Exodus 30 (TOMA)
1 Ɗa zalaɠa ɠulazuʋɛ gila kpɛtɛ ansansegiti gala vai zu. Ɗa kpɛtɛ ga akasia wului. 2 Toɠa ɠɛ ga seki naanigi, sakpai ɠɛ ga mɛtɛlɛ lukpɛgi, kogi ɠɛ ga mɛtɛlɛ lukpɛgi, sɔligi ɠɛ ga mɛtɛlɛ ɠila. Ma minɛiti ti ɠɛɛzu ba, ta ɠɛ ga ani ɠila. 3 Ɗa zanu kitei ziɛ ma, gaaʋɛ, ta kakamaʋɛti, é ɠaku ma, ta ma minɛiti ma ná pɛ. Ɗa daaɓegi ɓɛtɛ ga zanugi, é ɠaku ná pɛ ma. 4 Ɗa zanu bala felegɔ lo ba daaɓegi wuʋɛ, kakama felegɔiti, gulu zɔkpɔiti ti ɗa lɔ ti zu, seɠe vai zu. 5 Ɗa gulu zɔkpɔiti kpɛtɛ ga akasia wului, è zanugi ziɛ ti ma. 6 Ɗa zalaɠa ɠulazuʋɛ lo kwɛpele seɠezuɠoozagi ɠakalaʋɛ, nii é zeele woo ɠesui ɠakalaʋɛ, kesui lakulugi ɠaazu letemaʋɛ, nii é zeele woo zɛʋɛi maazuʋɛ, ʋɛ nà ɠɛ ɠulazu kɛlɛma ná è ʋɛ. 7 Miná ɠa Aalɔn a ɗa ansansegiti gala ná. Toɠa ɠɛ ta ɠalazu sobu-o-sobu, siɛgi zu a ɠɛ fitinaiti kɛʋele ɓɛtɛzu la. 8 Aalɔn ɠa ɠɛ ta ɠalazu kpɔkɔi, siɛgi zu a ɠɛ fitinaiti kɛʋele ɓɛtɛzu la. Ansansegi ʋe, a ɠɛ ɠalazu yeenɔpɛ Ɠɔoɠɔ GALAGI ɠaazu, wo-mavofodaiti kpein su. 9 À mina ansanse ma zii ɠili kula ga zalaɠa, zalaɠa ɠulazuʋɛ, anɛɛ gala zalaɠa ɠili be, ɓaa vebɛ zalaɠa ɠili. À mina puya zalaɠa ɠila kpalaa pu ya ná. 10 Aalɔn ɠa ɗa koto gba vaiti kɛ zalaɠa ɠulazuʋɛ minɛiti maazu, naa ɠɛ ɠila kona-o-kona. Toɠa kɛ ga koto gba zuai ma ɲamai, naa ɠɛ ɠila kona-o-kona, wo-mavofodaiti kpein su. Zalaɠa ɠulazuʋɛ naa ɠa ɠɛ ga faa ɲadega wola Ɠɔoɠɔ GALAGI ɠaazu. 11 Ɠɔoɠɔ GALAGI ɓɔɛni Moize ʋɔ, é ɠɛ ma: 12 «Siɛgi zu è Izilayɛle nuiti gaalusu da, ti ɠilagilagi ta ɓɔɠɔ unmɔɔ ganii zala Ɠɔoɠɔ GALAGI ma, naa ɠa ɠɛ gaalugi ma ziɛgi zu, naa ɠa a kɛ maanɔɠɔ mina zeeli wo ma. 13 Niiti kpein ti ɠaalusu, naati ta ʋaazu wali ɠaei galamu lɔzita veezu, eɠɛʋelei seizu ɲadegai ma wali ɠaei la. Naa ɠɛ ga vebɛanii, é zeɠe ba Ɠɔoɠɔ GALAGI ʋɛ. 14 Nu-o-nu é ɠɛɛzu gaalugi zu, é zo kona ʋuufelegɔ (20) ma, é lɛ zeemaazu, naa ɠa vebɛanii zala, nii é veezu Ɠɔoɠɔ GALAGI ʋɛ. 15 Naavolo nui la salaa, é ʋa ʋooʋa ma, mɔnɛ nui ɓalaa la salaa, é ʋa yei bu. Vebɛani ʋe, é veezu Ɠɔoɠɔ GALAGI ʋɛ, ta-ɠotoiti gba vai zu. 16 Ɗa koto gba walii ɠula Izilayɛle nuiti zea, è dɔ GALA daaɠomi seɠe ʋɛlɛi ma wotii zu. Toɠa ɠɛ ga ɠizɛsu vaa Izilayɛle nuiti bɛ Ɠɔoɠɔ GALAGI ɠaazu, nuɓusɛiti ta-ɠotoiti gba vai zu.» 17 Ɠɔoɠɔ GALAGI ɓɔɛni Moize ʋɔ, é ɠɛ ma: 18 «Ɗa maagba aniɲakai ɓɛtɛ ga kɔlu ɓɔigi, ná-seiga anii ɓalaa ɠa ɠɛ ga kɔlu ɓɔigi, maagba