1 Kings 13 (TOMA)
1 GALA goo wo nui ta devei zɔlɔɔni Ɠɔoɠɔ GALAGI ya ga é zeɠe Zuda yooi zu, é li Ɓetɛle. É zeelini kpein nɔ, Zeloɓoame ɗa ansansegiti gala zalaɠa ɠulazuʋɛ. 2 É Ɠɔoɠɔ GALAGI laawooi nii woni zalaɠa ɠulazuʋɛ laalɔɠɔma, é ɠɛ ma: «Zalaɠa ɠulazuʋɛ! Zalaɠa ɠulazuʋɛ! Ɠɔoɠɔ GALAGI wooi ɠaa: ‹Zunu loun ɠa zɔlɔɔsu Davide ná-pɛlɛyeɠei wu, daaseigi ɠa ɠɛ ga Zoziase, nii é ʋaazu zalaɠa ɠula adaʋɛti ma zalaɠa ɠula nuiti kulazu ga zalaɠai è ma, niiti ti ansansegiti galazu è ma, ta nu ɠaeiti gala vɔlɔ è ma.› » 3 Naama voloi nɔ é poogi veeni ti ya, é ɠɛ ti ma: «Wɛlɛ poogi ʋa nii é dɛɛzu ga Ɠɔoɠɔ GALAGI ɠa kpɔɛai: Zalaɠa ɠulazuʋɛ ɠa ʋaazu ʋalizu su, zuʋui nii é ʋuuni ga, naa ɠa vazasu.» 4 Siɛgi zu masagi naama wooi mɛnini la, nii GALA goo wo nui boni zalaɠa ɠulazuʋɛ laalɔɠɔma nii é Ɓetɛle, é yeemaaleni, é ɠɛ ma: «À so!» Kɛlɛ zeei nii é maaleni GALA goo wo nui laalɔɠɔma, naa zaani ma, é la mɔ ɠɛni zooni é ʋa tɛ ba. 5 Zalaɠa ɠulazuʋɛ ʋalini su, zuʋui é ɠɛni ga, naa vazani, é zoloo poogi ma nii GALA goo wo nui feeni ga Ɠɔoɠɔ GALAGI maaʋele. 6 Masagi kpɔɛi zeɠeni, é ɠɛ GALA goo wo nui ma: «Ɗa-ƓALAGI, Ɠɔoɠɔ GALAGI maanɛɛnɛ bɛ̀, nii a kɛ gè zo gè zèei lɛ ba.» GALA goo wo nui Ɠɔoɠɔ GALAGI maanɛɛnɛni, masagi zooni é zeei lɛ ba, é ʋilɛ kɛʋele wɔlɔmai zu. 7 Masagi GALA goo wo nui lolini, é ɠɛ ma: «Ʋa, de li nà-pɛlɛi wu, de daami wo, naa ʋoluma nà faanɛɛ ɠɛ è ʋɛ niina.» 8 Kɛlɛ GALA goo wo nui ɠɛni ma: «Anɛɛ ɓalaa ɗa ɗa-naavoloi ma ʋalisaamai pɛ feezu zèa, gè la liizu ɗa-ʋɛlɛi wu, gè la daamiani nɔpɛ mia, gè la ɓalaa ziɛ nɔpɛ kpɔlea. 9 Mazɔlɔɔ gè niima levei zɔlɔɔgɛ Ɠɔoɠɔ GALAGI ya, é ɠɛ mà: ‹Mina daamii ta kpɔle wo, mina ɓalaa ɠale ma ga pelei nii è liai la.› » 10 É liini ga pele ɠili, é la ɠɛni ɠaleni ma ga pelei nii é liini la Ɓetɛle. 11 Naama ziɛgi zu GALA goo wo nu wɔlɔzaɠagi ta ɠɛni Ɓetɛle. Ná-doun zunuiti ti naa kpein boni ma, nii pɛ GALA goo wo nui kɛɛni, nii seɠeai Zuda, é ʋa Ɓetɛle naama voloi, ta nii kpein é boni masagi ma. Ná-doun zunuiti ti naa pɛ suɠulaai ma ma. 12 É ɠɛɛni ti ma: «Mini ʋele ɠa diai la?» Ná-doun zunuiti ti GALA goo wo nui lii ʋelei ɠaani, nii é zeɠeni Zuda. 13 É ɠɛ ma: «À soovalegi maaɠili bɛ̀.» Ti soovalegi maaɠilini, é lɛ kɔma. 14 É ʋilɛni GALA goo wo nui ʋolu, é li, é naa ɠa zeini sɛne gului ta wu, é ɠɛ naa ma: «Ɗa ɠa è ga GALA goo wo nui seɠeai Zuda?» Naa gooɠaaʋoteni, é ɠɛ ma: «Eyei, nà ʋe de.» 15 É ɠɛni ma naazu: «Ʋa, de li pɛlɛi wu, de daami wo.» 16 Kɛlɛ GALA goo wo nui gooɠaaʋoteni, é ɠɛ ma: «Gè la ɠalega ma è ʋɔ, gè ʋa lɛ ɗa-ʋɛlɛi wu. De la daamiani mia ʋɔɔma, de la ɓɔɔlea ʋɔɔma pɛ adaʋɛ tɛi, 17 mazɔlɔɔ Ɠɔoɠɔ GALAGI ɠɛɛʋɛ mà: ‹Mina daamii ta kpɔle wo ná, mina ɓalaa ɠale ma ga pelei nii è liai la.