2 Corinthians 12 (TOMA)

1 Kɛni gè ɓɔɠɔ maamusɛ, anɛɛ ni naa la ʋani. Nà ɓɔɛzu niina, é ʋilɛ wozaɠaaiti ta kulakɛlɛmaiti ba, niiti Maliɠii ti lɛɛni ga ze. 2 Gè zunui ta ɠwɛɛ, keletiɛin ta, niigi, é ɠɛa ga kona puugɔ maazu naani (14), é lɛɛni poun é zeeli geeɠɔlɔgi ɠwɛgi ma. Ni é ɠɛni kpusɛi zu, gè la kwɛɛ, ni é la ɠɛni kpusɛi zu, gè la kwɛɛ, kɛlɛ GALA ge kwɛɛ. 3 Zunui naa ɠɛni kpusɛi zu, ɓaa ni é la ɠɛni kpusɛi zu, gè la kwɛɛ, kɛlɛ GALA ge kwɛɛ, nii gè kwɛɛ naa ɠa ga 4 zunui naa lɛɛni GALA ná-taa ʋagɔi zu. É wooiti mɛnini nii é la veeni nu ʋɛ ga è suɠula, ta ma zobo ge la veeni nuɓusɛ ʋɛ ga é suɠula. 5 Nà ɓɔɠɔ maamusɛzu zunui tɛi ná-faa zu, kɛlɛ gè la ɓɔɠɔ maamusɛzu nà ɓɔɠɔi nà-faa zu, kɛni nɔ nà-zɛbɛsulalai nɔ. 6 Ni gè ɠɛni pɔ ga gè ɓɔɠɔ maamusɛ, gè la ɓena ɠɛ ga ɠimalala nu, mazɔlɔɔ gaamai ɠa gè bosu. Kɛlɛ nà ɓɔɠɔ zosu, naa ɠa a kɛ nu nɔpɛ ge mina ɠisiɛ nà-faa zu, é ʋa leʋe kɛ̀ɛwotiiti ta kpɔ̀ɛ wooiti ba. 7 Tama tɛi naama ɠulakɛlɛmaiti maayikini, nii a kɛ gè mina waso, ɠaingi lɔɔni kpùsɛi zu, eɠɛ Setana ná-keela, teʋegai ga é dòɠa, nii a kɛ dàa mina ve ga wasogi. 8 Gè Màliɠii maanɛɛnɛni ná zeizu ɠɛ saʋa, ga é niima ɓɔlɔi maaɠooza bà. 9 É gòoɠaaʋoteni, é ɠɛ mà: «Nà-zaalai nɔ ɠa è ɓɛdɛi ba fai pɛ su, mazɔlɔɔ sɛ̀bɛi laa ɠa ɗa zeeli ga pagɔ, siɛgi zu è zɛbɛsulalai zu la.» Toɠa ga zìima vaa, gè ɓɔɠɔ maamusɛ nà-zɛbɛsulalaiti su, nii a kɛ Kilista ná-zɛbɛi ɠɛ bà. 10 Naa ɠa é ba, nà ɠoozunɛɛzu zɛbɛsulalai zu, ta poomugiti bu, ta kidaaʋili faiti su, ta wɔinzeɠemaiti su, ta kpɔlɔiti gè ti zɔlɔɔsu Kilista ná-faa zu. Mazɔlɔɔ siɛgi zu gè ga zɛbɛsulala nui la, názu mu ka sɛ̀bɛi wɔɔlɔai la gola. 11 Nà ɓɔɛzu eɠɛ nà ɠɛ ɠɛni ga ɠimalala nu, wa ɠa wo dìini naa ma. Tɔɔzei wa ɠa wa la tòsuʋɛ lɛɛ. Anɛɛ ni gè la ga ani nɔpɛ, kɛlɛ wa-ɠeela wolai naati ti la vizɔni bà faa nɔpɛ su. 12 Kɛɛwotii niiti ti dɛɛzu ga nà ga keela ɠitei, naati ti ɠulani kɛlɛma wo zaama, ziilɔɔ laazeeliai zu, ʋoluɠulai ma zii pɛ su, naa ʋɛɛ poogiti ta maaɓɛlɛ vaiti ba, ta laavɔɔ vaiti. 