2 Corinthians 12 (MKNFD)
1 Na kabena taup ianna mac eac ŋgocor. Na aku ndona imo gidik ŋgoin naaŋgɨri ŋgepnandet. Na anna gidik, an taupa aimo mba otacitndai. Na anmo watcari, aku manmbɨanmemraŋna tamram ndeidapa iŋgoroca eacrena kamb ndeida Kacootta aukmo wandacrinanna, aku an ndopnande. 2 Na aku lamŋirena Karaisna ramoot ian, iarira 14na mɨnna anna iŋmbaia Raraŋ Aetaniaca manmo aŋgɨa gaca tamuŋna auŋmo, kabemo kunda, mac gaca mbuniŋnan mac kunda, mac gaca mbonkacna auŋa, manmo anna tɨkrina. Na ma ndona tikca ŋgetrikiri, co, ma ndona tik anap eacre, aku mba lamŋiri. Na Raraŋ Aetaniac ma ndo lamŋirena. 3 3-4 Na aku an ramootmo aku lamŋirena, Raraŋ Aetaniaca manmo tamuŋna auŋ naaŋgɨa gacatnan. Na ma ndona tikap eacre, co, ma ndona tikca ŋgetrikiri, aku lamŋi ŋgocor, Raraŋ Aetaniac ma ndo lamŋirena. Na an tamuŋna auŋa ma waracatna kamma, aintocna kamma ramootta waraca mbopna mɨnna wanaiŋ. Na an toco wandɨk, ramootta mbopna mɨnna wanaiŋ. 5 Na aku ndo aku an ramootna i aŋgɨri ŋgepnande, na aku ndo ŋgoinna aku ndona ia mba mac aŋgɨri ŋgepitndai. Na aku ndo ŋgoinmo gaindopnande, aku gagrar kocor, na aku ndona imo an mbuŋ naaŋgɨra ŋgeprena. 6 Na anna gidik, aku ndona i aŋgɨri ŋgep ndop te, aku an ŋaŋaona ramootna kirara mba moitndai. Wanaiŋ. Aku kam gidik ndopnande. Na aku ndona ia mba aŋgɨri ŋgepitndai. Na anna gidik, aku toŋgo ŋgocor, ramoot ianna ma aukmo gainda kai lamŋi teac, aku ramoot laŋ ŋgoin. Na aku toŋgorinanna, ne aukna morena tɨpemb kirarira wat te, aukna mbopekna kambca warac. Na an mbuŋa ne aukmo wat rapacnandet. 7 Na an kamma Raraŋ Aetaniac, ma aukmo wandacatna, anna reac aniac ŋgoin. Na Raraŋ Aetaniac, ma toŋgo ŋgocor, aku ndona imo kai tacro aŋgɨri ŋgepcari teac, aintik ma aukmo lac tocna reac ian neaŋga ma aukap eacrena, anna aukna tikca rɨŋrena. Na an reac, anna aukca pina Ramoot Mbɨkna aiŋna ŋeroŋ, anna aukmo makuk neaŋga aku ndona imo kai tacro aŋgɨri ŋgepcari teac. 8 Na kɨdrɨkar mbonkaca aku Kacootmo mbendeiatna, manmo aukna an reac tarkina moca. 9 Ri, ma aukmo gaindopatna, “Aukna kakadmaina opotaca anna una mɨn. Na an aukna gargara ma gargar ŋgoin, ma gagrar kocorta ramootna aiŋa wakikia morena.” Na Kacootta aindoprina, aintik aku gagrar kocor, na aku an mbuŋa ndona imo aŋgɨca ŋgepnande, na Karaisna gargara ndo aukap eacnande. 10 Aintik ŋarikca Karaisna an aiŋ mbuŋa tɨkca aku gagrar kocortacari te, na meikramtaɨra aukmo mo laŋa mo ŋgocor, na ainta makukara aukmo larurena, na meikramtaɨra aukmo mo ŋgocraina morenan, na meikramtaɨra aukmo komerena, na iro auknanna an nake makuku ŋgocor, na gidik, an mɨnna aku gagrar kocor, na gan mɨn ŋgoinna tɨkcapeke, aku gargar aniacap. 11 An kam aku mbopatnanna, anna ŋaŋao ŋgoin. Na anna ne ndori, aukmo moa ŋgepca aku gaindopatna. Ne aukna i aŋgɨri ŋgep te, anna tɨp wandoŋ laŋ. Na ne ainda mba mori. Gidik, aku reac ŋgoreac, aintik aku nena an outna, paparuna up aŋgɨrena ramtaɨra, ndorita i aŋgɨ ŋgeprena ramtaɨrta kaŋgaukca mba eacrenanna. 12 Na an mɨn aku nena rɨk ndeacatke, aku reik wɨt aniaca moatna, anna aku ndomo wandacatna, aku up aŋgɨrena ramoot gidik ian. Na aku wɨtɨkca gagraca aku makukar mbukatna, na an tɨpna kirar mbuŋa aku an ŋgagatracarapa an titoc, titocna Raraŋ Aetaniacna aiŋir anikca nena rɨk ndaruatnanna, anna aku nenmo ndomo wandacatna, aku Raraŋ Aetaniacna aiŋna ramoot. 13 Na aku kabena laiplacarmo, an tɨpna kirara moatnanna, an tɨp kirar kabea, aku kabena Iesusna rɨtɨpaikta meikramtaɨrta tumnambmo ainda moatna. Na moca aku nena reac ianna moa matpiri ki? Na moca aku nena an reac kabe niŋgik nenan ki, moa matpia? Na aku ndo ŋgoinna aku nena reac ianna aŋgɨ ŋgocor. Na ne aukmo an tɨp kirara moapeknanmo, ne an tɨp kirarmo mo kecari. 