Colossians 4 (SBITS2)
1 అపరఞ్చ హే అధిపతయః, యూయం దాసాన్ ప్రతి న్యాయ్యం యథార్థఞ్చాచరణం కురుధ్వం యుష్మాకమప్యేకోఽధిపతిః స్వర్గే విద్యత ఇతి జానీత| 2 యూయం ప్రార్థనాయాం నిత్యం ప్రవర్త్తధ్వం ధన్యవాదం కుర్వ్వన్తస్తత్ర ప్రబుద్ధాస్తిష్ఠత చ| 3 ప్రార్థనాకాలే మమాపి కృతే ప్రార్థనాం కురుధ్వం, 4 ఫలతః ఖ్రీష్టస్య యన్నిగూఢవాక్యకారణాద్ అహం బద్ధోఽభవం తత్ప్రకాశాయేశ్వరో యత్ మదర్థం వాగ్ద్వారం కుర్య్యాత్, అహఞ్చ యథోచితం తత్ ప్రకాశయితుం శక్నుయామ్ ఏతత్ ప్రార్థయధ్వం| 5 యూయం సమయం బహుమూల్యం జ్ఞాత్వా బహిఃస్థాన్ లోకాన్ ప్రతి జ్ఞానాచారం కురుధ్వం| 6 యుష్మాకమ్ ఆలాపః సర్వ్వదానుగ్రహసూచకో లవణేన సుస్వాదుశ్చ భవతు యస్మై యదుత్తరం దాతవ్యం తద్ యుష్మాభిరవగమ్యతాం| 7 మమ యా దశాక్తి తాం తుఖికనామా ప్రభౌ ప్రియో మమ భ్రాతా విశ్వసనీయః పరిచారకః సహదాసశ్చ యుష్మాన్ జ్ఞాపయిష్యతి| 8 స యద్ యుష్మాకం దశాం జానీయాత్ యుష్మాకం మనాంసి సాన్త్వయేచ్చ తదర్థమేవాహం 9 తమ్ ఓనీషిమనామానఞ్చ యుష్మద్దేశీయం విశ్వస్తం ప్రియఞ్చ భ్రాతరం ప్రేషితవాన్ తౌ యుష్మాన్ అత్రత్యాం సర్వ్వవార్త్తాం జ్ఞాపయిష్యతః| 10 ఆరిష్టార్ఖనామా మమ సహబన్దీ బర్ణబ్బా భాగినేయో మార్కో యుష్టనామ్నా విఖ్యాతో యీశుశ్చైతే ఛిన్నత్వచో భ్రాతరో యుష్మాన్ నమస్కారం జ్ఞాపయన్తి, తేషాం మధ్యే మార్కమధి యూయం పూర్వ్వమ్ ఆజ్ఞాపితాః స యది యుష్మత్సమీపమ్ ఉపతిష్ఠేత్ తర్హి యుష్మాభి ర్గృహ్యతాం| 11 కేవలమేత ఈశ్వరరాజ్యే మమ సాన్త్వనాజనకాః సహకారిణోఽభవన్| 12 ఖ్రీష్టస్య దాసో యో యుష్మద్దేశీయ ఇపఫ్రాః స యుష్మాన్ నమస్కారం జ్ఞాపయతి యూయఞ్చేశ్వరస్య సర్వ్వస్మిన్ మనోఽభిలాషే యత్ సిద్ధాః పూర్ణాశ్చ భవేత తదర్థం స నిత్యం ప్రార్థనయా యుష్మాకం కృతే యతతే| 13 యుష్మాకం లాయదికేయాస్థితానాం హియరాపలిస్థితానాఞ్చ భ్రాతృణాం హితాయ సోఽతీవ చేష్టత ఇత్యస్మిన్ అహం తస్య సాక్షీ భవామి| 14 లూకనామా ప్రియశ్చికిత్సకో దీమాశ్చ యుష్మభ్యం నమస్కుర్వ్వాతే| 15 యూయం లాయదికేయాస్థాన్ భ్రాతృన్ నుమ్ఫాం తద్గృహస్థితాం సమితిఞ్చ మమ నమస్కారం జ్ఞాపయత| 16 అపరం యుష్మత్సన్నిధౌ పత్రస్యాస్య పాఠే కృతే లాయదికేయాస్థసమితావపి తస్య పాఠో యథా భవేత్ లాయదికేయాఞ్చ యత్ పత్రం మయా ప్రహితం తద్ యథా యుష్మాభిరపి పఠ్యేత తథా చేష్టధ్వం| 17 అపరమ్ ఆర్ఖిప్పం వదత ప్రభో ర్యత్ పరిచర్య్యాపదం త్వయాప్రాపి తత్సాధనాయ సావధానో భవ| 18 అహం పౌలః స్వహస్తాక్షరేణ యుష్మాన్ నమస్కారం జ్ఞాపయామి యూయం మమ బన్ధనం స్మరత| యుష్మాన్ ప్రత్యనుగ్రహో భూయాత్| ఆమేన|