Isaiah 52 (TBIAOTANT)
1 O Saion, nɨ dɨkavigh tugh gavgavigh!O Jerusalem, nɨ God baghavɨra itir nguibar ekiam!Nɨ kurkazir bar aghuiba uabɨn kurkeghganganir bar aghuim damuam.Guizbangɨra, Ekiam gɨfozir puvatɨziba,me gumazir uan mɨkarzir mogomer iniba aghorezir puvatɨziba, ko Godɨn damazimɨn zuezir puvatɨziba,me uam nɨn aven izan kogham. 2 O Jerusalem, noka! Nɨ datɨrɨghɨn kalabuziamɨn iti,egh nɨ dɨkavigh uan mɨkarzimɨn nguaziba apɨsigh.O Saion, senɨn nɨn fɨrim gikeziba,nɨ da adangigh mangɨ, uan atrivir dabirabim daperagh. 3 Ezɨ Ikiavɨra Itir God kamaghɨn mɨgei,“Gumazitam na givezezir puvatɨgha,nan gumazamiziba inigha ghuzɨ, me an ingangarir gumazamizir kɨnibar otifi.Puvatɨ.Kamaghɨn amizɨ, kɨ ua me inisɨ, me givezan kogham.Puvatɨ. Kɨ pura ua me iniam. 4 Kɨ Ikiavɨra Itir God, ian Ekiam, kɨ kamaghɨn mɨgei,Fomɨra nan gumazamiziba ghua Isipɨn itir dughiamɨn,me mati gumazamizir pura guighav itibar mɨn ghuapura kantrin kamɨn iti.Ezɨ gɨn, Asiriaba iza ingangarir gumazamizir kɨnibar mɨn me inigha ghu.Asiriaba na givezezir puvatɨgha pura me inigha ghu. 5 Ezɨ kɨ garima, Babilonia uaghan arazir kamram ami.Me pura nan gumazamiziba inigha ghua kalabuziam gatɨ,egha nan adarazir gumazir dapanibagh amizɨ, me bar puvɨram azi.Ezɨ kɨ bizitam inizir puvatɨ.Gumazamiziba zurara na dɨpovava, nan ziam gasɨghasɨsi. 6 Kamaghɨn amizɨ, kɨ uabɨ mɨsevezir dughiamɨn, kɨ uabɨ uan gumazamiziba ua me iniam,eghtɨ me deravɨra nan ziam gɨfogham.Egh me kamaghɨn fogh suam, kɨrara, kɨ Ikiavɨra Itir God,kɨ uabɨra biziba bar dar gun mɨgei.” 7 Godɨn akar aghuim inigha izir gumazamizibar darorim, a bar dera.Me mɨghsɨabar pɨn ikegha akar aghuim inigha iza Saionɨn aven iza kamaghɨn mɨgei,“Ia dabirabir aghuim ko navir amɨrizimɨn ikɨ!Bizir bar aghuiba ia bativam,God ian akurvaghtɨ ia deravɨra ikiam.Eghtɨ ia Saionɨn gumazamiziba, ian God, an atrivimɨn ikiam.”Eghtɨ gumazamiziba akam inigha izir gumazamizibar gansɨ bar akuegham. 8 Ia oragh. Ian gumazir nguibar ekiamɨn bizibar gariba,uari uan damazibar gantɨ,Ikiavɨra Itir God uamategh Saionɨn nguibamɨn izam,eghtɨ me bar akuegh pamten dɨmɨva, arangɨva onger akabar amu. 9 Ia Jerusalemɨn nguibar apaniba asɨghasɨghizimɨn gumazamiziba,ia kamaghɨn fogh, Ikiavɨra Itir God uan gumazamizibar osɨmtɨziba agɨvaghagavgavim isa me ganɨngi.A Jerusalemɨn nguibamɨn itir gumazamiziba ua me ini.Kamaghɨn amizɨ, ia bar akuegh pamten dɨmɨva onger akabar amu. 10 Ikiavɨra Itir God uan gavgavim, kantribar gumazamiziba an ganasa,anekagha gɨfa.Eghtɨ a uan gumazamizibar akuragha ua me inizir gavgavir ekiam,nguazir kamɨn gumazamiziba bar an ganam. 11 Ia bar moghɨra Babilon atakigh!Ia dɨkavigh zuamɨram azenan izɨ!Egh ia bar deraghvɨra uari bagh gan,ia ua bizir Godɨn damazimɨn zuezir puvatɨzitam uam an suighan markɨ.Egha ia Ikiavɨra Itir Godɨn Dɨpenimɨn itariba ateri darasi,ia uari Godɨn damazimɨn zueghamin arazimɨn gɨn mangɨ.Ia bar moghɨra uari zuegh izɨ. 12 Ia fomɨra Isip ategha zuamɨram aravghuzɨ moghɨn, ia Babilon ategh zuamɨra arɨ izan kogham. Puvatɨ.Ia bar aghumra daru izam.Eghtɨ Ikiavɨra Itir God, a ian faragh mangam.Egh uaghan ian gɨn izam,egh a bar deragh ian gan, ia geghuv ian aku izam. 13 Ikiavɨra Itir God kamaghɨn mɨgei,“Ia oragh, bizir nan ingangarir gumazim amiziba,da bar moghɨra deraghvɨram otivigham.Eghtɨ gumazamiziba ziar ekiam a danɨngɨva,an ziam bar a pɨrafam. 14 Me faragha an mɨkarzim ko guam gasɨghasɨghizɨ,gumazamiziba an garima, a nguazir kamɨn gumazimɨn mɨn garir puvatɨ.Gumazamiziba dɨgavir kuram gamua an ganan atiatingi. 15 Eghtɨ gɨn kantrin avɨribar gumazamiziba ko men atriviba,me bizir fomɨra nɨghnigha ganizir puvatɨzibar gan dagh fofogham.Gumazamizir eghaghaniba faragha da baraghizir puvatɨziba, datɨrɨghɨn da baragham.Kamaghɨn amizɨ, me dɨgavir kuram damigh, pura ganɨva uan akabar kumigh,bizitam mɨkɨman asagham.”