2 Samuel 23 (KAPI)
1 David go tama a Jesse, go taane a God dela ne haga gila aga. Mee ne hili go di God o Jacob belee hai di king, gei ne dili nia daahili gi Israel. Deenei di hagaodi o nia helekai muliagina a David ala ne hai: 2 Di Hagataalunga o Dimaadua dela e haga helehelekai au.Nia hagahonu o ana helekai aanei i di gili ogu malau ngudu. 3 Di God o Israel gu helekai,di Madaloohi o Israel gu helekai mai gi di au boloo,“Di king dela e dagi i di tonu,dela e dagi gei e hagalaamua a God, 4 mee e hai gadoo be di maahina o di laadela ma gaa hobo luada i di laangidela e dei ono gololangi ai.Mee e hai be di laa dela e haga madamadania geinga o lodo henua i muli di uwa.” 5 Deenei di hai a Goddela gaa hila mai ai gi ogu hagadili,idimaa, Mee gu hai mai dana hagababa hagalee mooho,di hagababa dela e hagalee huli.Ma go di mee deenei dela e hiihai ginai au.Deenei di mee dela gaa hai dogu aali.Malaa, God la koia ga haga gila aga di maa. 6 Gei ogo digau huaidule e hai be nia geinga duduia ala e kili gi daha,e deemee di bili ginai tangada gi ono lima. 7 Tangada dela e bili gi nia maae hai hegau gi di baalanga be di amu daalo,nia maa gaa wwele hagatau. 8 Aanei nia ingoo o digau dauwa a David maaloo: Togo dahi go Josheb Basshebeth tangada o Tachemon, tagi ni “Digau Dogodolu”. Mee ne heebagi gi dana daalo gi nia daane e walu lau (800), ga daaligi digaula gii mmade i tauwa hua e dahi. 9 Togo lua i “Digau Dogodolu” maaloo go Eliaser tama a Dodo, tangada i di madahaanau o Ahohi. Di laangi e dahi, gei mee ginaua mo David gu heebagi gi digau Philistia ala ne dagadagabuli belee heebagi gi digau Israel. Digau Israel guu llele gi daha, 10 gei mee e duu hua igolo, ga heebagi gi digau Philistia, gaa dae loo gi dono lima gu mau dangihi gi dana hulumanu dauwa gu deemee di diiagi. Dimaadua gu aali i di laangi deelaa i nia mahi aamua. I muli hua teebagi deelaa, gei digau Israel ga loomoi gi muli gi di gowaa dela nogo iei Eliaser, ga hagabudu mai nia goloo dauwa o digau ala ne mmade. 11 Togodolu o “Digau Dogodolu” maaloo go Shammah, tama ni Agee tangada o Harar. Digau Philistia gu dagabuli i Lehi, di gowaa dela iai di hadagee golee laagau, gei digau Israel guu llele gi daha mo digau Philistia, 12 gei Shammah guu duu hua igolo gi mau dangihi i dono lohongo, e abaaba di gowaa deelaa, gei mee gu daaligi digau Philistia aalaa. Dimaadua gu aali i di laangi deelaa i nia mahi aamua. 13 Hoohoo gi di madagoaa e daamada e hadi ai taugai, digau dogodolu mai i “Digau Dogo Motolu” gaa hula gi di gowaa di bongoo hadugalaa Adullam, di gowaa dela e noho ai a David, gei di buini dauwa o Philistia nogo noho i nadau hale laa i di gowaa mehanga gonduu i Rephaim. 14 Di madagoaa deelaa, gei David e noho i hongo tama gonduu gu abaaba, gei digau Philistia guu noho i Bethlehem. 15 David gu hidihidi huoloo, ga helekai, “Au gu hiihai huoloo bolo tangada gii hana gi gaamai hunu wai e inu iei au, mai i di monowai dela i di ngudu di bontai di abaaba o Bethlehem!” 16 Digau dauwa maaloo dogodolu aalaa gaa hula laa lodo di waahale laa o digau Philistia, ga udu mai nadau wai i di monowai deelaa, ga gaamai gi David, gei David digi inu nia maa, gaa dui hua gi lala bolo e hai tigidaumaha ang gi Dimaadua. 17 Gei mee ga helekai, “Meenei Dimaadua, au e deemee di inu nia wai aanei! Maa nei bolo au ga inu nia maa, gei au e ala be au ne inu nia dodo o digau dogodolu aanei ala ne de hagahuodia nadau mouli i lodo di hagalliga di haingadaa!” Malaa, gei mee digi inu nia wai aalaa.Aanei nia hai haga goboina huoloo ala ne hai go “Digau Dogodolu” maaloo aanei. 18 Abishai tuaahina daane o Joab (di nau dinana go Zeruiah) go mee dela e dagi “Digau dauwa Maaloo e Motolu”. Mee ne heebagi gi dana hulumanu dauwa gi nia daane e dolu lau (300), gu daaligi digaula huogodoo guu mmade, gei mee guu dele humalia dono longo i baahi “Digau Dogo Motolu”. 19 Go mee dela guu gila i “Digau Dogo Motolu” aalaa, gei mee guu hai di tagi ni digaula, gei mee hagalee loo e maaloo be “Digau Dogodolu”. 20 Benaiah tama ni Jehoiada mai i Kabzeel, la tangada dauwa labelaa e dau, guu hai labelaa ana mee hagagoboina huoloo. Mee gu daaligi nia daangada maaloo dogolua o Moab. Di laangi e dahi gei mee ne ulu gi lodo di bagungoo i di madagoaa ‘snow’, ga daaligi dana laion i golo. 21 Mee gu daaligi labelaa taane damanaiee o Egypt e dagidagi dana daalo. Benaiah ga heebagi gi mee, e heebagi gi tugidugi, gaa dada taalo i di lima o maa, ga daaligi a mee gi taalo deelaa. 22 Aanei nia mee hagagoboina a Benaiah ne hai, tangada e dahi i “Digau Dogo Motolu”. 23 Mee e maaloo huoloo i baahi digaula, gei hagalee loo e maaloo be “Digau Dogodolu”. David gaa dugu ang gi mee gi dagia digau ala e madamada humalia di hale king. 24 24-39 Hunu gau i “Digau Dogo Motolu” aanei:go Asahel, tuaahina daane o Joab,Elhanan, tama ni Dodo mai Bethlehem,Shammah mo Elika, nia daangada mai Harod,Helez, tangada mai Pelet,Ira, tama ni Ikkesh tangada mai Tekoa,Abiezer, tangada mai Anathoth,Mebunnai, tangada mai Hushah,Zalmon, tangada mai Ahoh,Maharai, tangada mai Netophah,Ittai, tama ni Ribai tangada mai Gibeah i Benjamin,Benaiah, tangada mai Pirathon,Hiddai, tangada mai nia gowaa mehanga gonduu ala e hoohoo gi Gaash,Abialbon, tangada mai Arabah,Azmaveth, tangada mai Bahurim,Eliahba, tangada mai Shaalbon,Nia dama daane a Jashen,Jonathan,Shammah, tangada mai Harar,Ahiam, tama daane Sharar, tangada mai Harar,Eliphelet, tama daane o Ahithophel tangada mai Gilo,Hezro, tangada mai Carmel,Paarai, tangada mai Arab,Igal, tama daane Nathan tangada mai Zobah,Bani tangada mai Gad,Zelek, tangada mai Ammon,Naharai, tangada mai Beeroth, tangada e dagidagi nia goloo dauwa a Joab,Ira mo Gareb nia daangada mai Jattir,Uriah, tangada o Hittite. Digaula digau dauwa dogo motolu maa hidu huogodoo.