2 Chronicles 35 (TOMA)
1 Zoziase Pake fɛtii ɠulani Zeluzalɛme, Ɠɔoɠɔ GALAGI lɛbi vai ma, ti fɛti zuaiti kɔdaaleʋeni konagi ma alu mɔungi ma volo puugɔ maazu naanigɔi (14) ma. 2 É zalaɠa ɠula nuiti pilɛni ti-losuʋɛti ʋolu, é naati iɲɔdɔ ta-wotiiti su, nii ti kɛɛzu Ɠɔoɠɔ GALAGI zei ʋɛlɛi wu. 3 Naa ʋoluma, é ɓɔɛni Levi mavofodaiti pɔ, niiti ti veai Ɠɔoɠɔ GALAGI ʋɛ, ga ti ɗa nuɓusɛi pɛ kala. É ɠɛni ti ma: «À minazeɠe kesui la Ɠɔoɠɔ GALAGI zei ʋɛlɛi wu, nii Davide ná-doun zunui Salomɔn toni, Izilayɛle masagi. Niima ziɛgi zu wo ɓɛdɛ la mɔ ba ga wo da ɠɔma, wo ɗa leʋe da. À botii ɠɛ wa-ƓALAGI, Ɠɔoɠɔ GALAGI ta ná-nuɓusɛi Izilayɛle ʋɛ. 4 À ɓɔɠɔ zei kpasu, wo ɓɔɠɔ ɠaaɠwɛsu ga pɛlɛyeɠe ʋelei, ta botii ɠɛ ɓɔgiti gaaɠwɛ, eɠɛʋelei Izilayɛle masagi Davide deveni la ta ná-doun zunui Salomɔn. 5 À wo-losuʋɛti seɠe ada ɲadegai wu, nii a kɛ Levi ʋɛlɛyeɠe ɠila ge ɠɛ ná wo-ɠɛɛlointi ta-ʋɛlɛyeɠei ɠilagilagiti faa ma nuɓusɛi zaama. 6 À Pake baala ziʋoiti paa. Naa ɠa é ba, à ɓɔɠɔ ɲade, wo Pakegi ɠɛʋele ɓɛtɛ wo-ɠɛɛlointi bɛ, eɠɛʋelei Ɠɔoɠɔ GALAGI laawooi la nii é puuni Moize la ga é bo.» 7 Pake fɛtii ɠula vai zu Zoziase ɠulani ga: baala ziʋo ta boli yiʋo waaʋuusaʋagɔ (30.000), naa ʋɛɛ nikɛ zinɛ waasaʋagɔ (3.000) ʋa, é naati pɛ kulani kpɔɠɔ logani ɓulugi zaama nuɓusɛiti pɛ faa ma, niiti ti ɠaalɛɛni ba Zeluzalɛme. 8 Ná-nu wolaiti ɓalaa ti faaɓɔɠɔiti kɛɛni nuɓusɛi ʋɛ, naa ʋɛɛ zalaɠa ɠula nuiti ta Levi nuiti ba. Yilikiya, Zakali, ta Yeɠiyɛle, niiti ti ɠɛni ga GALA sei ʋɛlɛi ma ɠundiɠiiti, naati ti baala ziʋo ta boli yiʋo waafelegɔ undɔzita (2.600) veeni zalaɠa ɠula nuiti bɛ, ta ti nikɛ zinɛ unsaʋagɔ (300) ve Pake fɛtii ɠula vai zu. 9 Levi nuiti ta-ɠundiɠiiti Konania ta kɛɛɠɛlointi Semaya ta Netaneyɛle, naa ʋɛɛ Ɠasaɓiya, Yeiyɛle ta Yozaɓade ʋa, ti baala ziʋo ta boli yiʋo waadɔɔlugɔ (5.000) veeni Levi nuiti bɛ Pake fɛti vaa zu, naa ʋɛɛ nikɛ zinɛ undɔɔlugɔ (500) ʋa. 10 Pɛtɛ ʋelei ti fɛtii zeini la kpasu: Zalaɠa ɠula nuiti ti