1 Samuel 25 (TOMA)

1 Naama ziɛgi zu Samiyɛle zaani. Izilayɛle nuiti pɛ ti ɠaalɛɛni ba, ti ná-saa wɔlɔi wo, ti maaɠuluni ná-taazuʋɛ Lama.Naa ʋoluma, Davide ʋilɛni pelei ma, é li ga Palan teʋebai zu ʋele. 2 Zunui ta ɠɛni Maon, é ga kpɛtɛ nu wola, kɔligiti ti ɠɛni Kaalamɛle taa goi zu. Baalagi ɠɛni zea ga waasaʋagɔ (3.000), bolii ɠɛ zea ga waagila (1.000). Niima ziɛgi zu é ɠɛni Kaalamɛle, é ɗa ná-baalagiti maaleɠai leʋe. 3 Zunui nii ɠɛni ga Kalɛɓe mavofodai zu nui ta, daa ɠɛni ga Naɓale, anzai laa ɠɛ ga Aɓigayile. É ɠɛni ga ɠima anzanu, pagai ɓalaa, kɛlɛ sinigi ná-fai ɓaani, suɲɔu. 4 Davide mɛnini teʋebai zu ga Naɓale ɠa ná-baalagiti maaleɠai leʋezu. 5 É yeeloni zunu loungo puugɔ ʋa, ná-nuiti saama, é ɠɛ ti ma: «À li Kaalamɛle, wo Naɓale luʋɔ bɛ̀. 6 Wo ɠɛ ma: ‹È-zii zuɠooza! Ziilɛigi ɠɛ è ʋɛ, ɗa-o, ɗa-ʋɛlɛyeɠei-yo, ta nii pɛ é ga ɗɔnɔ. 7 Gè mɛnigɛ ga ɗa ɗa-ʋaalagiti maaleɠai leʋezu. Tama ɗa-ʋaala makɛ nuiti ti ɠɛa gi ʋa, gi la faa ɲɔu ɠɛɛni ga tiye, ti la ʋalani ani nɔpɛ ma, yeeɠɛɠalai naa pɛ su, nii ti kɛa Kaalamɛle. 8 Ti ɠaazaɠa ma, ta zoo ti bo è ma. Naa ɠa é ba, yeezei nà-zunu loungoiti bu ga pagɔ, tɔɔzei gi ʋaa gi zoloo fɛti voloi ma. Naa maaʋele ma, nii nɔpɛ é è ya, naa ve gi ya, gɛi gi ga ɗa-wotiɠɛ nuiti, gá è-loun zunui Davide.› » 9 Davide ná-zunu loungoiti seeliai ma, ti naama wooiti pɛ daazeelini Naɓale ma, Davide laaseigi zu. Naa ʋoluma ti maaɠɛ kpɔ. 10 Naɓale ti wooɠaaʋoteni, é ɠɛ ti ma: «Ɓɛ ɠa é ga Davide? Ɓɛ ɠa é ga Izayi ná-doun zunui? Niizu botiɠɛ nu mɔinmɔin ka ʋelazu, ti zeɠe ta-luɔ kɛɛɠɛiti pɔ bɛ. 11 Nɔ̀un gè nà-ɓului, ta nà-ziɛi zeɠe, ta nà-suai, nii gè kɛʋele ɓɛtɛai nà-baala maaleɠa leʋe nuiti bɛ, gè fe naama nuiti zea, niiti gè la ti-zeɠezu ɠwɛɛ?» 12 Davide ná-zunu loungoiti ti ʋoluazoni, ti ɠale ma, ti Naɓale ná-kpɔɛiti pɛ daazeeli Davide ma. 13 Davide ɠɛni naazu ná-kɔɔɠɔ nuiti ma: «Wo ɠilagilagi pɛ ge ná-boɠa zɔkpɔi ɠili zaama.» Davide ta ná-nuiti pɛ ti ta-woɠa zɔkpɔiti gilini zaama. Nu unnaanigɔ (400) ɠa é ʋilɛni polu, nu unfelegɔ (200) yɛ kasɔiti koba. 14 Naɓale ná-botiɠɛ nu ɠila ge liini, é naama vaiti pɛ daazeeli Naɓale anzai Aɓigayile ma, é ɠɛ ma: «Davide keelaiti teʋegɛ, ti zeɠe teʋebai zu, ga ti gá-ɠalamɔin luʋɔ, kɛlɛ é la yeezeini ti wu ga pagɔ. 15 Nui naati ma, ti ɠɛni ga nu ʋagɔ gi ʋɛ, ti la faa ɲɔu nɔpɛ kɛɛni ga giye, ani nɔpɛ ge la ɠulani gi ya, yeeɠɛɠalai naa pɛ su, nii gi kɛɛni ti ɠoba. 16 Kpidii ʋɛɛ folo ʋa, ti ɠɛa gi ma ga siɠigi, yeeɠɛɠalai naa pɛ su, nii gi kɛɛni ti ɠoba, gi ɗa baalagiti kɔnɔkula. 