Joshua 6 (TOMA)
1 Zeliko taai laaɠuluni kpekpe, Izilayɛle nuiti maaʋele ma. Nu la ɠɛni lɛɛzu, nu la ɠɛni ɠulazu. 2 Ɠɔoɠɔ GALAGI ɠɛni Zozuwe ma: «Wɛlɛ, gè Zeliko lɔa è yeezu, ta ná-masagi, ta ná-kɔɔɠɔ nu ɠɛzɛɠɛzɛgiti kpein. 3 Folo lɔzita laawu, ɗa-o, ɗa-ɠɔɔɠɔ nuiti-yo, folo-o-folo wa ɗa lati taai ma, naa ɠɛ ɠila folo ɠila. 4 Zalaɠa ɠula nu lɔfela, niiti baala minɛ ʋuʋugi ti ɠilagilagi ya, naati ta lo minazeɠe kesui luɠɔ. Folo lɔfelasiɛi, wa lati taai ma, ná ɠɛ lɔfela, zalaɠa ɠula nuiti ta puʋugi vɛ niina. 5 Siɛgi zu nuɓusɛiti ti baala sinɛ ʋuʋugi vɛ wooi mɛnisu da suɠoozaai, ɛsɛ pɛ ka kpeei loo ʋɔɔma, taai ma ziɠigiti ta wolo gaamago nɔ. Nuɓusɛiti ta taai zo, ɛsɛ ge lɔ ga letegi.» 6 Nun ná-doun zunui Zozuwe zalaɠa ɠula nuiti tolini, é ɠɛ ti ma: «À minazeɠe kesui zeɠe, zalaɠa ɠula nu lɔfela baala sinɛ ʋuʋu dɔfela zeɠe, ti lo Ɠɔoɠɔ GALAGI ná-minazeɠe kesui luɠɔ.» 7 Naa ʋoluma é ɠɛni nuɓusɛiti ma: «À li, wo lati taai ma, kɔɔɠɔ zunu ɠɛzɛɠɛzɛgiti kpein ti lo Ɠɔoɠɔ GALAGI ná-minazeɠe kesui luɠɔ.» 8 Nuɓusɛiti ti kɛɛni, eɠɛʋelei Zozuwe devei veeni la. Zalaɠa ɠula nu lɔfelaiti, ti puʋu dɔfelaiti seɠeni, kpɛtɛai ga baala sinɛ minɛiti. Ti loni Ɠɔoɠɔ GALAGI ná-minazeɠe kesui luɠɔ, ti tɔɔzei ga puʋugi vɛa. Ɠɔoɠɔ GALAGI ná-minazeɠe kesui ʋilɛni ti ʋolu. 9 Kɔɔɠɔ nui tanigaa ti ɠɛni loni zalaɠa ɠula nuiti tuɠɔ, niiti ti ɠɛni puʋugi vɛɛzu, ta kɔɔɠɔ nui zɔiti ti ʋilɛni kesui ʋolu. Ti ɠɛni ziɛzu puʋugi wooi ma. 10 Zozuwe naama levei veeni nuɓusɛiti zea, é ɠɛ ti ma: «À mina kpee loo pa, nu mina wo woomɛni, woo ɠila kpalaa mina ɠula wo-laaʋɛ, eyɛsu foloi nà devei ve la wo ya, ga wo kpeei loo. Wa wooɠula niina.» 11 Ɠɔoɠɔ GALAGI ná-minazeɠe kesui latini taai ma, ná ɠɛ ɠila. Naa ʋolu ti liini ti-ʋuuzuʋɛ, ti ɲi ná kpidii. 12 Zozuwe wuzeɠeni ga sobuzobui. Zalaɠa ɠula nuiti ti Ɠɔoɠɔ GALAGI ná-minazeɠe kesui zeɠeni. 13 Zalaɠa ɠula nu lɔfelaiti, ti puʋu dɔfelaiti seɠeni, niiti ti ɓɛtɛai ga baala sinɛ minɛiti, naati ti ʋilɛni pelei zu mɔnɔ, Ɠɔoɠɔ GALAGI ná-minazeɠe kesui luɠɔ, ti ɗa ti vɛ. Kɔɔɠɔ nui tanigaa ti loni ti luɠɔ, kɔɔɠɔ nui zɔiti ti ʋilɛni Ɠɔoɠɔ GALAGI ná-minazeɠe kesui ʋolu. Ti ɠɛni ziɛzu puʋugi wooi nɔ ma. 14 Ti latini taai ma, ná ɠɛ ɠila, foloi velesiɛi. Naa ʋolu ti ɠale ma ti-ʋuuzuʋɛ. Ti kɛɛni ɠana nɔ folo lɔzitai kpein su. 15 Foloi lɔfelasiɛi ma, ti wuzeɠeni ga gosui, ti lati taai ma, ná ɠɛ lɔfela ɠana nɔ. Naama volo ɠila kpegi nɔ ti latini taai ma ga dɔfela. 