2 Chronicles 25 (TOMA)
1 Amasia ná-konagi ɠɛni ga puufelegɔ maazu lɔɔlugɔ (25) siɛgi zu é zeini la ga masagi. Kona ʋuufelegɔ maazu taaʋuugɔ (29) ɠa é kɛɛni masadai zu Zeluzalɛme. Dee laa ɠɛni ga Yoadan, Zeluzalɛme nu ɠɛni de. 2 É Ɠɔoɠɔ GALAGI yiima vai ɠɛɛni, kɛlɛ é la ɠɛni naa ɠɛɛni ga zii pɛ. 3 Sei ʋele ɓɛtɛai ma nɔ feya masadai zu, é kɛɛɠɛ ná-botiɠɛ nu wolaiti pɛ paani, niiti ti kɛɛɠɛ ʋaani. 4 Kɛlɛ é la ɠɛni naati ti-lointi paani, eɠɛʋelei sɛʋɛai la Moize ná-tɔ sɛʋɛi zu, ʋɛ Ɠɔoɠɔ GALAGI bogai ná ga: «Nu la ɠɛɛɠɛiti paa lointi ta-vaa zu, nu la lointi paa ɠɛɛɠɛiti ta-vaa zu, kɛlɛ ɛsɛ gilagilagi ɠa za tɔ ɓɔɠɔi ná-kotoi vaa zu.» 5 Amasia Zuda ta Ɓɛnzamɛn nuiti pɛ gaalɛɛni ba, é zɛba é nu waagilagila ta nu ungilagila kundiɠiiti sei bolodai ɠilagilagiti pɛ su. É nuiti daaseigiti sɛʋɛni é zo kona ʋuufelegɔ nuiti ma, é lɛ maazu, zunu waaunsaʋagɔ (300.000) ɠa daaseigi zɛʋɛni, niiti ta zoo kɔɔ ɠɔɔzu, ti zoogai kpɛɛin ta kɔɔɠɔ zɛpɛ golai la. 6 Naa ʋoluma, é kɔɔɠɔ nu ɠɛzɛɠɛzɛ waaungila (100.000) geyani Izilayɛle masa zooi zu ga kilo waasaʋagɔ (3.000) walii zu. 7 GALA goo wo nui ta ʋaani, é ɠɛ ma: «Ee, masagi! Mina va bu Izilayɛle ɠɔɔʋɛbɛ ʋa ʋilɛ è ʋolu kɔɔɠɔzuʋɛ, tɔɔzei Ɠɔoɠɔ GALAGI la Izilayɛle masa zooi ʋa, Efelayime nui tɛiti. 8 Ɗa kulana woizu, è ti ʋilɛ ʋolu kɔɔmaʋɛ, è kɔɔi ɠɔ ʋa ga è-zɛbɛi pɛ, GALA ka è loo bu è zili nui ɠaazu, tɔɔzei zobogi ɠa GALA bɛ ga é kpɔbai ɠɛ ta é nu loo bu.» 9 Amasia GALA goo wo nui ɠaazaɠani, é ɠɛ ma: «Walii kilo waasaʋagɔi (3.000) nii gè feai Izilayɛle ɠɔɔʋɛbɛi ya, naa ɗa ɠɛ ɠale naazu?» GALA ná-nui gooɠaaʋoteni, é ɠɛ ma: «Ɠɔoɠɔ GALAGI ɠa zoo é poto fe è ya, é ʋooʋa naa ma.» 10 Amasia zɛba é kɔɔʋɛbɛi pɛ gaaɠale ma, niiti ti zeɠeni Efelayime. Kɛlɛ naati ziiɠaawanani Zuda ma, ti ɠaleni ma ta-yooi zu ga ziiɠaawana wolai. 11 Amasia yiilɔɔni, é lo ná-kɔɔʋɛbɛi luɠɔ, é li, é Edɔme nu waapuugɔ (10.000) ʋaa Kpolo Ʋɛtugi zu. 12 Zuda nuiti ti nu waapuugɔ (10.000) zoni ga ti ma vului, ti li ga naati fasa ɠize golai ta unmaʋɛ, ti naati daaʋili fiilɛi zu, ti ma ɠaeiti suɠaleɠale. 13 Naama ziɛgi zu, salaʋusui niiti Amasia ti ɠaaɠaleni ma ga ti mina ʋilɛ polu kɔɔɠɔzuʋɛ, naati ti lɔɔni Zuda laa wolaiti su, é zo Samali, é zeeli Ɓɛte-Ɠolon. Ti nu waasaʋagɔ (3.000) ʋaani, ti li ga kɔɔzogani mɔinmɔin. 14 Amasia ɠalegai ma ma, é zeɠe kɔɔmaʋɛ, ʋɛ é vɔnini ná Edɔme nuiti ma, é ʋaani ga naati ta-ɠalagiti, ti ga vololibaiti, é ɗa nɔkɔ ti wu, é ɗa ansansegiti gala ga zalaɠai naati bɛ. 15 Ɠɔoɠɔ GALAGI zɛba é yiiɠaawana ma, é GALA goo wo nu leʋe ma, naa gaazaɠa, é ɠɛ ma: «Lee vaa zu è ɠaaʋotegai nuɓusɛi niiti ta-ɠalagiti ma, niiti ti la vɔlɔ zooni ti ʋa ti ɓɔɠɔ nuɓusɛiti kula è ya?» 16 Kɛlɛ masagi kpɔɛi