Job 20 (TOMA)

1 Sofaal nii é zeɠezu Naama, naa kpɔɛi zeɠeni, é ɠɛ ma: 2 «Wɛlɛ niizu, nà-kisiɛiti ta ɓɔizu dà ga gè gooɠaaʋotegi ve,gè la zooga gè ʋa yiilɔɔ. 3 Gè zeliiti mɛnigɛ, ti la zɔleni gàazu.Nɔ̀nɔ ma gaamai ɠa gè losu ma, gè gooɠaaʋotegi ve. 4 È la suɠwɛɛ ɓaa ga, siɛnɔpɛ su,kaipa nuɓusɛi ɠulani etea, 5 nu ɲɔiti ta-vɔnifaamai zu la ɗa ga ɠooza,ta nu ɲɔi ná-koozunɛɛi ɠa ga yeeɠɛɠala go nɔ? 6 Anɛɛ siɛgi zu sɔligi zeizu la geei ʋa,ta nɔungi ɗa zei tonaɓiingiti ba, 7 Toɠa ɲɛɛlɛ eyɛsu ɠɔ, eɠɛ tɔ ɓɔɠɔi koozu ɓooi.Zɔiti ti ɠɛni kwɛɛ, naati ta ɠɛ ma: ‹Mini ɠa é ná?› 8 Toɠa ɲɛɛlɛzu eɠɛ segi, kɔɠɔʋo ge loo ya,é loo ya eɠɛ kulakɛlɛmai é wosu kpidii. 9 Ti zunui naa ɠaani, kɛlɛ ti la mɔ kaa pɛ,adaʋɛ é ɠɛni zeini ná, ná yeema ma. 10 Ná-doun zunuiti ta bala nuiti zee ɠaaɠale ma, niiti é looni ti ma.Tɔ ɓɔɠɔi ɠa ti kpein potogi ve, é ɠula ná-naavoloi zu. 11 Zɛbɛi ɠɛni ba ná-nu niinɛlai zu,naa kpein ka yeizu ma kabayeɠei zu. 12 «Anɛɛ ni faa ɲɔi nɛɛʋɛ da,anɛɛ ni toɠa makɛsu nɛgi wu, 13 é makɛ ba, é la ɠɛlɛa ba,é makɛ daa ɠoozuʋɛ, 14 daamianigi ɠa valibo koozuʋɛ,toɠa ɠɛ koozuʋɛ ga kɛlɛɓɛzɛi ma wanai. 15 Naavoloiti é ti ɓɔleni zɔiti zea, toɠa unpili ga tiye,GALA ka ti ɠula koozu. 16 Toɠa kɛlɛɓɛzɛi ma wanaiti kpɔlezu.Toɠa saai maazɔlɔɔ ga gozagi ná-ɲiigi. 17 «É la mɔ ɠidia ná, ga toɠa kɔin gulɔi zɔlɔɔ mɔnɔ ga undaanɛɛi, eɠɛ ziɛ wolaiti,kɔtuɗɛiti ti ga nikɛ ɲiimiɗɛi ma wulɔi. 18 Toɠa ɓɔlɔzu lɔnɔgi kpein pu ya, é la yiimaɠɛa su.Ná-naavoloi kpein é sɔlɔɔni ná-pɔdi loo vaiti su, é la ta wɔinɠulaa. 19 Mazɔlɔɔ é bala nuiti koloɠoloni, é ɠɛlɛ ti ʋa,é ta-ʋɛlɛiti goloni, niiti é la ʋaazu ti losu ʋolu. 20 Tɔɔzei ziima vai la ɠɛni ɠɛɛni,é la zooga é ʋa ná-naavoloi taɠila kpalaa kizo. 21 Toɠa maayii ɠɛ ga nui kpein,kɛlɛ ná-kulagaanɛɛzui zu la ɠoozaa. 22 Anɛɛ ná-sɔlɔɔ golai naa kpein saama, toɠa ɠɛ kpalai zu.Maanɔɠɔ ɓakɔi kpein ka zeeli ma. 23 Siɛgi zu é ɓalazu la ga é ɠogi zulaave,GALA ka yeeɓe ná-ziiɠaawana wolai ʋa, é yei daalɔɠɔma,é ʋu ma daamianigi ʋotogi zu. 24 A ʋelana kɔɔɠɔ zɔɔlai ʋa é ga kɔlu gelei,kɔlu ɓɔi mɛɛin ɠa ʋa é bɔ. 25 Mɛɛin é bɔai poluʋɛ, a naa ɠulana ɓɔɠɔ ʋa,kaegi é saamaʋɛ zuvologai, é naa ɠula,saai ná-maalua vai ɠa lɔ unga. 26 Kpidii makɛgɛ daalɔɠɔma ga ná-tɔnɔgi,abui nii nu nɔpɛ ge la gaalɛɛni, naa ɠa kɔligiti gala,é naati kpein gala niiti ti yɛsu ná-pɛlɛi wu. 27 Geeɠɔlɔgi ɠa ná-faaɠaazagiti kula kɛlɛma,eteai ɓalaa ka wuzeɠe daalɔɠɔma. 28 GALA ná-ziiɠaawana voloi,ani ʋagɔi kpein é gaalɛai ba ná-pɛlɛi wu,naa ɠa ɓale, é zeɠe ná. 29 Naa ɠa é ga kasɔi, GALA ge kɛʋele ɓɛtɛai nu ɲɔi ná-faa ma, maanɛai é sɔlɔɔ.Naa ɠa GALA ge deveai tɔun bɛ.»

Job 20 (TOMA)

In Other Versions