2 Samuel 12 (TOMA)
1 Ɠɔoɠɔ GALAGI Natan leʋeni Davide ma. É liini pɔ bɛ, é ɠɛ ma: «Zunu felegɔ ɠɛni taai ta zu, zɔi ga kpɛtɛ nu, bɔɔlai ga bala nu. 2 Nikɛiti ta baalagiti ti mɔinni kpɛtɛ nui ya. 3 Baala saa yiʋo ɠila kpe nɔ ɠa é ɠɛni bala nui ya, nii é geyani, é ɗa to, naa ɠɛni ɓaɠozu pɔ bɛ ná-dointi koba. É ɠɛni zunui ná-daamianigi miizu, é ɗa ɓɔɔle ná-ziawɔi zu, é ɗa la zeeloko zu, é ɠɛni zea eɠɛ ná-doun anzanu. 4 Yeeta wɛɛn ɠulani kpɛtɛ nui ma, kɛlɛ tɔun ge la ɠɛni pɔ ga é ʋa ná-toganii ta zeɠe, baalagiti ɓaa nikɛiti saama, é ʋa gili ma wɛɛin ʋɛ ga kɔnɔgi. É liini, é bala nui ná-baala saa yiʋoi zo, é kpɛtɛ ga ma wɛɛin ɠɔnɔgi.» 5 Davide wola yiiɠaawanani naama zunui ma, é ɠɛ Natan ma: «Gè ɠonaa Ɠɔoɠɔ GALAGI ma, nii é vulua, ga nui nii é naama vai ɠɛa, maanɛɛʋɛ ga é za. 6 Baala ziʋoi é seɠeai, toɠa naama ʋɛɛda naanigɔi ve, mazɔlɔɔ é la gaazumaawɔinɠaa ɠɛɛni.» 7 Natan ɠɛni Davide ma naazu: «Ɗa ɠa è ga zunui naa! Ɠɔoɠɔ GALAGI Izilayɛle ná-GALAGI wooi ɠaa: ‹Nà ɠa gè gulɔi ziaa è ma ga è ɠɛ ga Izilayɛle masagi, gè è ɠula Sayile ya. 8 Gè è-maliɠii Sayile ná-pɛlɛi lɔ è yeezu, gè anzaiti pu è yeezu, gè è zei ga Izilayɛle ta Zuda unda ga masagi. Ni naa pɛ ge ɠɛa ga faa go, kɛ̀ʋele ɓɛtɛa ɠɛa de ga gè vebɛani ɠiligaa la ma. 9 Lee vaa zu mu è dàawooi ʋɛlɛʋɛlɛsu, è ɗa wànama vai ɠɛ? È Ɠɛte nui Ilii ʋaaʋɛ ga boɠa zɔkpɔi, è anzai zeɠe, è kɛ ga ɗɔnɔ, tɔ ɓɔɠɔi ma è paa ga Amɔn nuiti ta-woɠa zɔkpɔi. 10 Naa ɠa é ba, toomai la mɔ zeɠea ɗa-ʋɛlɛi ʋa pɛ, mazɔlɔɔ è pɛ̀lɛʋɛlɛga, è Ɠɛte nui Ilii anzai zeɠe ga ɗɔnɔ.› 11 Ɠɔoɠɔ GALAGI wooi ɠaa: ‹Nà ʋaazu ga maanɔɠɔi è ʋɔ, è ɠula ɗa-ʋɛlɛyeɠei nɔ wu, nà è ɓɔɠɔ anzaiti seɠezu è ɠaazu, gè ti ve nu ɠili zea, é la ga tiye ɛsɛ pɛ gaazu. 12 Ɗɔun è ɗɔnɔi ɠɛɛʋɛ dɔɔɠuzu, nɔ̀un nà nii ɠɛɛzu Izilayɛle pɛ gaazu, folo wolai.› » 13 Davide ɠɛni Natan ma: «Gè kotoi ɠɛa Ɠɔoɠɔ GALAGI laalɔɠɔma.» Natan ɠɛni Davide ma: «Ɠɔoɠɔ GALAGI ɗa-ɠotoi maavaayɛga, è la mɔ zaazu. 14 Kɛlɛ tɛi niima vai maaʋele ma, è yeeɠɛɠalai vea Ɠɔoɠɔ GALAGI zili nuiti zea ga ti woo ɲɔi wo ma, doin sɔlɔɔgai è ʋɛ, toɠa za.» 15 Natan ɠaleni ma ná-koizu. Ɠɔoɠɔ GALAGI seeɓɛ wolai ʋilini doungoi ma, nii Ilii anzai sɔlɔɔni Davide ʋɛ. 16 Davide GALA maanɛɛnɛni doungoi ʋɛ. É zugi zoni, é ɲi piin laani zooi ma. 17 Ná-pɛlɛi wu wotiɠɛ nu wolaiti ti looɠoni ba ga é wuzeɠe, kɛlɛ é ɠɛlɛni, é la kɛɛni, ti ʋa laami ʋɔɔma. 