Esther 3 (TOMA)

1 Naama vaiti poluma, masagi Zɛɛlesɛse lɛbiya losu wola veeni Aman ya, Agage mavofodai, Ɠamedata ná-doun zunui, é kpudɛ ná-botiɠɛ nu wolaiti pɛ maazu ti zou zɛʋɛ wolaiti unda. 2 Niiti kpein ti ɠɛni ga botii ɠɛɛzu masagi ná-pɛlɛi wu, naati pɛ ti ɠɛni ʋilɛsu ɲiibiɠa, ti nɔkɔ Aman wu, mazɔlɔɔ masagi naama levei veeni. Kɛni Maledosé ɠila kpe nɔ ɠa é la ɠɛni kɛɛzu é ʋa nɔkɔ bu. 3 Masagi ná-botiɠɛ nuiti ti ɠɛni ma: «Toɠa ɠale, è la ɠolozu masagi ná-devei ʋɛ?» 4 Folo-o-folo naa nɔ ɠa ti ɠɛni bosu ma, kɛlɛ Maledosé la ɠɛni woilosu ti-woo ma. Gaaɓelagi zu, ti boni Aman ma, nii a kɛ ti kwɛɛ ni Maledosé ɠa yɛsu wooi ʋolu, mazɔlɔɔ é dɛɛni ga tiye ga toɠa ga Zuifui. 5 Aman kwɛɛgai ma ga Maledosé la ʋilɛsu ɲiibiɠa, é ʋa nɔkɔ bu, é wola yiiɠaawanani. 6 Tɛi ti Maledosé ma zii lɛɛni la, Aman ɠisiɛni ga ná-wanaɠulai Maledosé ɠila nɔ ʋa, naa la ga faa nɔpɛ. Naa ɠa é kɛɛni é deveni ga é Zuifuiti pɛ suwuɠaaleʋe masagi Zɛɛlesɛse ná-zooi ɠa. 7 Masagi Zɛɛlesɛse ná-kona puugɔ maazu velesiɛi (12) lɔɔzeizuʋɛ, alu mɔungi ma nii daa ga Nisan, Aman kpakutoomai ɠɛɛni nii daa ga «pul», nii a kɛ é kwɛɛ, foloi ta alugi ɓɛgele ɠa a zoloo ná-faazeikpasui ma. Kpaku zolooni alugi puugɔ maazu velesiɛi (12) ma, nii daa ga Adaal. 8 Aman ɠɛni masagi Zɛɛlesɛse ma: «Zii ɠila ka ʋɛ, ti vazagɛ ɗa-yooi zu ná pɛ, ti-ɠɛɛwotiiti ti la ɓɔni zii ɠili nɔpɛ nɔnɔ ʋa, ti la ɗa-lɔgiti sosu, kulanuma nɔpɛ ge la è ʋɛ ga è ʋa ti yɛ ziilɛi su. 9 Ni a nɛɛna è ʋɛ, masagi, devei wo, é zɛʋɛ ga ti zuwuɠaaleʋe. Naazu nà kilo waaunsaʋagɔ (300.000) ve ga walii botiɠɛ nuiti zea, ti pu ɗa-naavolo makɛsuʋɛ.» 10 Masagi ná-balaɠaegi ɠulani yeei ʋa, é teʋe Zuifuiti zili nui Aman ʋɔ, Ɠamedata ná-doun zunui, Agage mavofodai. 11 É ɠɛni Aman ma: «Makɛ ɗa-walii ʋa, nii é ga zii naa nii è vaazu ma, gè fea è ya, ti zo ʋelei è pɔ la.» 12 Alu mɔungi ná-folo puugɔ maazu saʋagɔi (13) ma, ti masagi ná-sɛʋɛ ɠɛ nuiti kpein tolini. Ti sɛʋɛiti kɛɛni ʋelei Aman boni la ti ma, ti sɛʋɛiti teʋe masagi ná-nu wolaiti ma, ta zou zɛʋɛ ɠundiɠiiti, naa ɓɔ zii ɠilagilagiti ta-lotuɠɔiti ba. Ti sɛʋɛi naa ɠɛɛni, ti teʋe zou zɛʋɛi ɠilagilagiti ma, ta zii ɠilagilagiti, ʋelei ta-zɛʋɛ ɠɛ ʋeleiti ta ti-laawooiti ti la, ti yeeʋo pilɛni ti zu masagi Zɛɛlesɛse laaseigi zu, ti poogi ʋilɛ ti zu ga masagi ná-balaɠaegi. 13 Ti sɛʋɛiti feeni keelaiti zea, ti li ga tiye masagi ná-zou zɛʋɛ wolaiti pɛ su. É woni sɛʋɛiti su ga ti Zuifuiti pɛ suɠoloɠolo, ti naati paa, ti zuwuɠaaleʋe, buzeɠe niinɛgiti ta nu wɔlɔiti, doungoiti ta anzanuiti pɛ kulaba la ba, naa ʋoluma ti loo ti-yeaɠɔligiti su. Nu ʋaai naa maanɛɛni ga é ɠɛ folo ɠila kpe nɔ zu, zooi zu ná pɛ, alu puugɔ maazu velesiɛi (12), nii daa ga Adaal, naa ná-folo puugɔ maazu saʋagɔi (13) ma. 14 Deve zɛʋɛi naa zu wooi maanɛɛni é ɠɛ ga tɔgi, é lɛ ga zou zɛʋɛi ɠilagilagiti pɛ su nuɓusɛiti, naa ɠa a kɛ ɛsɛ pɛ ge ɠɛʋele ɓɛtɛ naama voloi vaa ma. 15 Masagi ná-devei maaʋele ma, keelaiti ti liini ga kpizɛi. Naa ʋoluma devei naa zu wooi vazani Suze taa wolai zu. Masagi ta Aman ti zeini, ti ɗa dɔɔi ɓɔle, naama ziɛgi zu Suze taa wolai zu ɠɛni nɔ wuulee.

Esther 3 (TOMA)

In Other Versions