2 Chronicles 25 (YAPE)

1 Amaziah e rliw’ nge lal e duw rok me mang pilung, me gagiyeg u Jerusalem ni rliw’ nge mereb e duw. Chitiningin e Jehoaddin nu Jerusalem. 2 I rin’ e tin nib m’agan’ SOMOL ngay machane i rin’ ni gathi rib pasigan’ ngay. 3 Yug nap’an ni milfan e gagiyeg ko pilung ngak, me yog ni ngan li’ nge yim’ e pi tolang nra thanged e pogofan rok e chitamngin. 4 Machane de li’ pifakrad, ya fol ko n’en ni yog SOMOL u lan e Motochiyel rok Moses ni ga’ar: “Gal labthir e dab ni thang e pogofan rorad ni bochan e kireb nike rin’ pifakrad, ma bitir e dab ni thang e pogofan rorad ni fan ko oloboch nike rin’ e gallabthir rorad; girdi’ e yira thang e pogofan rorad ni kemus ni fan ko pi oloboch ni yad e kar ngongliyed.” 5 Me yarmiy Amaziah ni Pilung urngin e pumo’on ko fa gal ganong rok Judah nge Benjamin nge yo’or ulungnag, ra baken e girdi’ ma reb e ulung, me tay e pi tolang ko salthaw ni ngu’ur gafaliyed e pi ulung nem ni boch e 1,000 girdi’en ma boch e 100 girdi’en. Pumo’on ni un ngay e rliw’ e duw yangren ngalang, yad dalip mir’ay e bbiyu’ u gubin. Ka ni mel’egrad ni ngar manged salthaw, ni ka ra fal’eged rogorad ni ngar’uned ko mael, yad ba salap ko cham ko sarey nge shield. 6 Miki immoy 100,000 e salthaw nu Israel niki tayrad e en pilung ni ngar’uned ngorad me pi’ puluwrad ni gonapan aningeg e ton e silber. 7 Machane me yan ba profet ngak fare pilung nge ga’ar ngak, “Dabi un e salthaw nu Israel ngom. Ya demoy SOMOL rok e girdi’ nu ley ni Lel’och e Nam. 8 Rayag ni ga be leamnag ni yad ra ayuwegnem ngam gel, machane Got e ir e bay gelngin nra gel nigey fa me’waer nigey, ma ra pag e pi to’ogor rom ngar gelgad ngom.” 9 Me fith Amaziah fare profet ni ga’ar, “Me ere fapi silber ni aram urngin ni ku gu pi’ ni puluwrad e bayi di’in?”Me fulweg fare profet ni ga’ar, “I SOMOL e rayag rok ni nge pi’ boch ngom ni kab yo’or ko tinem!” 10 Ma aram me yog Amaziah ngak fapi salthaw nike pi’ puluwrad ni ngar’uned ngak, ni ngar sulod nga taferad. Ma aram miyad sul nga taferad ni kar damumuwgad ngak e girdi’ nu Judah. 11 Mri athamgil Amaziah nge pow’iy fare raba’ i salthaw rok ngranod ko fare Loway ni Sol fithingan. Mar chamgad u rom ngar li’ed ragage bbiyu’ e salthaw nu Edom 12 ma ku 10,000 e ra koled ngar feked ni kalbus. Miyad fek fapi kalbus nga daken bangi rech ko fare binaw nu Sela ngar thuruyed fapi cha’ nga but’ ngar awgad ko malang u tan e rech ngarm’ad. 13 Ngiyal’nem e fapi salthaw nu Israel nde pagrad Amaziah ni ngar uned ngak ko mael e ra chelgad ngar m’aged e mael ngak fapi binaw nu Judah ni bay u thilin yu Samaria ngu Beth Horon, ngar li’ed 3,000 e pumo’on miyad fek bokun ban’en. 14 Nap’an ni sul Amaziah nike gel ngak piyu Edom, me fek e pi liyos rorad nge un ngak, me tay ngalang ngi i tay farad, mi i urfiy e incense ni fan ngorad. 