17 Naa ɠa é ba, ɠisiɛ naazu ga pagɔ, nii ɗa kɛ, mazɔlɔɔ ni è la faa ɠɛɛni, maanɔɠɔi ɠa é ʋaazu gá-ɠalamɔin ʋɔ, ta ná-pɛlɛyeɠei. Tɔ ma, toɠa ga nu ɲaka, nu la zooga faa nɔpɛ bosu ma.» 18 Aɓigayile suvilɛni, é ɓulu unfelegɔ (200) zeɠe, kɔlɔ woole felegɔ dɔɔi zu, baala dɔɔlugɔ niiti ti ɠɛʋele ɓɛtɛa ɠɛni de niina, kɔɠɔ ganii zu lɔɔlugɔ ani ɠae ɠeegai zu, leezɛn vɔɔi zeeɲɛ ungila (100), ta kooleɠoole fɔɔi ma ɓuun ba unfelegɔ (200), é ti pɛ daani soovalegiti kɔma. 19 É ɠɛ ná-botiɠɛ nuiti ma: «À lo tùɠɔ, nà wo ʋolu.» Sinigi Naɓale la ɠɛni faa nɔpɛ kwɛɛ naama vaiti su. 20 É ɠɛni zeini ná-soovalegi ɠɔma, é ɗa yei, gizei ɠɛni gaazu luɠɔ. Naazu ma Davide ta ná-kɔɔɠɔ nuiti ti ɗa ʋa ga pɔ pelei, gaamago é ɓɔɠɔ ɠaani naati kakala. 21 Naazu Davide ɓegai ga ɠɛ ɓɔɠɔ ma: «Gè nii ɠɔligiti makɛgɛ nɔ fuun teʋebai zu, ga ta mina loo ya, é nà-faa ʋagɔi zuloa ga faa ɲɔi. 22 GALA ge sò ná-ziiɠaawanai pɛ su, ni é zo za ma, é li lina ʋɔ, nà zunu ɠila kpalaa zɛ ná vulua Naɓale ná-pɛlɛi wu.» 23 Aɓigayile Davide ɠaai ma, é ɠulani ná-soovalegi ɠɔma ga suvilɛ, é ɠaazuyei zooi ma, é la Davide ɠɔɠɔwu. 24 Naa ʋoluma é looni kɔɠɔwu, é ɠɛ ma: «Màliɠii, va bu ga niima vaa ɲɔi pɛ ge ɠɛ ga ùnma ɠasɔ! Va bu, nɛ̀i gè ga ɗa-wotiɠɛ anzanui, gè ɓɔɛ è ʋɔ, woilo gòo ma. 25 Màliɠii, mina wɛlɛ nu ɲakai Naɓale ʋa, mazɔlɔɔ daaseigi sogɛ ɠɛzɛɠɛzɛ: Daa ɠa ga Naɓale, poluʋɛ ga nu ɲakai, tama ʋele ɠana é ziɛzu la. Nɛ̀i gè ga ɗa-wotiɠɛ anzanui, gè la zunu loungoiti kaani, niiti è ti leʋeni. 26 Kɛlɛ gè ɠonaa Ɠɔoɠɔ GALAGI ma, nii é vulua, ta ɗa ɓalaa ma ɗɛi è vulua, ga Ɠɔoɠɔ GALAGI ɠa é pele ɓesaga è luɠɔ ga è mina lɔ nu ʋaa vaa zu, ɓaa è ʋa potokulai ɠɛ ɓɔɠɔ ʋɛ. Màliɠii è zili nuiti pɛ ti ɠɛ ga Naɓale ɠɛʋele. 27 Yeezei vebɛanii nii wu, gè ʋaa la, è gaaɠwɛ zunu loungoiti ba, niiti ti è ʋolu, màliɠii. 28 Soma è nà-faa ɲɔi zuvaayɛ bɛ̀, nɛ̀i gè ga ɗa-wotiɠɛ anzanui. Dàaʋɛ da ga Ɠɔoɠɔ GALAGI ɠa masadai veezu è ya, ɗa-o, ɗa-ʋɛlɛyeɠei-yo, mazɔlɔɔ màliɠii ɗa losu ɠɛɛzu Ɠɔoɠɔ GALAGI ná-kɔɔɠɔ vaiti su. Ni nu a wɛlɛna è-ziɛ ʋelei ʋa, è-zii ma voloiti su, nu la è ɠa ga sɔba nu. 29 Ni nui ta a ʋilɛna è ʋolu ga é è ʋaa, Ɠɔoɠɔ GALAGI ɗa-ƓALAGI ɠa màliɠii è-yɛnvui makɛ ɠoba, nii a kɛ è yɛ fulu nuiti saama. Kɛlɛ toɠa è zili nui yɛnvui