Luke 16 (TOMA)
1 Naa ʋoluma Yesu ɠɛni ná-kaladopoiti ma: «Naavolo nu wolai ta ɠɛni ná, nii naavolo unda nu ɠɛni zea, ti naa maalɔɔni ma ga toɠa ná-naavoloi zuɠoloɠolosu. 2 É naa lolini, é ɠɛ ma: ‹Lee ɠa gè mɛnisu, é ʋilɛ è ʋa? Ʋaana, è ʋoluvaawo, é lo ɗa-naavolo makɛ pelei ʋa, tɔɔzei è la zooga zeizu nà-naavoloi unda.› 3 «Naavolo unda nui ɠisiɛni, é ɠɛ ɓɔɠɔ ma: ‹Lee ɠa gè ʋaazu kɛɛzu, tɔɔzei màliɠii sèɠea ná-naavoloi unda? Gè ʋa li tii ɠɛɛzuʋɛ ɓaa? Gè la zooni naa la. Gè ʋa ɠɛ ga fali wo nu ɓaa? Naa ɠa zèa ga unfegi. 4 Gè kwɛni niina, nii gè ʋaazu kɛɛzu, nii a kɛ siɛgi zu màliɠii kùlazu la ná-naavoloi unda, gè numaa zɔlɔɔ, niiti ta ɠɛ yeezeizu bù ta-ʋɛlɛiti bu.› 5 «É maliɠii ná-kuye nuiti pɛ tolini, é ɠɛ ma mɔungi ma: ‹È-ma ɠuyei ɠa ga dielegɔ wo yɔɠɔzu, wa màliɠii?› 6 Naa gooɠaaʋoteni, é ɠɛ ma: ‹Gulɔ ɠɔɠɔ gani ɲɛ ungila (100).› É ɠɛ naa ma: ‹Ɗa-zɛʋɛi zeɠe, è zei fala, è sɛʋɛ su ga puulɔɔlugɔ (50).› 7 Naa ʋoluma, é ɠɛni taɠili ma: ‹Ɗa ma, è-ma ɠuyei ɠa ga dielegɔ?› Naa gooɠaaʋoteni, é ɠɛ ma: ‹Molo ɓɔlɔ ungila (100).› Naavolo unda nui ɠɛ ma: ‹Ɗa-zɛʋɛi zeɠe, è sɛʋɛ su ga puulɔsaʋa (80).› 8 «Naavolo unda nui naa, nii é ɠɛni ga ladalala nui, maliɠii maamusɛni tɔɔzei é faiti kɛɛni ga kiseimai. Tɔɔzei niima eteai zu nuɓusɛiti ta ɠiseizu ma faiti su, ti yɔɠɔzu ta ti-wɔɔlaiti, é leʋe wozakalagi nɔnɔ ma lointi ba. 9 Nɔ̀un, nà bosu wo ma ga: À wɔɔlaa ɠaiziɛ ga eteai niizu naavoloiti, naa ɠa a kɛ siɛgi zu ti ɓesu la wo ya, ti yeezei wo wu ɠɔoɠɔ pɛlɛiti bu. 10 «Zɔi é ga lada nu faa goi zu, naa ɠa ga lada nu faa wolai ɓalaa su. Zɔi ma é ga ladalala nui faa goi zu, toɠa ga ladalala nui faa wolai ɓalaa su. 11 Ni mu wo la ɠɛni ga lada nu eteai niizu naavoloiti su, ɓɛ ɠa a naavolo ɠiteiti kaliva wo ma? 12 Ni mu wo la ɠɛni ga lada nu boa naavoloiti su, ɓɛ ɠa a wo ɓɔɠɔ gelei ve wo ya? 13 «Botiɠɛ nu nɔpɛ ge la zooga botii ɠɛɛzu maliɠii felegɔ ʋɛ ʋɔɔma. Kɛni nɔ é gila wɔinzeɠe, é zɔi nɛɛ ʋɛ, ɓaa é ɠili zɔi ʋa kpaan, é zɔi ʋɛlɛlala. Wo la zooga botii ɠɛɛzu GALA ta naavoloi ʋɛ ʋɔɔma.» 