1 Samuel 16 (TOMA)

1 Ɠɔoɠɔ GALAGI ɠɛni Samiyɛle ma: «Ɗa yɛsu wɔlɔzu, eyɛsu yeelɛ, Sayile ná-faa zu? Nɔ̀un gè ɠɛlɛa ba, nii a kɛ gè Izilayɛle masadai ɠula zea. Ɗa-wulɔ minɛi laave, è li Ɓɛteleyɛme taazuʋɛ. Nà è leʋesu Izayi ná-pɛlɛi wu, mazɔlɔɔ gè yiimazeɠeʋɛ ga ná-doun zunui gila, ga é ɠɛ ga masagi.» 2 Samiyɛle ɠɛni ma: «Naa ɠa zoo é ɠɛ ɠale? Sayile a mɛnina, toɠa pàa.» Ɠɔoɠɔ GALAGI ɠɛni ma: «Nikɛ ɓokpa gila seɠe, è lii la, ɗa ɠɛɛzu ma: ‹Pàaʋɛ zalaɠa ɠulazu Ɠɔoɠɔ GALAGI ʋɛ.› 3 Ɗa Izayi loli zalaɠa ɠulazuʋɛ. Nii gè pɔ ga è kɛ, nà naa lɛ ga ɗe niina. Nui nii gè dɛɛzu ga ɗe, naa ɠa è gulɔi ziɛzu ma bɛ̀.» 4 Samiyɛle ɠoloni Ɠɔoɠɔ GALAGI wooi ʋɛ, é liini Ɓɛteleyɛme. Taa ɠɛwolaiti ti Samiyɛle ɠaai ma, ti yiizoolɛni, ti gaazaɠa, ti ɠɛ ma: «È ʋaa ungi ɠa ga faa ʋagɔ ɓaa?» 5 Samiyɛle ɠɛni ti ma: «Ungo, pàaʋɛ zalaɠa ɠulazu Ɠɔoɠɔ GALAGI ʋɛ. À ɓɔɠɔ ɲadena zalaɠa ɠula vai ma, wa ʋa niina pɔ̀ pelei.» Samiyɛle Izayi ta ná-dointi tolini ga ti ɓɔɠɔ ɲade, ti ʋa zalaɠa ɠulazuʋɛ. 6 Naati paai ma, Samiyɛle Eliyaɓe ɠaani, é ɗa ɠɛ ɓɔɠɔ ma: «Tanisu nii ɠa Ɠɔoɠɔ GALAGI yiimazeɠeai la.» 7 Kɛlɛ Ɠɔoɠɔ GALAGI ɠɛni Samiyɛle ma: «È ɠaazu mina ɠula kpusɛi ta kooza ʋelei ʋa, mazɔlɔɔ gè la yiimazeɠeni la. Gè la faiti pɛtɛsu ga eɠɛʋelei nuiti ti kaazu la. Nuɓusɛi ɓelagi ɠa nɔ ga nii é kaazu ga ɠaazuʋɛ, kɛlɛ nɔ̀un, nà ɗa wɛlɛ nui yiimaʋɛ.» 8 Naa ʋoluma, Izayi Aɓinadaɓe lolini, é dɛɛ ga Samiyɛle, kɛlɛ Samiyɛle ɠɛni ma: «Ɠɔoɠɔ GALAGI la yiimazeɠeni ga nii ɓalaa.» 9 Naa ʋoluma, é ʋaani ga Sama. Samiyɛle ɠɛni ma ʋolu: «Ɠɔoɠɔ GALAGI la yiimazeɠeni ga nii ɓalaa.» 10 Izayi ná-doun lɔfela lɛɛni ga Samiyɛle ɠana nɔ, kɛlɛ Samiyɛle ɠɛni ma: «Ɠɔoɠɔ GALAGI la yiimazeɠeni ga nii tanɔpɛ.» 11 Samiyɛle Izayi ɠaazaɠani, é ɠɛ ma: «È-loun zunuiti tie ka ná ɓaa?» Izayi ɠɛni ma: «Ti-ma loungoi ɠa dɔɓɔi zu, é ɗa baalagiti makɛ.» Samiyɛle ɠɛni ma: «Nu leʋe, ti toli, é ʋa, tɔɔzei ade la zalaɠa laamii lɔɔzeizu polu, kɛni a ʋaana.» 