Job 32 (TOMA)

1 Niima nu saʋagɔiti, Elifaze, Ɓilidade ta Sofaal, ti ɓeni Zɔɓe wooɠaaʋote fai ʋa, tɔɔzei naa laani ɓɔɠɔ la ga telebogɛ. 2 Naa Ɓalakele ná-doun zunui Eliyu yiiɠaawanani gola, Ɓuze mavofodai, Lame ná-pɛlɛyeɠei wu nui. É yiiɠaawanani Zɔɓe ma, tɔɔzei naa ɠɛni ɓɔɠɔ ɠaazu ga telebogɛ é leʋe GALA ba. 3 É yiiɠaawanani ɓalaa Zɔɓe bɔɔla saʋagɔiti ma, tɔɔzei naati ti la ɠɛni faa nɔpɛ kaani, nii ta gooɠaaʋote da, ti Zɔɓe ʋeelalani wafuun ga naa maaʋele. 4 Eliyu maaɓɔungi woni, aisa é ʋa ɓɔɛ Zɔɓe ʋɔ, tɔ ɠa é ɠɛni ga doungoi Zɔɓe bɔɔla saʋagɔiti saama. 5 Kɛlɛ Eliyu kaai ma ga kpɔɛ nɔpɛ ge la mɔ ɠɛni bɔɔla nu saʋagɔiti da, ti ʋa bo, é yiiɠaawanani. 6 Ɓuze mavofodai Ɓalakele ná-doun zunui Eliyu kpɔɛi zeɠeni, é ɠɛ ma:«Nà dɛ ga doungo, wa ga kpakologiti.Naa ɠa é ba, dùaʋɛ, ungo, ìnɛinɛgɛ gè ʋa naa wo wo ma, nii gè kwɛɛ. 7 Gè ɠɛni ɠɛɛzu:‹Niiti ti eteai ta ziaai na sɛ, naati ta zoo ɓɔɛzu,niiti ti ziaa faa mɔinmɔin su, naati ta ɠimalai lɛ.› 8 Gaamai zu, nii é nui ɠɛɛzu ga keleɠele nui,naa ɠa é ga zɛnvui, GALA Zɛbɛi-Pɛ-Maliɠii ná-kulakɛlɛmai. 9 Ɗa-ɠonagiti mɔin vai laade, a è ɠɛ ga ɠima nui.Kɛwola wɔlɔiti nɔ laade, ti ʋa ɠɛ faa zɔlegai ɠwɛɛ. 10 Naa ɠa é ba, nà è maanɛɛnɛzu, woilo gòoi ma, nà ɓalaa!Nà kìsu vai lɛɛzu. 11 «Zaaɠaza, gè ɠɛa maaɓɔungi wosu,gè woilo wo ɓɔɛ wooiti ma, ta wa-ɠigaiziɛiti,gè wo yɛ ná, wo wa-ɠisiɛiti dɛɛ. 12 Gè woilogɛ wo-wooiti ma gola ga pagɔ,kɛlɛ wo tanɔpɛ ge la zooni Zɔɓe la,wo tanɔpɛ ge la gooi ta zeɠeni daazu. 13 À mina ɠɛ ma: ‹Gi ɠimalai ɠaaʋɛ,GALA gila kpe ka a vɔni ma,kɛlɛ nu ɠila kpalaa taade.› 14 Anɛɛ naa ʋe, Zɔɓe ná-kpɔɛiti ti la sakpani, ti ʋa lo bà.Gè la gooɠaaʋotesu, eɠɛʋelei wɔnɔ ma wooɠaaʋotegiti ti la. 15 «Ti ʋɛtɛ, ti ɠoozuʋiliga, ti la mɔ gooɠaaʋote feezu!Wooiti ti ʋalaga ti la! 16 Gè maaɓɔungi woga, kɛlɛ ti la mɔ ɓɔɛzu,ti loga kpɛ, ti la mɔ gooɠaaʋote feezu. 17 Nɔ̀un tetegi, nà pɔ nà ɓalaa gè gooɠaaʋotegi ve,gè nà-faaɠaaɠai lɛ. 18 Mazɔlɔɔ ɠi mɔinmɔin ka bɛ̀,zɛ̀nvui ɠa kpɔ̀lɔzu kòozu, ga gè ɓɔɛ. 19 Toɠa zɔsu kòozu, eɠɛ dɔɔi puai kɔlɔ woole niinɛi zu,é daavegai, é ɠɛɛzu é ʋu ya. 20 À zɛ̀na gè ɓɔɛ, naa ɠa a kɛ gè yɛnvu ga pagɔ,nà laalaosu deɠɛmu, gè gooɠaaʋotegi ve. 21 Gè la losu nu nɔpɛ polu,gè la nu nɔpɛ tɛɛzu su. 22 Gè la zooni nu lɛɛzu su,Kpɛ̀tɛ Nui ɠa sèɠena gaamago nɔ.»

Job 32 (TOMA)

In Other Versions