14 Faliziɛinti ti naama wooiti mɛnigai ma, ti ɲɛɛɠulani Yesu zu, mazɔlɔɔ naavoloi nɛɛʋɛ ti ʋɛ. 15 Yesu ɠɛni ti ma: «Wa ɓɔɠɔ ɠɛɛzu ga telebo nuiti nuɓusɛiti gaazu, kɛlɛ GALA ge wo-yiimaʋɛti kwɛɛ. Mazɔlɔɔ nii nuiti ti kaazu ga faa ɓiigi, naa ʋɛlɛzeɠeʋɛ GALA bɛ. 16 «Tɔgi ta GALA goo wo nuiti ta-yeeɠɛɠalai ʋaaʋɛ, é zeeli Zan ná-yeeɠɛɠalai ma. Kaipa niina é ʋaani, GALA ná-masadai ma Woo Niinɛ Ʋagɔi laa ɠa zeelizu, tama ɛsɛ pɛ ka leʋesu ga ná-zeeɠaaɓaai, é ʋa lɔ masadai zu. 17 Geeɠɔlɔgi ta zooi leʋesu la ɓaani, é ʋa zeeli tɔgi ma zɛʋɛ ɠaei gila kpalaa too vai ʋa ya. 18 «Zɔi nɔpɛ é ɠɛlɛzu anzai ʋa, é taɠili sei, é wɛɛnziɛgi ɠɛa. Zɔi ma é anzanu zeizu, nii sinigi ɠɛlɛai ba, tɔ ɓalaagi wɛɛnziɛgi ɠɛa.» 19 «Naavolo nui ta ɠɛni ná, nii folo-o-folo maaɠilini ga seɠe laa ɓaaɓaagiti ti wola ʋagai, é ɠɛni ná-eteai ɠɛɛzu gaanɛɛi zu, é ɗa laami ga pagɔ. 20 Bala nui ta ɠɛni laani ná-kpogi wu, daaseigi ga Lazaal, palai ɠɛni kɔlɔgi ma ná pɛ, 21 wɔin ɓena ɠɛ ma ga é pului zeɠe ɓɔɠɔ ma ga daamiani ɓulukpulugi niiti ti ɠɛni ɠulazu naavolo nui ná-taɓalii ɠa, ti ɗa loo. Naa ʋoluma gilɛiti ti ɠɛni ʋaazu, ti ɗa ná-palaiti gaaɠɔmɔ. 22 «Bala nui zaani, geezuɠeelaiti ti seɠe, ti lii la Abalaame ɠoba. Naavolo nui ɓalaa zaani, maaɠulu. 23 É yɛni gɔvɛalaazu kpɔlɔi zu, é ɠaazuwuzeɠe, é Abalaame ɠa, Lazaal koba. 24 É ɓainni, é ɠɛ ma: ‹Kɛ̀ɛ, Abalaame, màawɔinɠa. Lazaal leʋe, é yeeɓeɠai ʋilɛ ziɛi ɠa, é nɛ̀gi maayɛɓɛ kae! Tɔɔzei nà wola ɓɔlɔzu abuzogi nii zu.› 25 «Abalaame gooɠaaʋoteni, é ɠɛ ma: ‹Dòun, ɠizɛ su ga è ɗa-undaanɛɛi zɔlɔɔni, siɛgi zu è ɠɛni la vulua, naama ziɛgi zu Lazaal ɠɛni daanɔɠɔwogi zu. Kɛlɛ toɠa ná-gaanɛɛnɛi zɔlɔɔsu ʋɛ niina, ɗa ma, è ɗa zoolɛ ga ʋe. 26 Naa pɛ poluma, kpokula zeɠe wolai ɠa ade yɔɠɔzu, naa ɠa a kɛ, zɔiti ta ɠɛ pɔ ga ti zeɠe wo ʋɔ pelei, ti ʋa gi ʋɔ bɛ, ti mina zoo, niiti ɓalaa ta ɠɛ ti zeɠe gi ʋɔ pelei, ti ʋa miná ʋele, ti mina zoo.› 27 «Naavolo nui ɠɛni ma: ‹Kɛ̀ɛ Abalaame, nà è maanɛɛnɛzu mu, soma è Lazaal leʋe kɛ̀ɛ ʋɛlɛi wu, 28 mazɔlɔɔ kɛɛɠɛloun lɔɔlugɔ ɠa zèa ná. É li, é ɓɔɛ ti ʋɔ, nii a kɛ ti mina ʋa daanɔɠɔwo adaʋɛ tɛi.› 29 Abalaame gooɠaaʋoteni, é ɠɛ ma: ‹Moizeni ta GALA goo wo nuiti ta-zɛʋɛiti ta ti ya. Ti woilo naati goo ma.› 30 É ɠɛ naa ma: ‹Naa la kula ɠɛa su, kɛ̀ɛ Abalaame, kɛlɛ ni gɔvɛi ta ɠa liina ti ʋɔ, ta ti-ziɛ ʋelei maavalibo.› 31 Abalaame ɠɛni ma: ‹Ni ti la woiloni Moize woo ma ta GALA goo wo nuiti, anɛɛ ɓalaa gɔvɛi ta ɠa é wuzeɠezu, ti la laa da pɛ.› »