12 Izayi nu leʋeni, ti Davide loli, é ʋa. Davide ɠɛni ga zunu loungoi, é ɠɛni ga kpɔi nu, gaazuɠɛzɛiti seiɗai su ga pagɔ, dɔtɔai ɓalaa ga pagɔ. Ɠɔoɠɔ GALAGI ɠɛni Samiyɛle ma: «Tɔ ɠaa, wuzeɠe, è gulɔi ziɛ ma.» 13 Samiyɛle gulɔ minɛi zeɠeni, é gulɔi ziɛ Davide nɔungi ma, kɛɛɠɛlointi gaazu. Ɠɔoɠɔ GALAGI ná-Zɛnvui yeini Davide ma naama voloi, é yɛni ba ɠɔ. Samiyɛle ɓegai ma, é ɠaleni ma Lama. 14 Ɠɔoɠɔ GALAGI ná-Zɛnvui zeɠeni Sayile ʋa, zɛnvu ɲɔi ta leʋega ɠɛni de Ɠɔoɠɔ GALAGI ʋɛ, naa ɗa nɔungi zeɠe ma. 15 Sayile ná-botiɠɛ nuiti ti ɠɛni ma: «Gi suɠwɛɛ ga GALA ge zɛnvu ɲɔi ta leʋega, nii é ɗɔungi zeɠezu ma. 16 Naa ɠa é ba, ni ɗa devei veena nɔ gi ya, gá nu ɠaiziɛzu, nii soogai kɔnigi ɠɛinsu, naa ɠa a kɛ, siɛgi zu zɛnvu ɲɔi a ɗɔungi zeɠena ma, gɛingɛin gani gɛin nui ɠa kɔnigi ɠɛin, naazu ɗɔungi zu ɠa la ga pagɔ.» 17 Sayile ɠɛni ti ma: «Zèe ɠa bu, à gɛingɛin gani gɛin nu ɠaiziɛna bɛ̀, wo ʋaa la pɔ̀.» 18 Ná-botiɠɛ nui gila ge kpɔɛi zeɠeni, é ɠɛ ma: «Gè zunu loungoi ta ɠaaʋɛ Ɓɛteleyɛme taazuʋɛ, Izayi ná-dointi saama, soogɛ kɔnigi ɠɛinsu. Toɠa ga kɔɔɠɔ nu wola, é ɓudɛ naa maazu, soogɛ ɓɔɛzu ga pagɔ, pagɛ gola, Ɠɔoɠɔ GALAGI ɠa ba.» 19 Sayile keelaiti teʋeni Izayi ma ga ti ɠɛ ma: «Masagi ɠɛ è Davide leʋe ma, è-loin nii é baalagiti makɛsu.» 20 Izayi ɓului tanigaa zeɠeni, ta kɔlɔ woole ɠila, nii dɔɔi su, ta boli yiʋo ɠila, é ma ɠasɔi la soovalegi ʋolu, ná-doin Davide li ga tiye Sayile ʋɔ. 21 Davide zeelini nɔ feya Sayile ʋɔ bɛ, é lɔ naa ná-botii zu. Davide ná-fai nɛɛ ʋele ma Sayile ʋɛ, é seɠeni, é kɛ ga ná-kɔɔɠɔ zɔɔlaiti seɠe nui. 22 Sayile keela leʋeni Izayi ma, é ɠɛ ma: «È-loin Davide ná-fai wola nɛɛʋɛ bɛ̀, ɓɛ é yɛ kòba, é ɗa boti ɠɛ bɛ̀.» 23 É lɔɔzei naama voloi ma, zɛnvu ɲɔi GALA ge ɠɛni teʋesu, naa a la Sayile nɔungi zeɠena ma, Davide ɓena kɔnigi zeɠe, é ɗa gɛin. Sayile nɔungi zu ɠɛni laazu ga pagɔ, é lago vizɔ, zɛnvu ɲɔi maaɠooza ba.

1 Samuel 16 (TOMA)

In Other Versions