16 Dɔfelasiɛi ma, zalaɠa ɠula nuiti ti puʋugi vɛɛni, Zozuwe ɠɛni nuɓusɛiti ma: «À kpeei loo, mazɔlɔɔ Ɠɔoɠɔ GALAGI taai vea wo ʋɛ! 17 Taai ɠa ɠulazu ga zalaɠai Ɠɔoɠɔ GALAGI ʋɛ, ta su aniiti kpein. Kɛni koloɠolo anzanui Laɠaɓe ɠila kpe nɔ ɠa a yɛ vulua, ta niiti kpein ta ɠɛ ba ná-pɛlɛi wu, mazɔlɔɔ tɔ ɠa é zunuiti dɔɔɠuni, niiti ade ti leʋeni. 18 Kɛlɛ à dama! À ɓɔɠɔ zo, wo dama ga nii maaɲɛɛi ba Ɠɔoɠɔ GALAGI ʋɛ. À mina naa tanɔpɛ seɠe, nii maaɲɛɛi ba, wo ʋa Izilayɛle ʋuuzuʋɛ lɔ nimizai zu, wo ʋa maanɔɠɔi ʋɛɛ ba. 19 Walii kpein, ta zanugi, ta kɔlu ɓɔi sɔɔlaiti, ta kɔlu zɔɔlaiti, naa kpein feeʋɛ Ɠɔoɠɔ GALAGI ʋɛ. Ta ʋuuzu Ɠɔoɠɔ GALAGI ná-naavolo makɛsuʋɛ.» 20 Ti puʋugi vɛɛni. Nuɓusɛiti ti mɛnigai ma, ti kpeei looni, ti wooɠula la, siɠigi woloni gaamago nɔ. Nuɓusɛiti ti ʋilini taazuʋɛ, ɛsɛ ge lɔ ga letegi, ti taai zo. 21 Ti taai zu nuɓusɛiti pɛ suwuɠaaleʋeni, zunuiti ta anzanuiti, nu niinɛiti ta nu wɔlɔiti. Anɛɛ nikɛiti pɛ ka ti ti zuwuɠaaleʋeni, ta baalagiti, ta soovalegiti. 22 Zozuwe ɠɛni zunu felegɔiti ma, niiti ti zooi zuʋɛtɛni: «À li koloɠolo anzanui ná-pɛlɛi wu, wo anzanui naa ɠula, ta nɔnɔiti kpein, eɠɛʋelei wo minazeɠeni la bɛ, wo ɠona.» 23 Zunu felegɔiti ti liini zou zuʋɛtɛ fai ma, naati ti liini, ti Laɠaɓe ɠula, ta kɛɛɠɛ, ta dee, ta kɛɛɠɛleaiti, ta nɔnɔiti kpein, ti ná-nuiti pɛ kula. Ti ɓaa ti maazu, ti ti ʋu Izilayɛle nuiti puuzuʋɛ ʋoluʋɛ. 24 Ti taai ɠalani, ta nii kpein é ɠɛni ná. Kɛni walii, ta zanugi, ta kɔlu ɓɔi sɔɔlaiti, ta kɔlu zɔɔlaiti, ti naati puuni Ɠɔoɠɔ GALAGI ná-naavolo makɛsuʋɛ. 25 Zozuwe koloɠolo anzanui Laɠaɓe yɛnvui makɛni, ta ná-pɛlɛyeɠei, ta niiti kpein ti ɠɛni ga nɔnɔ. É zeini Izilayɛle nuiti saama eyɛsu zaaɠaza. Mazɔlɔɔ é keelaiti dɔɔɠuni ga pagɔ, niiti Zozuwe ti leʋeni Zeliko ʋɛtɛ fai ma. 26 Naama ziɛgi zu, Zozuwe niima ɠonai woni, é ɠɛ ma:«Naama zunui ɠa ga foovoo nu Ɠɔoɠɔ GALAGI ɠaazu,nii a wuzeɠe, é ɠɛ é Zeliko taai lo ʋolu.Ná-doun zunu mɔungi yɛnvui ɠaa yɛ buulaagi ma yeɠei wɔɔ vai zu.Ná-doun zunu ɠaaɓelagi yɛnvui ɠaa yɛ kpogiti too vai zu.» 27 Ɠɔoɠɔ GALAGI ɠɛni Zozuwe ʋa, tɔɠɔi ɠulani zooi pɛ su.