Genesis 19 (TOMA)
1 Geezuɠeela felegɔiti ti zeɠeni Sɔdɔme kpɔkɔmaʋɛ. Lote ɠɛni zeini Sɔdɔme taa ziɠidaʋɛ. Siɛgi zu Lote ti ɠaani la, é wuzeɠeni, é ti laaɠomi, é maaʋɛɛni, é nɔkɔ zooi ma. 2 É ɠɛni ti ma: «Nà wo maanɛɛnɛzu, màliɠiiti, à ɠale ma, wo ɲi nà-pɛlɛi wu, nɛ̀i gè ga wa-wotiɠɛ nui. Wa zoo wo wo-ɠɔɠɔiti maagba ná, wo ɲi piin, sobui wo wuzeɠe, wo ɗa li wo-liizu ʋelei.» Ti ɠɛni ma: «Ɓa-o, gá ɲiizu koi zaamaʋɛ nɔ.» 3 Kɛlɛ Lote ɠilini ti ma gola, ti vaani bu, ti li ná-pɛlɛi wu. É daamianigi ɓɛtɛni ti ʋɛ, é pɛɛ ɓului ʋa, nii lɛʋɛ la su. Ti laamiini. 4 Aisa ti ʋa la, Sɔdɔme taazuʋɛ zunuiti kpein ti ʋaani, ti ɠaku pɛlɛi ma, zunuiti kpein ti ʋaani, é zo zunu loungoiti ma, é li kɛwolaiti pɔ, ti pɛ ɲɛgɛlɛin ti ʋaani ná. 5 Ti Lote lolini, ti ɠɛ ma: «Zunuiti ta mini, niiti ti ʋaai è ʋɔ bɛ kpidii? Ti ɠula, è ʋa ga tiye gi ʋɔ, gi ɓɛdɛ ɠula ga tiye.» 6 Lote ɠulani pɛlɛlaʋɛ, é daaɠulu ga ʋoluʋelei. 7 É ɠɛni ti ma: «Ɓa, kɛ̀ɛleaiti, nà wo maanɛɛnɛzu, à mina faa ɲɔi ɠɛ. 8 À woilo, dòun anzanu felegɔiti ti ná, ti la vɔlɔ zunu vaa ɠwɛɛ. Nà ʋaazu ga naati wo ʋɔ eteaʋɛ, wo naa ɠɛ ga tiye, nii nɛai wo ʋɛ. Kɛlɛ à mina vɔɔɠu zunui niiti ba, tɔɔzei ti ʋaaʋɛ, ti laazuʋɛ nà-pɛlɛi wu.» 9 Ti ɠɛni ma: «Zeɠe lɛɛ ʋɛ!» Ti ɠɛni ma mɔnɔ: «Ɗɛi è ga seikɔɠɔma nu nɔ, è ʋaai, ɗa pɔ è ɠɛ ga tukpɔɠaaleʋe nu! Ɓe nɔ, nii gi kɛɛzu ga ɗe, naa ɠa ɲɔu tɔnɔi ʋa.» Ti Lote ɓakpani ga ɲɔuɗa, ti maaɓuɠani kpogi ʋa, ga ti koloɠolo. 10 Zunu felegɔiti ti ɠɛni Lote ʋɔ bɛ, ti soni, ti mɛɛn pɛlɛi wu, ti pɛlɛi laaɠulu. 11 Ti yeeziɛni nuiti gaazu, niiti ti ɠɛni loni pɛlɛlaʋɛ, ti ɠaazuɠole, é zo zunu loungoiti ma, é li kɛwolaiti pɔ, naa ɠa é kɛɛni ti la mɔ ɠɛni pɛlɛlaʋɛ ɠaazu. 12 Zunu felegɔiti ti ɠɛni Lote ma: «Ɓɛgele ɠa é è ya ʋɛ mɔnɔ? È-nɛkoiti, è-loun zunuiti, è-loun anzanuiti, nii kpein é ga ɗɔnɔ taazuʋɛ ʋɛ, ti pɛ kula niima adaʋɛ ʋa. 13 Mazɔlɔɔ gá ga ʋa niima laai ɠoloɠolosu, tɔɔzei maalɔɔ ɓee wooi wɔɔlɔʋɛ, é zeelizu Ɠɔoɠɔ GALAGI ma. Naa ɠa é ba, Ɠɔoɠɔ GALAGI gi leʋegɛ ga gi taai tɛi koloɠolo.» 14 Lote ɠulani, é li, é ɓɔɛ naati pɔ, niiti ti ná-doun anzanuiti maazoni, é ɠɛ ti ma: «À wuzeɠe, wo ɠula niima adaʋɛ ʋa, mazɔlɔɔ Ɠɔoɠɔ GALAGI ɠana ʋa taai ɠoloɠolosu!» Kɛlɛ naati ti naama wooiti kaani ga ɲɛɛvae faa nɔ. 15 Geelaalao siɛgi zu, geezuɠeelaiti ti ɠilini Lote ma, ti ɗa ɠɛ ma: «Wuzeɠe, è-anzai zeɠe ta è-loun anzanu felegɔiti niiti ti ʋɛ, naa ɠa a kɛ è undaa mina ʋili taai ná-undaaʋiligi zu.» 16 Tɛi é ɠɛni nɛkɛsu, zunu felegɔiti ti soni zeei ʋa, tɔun be-o, anzai ʋe-o, ta ná-doun anzanu felegɔiti be-o, mazɔlɔɔ Ɠɔoɠɔ GALAGI ɠɛni pɔ ga é ɓaa ti maazu, ti liini ga tiye, ti ti yɛ taa ʋoluʋɛ. 