ʋili ya poun, eɠɛ fɛlɛvɛlɛ ka ani ʋili ya. 30 Siɛgi zu Ɠɔoɠɔ GALAGI ɓesu la ga faa ʋagɔi naati pɛ kɛ è ʋɛ, niiti é minazeɠeai ga tiye è ʋɛ, é è ɠɛ ga Izilayɛle ná-totuɠɔi, 31 màliɠii è-yii la ɓɔlɔa è ɠoozu, ɓaa è ʋa nimiza ɓɔɠɔ ma ga è ʋa ɠɛ nu ʋaani nɔ fuun, ɓaa è ʋa potokulai ɠɛ ɓɔɠɔ ʋɛ. Siɛgi zu Ɠɔoɠɔ GALAGI ɓesu la ga faa ʋagɔi ɠɛ è ʋɛ, màliɠii, ɠizɛ sù, nɛ̀i gè ga ɗa-wotiɠɛ anzanui.» 32 Davide ɠɛni Aɓigayile ma: «Mamagi ɠa Ɠɔoɠɔ GALAGI ʋɛ, Izilayɛle ná-GALAGI, nii é è leʋega za dàaɠomisu. 33 Tuya ɠa è ma ɗa-ɠimala ʋagɔi ma vaa zu, tuya ɠa è ma ɓalaa è pele ɓesa fai zu tùɠɔ ga gè mina nu ʋaa, gè mina potokulai ɠɛ ɓɔɠɔ ʋɛ. 34 Gaamazu gè ɠonaa Ɠɔoɠɔ GALAGI ma, Izilayɛle ná-GALAGI, nii é vulua, ga é pele ɓesagɛ tùɠɔ ga gè mina faa ɲɔu ɠɛ ga ɗe. Ni naa laade, ni è la ɠɛni dàaɠomini fala, é zo niizu ma, é li lina sobui ʋɔ, zunu ɠila kpalaa ge la mɔ ɠɛni yɛga vulua Naɓale ná-pɛlɛi wu.» 35 Davide yeezeini vebɛanii wu, nii Aɓigayile ʋaani la pɔ, é ɠɛ naa ma: «Ɠale ma, è li ɗa-ʋɛlɛi wu, ziilɛigi ɠɛ è ʋɛ. Gè è woomɛniga, gè yeezei bu, eɠɛʋelei è bogai la mà.» 36 Aɓigayile zeeliai ma, é kaani ga Naɓale ɠa fɛtii ɠulazu eɠɛ masa. Gola ɠoozunɛɛni, dɔɔi sogai, é la ɠɛni faa nɔpɛ boni naa ma, eyɛsu sobui. 37 Kɛlɛ sobui, Naɓale ná-dɔɔi ɠulaai ma gaazu, anzai naama vaiti pɛ boni ma, niiti ti leʋegai. Naɓale yii doɠani, suvidi. 38 Folo puugɔ leʋegai ma, Ɠɔoɠɔ GALAGI doɠani, é za. 39 Davide mɛnigai ma ga Naɓale zaa, é ɠɛni ma: «Mamagi ɠa Ɠɔoɠɔ GALAGI ʋɛ, nii é màaloboga, siɛgi zu Naɓale ɠɛni pòomusu la. Mamagi ɠa bɛ, é pele ɓesaga tùɠɔ, ga gè mina faa ɲɔu ɠɛ. Tɔ ɠa é Naɓale ná-faa ɲɔu ɠasɔi la tɔ ɓɔɠɔ unma.»Naa ʋoluma, Davide keela leʋeni Aɓigayile ma ga naa ɠɛ ga anzai. 40 Ti zeelini Aɓigayile ʋɔ bɛ Kaalamɛle, ti ɠɛ ma: «Davide gi leʋegɛ è ʋɔ bɛ, mazɔlɔɔ toɠa pɔ ga è ɠɛ ga anza.» 41 É wuzeɠeni, é nɔkɔ zooi ma, é ɠɛ ma: «Kɛ̀ʋele ɓɛtɛʋɛ, ga gè ɠɛ ga duɔi, gè ɗa màliɠii ná-botiɠɛ nuiti kɔɠɔiti maagba.» 42 Naa ʋoluma é wuzeɠeni, é zei soovalegi ɠɔma, é ʋilɛ pelei ma ta Davide ná-keelaiti, ná-botiɠɛ anzanu lɔɔlugɔ ɠa é maazaani. Ʋele ɠana é ɠɛɛni la ga Davide anzai. 43 Tɛi Davide Zizeleyɛle nui Ayinoame zeɠeni, ti felegɔ ti ɠɛni ga Davide anzaiti. 44 Mikale nii é ɠɛni ga Davide anza mɔungi, naa kɛɛɠɛ Sayile feeni Palati ʋɛ ga vului, Layise ná-doun zunui, nii é ɠɛni ga Galime nui.

1 Samuel 25 (TOMA)

In Other Versions