13 Fai ɓɛgele ɠa é ɠɛa zɔɔma Egilisiiti bɛ é la ɠɛɛni wo ʋɛ, kɛni tɛi nɔ gè la ɠɛɛni ga kasɔ wo unma? À sùvaayɛ ga naama lelebotalai! 14 Wɛlɛ, ná zeizu zaʋasiɛi ɠa kɛ̀ʋele ɓɛtɛai ga gè ʋa wo ʋɔ bɛ. Gè la ɠɛa ga kasɔ wo unma ɲɛgɛlɛin, mazɔlɔɔ gè la wo-yeaɠɔli gaiziɛzu, kɛni wa ɓɔɠɔi. Tɔɔzei dointi taade ta ɗa anii ɠaalɛ ba ti zɔlɔɔ nuiti bɛ, kɛlɛ ti zɔlɔɔ nuiti ka ta ɗa anii ɠaalɛ ba ti ʋɛ. 15 Nɔ̀un nà, toɠa bɛ̀ ga koozunɛ, nii pɛ é zèa, gè naati kula ya wa-vaa zu, gè ɓɔɠɔ ɠwɛ mɛtu wo ʋɛ. Nà wo wola nɛɛna ʋɛ, naa ɠa nà-nɛɛbɛi lɔi wo-yiimaʋɛ ɓaa? 16 Tama, gè la ɠɛni ga kasɔ wo unma. Kɛlɛ tanigaa ta ɠɛɛzu ma tɛi kèleɠelegai, gè wo zoni ga keleɠelegi! 17 Zɔiti gè ɠɛni ti leʋesu wo ma, gè leʋeni ga naati pɔ pelei ɓaa, gè loo wo ma? 18 Gè Tite maanɛɛnɛni ga é ʋa wo ʋɔ bɛ, ɠɛɛɠɛloin ta ɠɛni polu. Tite looni wo ma fai ta zu ɓaa? Nà-o, tɔ-o, gi la ɠɛni ziɛni ɠi gilagi nɔ zu ɓaa? Gi ziɛ ʋelei la ɠɛni ga faa ɠila ɓaa? 19 Kaite suɠoozaa, wa ɠigaiziɛzu ga gá ɓɔɠɔ maalobosu nɔ wo ɠaazu. Nɛ̀ɛɲɔɠɔiti, gá ɓɔɛzu eɠɛʋelei Kilista pɔ la GALA gaazu, gá naati pɛ bosu wo ma, nii a kɛ wo li luɠɔma kidaaleʋei zu. 20 Mazɔlɔɔ nà luazu ga nà ʋaana wo ʋɔ bɛ, gè la wo ɠaani ga ʋelei gè pɔ la, wa ɓalaa wo la ɠɛ kàani ga ʋelei wo pɔ la. Nà luazu ga kpɔɛ vaiti ti mina ɠɛ wo zaama, ta tolo ɲɔiti, ta ziiɠula vaiti, ta maaɠɔɔ faiti, ta tɔɠɔ ɠoloɠolo faiti, ta fama vaiti, ta waso faiti, ta faazupuiti. 21 Nà luazu ga nà ʋaana, nà-GALAGI mina ùnfe wo zaama, gè mina gɔlɔ wo ma mɔinmɔin ná-faa zu, niiti ti kotoiti kɛai, ti la ti-ziɛ ʋelei maavaliboni, ti ʋa ɓeteʋe kɔzɔba vaiti ba, ta koloɠolo faiti, ta ɓaaɠulama vaiti, ti ziɛzu ga tiye.

2 Corinthians 12 (TOMA)

In Other Versions