15 Ren’ey e k’aring e damumuw ngak SOMOL, ma aram me l’oeg ba profet nge yan ngak Amaziah. Me ga’ar fare profet ngak Amaziah, “Mangfan ni ka mu tayfan bogi got rok boch e nam ni mus ngak e girdi’ rorad ma de yag ni ngar ayuweged yad rom?” 16 Dawori mu’ fare profet ko numon me ga’ar Amaziah, “Mog wu’in e kan tem ni gur e tafonow rok e en pilung? Mu tal ko welthin, fa ngugog ngan li’em nga mum’!”Me tal fare profet ko welthin nga tomuren nike ga’ar, “Aram e kugnang e chiney nike turguy Got ni nge thirifem u but’ ni bochan e ka mu rin’ urngin e pin’ey ma ka mu fek yathin e fanow rog.” 17 Me makath Amaziah ni Pilung nu Judah nge pi tafanow rok nib togopluw ngak yu Israel. Ma aram me l’oeg e thin nge yan ngak Jehoash ni Pilung nu Israel nib mo’on ni fak Jehoahaz nib mo’on ni fak Jehu, ni be yog ngak ni ngar mael gow. 18 Ba’aray e fulweg rok Jehoash ngak Amaziah: “Immoy bake rachangal ni pan u daken fapi burey nu Lebanon me l’oeg e thin ni nge yan ngak bake gek’iy ni cedar ni ga’ar: ‘Mu pi’ fare rugod ni fakam nge le’engiy e re mo’on ni ba’aray ni fakag.’ Me yib ba gamanman ni malboch ni yug be yan nge yot’ daken fare ke rachangal nga but’. 19 Amaziah chiney e ga be uf ngay ni ka mu gel ngak piyu Edom, machane gu be yog ngom e tin bfel’ ni ngam par u tabnaw rom. Mangfan ni ngam pug e oloboch ngalang ni kemus ni nge fek e riya’ i yib ngom nge tirom e girdi’?” 20 Machane me turguy Amaziah u wan’ ndabi motoyil. Mm’agan’ Got ngay ni nge waer Amaziah ni bochan e ke tayfan e pi liyos ni got nu Edom. 21 Ma aram me yan Jehoash ni Pilung nu Israel ko mael nib togopluw ngak Amaziah ni Pilung nu Judah. Ra mada’ gow nga Beth Shemesh u Judah, 22 me waer fare raba’ i salthaw nu Judah, me mil e pi salthaw nga taferad. 23 Me kol Jehoash i Amaziah nge fek i yan nga Jerusalem. Me buthug e yoror ko fare binaw nga but’ ni tabab ko fare Garog ni Efraim nge yan ko bin tabthung e Garog, ni pal’afngin e l’agruw mir’ay e yard. 24 Me fek nga Samaria urngin e gol nge silber nu lan fare Tempel nge gathon ni i matnagiy e pi’in owchen Obed Edom, nge machaf u tafen e pilung. Ma ku errogon e girdi’ niki fek boch ngar uned ngak. 25 I Amaziah ni Pilung nu Judah e par nib fos ni ragag nge lal e duw nib n’uw nap’an ngak Jehoash ni Pilung nu Israel. 26 Urngin e tin ki i rin’ Amaziah u tabolngin e gagiyeg ni i tay nge mada’ nga tungun e go’ kan yoloy ngalan fare babyor ni Chepin e Pilung nu Judah ngu Israel. 27 Ka nap’an fa ngiyal’ ni cheal nge togopluw ngak SOMOL, mi ni tababnag ba makath u Jerusalem nib togopluw ngak. Me tomur riy me mil nge yan ko fare binaw nu Lakish, machane me lek e pi to’ogor rok e ngaram ngar li’ed nge yim’. 28 Mi ni fek e ldow rok u daken ba os i yan nga Jerusalem, mi ni k’eyag u lan fapi low ko yam’ rok e pilung nu lan fare Binaw rok David.

2 Chronicles 25 (YAPE)

In Other Versions