14 Laŋ mandeaca aku makocrori, na aku nen ndambuŋ nakɨkɨpa kɨdrɨkara mbonkac mamoek, na an mɨn toco, aku nenmo makukca mba neaŋitndai. Na ne warac! Aku nena reikca mba aŋgɨritndai, aku karirina. Na aku nen niŋgik aŋgɨnandet. Na ne ndori lamŋirena, mombonikca mina amna reacna aiŋa moca aŋgɨri tumbunna tɨkca ndorita ameratera wiramna gargara mɨnna wanaiŋ. Ameratera ndori amna reik aŋgɨri punica mombonikmo otacna aiŋa morenan. 15 Na aku ndo, aku toŋgorena ndona reikmo muruŋcamiŋ ŋgoinna neaŋnande, na ndona tik motocmo, nena ŋerŋgaur ŋgotacna neaŋrena. Na aku ndona mamatŋi muruŋ ŋgoinna nena neaŋrina, na anna ndo nenmo moca ne ndorita mamatŋi muruŋmo aukmo mba neaŋri? 16 Na meikramtaɨr ndeida mina aukmo gaindoprena, “Gidik ma aina reikmo raekca mba tɨkca aŋgɨrenanna, na ma wai aocrena ramoot, na ma paparuna kirara ma aina ŋgumbepa rɨŋreke. Na ma aina reik aŋgɨrena.” 17 Na kaica? Na an ramtaɨra aku nen ndambuŋa mandaca kɨpatnanna. Anna titoca moca? Na ŋarikca aku paruca mina ianna par mbuŋa nena reik ndeid makɨmri ki, a? 18 Na aku Taitusmo iroar neaŋga ma nen ndambuŋ nakɨpatna, na aku kabena Iesusa rɨpacrena laiplacarta ian motocmo anna mandaca ma manap kɨpatna. Na ŋarikca Taitusa nenmo paruca nena reik makɨm nari? Wanaiŋ ŋgoin. Na aŋga iro kabea raŋgairenan, na aŋga taup kabe niŋgik mbuŋa taŋrenan. 19 Na aku gaind ndamŋirina, ne an timbiŋ raparna kambmo muruŋ ŋgoinna watta mairina, na ne gaind malamŋiri, aia nena lamnikmo ndorita kam wandoŋaina tirrina. Na ainda wanaiŋ. Aia Karaisna meikramtaɨr tarurina, na aia Raraŋ Aetaniacna lamnɨac mbuŋa aia an kam ndopatna. Na ne aukna aikndamtaɨr laiŋ, aia an kambca muruŋ ŋgoin ndopapeknanna, anna nena rɨtɨpaikca moi paŋpaiŋina. 20 Ainda moca aku rugut emtemma moca gaind ndamŋiatna, ŋarikca aku nen ndambuŋ nakɨpca, na aku nenmo aintocna kirarna meikramtaɨra aku toŋgo watna morenanna eac ŋgocor. Na moca ne toco aukmo wat te, aku an eacrena ramootna kirara mba eacrenan. Na moca aku nena rɨkmo aintocna tɨpna kirarirmo nena rɨkca tɨki wat nari, gan tɨpna kirarira, kam mbuŋ ndopi taŋca kabena meikramtaɨrmo iro ŋgoreac aŋgɨrena, na kaegna kirara morena, na garururena kirara morena, na kambmo iŋmbai ndoprena kirara morena, na kam mbarac narica morena, na reac, reacna kirarira muruŋa moa kurirena. 21 Na moca aku nen ndambuŋ nakɨpca aukna Raraŋ Aetaniaca aukmo nena lamnikca tɨkca aukmo moi numbira mac neaŋ nari. Na moca aku meikramtaɨr wɨt anikta tɨpemb ŋgorikta makukara morinan, mac wat nari. Na mina ndorita iroar inkarmo ŋgetriki ŋgocor, na mina an patiŋmo iŋ neaŋri, na meacramootna kaŋtertaapna tɨp kirara mona tik ŋgep te, mina meacramootna tɨp ŋgadudukca morena tɨpemb ŋgorikta makukara monandet, na anna mina ŋgaua morina tɨpemb kirarir. Na aku aintocna tɨpemb kirarira wat te, aku numbira moca kadmainande.
In Other Versions
2 Corinthians 12 in the ANGEFD
2 Corinthians 12 in the ANTPNG2D
2 Corinthians 12 in the BNTABOOT
2 Corinthians 12 in the BOATCB
2 Corinthians 12 in the BOATCB2
2 Corinthians 12 in the BOGWICC
2 Corinthians 12 in the BOHLNT
2 Corinthians 12 in the BOHNTLTAL
2 Corinthians 12 in the BOILNTAP
2 Corinthians 12 in the BOITCV
2 Corinthians 12 in the BOKCV2
2 Corinthians 12 in the BOKHWOG
2 Corinthians 12 in the BOKSSV
2 Corinthians 12 in the BOLCB2
2 Corinthians 12 in the BONUT2
2 Corinthians 12 in the BOPLNT
2 Corinthians 12 in the BOTLNT
2 Corinthians 12 in the KBT1ETNIK
2 Corinthians 12 in the SBIBS2
2 Corinthians 12 in the SBIIS2
2 Corinthians 12 in the SBIIS3
2 Corinthians 12 in the SBIKS2
2 Corinthians 12 in the SBITS2
2 Corinthians 12 in the SBITS3
2 Corinthians 12 in the SBITS4
2 Corinthians 12 in the TBIAOTANT
2 Corinthians 12 in the TBT1E2