vaiti su. Ɗa pilɛ GALA daaɠomi seɠe ʋɛlɛi ta zalaɠa ɠulazuʋɛ ti yɔɠɔzuʋɛ, è ziɛi ʋu su. 19 Naa ɠa Aalɔn ta ná-doun zunuiti ta ɠɛ yeeiti ta ɠɔɠɔiti maagbazu la. 20 Siɛgi zu ti lɛɛzu la GALA daaɠomi seɠe ʋɛlɛi wu, ta ɓɔɠɔ maagba ga naama ɗɛi, naa ɠa a kɛ ti mina za, ta siɛgi zu ti maaɓuɠazu la zalaɠa ɠulazuʋɛ ʋa, ga ti botii ɠɛ, ti zalaɠaiti gala ga abui Ɠɔoɠɔ GALAGI ʋɛ. 21 Ta ti-yeeiti ta ti-ɠɔɠɔiti maagba, naa ɠa a kɛ ti mina za. Naa ɠa ɠɛ ga ɠɔoɠɔ tɔgi, Aalɔn ʋɛ ta ná-doun zunuiti, ta ti-mavofodaiti kpein bɛ.» 22 Ɠɔoɠɔ GALAGI ɓɔɛni Moize ʋɔ, é ɠɛ ma: 23 «Ɗa ansanse papagiti seɠe: miile gulɔ maku nɛɛnɛgi kilo lɔzita, ta kanɛle maku nɛɛnɛgi kilo saʋagɔ, ta seeli kpaɠa maku nɛɛnɛgi kilo saʋagɔ, 24 ta kasegi kilo lɔzita, eɠɛʋelei seizu ɲadegai ma ɠɔɠɔgi la, ta wolive wulɔi litɛlɛ lɔzita. 25 Ɗa naa ɠɛ ga siɛma wulɔ ɲadegai, eɠɛʋelei gulɔ maku nɛɛnɛ kpɛtɛ nui a ɗa kpɛtɛ la. Naa ɠa é ɠɛɛzu ga siɛma wulɔ ɲadegai. 26 «Naa ɠa ɗa ta ziɛ GALA daaɠomi seɠe ʋɛlɛi ma, ta zeele woo ɠesui, 27 ta taɓalii ta ná-sɔɔlaiti, ta fitina zei anii, ta ná-sɔɔlaiti, ta ansansegiti ma zalaɠa ɠulazuʋɛ, 28 ta è siɛ gala zalaɠaiti kulazuʋɛ ta ná-sɔɔlaiti kpein ma, ta maagba aniɲakai, é ʋɛɛ ná-seiga anii ʋa. 29 Ɗa niima aniiti kpein fe bɛ̀, ti wola ɠa ɲade, nii kpein a vɔɔɠu ti ʋa, naa ɠa ɲade. 30 Ɗa gulɔ ɲadegai ziɛ Aalɔn ta ná-doun zunuiti ma, è ti ve bɛ̀, naa ɠa a kɛ ti nà-zalaɠa ɠula wotii ɠɛ. 31 «Ɗa ɓɔɛ Izilayɛle nuiti pɔ, è ɠɛ ti ma: ‹Naa ɠa ɠɛ bɛ̀ ga siɛma wulɔ ɲadegai, wo-mavofodaiti kpein su. 32 Nu mina ta ziɛ ɓusɛi ma, ɲɛgɛlɛin. À mina ma zii ɓɛtɛ ga kɛʋele. Ɲadegɛ, wa ɗa pɛtɛ ga ɲade ganii. 33 Nu-o-nu a ma zii ɓɛtɛna, ɓaa é ta ziɛ nu ɠili ma, é la ga zalaɠa ɠula nu, naa ɓe ka leʋe ná-nuɓusɛiti ba.› » 34 Ɠɔoɠɔ GALAGI ɠɛni Moize ma: «Ansansegi naati seɠe, ti ɠɛ tie: setaketegi, ta wonikesegi, ta galeɓanumegi, ta gulu mana maku nɛɛnɛgi. 35 Ɗa naa ɠɛ ga ansansegi, supuai, eɠɛʋelei gulɔ maku nɛɛnɛ kpɛtɛ nui a ɗa kpɛtɛ la, kpoloi ɠɛ ba. Toɠa ɠɛ ga ma ɠitei, é ɲade. 36 Ɗa kɛ ga ma vukɔi, è sei zeele woo ɠesui ɠakalaʋɛ, GALA daaɠomi seɠe ʋɛlɛi wu, ʋɛ nà ɠɛ ɠulazu kɛlɛma ná è ʋɛ. Toɠa ɠɛ wo ʋɛ ga anii gola ɲadegai. 37 À mina ansanse kpɛtɛ ɓɔɠɔ ʋɛ ɲɛgɛlɛin ga nii ɠɛʋele, siɛma vaa zu. Wa pɛtɛ ga ani ʋe ɲadegai, makɛgai Ɠɔoɠɔ GALAGI ɠila kpe nɔ ʋɛ. 38 Nu nɔpɛ a naa ɠɛɠala ɓɛtɛna, ga é ɗa maku, naa ɓe ka leʋe ná-nuɓusɛiti ba.»