› » 18 GALA goo wo nu ɠɛwolai ɠɛni ma: «Nà ɓalaa, nà ga GALA goo wo nui ta ga è ɠɛʋele. Ɠɔoɠɔ GALAGI ná-geezuɠeelai gila teʋegɛ mà, é ɠɛ mà: ‹Li, è gaaɠale ma, wo ʋa ɗa-ʋɛlɛi wu, é laami, ta é ɓɔɔle.› » Zɛɛi ɠa é ɠɛni bosu naa ma. 19 GALA goo wo nui ʋilɛni polu, ti ɠale ma, é daamii woni, é ɓɔɔle ná-pɛlɛi wu. 20 Ti ɠɛai ma daamii wosu, Ɠɔoɠɔ GALAGI ɓɔɛni GALA goo wo kɛwolai ʋɔ, nii é gaaɠaleni ma. 21 É ɓɔɛni GALA goo wo nui ʋɔ nii é ʋaani, é zeɠe Zuda, é ɠɛ ma: «Ɠɔoɠɔ GALAGI wooi ɠaa: ‹Tɛi è kololalai ɠɛa ga Ɠɔoɠɔ GALAGI, è la tɔgi zoni nii ɗa-ƓALAGI Ɠɔoɠɔ GALAGI feai è ya, 22 tɛi è ɠalega ma, è laami ta è ɓɔɔle naama adaʋɛ, ʋɛ kɛai è ma: Mina daamii ta kpɔle wo ná, è-ma ʋoomai la laa è-ɠɛɛni ta-ɠabaiti su.› » 23 Ti ɓegai ma ga daamii wo, ti ɓɔɔle, GALA goo wo nui nii é gaaɠaleni ma, é naa ná-soovalegi maaɠilini. 24 Naa ɗa li, é ɠulani zala ɠila ma pelei zu, naa paa, é ma ʋoomai yɛni laani pelei zu, soovalegiti ta zalai ti loni koba. 25 Teʋe nuiti ti poomai naa ɠaani laani pelei zu, zalai loni koba. Ti liini, ti bo taazuʋɛ, ʋɛ GALA goo wo kɛwolai ná. 26 GALA goo wo kɛwolai nii é gaaɠaleni ma naama wooi mɛnini, é ɠɛ ma: «GALA goo wo nui ʋe, nii é kololalai ɠɛai ga Ɠɔoɠɔ GALAGI ná-devei, Ɠɔoɠɔ GALAGI fea zalai ya, naa bali ga, é paa, eɠɛʋelei Ɠɔoɠɔ GALAGI boni la ma.» 27 É ɠɛni ná-doun zunuiti ma: «À soovalegi maaɠili bɛ̀.» Ti soovalegi maaɠilini. 28 É liini, é poomai ɠa pelei zu, soovalegiti ta zalai ti loni koba. Zalai la ɠɛni poomai miini, ta é la ɠɛni soovalegi ʋalini ga. 29 GALA goo wo kɛwolai GALA goo wo nui ma ʋoomai wuzeɠeni, é da soovalegi ɠɔma, é ɠale ma la taazuʋɛ, nii a kɛ é ná-saa wɔlɔi wo, é maaɠulu. 30 É naa laani tɔ ɓɔɠɔi ná-kabai zu, nuiti ti ɠɛni saa wɔlɔ wuyei loozu ma, ti ɗa ɠɛ ma: «Maawɔin vaa ʋe, kɛ̀ɛloin zaa.» 31 Maaɠulugi ɓegai ma, GALA goo wo kɛwolai ɠɛni ná-doun zunuiti ma: «Yeei gè zaazu la, à màaɠulu kabai nii nɔ zu, nii GALA goo wo nui maaɠulugai su, wa mà ʋoomai la ma ʋoomai ɠoba. 32 Mazɔlɔɔ wooi nii é bogai Ɠɔoɠɔ GALAGI laaseigi zu Ɓetɛle zalaɠa ɠulazuʋɛ laalɔɠɔma, ta zalaɠa ɠula adaʋɛti ma ʋɛlɛiti kpein daalɔɠɔma ti Samali yooi zu, ma wooi zu vaiti daa ɠa zeeli.» 33 Niima vai pɛ poluma, Zeloɓoame la ɠɛni valiboni, é ʋa zeɠe kɛɛwoti ɲɔiti polu. É ɠɛni ba nɔ, é ɗa nuiti seɠe nuɓusɛiti saama, é ti ɠɛ ga zalaɠa ɠula nuiti, zalaɠa ɠula adaʋɛti unda. Nu nɔpɛ nɔ ma wɔin a la ɠɛ naa ma, é ɠɛni naa zeizu ga ta. 34 Naa ɠɛɛni ga kotoi ɠɛ zaɓui Zeloɓoame ná-pɛlɛyeɠei ʋɛ, naa ɠa é kɛɛni é ɠoloɠoloni, é ɲɛɛlɛ zooi ɠa.