Daniel 5 (TOMA)
1 Foloi ta, masagi Ɓɛlesazaal ná-botiɠɛ nu wolaiti tolini daami wolai ta ma, ti ɠɛni ga nu waagila (1.000), é tɔɔzeini ga dɔɔi ɓɔlea ti ɠaazu. 2 É dɔɔi ɠɔɠɔgai ma, é devei veeni ga ti ʋa ga zanu aniɲakaiti ta wali aniɲakaiti, niiti kɛɛɠɛ Neɓukadenɛzaal ti zeɠeni GALA sei ʋɛlɛi wu Zeluzalɛme. É ɠɛni pɔ é ti zeɠe, ti ɗa ɓɔɔle su ta ná-botiɠɛ nu wolaiti, ta anzaiti, ta anzaiti ti la vuluni ga zɔiti kɛʋele. 3 Ti ʋaani niina ga zanu aniɲakaiti niiti ti zeɠeni GALA sei ʋɛlɛi wu Zeluzalɛme. Masagi ti zeɠeni ga ti ɓɔɔle su ta ná-nu loligaiti. 4 Ti pɛ ti dɔɔi wola ɓɔleai ma, ti tɔɔzeini ga guyei loa, ti ɗa kɔɔɠɔ ganigiti maamusɛ, niiti ti ɓɛtɛai ga zanugi, ta walii, ta kɔlu ɓɔigi, ta kɔlui, ta gului, ta kɔtui. 5 Gaamago nɔ, nu yeei ta ɠulani kɛlɛma, fitina zei anii ɠobaʋɛ. É sɛʋɛi ɠɛɛni masagi ná-pɛlɛi ma koozuʋɛ, ná ɠobegai ga kobegi. Siɛgi zu masagi naama yeei ɠaani la, é ɗa sɛʋɛi ɠɛ, 6 dɔtɔzuleʋeni, é ɠɛ wuulee ná-kisiɛiti su. É ʋalani ná-kitosuʋɛ pɛ ma, ta ɲiibiiti ti ɗa ziɠa ɓɔɠɔ ʋa. 7 É devei veeni ga woo wola, ga ti ʋa ga kpaamaazu zoɠoiti, ta adɔɓɛɛ nuiti, ta somideɠa adɔɓɛɛ nuiti, é ɠɛ ti ma: «Nu-o-nu nii a zoona é niima zɛʋɛi ɠala, é poluʋɛ wo mà, seɠeungi kpɔiɗai, naa ɠa loo kɔba, ta zanu ansai ɠa ʋili kɔbu, ta toɠa kundiɠilai ma losu zaʋasiɛi zɔlɔɔ masadai zu.» 8 Ɠima nuiti kpein ti ɠɛni botii ɠɛɛzu masagi ʋa, ti pɛ ti lɛɛni pɛlɛi wu, kɛlɛ ti taɠila kpalaa ge la zooni é ʋa sɛʋɛi naa ɠala, ɓaa é ʋa poluʋɛ wo masagi ma. 9 Masagi Ɓɛlesazaal ɠɛni wuulee, gola lɔtɔzuleʋe, ná-nu wolaiti ɓɔɠɔi ɓalaa ti ɠɛ unga wuulee. 10 Masagi dee, masagi ta ná-nu wolaiti sɔngɔ wooi mɛnigai ma, é lɛɛni koozunɛ laamii wo pɛlɛi wu, é ɠɛ masagi ma: «È-zii zuɠooza faan! Ɗa-ɠisiɛiti ti mina è ɠɛ wuulee, ta è lɔtɔzu mina leʋe. 11 Zunui ta ɠa ɗa-masadai zu, nii gala ɲadegaiti ti-yɛnvui su. È-ɠɛɛ ná-siɛgi zu, tɔ ɠa é ɠɛni faiti suɠalasu, keleɠelegɛ ta ɠimalai veeʋɛ bɛ, eɠɛ galagiti ta-ɠimalai ɠɛʋele. Naa ɠa é kɛɛni è-ɠɛɛ, masagi Neɓukadenɛzaal kɛɛni ga molikula nuiti ta-ɠundiɠii, ta kpaamaazu zoɠoiti, ta adɔɓɛɛ nuiti, ta somideɠa adɔɓɛɛ nuiti. 12 Naama yɛnvui ɠa zea yɛ, nii a faiti zɔɠɔzuɠula la, ta keleɠelegi, ta zobogi a segiti poluwo da, ta faalaaliiti poluʋɛ, ta é faaɓaagiti gaaɠula ba. Deɠɛmu ti ʋaa ga zunui ná, Daniyɛle naa, nii masagi daasei pɛɛni ga Ɓɛlɛtasaal. Toɠa sɛʋɛ ɠɛai naa ʋoluʋɛ lɛ.» 13 Ti liini ga Daniyɛle masagi ʋɔ bɛ. Naa gaazaɠani ga: «Ɗa ɠa è ga Daniyɛle, nii é kɔɔzogiti saama, ti zeɠeai Zuda, kɛ̀ɛ nii é ɠɛni ga masagi é ʋaani ga tiye, ti zeɠe Zuda yooi zu? 14 Gè mɛnigɛ ga galagiti zɛnvui ɠa è zu, ta ɗa faiti suɠalasu, ta keleɠelegi, ta ɠimala wolai. 