii ne Hamangkhung-aphuii ro Bohblu pha ji pha phazoi shii dug ruii phro. 70 Ithek zab è aishii yao, “Chiihphado, Na ne Hamangkhung-aphuii ro Dufuii bey?” Ai è ithek shii chang, nathek è è yao arone gu ne ji chak ro. 71 Chiih-è ithek è yao, “Gathek ne na chiang shii dinne a-ìd chid sha, ai è nyie yao pha ji ne gathek è yoi jong.”

Luke 22 (BBT1E)

In Other Versions