17 Ti ɠulaai ma taai ʋa, geezuɠeelai gila ge ɠɛni ma: «Ɓizɛ, è è-yɛnvui ɠizo! Mina wɛlɛ ʋolu, mina lo nɛmɛi zu ada nɔpɛ! Ʋela, è lɛ gizei ma, ni ɗa pɔ ga è undaa mina ʋili.» 18 Lote ɠɛni ma: «Ɓa-o, màliɠii! 19 Nɛ̀i gè ga ɗa-wotiɠɛ nui, gè zaalai zɔlɔɔgɛ è ɠaazu, è ɠɛɛʋɛ ga wooɠɛɠila nu bɛ̀, è zɛ̀nvui ɠizo fai zu. Gè la zooga gè ʋa ʋela, gè ʋa lɛ gizei ma, nà ɠɛ gè za, ùndaaʋili. 20 Wɛlɛ, taai tɛi tago maaɓuɠaʋɛ, ga gè ɓizɛ gè zeeli ná. Dɔiʋɛ, nà zoo gè ʋela, gè li ná, zɛ̀nvui ɠizo! Taai naa la lɔini ɓaa?» 21 Geezuɠeelai ɠɛni ma: «Wɛlɛ, gè vaa naa wu, ga gè kɛ è ʋɛ ga faaɓɔɠɔ, gè la taai tɔna koloɠologa, nii è ná-fai wosu. 22 Suvilɛ, è ʋela, è li ná, mazɔlɔɔ gè la zooga gè ʋa faa nɔpɛ kɛ, eyɛsu è zeeli ná.» Naa ɠa é kɛa, ti taai naa laasei pɛai ga Sowaal. 23 Folo tɛɛ ziɛgi zu ɠa Lote zeelini la Sowaal. 24 Názu ɠa Ɠɔoɠɔ GALAGI timini abui ʋuuni la Sɔdɔme ta Gomɔɔl, eɠɛ tonai, é ɠulazu geezuʋɛ. 25 É taai naati koloɠoloni, naa ʋɛɛ maaɠoolii ma nɛmɛi kpein ba, ta ma nuɓusɛiti, naa ʋɛɛ siinziin ganigiti ba. 26 Lote anzai wɛlɛni ga ʋoluʋelei, é ʋoteni ga kpolo ziɠigi. 27 Abalaame wuzeɠeni ga sobuzobui, ga é li naama adaʋɛ, ʋɛ é ɠɛni loni ná Ɠɔoɠɔ GALAGI ɠaazu. 28 É ɠaazuziɛni Sɔdɔme ta Gomɔɔl letema ʋelei, ta nɛmɛi maaɠoolii ma yooi kpein su, pɛtɛ, é duului ɠaani, é ɗa wuzeɠe zooi ma, eɠɛ abuzulugi ma luului. 29 Siɛgi zu GALA ge nɛmɛ zu laaiti suɠoloɠoloni la, é ɠizɛni Abalaame zu, é Lote ɠula faaɓaagi zaama, nii é taaiti tokani da, ʋɛ Lote ɠɛni zeini ná. 30 Lote zeɠeni Sowaal, é li, é zei gizei ma, ta ná-doun anzanu felegɔiti, mazɔlɔɔ é luani ga é mina yɛ Sowaal. É zeini pugi zu ta ná-doun anzanu felegɔiti. 31 Yeeta, nu ɠite gelei ɠɛni loungo gelei ma: «De-ɠɛɛ wɔlɔzaɠaga, zunu la zou yɔɠɔzuʋɛ ʋɛ, nii a ʋilɛ de ʋolu, eɠɛʋelei de ɠula de ka la etea. 32 De li, de dɔɔi ʋu de-ɠɛɛ la. De la koba, naa ɠa a kɛ, de-ɠɛɛ mavofodai ɠɛ ná.» 33 Ti dɔɔi ʋuuni ti-ɠɛɛ la kpidii naa, nu ɠite gelei liini, é la kɛɛɠɛ ɠoba. Naa la looni ga daa la koba, ta buzeɠe la. 34 Naa ʋolu sobui, nu ɠitei ɠɛni loungo gelei ma: «Wɛlɛ, dàaʋɛ kɛ̀ɛ ɠoba kpɔkɔ ná. De dɔɔi ʋu da mɔnɔ za kpɔkɔi, è li, è la koba, naa ɠa a kɛ de-ɠɛɛ mavofodai ɠɛ ná.» 35 Ti dɔɔi ʋuuni ti-ɠɛɛ la mɔnɔ kpɔkɔi tɔna. Loungo gelei liini, é la koba. Naa la looni ga daa la koba, ta buzeɠe la. 36 Lote ná-doun anzanu felegɔiti ti kogi zeɠeni ti-ɠɛɛ ʋa. 37 Nu ɠite gelei doun zunu zɔlɔɔni, é daasei pɛɛ ga Moaɓe. Zaaɠaza tɔ ɠa é ga Moaɓe nuiti ti-mɛmɛwolai. 38 Loungo gelei ɓalaagi doun zunu zɔlɔɔni, é daasei pɛɛ ga Ɓɛne-Ami. Zaaɠaza tɔ ɠa é ga Amɔn nuiti ti-mɛmɛwolai.