15 Ti ʋaa pɔ̀ bɛ ga ɠima nuiti ta adɔɓɛɛ nuiti ga ti sɛʋɛi tɛi kala, ti poluʋɛ wo mà, kɛlɛ ti la zooni ti ʋa wooiti poluʋɛ wo. 16 Gè mɛnigɛ ga ɗɔun ɗa zoo è faalaaliiti poluʋɛ wo, ta è faaɓaagiti gaaɠula ba. Ni ɗa zoo è sɛʋɛ ɠɛai tɛi kala, è poluʋɛ wo mà, seɠeungi kpɔiɗai, naa ɠa loo è ɠɔba, ta zanu ansai ɠa loo è ɠɔbu, ɗa kundiɠilai ma losuʋɛ zaʋasiɛi zɔlɔɔ zou masadai zu.» 17 Daniyɛle masagi wooɠaaʋoteni, é ɠɛ ma: «Màliɠii, ɗa zoo è ɗa-vebɛaniiti makɛ ɓɔɠɔ ʋɛ, ɓaa è fe taɠili bɛ. Anɛɛ naa ʋe, nà sɛʋɛ ɠɛai naa ɠalasu è ʋɛ, masagi, gè poluʋɛ wo è ma. 18 GALA nii é Anii-Pɛ-Unda, naa è-ɠɛɛ Neɓukadenɛzaal ɠɛɛni ga masa gola, niigi lɛbiyai ta ɠaazu unfegi ɠɛni bɛ. 19 Ɠaazu unfegi maaʋele ma nii GALA ge feeni bɛ, zooiti kpein su nuɓusɛiti, ta ziiti kpein, ta zii woo wo nuiti kpein, ti zu ɠɛni ɓalizu gaazu, ti ɗa lua. Nii a la ɠɛ pɔ ga é paa, é ɓena naa ʋaa, nii a la ɠɛ pɔ ga é zɛ vulua, é ɓena naa yɛ vulua. É ɓena tanigaani bɔɔlɔ, é tanigaani pɛlɛʋɛlɛ. 20 Kɛlɛ é ɠɛni ga waso nu, é yii zasani ná-gaazulɛɛi zu. Naazu ɠa é lokani la, é ɠula ná-masa kpɔkpɔgi ɠa, é ʋala lɛbiyai ma. 21 É ɓɛɛni nuiti saama, é vulua é ɗa suaiti daaʋokɔɠɔ, é zeini dɔɓɔ zoovalegiti saama, é ɗa tufai mi ga nikɛiti kɛʋele, geezu nɔɗagi ɗa zɛɓɛ, eyɛsu foloi é kwɛɛni la ga GALAGI nii é Anii-Pɛ-Unda, naa ɠa é ga nuɓusɛiti ta-masadaiti ti-maliɠii, ta toɠa ɗa naama nui zei masadai zu, nii é pɔ. 22 Ɗa ma, Ɓɛlesazaal, ɗɛi è ga ná-doun zunui, è ɠɛɛʋɛ niima vai kpein kwɛɛ ga pagɔ, kɛlɛ anɛɛ naa ʋe, è la ɠɛɛni ga ɓɔɠɔmaayei nu è-yiimaʋɛ. 23 È wuzeɠeʋɛ geeɠɔlɔgi Maliɠii GALA daalɔɠɔma, è ʋaaʋɛ ga sei ʋɛlɛi wu aniɲaka ɲadegaiti è ʋɔ bɛ, wo ti zeɠeʋɛ, wo dɔɔi ɓɔle ti zu, ɗa-o, ɗa-wotiɠɛ nu wolaiti-yo, è-anzaiti-yo, ta è-anzaiti ti la vuluni ga zɔiti kɛʋele. É ɓudɛ naa maazu, è guyei looʋɛ, è ɗa kɔɔɠɔ ganigiti maamusɛ niiti ti ɓɛtɛai ga walii ta zanugi, ta kɔlu ɓɔigi, ta kɔlui, ta gului, ta kɔtui, kɔɔɠɔ ganigiti è ti ɠaazu ga galagiti, kɛlɛ ti la wozaɠaazu, ti la faa mɛnisu, ta ti la faa nɔpɛ kwɛɛ. Kɛlɛ è ɠɛlɛʋɛ ga è mina lɛbiyai ve GALA bɛ nii è-yɛnvui zea niizu, ta è yeeluɠɔ ʋele vaiti pɛ. 24 Naa ɠa é kɛa naama yeei leʋegai ga é sɛʋɛi naa ɠɛ. 25 «Pɛtɛ nii ɠa sɛʋɛai: MENE, MENE, TEKELE, PALESINE. 26 Pɛtɛ naama wooi ʋoluʋɛ ɠa é ga nii: MENE ʋoluʋɛ ɠa ga ‹gaalu›: GALA ge ɗa-masadai ma ɠonagi ma voloi ɠaaluga, ɗa-masadai ɓega. 27 TEKELE ʋoluʋɛ ɠa é ga ‹kɔɠɔ›: È ɠɔɠɔgɛ kiloi ɠa, kɛlɛ kaaʋɛ ga è veɠagɛ. 28 PALESINE ʋoluʋɛ ɠa é ga ‹gaaɠwɛ›: Ɗa-masadai ɠaaɠwɛɛʋɛ, é ve Mɛde nuiti zea ta Pɛɛlese nuiti.» 29 Gaamago nɔ, Ɓɛlesazaal devei veeni ná-botiɠɛ nuiti zea ga seɠeungi nii kpɔiɗai, ti naa loo Daniyɛle ɠɔba, ti zanu ansai loo kɔbu. Ti zezeni la ɓalaa ga Daniyɛle kundiɠilai ma losuʋɛ zaʋasiɛi zɔlɔɔga zou masadai zu. 30 Kɛlɛ naama ɓidii nɔ, nui tanigaa ti Ɓaɓilɔne masagi Ɓɛlesazaal ʋaani.