Hosea 14 (MAAL)
1 ዒስራዔኤሌ ዴሬዮቴ! ዒንሢኮ ጎማ ዒንሢ ዹቂ ዣኣሊሴያታሢሮ ናንጊና ናንጋ ጎዳ ማዔ ዒንሢኮ ፆኦዛሢ ባንሢ ማዑዋቴ። 2 ዒንሢ ቡኡፃንዳ ባኮ ዔሪ ናንጊና ናንጋ ጎዳ ባንሢ ማዑዋቴ፤ ሂዚ ጎዑዋቴ፦ «ኑኡኮ ጎሞ ቢያ ዓቶም ጌዔ፤ ኑና ማኣሪ ዔኬ፤ ኑኡኒያ ኑ ዻንጎና ኮሺ ዓኣፒ ማዔ ጋላታ ኔኤም ሺኢሻንዳኔ። 3 ዓሶኦሬ ኑና ዓውሳዓኬ፥ ዖሎ ፓራሢያ ኑኡኒ ጉሙርቁዋሴ፤ ሃይካፓ ሴካ ኑ ኩቻ ኑኡኒ ማዤ ባኮ ‹ፆኦሲ› ጌይ ኑ ዔኤላዓኬ፤ ናንጊና ናንጋ ጎዳሢዮ! ዜኤሮ ናኣቶ ኔኤኒ ሚጪንታያኬ።» 4 ናንጊና ናንጋ ጎዳ ሂዚ ጋዓኔ፦«ታ ዴሮኮ ጉሙርቂንቱዋያ ማዒፆ ታኣኒ ጊኢጊሺታ ባንሢ ዔኪ ማሃንዳኔ።ዻጋ ታኣኮ ዔያቶ ባንፃፓ ማዔሢሮታኣኒ ታ ሼኔና ጉሪ ዔያቶ ናሽካንዳኔ። 5 ዒስራዔኤሌ ዴሮም ታኣኒ ፆፆዻ ዖልኬ ማዓዛዔያታ ቡኒጉዲ ቡናንዳኔ፤ሊባኖኦሴ ሚፆጉዲ ፃጲ ዔያታ ዳካንዳኔ። 6 ዓንታ ዔያቶኮ ዋርቃንዳኔ፤ዛይቶ ሪሚቶጉዲያኣ ዔያታ ሚዛጲሃሣ ሊባኖኦሴ ዴኤሎጉዲ ኮሺ ሳውሞ ዓኣያ ማዓንዳኔ። 7 ጊንሣ ማዒ ታ ሺቦ ዴሞ ዔያታ ጌላንዳኔ፤ሃጊ ባቃላ ሃኣኮጉዲ ዔያታ ዓኣዒ ሚዛጳንዳኔ፤ዎይኔጉዲያኣ ዔያታ ቡናንዳኔ፤ዔያቶኮ ሳውማ ሊባኖኦሴ ዎይኖ ዑዦሲጉዲ ዔርቴያ ማዓንዳኔ። 8 ዔፕሬኤሜ!ሜሌ ፆኦዞና ዎላ ታኣኮ ዓይጎ ካኣሚ ዓኣይ?ዒንሢኮ ሺኢጲፆ ዋይዛሢንታ ቶኦኮ ዒንሢኮ ዛጋሢ ታናኬ፤ታኣኒ ቢያ ዎዴ ዋርቄ ጎይሣ ዴዓ ዚቢቂጉዲኬ፤ዒንሢ ዓኣፒሳሢያኣ ታናኬ።» 9 ዔራቶ ዓኣ ዓሲ ዬንሢ ባኮ ዒና ዔካንዳኔ፤ ማሊ ጶቂሣ ዓሲያኣ ዔራንዳኔ፤ ናንጊና ናንጋ ጎዳኮ ጎይፃ ፒዜኬ፤ ፂሎ ዓሳ ዒዞና ሃንታኔ፤ ጎሞ ዓሳ ጋዓንቴ ዹቂንቲ ዒኢካ ሎሎኦማኔ።