Mark 16 (BBT1E)

1 Jew Thung pha Inai jong pha idoh shii, Mery Magdalene, Jems pha amuii Mery, Salome ithek è Isu ro siu shii shun pha thiiliie pheg srane Isu siu-iy shii shun pha wuii dun. 2 Deobari pha hamiang riang hasiang siang mage shii ithek ne wieng hà wuii dun. 3 3-4 Lumuii hà lua ramuii shii, ithek ne awaithek chung yao rai, wieng kheb pha lubao ji ne hanyie è hong phi pha lei? (Hì ne bajo boh pha lubao ro.) Ji iyao ne wuii thog mage shii, ithek è riig shii ji pha lubao ne idoh thud ne um iang pha doh. 5 Ji-è ithek ne wieng bucho hà wuii dun, bucho hà wuii thog mage shii, ithek è filiao bran jia ne yung phiang imo guii srane phazoi hà dug ne rai pha doh phro. Ji doh mage shii ithek ne wiengphleg dun phro. 6 Jipha bran è yao, “Awiengphleg chid rabo, gu ne thieg, nathek ne Nazareth pha Isu bai shii zun ne ua mua pha ji sow wuii phro. Ai ne ichiih shii oi ro, ai ne chai shii hòijong dun ro, riig bo, ai ruii pha ithua shii nyie de oi ro. 7 Ji-è nathek ne dun srane Isu ro samoythek chiih-è Phithar shii mua yao mage bo: Isu ne nathek ibi shii Galili hà thog phro, ai è khi-èrek ne yao marui pha ji duiine thiisa hà ithek ne aishii si.” 8 Ithek ne zab sham ne rum chiih-è rumdun ne dun dun, chiih-è ithek ne rum ne ji pha miyaothek hanyie shii de ayao mua pha rai dun.[ 9 Isu chai hòi din pha idoh Deubari hamiang shii Mery Magdalene shii igobi dong, hanyie shii Isu è ibuii ragung miley khia phi pha Mery Magdalene shii si pha wuii ruii phro. 10 Mery Magdalene è Isu ro ijakthek zo ne choh ne rai pho moe shii wuii srane yao. 11 Ai è ithek shii yao Isu ne isieng ro chiih-è gune doh ro, jishii ithek ne ai miyao jishii migi arek ro. 12 Jipha idoh, awai samoy nyi soh pha ithua lumuii è lua ramuii shii Isu ne gai mia ne isa shii dong ruii phro. 13 Ji-è isa ne thadoh dun thog ne, Isu ro gai samoythek shii yao, jishii ithek è isa shii migi arek ro. 14 Ji-è rek ched pha idoh shii, Isu ne awai samoy snajia yi michie chie ramuii shii dong thog ruii phro. Isu è ji pha samoythek shii giung, nyieliieshii nathek ne aishii isieng dohjong pha branthek miyao ji ne lawasdai è migi arek ro. 15 Isu è ithek shii yao, zab pha sohjambling hà wuii mage srane zab branthek shii gu Muawie hì yao mage bo. 16 Hanyie è migi now ne gu beng è khowo yi pho ne lago è ragia re ruii phro; chiih-è, hanyie thek è migia rek pho ne layog the ruii phro. 17 Gu shii migi now pho ne gu beng è buangthek de rek mua phro; chiih-è, gu beng è awie pha ibuii ragung shii de khia mua phi phro; chiih-è, ithek ne nyuak iwo yao ruii phro; 18 chiih-è, pham chong magunde, miiriin chie na de, ithek ne nyie de achun phi phro; chiih-è ithek wad ne radshopho shii khoh ne sia phi magunde gang ruii phro. 19 Chiihphado Ithong Isu è ithek shii yao ched ne aishii ne Hamangkhung hà noh dun phro. Thiisa hà Hamangkhung-aphuii phazoi moe shii dug dun phro. 20 Ji-è samoythek ne zab pha ithua hà wuii srane Mua Wie ji yua ne lua, ji-è, Ithong è ithek rog shii rek gieng phro. Ji-è Mua Wie chiih-è buangthek rek pha ji ne izai chak rone khagi re dun ro.]

Mark 16 (BBT1E)

In Other Versions