loni ti-losuʋɛti, Levi nuiti ti ɠaaɠwɛsu ga ʋelei ta-ɓɔgiti ti la, é zoloo devei naa ma nii masagi boni. 11 Nuɓusɛiti ti ɠɛni Pake fɛtii ma zuaiti paazu. Levi nuiti ti ɠɛni ma ɲamai veezu zalaɠa ɠula nuiti zea, naati ti ɗa pili zalaɠa ɠulazuʋɛ ma, naa ʋoluma Levi nuiti ti ɗa zalaɠa zuaiti kɔlɔɔ. 12 Ti ɠɛni gala zalaɠaiti puuzu yɛ, nii a kɛ ti ti ve pɛlɛyeɠei ɠilagilagiti ta-ɓɔgiti zea, ti ʋa daazeeli ga zalaɠai Ɠɔoɠɔ GALA ma, eɠɛʋelei sɛʋɛai la Moize ná-sɛʋɛi zu. Ʋele nɔ ɠana ti kɛɛni la ga togani ɓaazagiti. 13 Ti Pake baala ziʋoiti mɔni, eɠɛʋelei deveai la tɔgi zu, naama ziɛgi zu ti ɗa zɔɔma zalaɠa zua ɲadegaiti gili diɠiiti su, naa ʋɛɛ ɓɔniiti ta aniɲakaiti zɔiti ba, nii a kɛ ti ʋa, ti ɠaaɠwɛ fala nuɓusɛi ʋa. 14 Naa pɛ poluma, Levi nuiti ti ɠɛni Pakegi ɠɛʋele ɓɛtɛzu tiya ɓɔɠɔi ta zalaɠa ɠula nuiti bɛ, tɔɔzei Aalɔn mavofodaiti ti zalaɠa ɠula nuiti, naati unpilɛga ɠɛni de gala zalaɠaiti kula vai ma ta sua wulɔiti gala vai ma é zo sobui ma é zeeli kpidii ma. Naa ɠa é kɛɛni Levi nuiti ti ɠɛni Pakegi ɠɛʋele ɓɛtɛzu ɓɔɠɔ ʋɛ ta Aalɔn mavofodaiti. 15 Gɛingɛin gani nuiti ti ga Azafe mavofodaiti, naati ti ɠɛni loni ti-losuʋɛti, eɠɛʋelei Davide deveni la, ta Azafe ɓɔɠɔgoi, naa ʋɛɛ Ɠeman ʋa ta masagi ná-GALA goo wo nui Yedutun. Siɠida makɛ nuiti ɓalaa ti ɠɛni siɠidaʋɛti pɛ, ti la ɠɛni ta-wotii zuɠoloɠoloni, tɔɔzei ti-wɔɔlaiti Levi nuiti ti ɠɛni kɛʋele ɓɛtɛi ɠɛɛzu ti ʋɛ. 16 Ʋele ɠana naama voloi Pake fɛtii ɠula vai pɛ ge zeini la kpasu, Ɠɔoɠɔ GALAGI ná-lɛbiyai vaa ma, ta gala zalaɠaiti daazeeli vai Ɠɔoɠɔ GALAGI ná-zalaɠa ɠulazuʋɛ, ʋelei masagi Zoziase deveni la. 17 Izilayɛle nui niiti ti ɠɛni ná naama voloi ti Pake fɛtii ɠulani, ti ɓului nii lɛʋɛ la su ti naama vɛtii ɠula folo lɔfela laawu naama ziɛgi zu. 18 Kaipa é zo GALA goo wo nui Samiyɛle ná-siɛgi zu ma, Pake fɛti naa ɠɛɠala la ɠɛni dɛ ɠulani Izilayɛle. Izilayɛle masagiti ti la ɠɛni Pake fɛti zeini kpasu ga nii ɠɛʋele, nii Zoziase ta zalaɠa ɠula nuiti ta Levi nuiti ti kɛʋele ɓɛtɛni, naa ʋɛɛ Zuda ta Izilayɛle nuiti pɛ ba niiti ti ɠɛni ná, ta Zeluzalɛme nuiti pɛ. 19 Zoziase ná-masa fai ma ɠona puugɔ maazu lɔsaʋai (18) ma nɔ ɠa, ti Pake fɛtii naa ɠulani. 