leʋeni da, é gooɠaaʋote, é ɠɛ ma: «É vɔ è ʋa! Ɗa ɠa ti è ɠɛai ga masagi ná-tɛnɛbo nui ɓaa? È la dama, nu mina è ʋaa nɔ ʋa fuun!» GALA goo wo nui la ɠɛni sasani, kɛlɛ é ʋa ɠɛ é ɠula, é ɠɛni ma: «Gè kwɛni niina ga GALA ge devea ga é è undaaʋili, tɔɔzei niima vai ʋa è kɛai, ta è la kɛɛni è ʋa woilo nà-tɛnɛ gooi ma.» 17 Zuda masagi Amasia yiimazeɠeni ga koba nuiti ta-lɛnɛ gooi, é zɛba é keelaiti teʋe Izilayɛle masagi Zoase ma, Yoaɠaze ná-doun zunui, Zewu ná-dounloin, é ɠɛ naa ma: «Ʋa, de ɠomi, de kɔɔi ɠɔ.» 18 Kɛlɛ Izilayɛle masagi Zoase gooɠaaʋoteni, é ɠɛ ma: «Yeeta Liɓan yooi zu, ɠain gulu goi ta ɠɛni sɛdele gului ma: ‹È-loun anzanui ve, é zei dòun zunui ʋɛ ga anza,› kɛlɛ Liɓan lɔɓɔ zuaiti ti leʋeni ga ɠain gului ʋɔ pelei, ti suɠolo ga ɠɔɠɔi. 19 Ɗa ɠɛɛzu ɓɔɠɔ ma: ‹Gè vɔniga Edɔme nuiti ma,› è ɠaazulɛa, wasogi lɔ ɗɔungi zu. Nii soloogai è ma, naa ɠa ga, yɛ è-zeizuʋɛ. Leeni vaa zu ɗa ɓɔɠɔ lɔ fai ta zu nii gaaɓela ge la ʋani ɗa ɓɔɠɔi ma, naa ʋɛɛ Zuda masa zooi ʋa?» 20 Kɛlɛ Amasia la ɠɛni woiloni goo ma, tɔɔzei GALA ge ɠɛni pɔ ga tɔ-o, ná-nuɓusɛiti-yo, ti loo bu, tɔɔzei ti ɠaaʋoteni Edɔme ɠalagiti ma. 21 Názu ɠa Izilayɛle masagi Zoase lɛɛni la, ti kɔɔi ɠɔ ta Zuda masagi Amasia Zuda laai zu daa ga Ɓɛte-Semɛse. 22 Zuda ɠɔɔʋɛbɛi looni bu Izilayɛle gelei ɠakala, ti ʋela naati ba, ɛsɛ ge li ná-taa zu. 23 Izilayɛle masagi Zoase Zuda masagi Amasia zoni Ɓɛte-Semɛse. Amasia ɠɛni ga Zoase ná-doun zunui, é ɠɛ ga Aɠazia ná-dounloin. É liini Zeluzalɛme, é siɠigi ʋaaleʋe ga mɛtɛlɛ unfelegɔ (200) ɠɛɠala, siɠidaʋɛti zɔɠɔzu, niiti ti laa ga Efelayime ta Zokogi. 24 É zanugi ta waliiti pɛ seɠeni, naa ʋɛɛ sɔɔlaiti pɛ ba ti ɠɛni GALA sei ʋɛlɛi wu, nii Woɓɛde-Edɔme ɠɛni unda, naa ʋɛɛ masa pɛlɛi ma naavolo makɛsuʋɛ geleiti ba, é duɔiti soni ɓalaa, naa ʋoluma é ɠale ma Samali. 25 Zoase ná-doun zunui Amasia Zuda masagi kona puugɔ maazu lɔɔlugɔ (15) ɠɛɛni vulua, Izilayɛle masagi Zoase zaa ʋoluma, Yoaɠaze ná-doun zunui. 26 Amasia ná-kɛɛwotii mɔtaiti, é zo ma mɔungiti ma, é li gaaɓelagiti pɔ, naati sɛʋɛʋɛ Zuda masagiti ta Izilayɛle masagiti ta-zɛʋɛi zu. 27 Siɛgi zu Amasia ʋoluaveni la Ɠɔoɠɔ GALAGI ʋa, ti yaavai ɠilini ma Zeluzalɛme, é ʋela, é li Lakise, kɛlɛ sili nuiti ti numaa leʋeni polu Lakise ga ti paa miná. 28 Ti ma ʋoomai laani wotoloi zu, sooiti ti ɗa mɛɛn, ti ʋaa la, ti maaɠulu mɛmɛwolani ta-ɠabamaʋɛ Zeluzalɛme, Zuda yooi zu.
In Other Versions
2 Chronicles 25 in the ANTPNG2D
2 Chronicles 25 in the BNTABOOT
2 Chronicles 25 in the BOATCB2
2 Chronicles 25 in the BOGWICC
2 Chronicles 25 in the BOHNTLTAL
2 Chronicles 25 in the BOILNTAP
2 Chronicles 25 in the BOKHWOG
2 Chronicles 25 in the KBT1ETNIK
2 Chronicles 25 in the TBIAOTANT