Ezekiel 46 (TOMA)
1 «Maliɠii Ɠɔoɠɔ GALAGI wooi ɠaa: ‹Koi zaamaʋɛ ma ziɠidaʋɛ, gaaʋotegai folo ɠulazu ʋelei ma, daaɠulugai ɠa ɗa yɛ de, folo lɔzitai pɛ daawu botii ɠɛɛzu ma, kɛlɛ daa ɠa ɗa lao dooɠo foloi, ta alu toga niinɛi ma vɛti yeei. 2 Kundiɠii ɠa ʋa, é zeɠe ga koi wolai zu ʋele, é leʋe tɛɛ wosuʋɛ ná siɠidaʋɛ ɠobaʋɛ, é lo daamasagi ɠoba. Zalaɠa ɠula nuiti ti ná-zalaɠaiti kula bɛ, gala zalaɠai ta ziilɛi zalaɠai. Toɠa nɔkɔ kpofalagi wuʋɛ, naa ʋolu é ɠale ma. Siɠidaʋɛ laa mina ɠulu eyɛsu kpɔkɔi zeeli. 3 Dooɠo foloi ta alu toga niinɛi ma vɛti yeei, nuɓusɛiti ta ʋa, ti nɔkɔ Ɠɔoɠɔ GALAGI wu nu lɛɛzuʋɛ, naama ziɠidaʋɛ. 4 « ‹Gala zalaɠai kundiɠii a fe Ɠɔoɠɔ GALAGI ʋɛ, dooɠo foloi, toɠa ɠɛ ga baala ziʋo lɔzita, niiti nɛɛʋuzu la ti ʋa, ta baala sinɛ wola ɠila, nii nɛɛʋuzu la ba. 5 Ná-vebɛ zalaɠai a kpɔ baala sinɛ wolai ʋa, naa ɠa ɠɛ ga moloi nii daa ga ɓeleegi, kilo ʋuusaʋagɔ (30). Vebɛ zalaɠai liegɔi a nɛɛ bɛ, naa ɠa a kpɔ baala ziʋoiti ba, é ɓɔ gulɔi litɛlɛ lɔzita ʋa. 6 Alu toga niinɛi ma vɛti voloi, toɠa nikɛ zinɛ ɓokpagi ɠula ga zalaɠai, nii nɛɛʋuzu la ba, ta baala ziʋo lɔzita, naa ʋɛɛ baala sinɛ wola ɠila ba, niiti nɛɛʋuzu la ti ʋa. 7 Kundiɠii ɠa moloi kilo ʋuusaʋagɔ (30) ɓɔ nikɛ zinɛi ta baala sinɛi ɠilagilagi ʋa ga vebɛ zalaɠai. Nii liegɔi a nɛɛ tɔ ɓɔɠɔi ʋɛ moloi zu, é naa ʋɛɛ baala ziʋoiti ba. Toɠa gulɔ litɛlɛ lɔzita ɓɔ moloi ma ɠilo ʋuuzaʋasaʋagiti (30) ba.› » 8 « ‹Siɛgi zu kundiɠii lɛɛzu la, toɠa lɛ tɛɛ wosuʋɛ naa siɠidaʋɛ ɠobaʋɛ, é ɠale ma ga ma ʋele ɠilagi nɔ. 9 Kɛlɛ tama, siɛgi zu nuɓusɛiti ti ʋaazu la fɛti voloiti, ga ti nɔkɔ Ɠɔoɠɔ GALAGI wu, zɔi a lɛɛna ga nu ɠɔʋɛzu ʋelei ma ziɠidaʋɛ ga é nɔkɔ, naa ɠa ɠula ga nu yeezazu ʋelei ma ziɠida ʋelei. Zɔi a lɛɛna ga nu yeezazu ʋelei ma ziɠida ʋelei, naa ɠa ɠula ga nu ɠɔʋɛzu ʋelei ma ziɠida ʋelei. Nu nɔpɛ ge mina ɠula ga siɠida ʋelei nii tɛai la, kɛlɛ kɛni ɛsɛ ge ɠula ga zɔɔma ziɠida ʋelei ti laa letegai ɓɔɠɔ ma. 10 Kundiɠii ta nuɓusɛiti ta lɛ ʋɔɔma, ti ɠula ʋɔɔma, ti li.› » 11 « ‹Fɛti voloiti ta gaalɛba ɲadegaiti, vebɛ zalaɠai ɠa ɠɛ ga moloi kilo ʋuusaʋagɔ (30), naa ɠa é ɓɔsu nikɛ zinɛ ɓokpagi ʋa, moloi kilo ʋuusaʋagɔ (30), naa ɠa é ɓɔsu baala sinɛ wolai ʋa é ɠulazu ga zalaɠai. Baala ziʋoiti tetemazu, ɛsɛ ka vebɛ zalaɠai ɓɔ ba nii nɛai bɛ, gulɔi litɛlɛ lɔzita, naa ɠa é ɓɔsu moloi kilo ʋuuzaʋasaʋagiti (30) ba. 12 « ‹Ni kundiɠii a daana ɠisu ga é zalaɠa ɠula Ɠɔoɠɔ GALAGI ʋɛ, é ɠɛni ga gala zalaɠai, ɓaa ziilɛi zalaɠai, maanɛɛʋɛ ti siɠidaʋɛ laalao tuɠɔ, nii é folo ɠulazu ʋelei. Toɠa ná-zalaɠaiti kula, eɠɛʋelei dooɠo foloi ma geleiti ta ɗa ɠɛ la. A zeɠena ná, é li feya, ti siɠidaʋɛ laaɠulu. 