20 Naama vaiti poluma, Zoziase ɓegai ma ga GALA sei ʋɛlɛi ɠɛʋele ɓɛtɛ ʋolu ga pagɔ, Ezipete masagi Neko liini ga kɔɔi Kaalekemise ziɛ wolai Efelate ɠa. Zoziase liini daaɠomisu ga kɔɔi, é pele leʋe tuɠɔ. 21 Kɛlɛ Neko keelaiti teʋeni ma, ti ɠɛ ma: «Zuda masagi, lee ɠa é de yɔɠɔzu? Ɗa lɛi gè ʋa ɠɛ ʋaazu ga kɔɔi è laalɔɠɔma za. Masa kili ka gè liizu daalɔɠɔma. GALA ge ɠɛ gè zuvilɛ ga kɛa. Dama ga ɓɔɠɔ, è ʋa li GALA sakpesu, nii é bà. Ni naa laade, toɠa è ɠoloɠolo.» 22 Kɛlɛ Zoziase la ɠɛni kɛɛni é ʋa ɠale ma. É la woiloni naa ná-kpaazaɠa wooi ma, tama naa zeɠeni GALA pɔ. É ɓɔɠɔ maaʋoteni, é li naa laalɔɠɔma ga kɔɔi Megido nɛmɛi zu. 23 Siɛgi zu ti ɠɛni kɔɔi ɠɔɔzu la, mɛɛn ʋili nuiti ti sɔɔni, é zɛba é ɠɛ ná-botiɠɛ nuiti ma: «À li ga ze, tɔɔzei gòla maawanaʋɛ.» 24 Ná-kɔɔɠuluɓaiti ti kulani ná-kɔɔɠɔ wotoloi zu, ti da ná-wotoloi velesiɛi zu, ti lii la Zeluzalɛme. É zaani, ti maaɠulu mɛmɛwolani ta-ɠabamaʋɛ. Zuda nuiti pɛ naa ʋɛɛ Zeluzalɛme nuiti ba Zoziase zaa wɔlɔi woni. 25 Zelemi saa wɔlɔ wuyei ɓɛtɛni ná-faa zu. Guye loo nuiti kpein, zunu, anzanu ti pɛ ta ɗa daa lɔ guyei zu zaaɠaza, mazɔlɔɔ naa ɠɛa ga Izilayɛle nuiti kɛɛ vaa wɔlɔma. Guyei naati sɛʋɛʋɛ saa wɔlɔ wuye zɛʋɛi zu. 26 Zoziase ná-fai mɔtaiti, naa ʋɛɛ ná-kɛɛwoti ʋagɔiti ba, eɠɛʋelei sɛʋɛai la Ɠɔoɠɔ GALAGI ná-tɔ sɛʋɛi zu, 27 ta ná-kɛɛwotiiti, é zo ma mɔungiti ma, é li gaaɓelagiti pɔ, naati sɛʋɛʋɛ Izilayɛle masagiti ta Zuda masagiti ta-zɛʋɛi zu.
In Other Versions
2 Chronicles 35 in the ANTPNG2D
2 Chronicles 35 in the BNTABOOT
2 Chronicles 35 in the BOATCB2
2 Chronicles 35 in the BOGWICC
2 Chronicles 35 in the BOHNTLTAL
2 Chronicles 35 in the BOILNTAP
2 Chronicles 35 in the BOKHWOG
2 Chronicles 35 in the KBT1ETNIK
2 Chronicles 35 in the TBIAOTANT