18 Folo lɔfela ʋoluma, doungoi zaani. Davide ná-botiɠɛ nuiti ti la ɠɛni zoosu ti ʋa bo ma, mazɔlɔɔ ti ɠɛni ɠɛɛzu ɓɔɠɔ ma: «Doungoi ɠɛai ma vulua, é la woiloni ade-woo ma. Ada zoo ɠale, ade ɠɛ ma, doungoi zaa? Toɠa faa ɲɔu ɠɛ ga ɓɔɠɔ.» 19 Davide kaani ga ná-botiɠɛ nuiti ta ɓɔɛzu laa wu. É gaaɠaani ga doungoi zaa. É ti ɠaazaɠani, é ɠɛ ma: «Doungoi zaa ɓaa?» Ti ɠɛ ma: «É zaa.» 20 Naazu Davide wuzeɠeni zooi ma, é maagba, é gulɔ maku nɛɛnɛgi ziɛ ɓɔɠɔ ma, é ná-seɠei maavalibo, é li Ɠɔoɠɔ GALAGI zei ʋɛlɛi ma ʋɛlɛlaʋɛ, é nɔkɔ ná. Naa ʋoluma é liini ná-koizu, é ɠɛ ti daamianigi ve zea, é laami. 21 Ná-botiɠɛ nuiti ti gaazaɠani, ti ɠɛ ma: «Nii è kɛai, naa ʋoluʋɛ ɠa ga leeni? Siɛgi zu doungoi ɠɛa la vulua, è zugi zogɛ, è ɗa wɔlɔ. Tɛi é zaa, è wuzeɠe, è ɗa laami.» 22 É ti wooɠaaʋoteni, é ɠɛ ma: «Siɛgi zu doungoi ɠɛa la dɛ vulua, gè ɠɛa zugi zosu, gè ɗa wɔlɔ, mazɔlɔɔ gè ɠɛa ɠɛɛzu ma: ‹Ɓɛ ɠa é kwɛɛ ni Ɠɔoɠɔ GALAGI la màawɔinɠa, é ʋa doungoi yɛnvui yɛ su?› 23 Ni é zaa, lee vaa zu nà li zu sosu? Naama zobo ka bɛ̀, gè zɛnvui ʋu su? Nɔ̀un nà liizu pɔ pelei, kɛlɛ tɔun ge la mɔ ʋaazu ga pɔ̀ pelei.» 24 Davide maaɓuɠani anzai Ɓate-Seɓa ʋa, é gaanɛɛnɛ, é laani koba, naa doun zunu ɠili sɔlɔɔ bɛ ʋolu, é daasei pɛɛ ga Salomɔn. Ɠɔoɠɔ GALAGI doungoi naa nɛɛni ʋɛ, 25 é naa lɛɛni ga Davide ga GALA goo wo nui Natan maaʋele. Naama nɛɛbɛi maaʋele ma, doungoi laaseigi ʋɛɛni ga, Yedidia (nii poluʋɛ ga «Ɠɔoɠɔ GALAGI nɛɛɲɔɠɔi»). 26 Naama ziɛgi zu kɔɔɠuluɓai Zoaɓe laalɛɛni Amɔn nuiti ta-laa wolai Laɓa wu, é masa koizuʋɛ zoni. 27 Názu ɠa é keelaiti teʋeni la Davide ma, é ɠɛ ma: «Gè laalɛa Laɓa wu, gè buu ʋele ɠoizuʋɛ zoga vɔlɔ, ʋɛ ziɛ makɛsuʋɛ ná. 28 Kɔɔʋɛbɛi mɔtai ɠaalɛɛna ba mu, è ʋa, è taai zei kɛlɛ su ɗa ɓɔɠɔi, è so. Gè la pɔ ga gè so, ma lɛbiyai pɛ ge ʋa ʋa pɔ̀.» 29 Davide kɔɔʋɛbɛi mɔtai pɛ gaalɛɛni ba, é li, é laalɛ Laɓa wu, é naa zo. 30 Davide masa bɔɔlɔgi zeɠeni, nii é ɠɛni ta-masagi unma. Bɔɔlɔgi naa ɠɛni ga zanu tetelegi, buɲɛgi ɠɛni ga kilo ʋuusaʋagɔ (30), kɔtu zɔngɔ ɓaagi ɠila ge ɠɛni ba. Ti dɔɔni Davide unma. É ɠulani taai naa zu ga ani mɔinmɔin, niiti é ti zoni kɔɔi zu. 31 Nuɓusɛi niiti ti ɠɛni zeini ná, é naa tanigaa ɠɛɛni ga sii ziɛ nuiti, kɔtu zaɠa nuiti, gulu ʋɔ nuiti, é tanigaa ɠɛ ga ɓiliki loɠa nuiti. Ʋele ɠana é kɛɛni la ga nuɓusɛiti pɛ, niiti ti ɠɛni Amɔn laaiti su. Naa ʋoluma, Davide ta kɔɔʋɛbɛiti pɛ ti ɠaleni ma Zeluzalɛme.