2 Kings 6 (TOMA)
1 Yeeta GALA goo wo nuiti ta-ɠaladopoiti ti ɠɛni Elizé ma: «Wɛlɛ, ʋɛ ade gaalɛbai ɠɛɛzu ná, ná lɔiɗa ade ma. 2 Va bu gi li Zuludɛn, gi ɠilagilagi pɛ gi gulu ɠilagila teʋe, gi kota niinɛ ɠili to ade ʋɛ, gaalɛba vai zu.» Elizé ɠɛ ti ma: «À liina.» 3 Kɛlɛ ti ɠila ge maanɛɛnɛni, é ɠɛ ma: «Kalamɔn, soma è ʋilɛ gi ʋolu, ade li!» Elizé ɠɛ ma: «Zèe ɠa bu, ade li.» 4 É ʋilɛni ti ʋolu, ti li Zuludɛn, ti ɗa guluiti pɔ ná. 5 Gila ge yɛni ná-gului ʋɔsu, ná-zoovɛ ʋɛngi ɠula ga, é ʋili ziɛi wu. É ɓainga, é ɠɛ ma: «Kalamɔn, maanɔɠɔa! Gè zoovɛi nii ziingaoʋɛ.» 6 GALA goo wo nui ɠɛ ma: «Mini ɠa piligai ná?» Zunui ná lɛɛni la, Elizé zɛba é gulu ɓuɠai ta leʋe, é pili ma ada ɠilagi nɔ. Gaamago zoovɛ ʋɛngi lɛ ziɛi ɠa. 7 Elizé ɠɛni ma: «Seɠe.» Zunui yeemaale, é zoovɛ ʋɛngi zeɠe. 8 Kɔɔi ɠɛni Siili masagi ta Izilayɛle yɔɠɔzu, é ná-kɔɔɠuluɓaiti gaazaɠani, naa ʋoluma é dɛɛ ga tiye ʋɛ ná-kɔɔlaaɠai ɠɛɛzu ná. 9 Kɛlɛ GALA goo wo nui wooleʋeni Izilayɛle masagi ma, é ɠɛ ma: «Dama, mina leʋe ga niima ʋelei, mazɔlɔɔ Siili nuiti ta yeizu ga ná ʋelei.» 10 Izilayɛle masagi numaa leʋeni ná, ti ɗa wɛlɛ ʋɛ ma GALA goo wo nui ná lɛɛni la. Ná zeizu ɠɛɛni mɔinmɔin Elizé ɗa too kisu, tama é ɗa ɠɛʋele ɓɛtɛ. 11 Naama vaiti ti Siili masagi yiiɓɔlɔni gola, é ná-kɔɔɠuluɓaiti gaalɛ ba, é ɠɛ ti ma: «Yaava nui ɠa ade zaama, é Izilayɛle masagi ná-kakei ɠa, wo la pɔ wo ʋa dɛɛ ga ze ɓaa?» 12 Ti zaama gila ge ɠɛni ma: «Yaava nu nɔpɛ ge la ade zaama, màliɠii masagi. Kɛlɛ GALA goo wo nui Elizé, nii é Izilayɛle, naa ɠa é naama wooiti pɛ daazeelizu ná-masagi ma, nii kpein è bosu è laa ʋɛlɛi wu.» 13 Masagi ɠɛ ti ma: «Ʋɛ é ná, à li, wo ná ɠaiziɛ, nii a kɛ gè nu leʋe, ti so.» Ti ʋaani, ti ɠɛ ma: «Toɠa Dotan.» 14 É kɔɔʋɛbɛ wola leʋeni ná, ta sooiti, naa ʋɛɛ kɔɔɠɔ wotoloiti ba. Ti zeelini ga kpidii, ti taai maaɠaku. 15 Poluma zobui, GALA goo wo nui ná-botiɠɛ nui wuzeɠeni ga sobuzobui, é ɠula eteaʋɛ, é ka ga taai maaɠakugɛ ga sooiti ta kɔɔɠɔ wotoloiti, é ɠɛ ma: «Ee, màliɠii, da kɛɛzu ɠale?» 16 Elizé gooɠaaʋoteni, é ɠɛ ma: «Mina lua, mazɔlɔɔ zɔiti ti de ʋa, naati mɔinʋɛ é leʋe ti ʋa.» 17 Elizé GALA falini, é ɠɛ ma: «Ɠɔoɠɔ GALAGI, gaazuʋɛ zeɠe ma, é wozaɠa.» Ɠɔoɠɔ GALAGI botiɠɛ nui ɠaazuʋɛ zeɠeni ma, é ka ga gizei maalaavegɛ ga abu ba zooiti ta wotoloiti Elizé maaɠoolii zu. 18 Siili zalaʋusuiti ti ɠɛni liizu Elizé ʋɔ pelei. Elizé GALA falini, é ɠɛ ma: «Ɠɔoɠɔ GALAGI, nà è maanɛɛnɛzu, ti loɠa ga gaazuɠolei.» Ɠɔoɠɔ GALAGI ti ɠaazuɠoleni, ʋelei Elizé boni la. 19 Elizé ɠɛni ti ma: «Wo ɠakaga pelei ʋa, taai nii lɛi ti ʋa dɛɛ ga woye, à ʋa, gè lo wo luɠɔ, ade li zunui naa ʋɔ bɛ wo gaiziɛzu.» É liini ga tiye Samali taazuʋɛ. 