13 « ‹Folo-o-folo, ɗa gala zalaɠai ɠula Ɠɔoɠɔ GALAGI ʋɛ ga kona gila baala ziʋoi, nii nɛɛʋuzu la ba, ɗa ɗa vebɛanii naa ɠula sobu-o-sobu. 14 Sobu-o-sobu, ɗa vebɛ zalaɠai ɠula Ɠɔoɠɔ GALAGI ʋɛ, ga ɓulu vukɔi kilo lɔɔlugɔ, é zupu ga gulɔi litɛlɛ felegɔ. Tɔgi ɠana é ʋilɛ vebɛanii ʋa Ɠɔoɠɔ GALAGI ʋɛ, ɗa yɛ kɛɛzu folo-o-folo eyɛsu ɠɔ. 15 Baala ziʋoi ta ɓulu vukɔi, ta gulɔi, ti maanɛɛʋɛ ti yɛ ɠulazu Ɠɔoɠɔ GALAGI ʋɛ ga gala zalaɠai folo-o-folo.› » 16 «Maliɠii Ɠɔoɠɔ GALAGI wooi ɠaa: ‹Ni kundiɠii a ná-zooi ná ta veena ná-doun zunui ta ʋɛ, naa tɔna é feai bɛ, naa ɠa lɔ doun zunui naa ná-poganii zu, é ɠɛ ga poganii naa ná-dointi ta-ʋoganii zu. 17 Kɛlɛ ni kundiɠii a ná-zooi ta veena ná-botiɠɛ nui ta ʋɛ, vebɛanii naa ɠa ɠɛ ga botiɠɛ nui nɔnɔ eyɛsu ɓɔɠɔyeema ɠonagi zeeli, naa ʋolu toɠa gaaɠale ma ʋolu, é fe kundiɠii ya. Ná-poganii ɠa ga ná-dointi gila nɔ tɔnɔ. 18 Kɛlɛ tama, kundiɠii mina nuɓusɛiti ta-ʋogani nɔpɛ seɠe zea, é mina loo nu ma, é ʋa ná-pogani yooi zeɠe. Tɔ ɓɔɠɔ ná-zooi ɠa a ná-dointi ta-ʋoganii ɓɛtɛ su, nii a ɠɛ ga ɛsɛ nɔnɔ, naa ɠa a kɛ nà-nuɓusɛiti saama, nu nɔpɛ maa mina ɠooza ná-pogani yooi ʋa.› » 19 Zunui loni tùɠɔ, gi lɛ nu lɛɛzuʋɛ, ná siɠidaʋɛ ɠobaʋɛ, gi li pɛlɛ ɲadegaiti pɔ bɛ, ti ná zalaɠa ɠula nuiti faa ma, ti ɠaaʋotegai nu ɠɔʋɛzu ʋelei ma. É adaʋɛ ta lɛɛni ga ze, ná buu ʋele nuu, folo liizu ʋelei. 20 É ɠɛni mà: «Adaʋɛ ɠa, ʋɛ zalaɠa ɠula nuiti ta ɠɛ faazuɓɛtɛ zalaɠa zuaiti gilizu ná, ta koto gba zalaɠaiti, ta ɠɛ vebɛ zalaɠaiti geesu ná ɓalaagi. Naazu ti la ɠula ga tiye eteaʋɛ, ʋɛ ta-vɔɔɠubai a zoo nuɓusɛiti ɲadesu ná.» 21 Naa ʋolu é liini ga ze koi wolai zu, é leʋe ga ze koizuʋɛ ma zoko naanigɔiti pɔ bɛti, gè pɛtɛni ga koi wola ma zoko naanigɔiti pɛ su, 22 koi ɠoozuʋɛ ɠɛni náti pɛ siɠigi ti ma ti laaɠulugai, ti pɛ ti ɠɛni tie, ti-zakpai ɠɛni ga zeezakpa ʋuunaanigɔ (40), ti-ɠogi ɠɛ ga zeezakpa ʋuusaʋagɔ (30). 23 Kɔtu zasai ɠakuni ti naanigɔ ma. Daaɠoli wosuʋɛ ɠɛni ti ʋa, ti ʋoluzei sasai ʋa é ɠaku ma. 24 Zunui ɠɛni mà: «Daaɠoli wosuʋɛti be, mináti ka GALA sei ʋɛlɛi wu wotiɠɛ nuiti ta ɠɛ nuɓusɛiti ta-zalaɠa zuaiti gilizu ná.»