20 Ti zeeliai ma Samali taazuʋɛ, Elizé GALA falini ʋolu, é ɠɛ ma: «Ɠɔoɠɔ GALAGI, nui niiti gaazuzeɠena ma, ti wozaɠa.» Ɠɔoɠɔ GALAGI ti-ɠaazuʋɛti seɠeni ma, ti ka ga ta Samali taa zaamaʋɛ. 21 Izilayɛle masagi ti ɠaai ma, é Elizé ɠaazaɠani, é ɠɛ ma: «Kɛ̀ɛ, gè ti ʋaa ɓaa?» 22 Elizé gooɠaaʋoteni, é ɠɛ ma: «Ɓa, mina ti ʋaa! Ɗa ɗa salaʋusui naati paa ɓaa, niiti è ti zogai ga ɗa-woɠa zɔkpɔi ta ɗa-mɛɛin? Daamii mu fe lɛɛ ti ya ga ɓului ta ziɛi, ta daami wona, ti ɓɔɔle, ti ɠale ma ta-masagi ʋɔ bɛ.» 23 Izilayɛle masagi daamiani pagɔ ɓɛtɛni ti ʋɛ, ti mi, ti ɓɔɔle, naa ʋoluma é ti ɠaaɠale ma ta-masagi ʋɔ bɛ. Naa ma pa, Siili nuiti ti la mɔ ɠɛni tosu wosu Izilayɛle yooi zu. 24 Yeeɠɛɠalai tanigaa leʋegai ma, Siili masagi Ɓɛne-Ɠadade ná-kɔɔʋɛbɛiti pɛ gaalɛɛni ba, ti li, ti Samali zei kɛlɛ su. 25 Pulu wolai zɛba é loo Samali taazuʋɛ. Taai zei ʋelei ma kɛlɛ su, soovale gilagi nɔungi ɠɛni ɠeyazu ga wali ɠae ʋuulɔsaʋa (80), poopo kpooi ma ɠilo lukpɛgi ɗa ɠeya ga wali ɠae lɔɔlugɔ. 26 Yeeta Izilayɛle masagi ɠɛni ziɛzu siɠigi ɠa, anzanu ɠila ge wooɠulani ma, é ɠɛ ma: «Màliɠii masagi, ʋa, è ɓɔ bà!» 27 Masagi gooɠaaʋoteni, é ɠɛ ma: «Ni Ɠɔoɠɔ GALAGI la ɓɔni è ʋa, nà zoo ɠale gè ɓɔ è ʋa? Molo la zèa, dɔɔ la zèa, gè ʋa fe è ya.» 28 Masagi ɠɛni ma ʋolu: «Lee ɠa kɛai ga ɗe?» Anzanui gooɠaaʋoteni, é ɠɛ ma: «Anzanui nii ɠa kɛai mà: ‹È-loun zunui ve, de mi za, lina, de nɔ̀nɔi mi.› 29 Gi zɛba gi dòun zunui ɠili, gi mi. Poluma voloi, gè ɠɛ ma: ‹È-loun zunui veena, de mi,› é dɔɔɠu.» 30 Masagi anzanui naa ná-kpɔɛi mɛnigai ma, é ɠɔba zeɠeiti balini ga kidaaʋiligi maaʋele ma, teʋesuʋɛ ʋolu siɠigi ɠa, nuɓusɛiti ti kaani ga é saa wɔlɔ wo seɠei looʋɛ ná-seɠei wu. 31 É ɠɛni ma: «GALA ge sò ná-ziiɠaawanai pɛ su, ni Safate ná-doun zunui Elizé nɔungi ɠa yɛna ga, za leʋe.» 32 Elizé ɠɛni ná-pɛlɛi wu ta taa ɠundiɠiiti. Masagi nu leʋeni ná, kɛlɛ masagi ná-keelai ʋa ɠɛ é ʋa, Elizé ɓega ga ɠɛ kundiɠiiti ma: «Wo la suɠwɛɛ ga nu ʋaa nui ná-doun zunui nii nu leʋega ga é nɔ̀ungi ɠula ga? À dama, wa ná-nu leʋegai ɠaana nɔ feya, à pɛlɛi laaɠulu, é mina lɛ pɛlɛi wu. Tɔ lɛi ade kɔɠɔ lugi mɛnisu ɓaa?» 33 É la vɔlɔ ɓeni ga ɓɔɛ, eyɛsu masagi ná-nu leʋegai unkula. Masagi ɠɛni Elizé ma: «Niima vaa ɲɔi pɛ kulaʋɛ Ɠɔoɠɔ GALAGI ya, lee ɠili ka nà ɠito ba tɔun zea?»