Nehemiah 13 (TOMA)
1 Naama ziɛgi zu, ti yɛni Moize ná-sɛʋɛi ɠalasu nuɓusɛiti gaazu, ti ka su ga Amɔn ta Moaɓe nuiti maa la nɛɛni ti ʋa ɠɛ GALA ná-nuiti ta-maaɓɔgi zu. 2 Tɔɔzei, ti la ɠɛni Izilayɛle nuiti daaɠomini ga pagɔ, ti ʋa ti vadɔ ga daamianigiti ta kpɔɔle ɗɛi. Moaɓe nuiti mu ti Ɓalaame zalani ga é ʋa, é Izilayɛle ɠoto, kɛlɛ gá-ƓALAGI kotoi naa valiboni ga tuyai. 3 Izilayɛle nuiti ti naa mɛnigai ma sɛʋɛ ɠalagi zu, ti deveni ga ti wɛɛinti kpein kula ɓɔɠɔ zaama. 4 Naama yeei ʋa ɠɛ é zeeli, zalaɠa ɠula nui Eliasiɓe ɠa é ɠɛni wɛlɛzu pɛɛbaiti ma, niiti ti loni gá-ƓALAGI zei ʋɛlɛi ʋa. Tɛi tama ti ɓɔni boloda ma ta Toɓiya, 5 é pɛɛbai gila feeni naa ya, ʋɛ sɔɔlai niiti ti ɠɛni ná mɔungi: vebɛ zalaɠaiti, ansansegi, GALA sei ʋɛlɛi wu zɔɔlaiti, moloi ta dɔɔ niinɛi ma ʋuusiɛi, ta gulɔi, niiti ti levea ɠɛni de ga Levi nuiti, ta guye loo nuiti, ta siɠida makɛ nuiti tɔnɔi, ta zalaɠa ɠula nuiti kɔnɔgiti. 6 Gè la ɠɛni Zeluzalɛme siɛgi zu naama vaiti ti ɠɛɛni la, mazɔlɔɔ gè ɠaleni ma Ɓaɓilɔne masagi Aaletazɛɛlesɛse ɠoba ná-kona ʋuusaʋa maazu velesiɛi (32) ma masa fai zu, gè yeeɠɛɠala go ɠɛɛni. Naa ʋoluma é vaani bu ga 7 gè ɠale ma Zeluzalɛme. Gè faa ɲɔi naa ɠaani, nii Eliasiɓe kɛɛni, ga pɛɛbai vee vai Toɓiya ʋɛ gá-ƓALAGI zei ʋɛlɛi ma ɠoizuʋɛ. 8 Zìiɠaawanani gola. Nii kpein é ga Toɓiya ɠɔligiti, gè ti ɠulani pɛlɛi wu, gè ti ʋili ya eteaʋɛ, 9 naa ʋoluma gè devei veeni ga ti pɛlɛiti buuɲade, gè GALA sei ʋɛlɛi wu zɔɔlaiti puuni ná ʋolu mɔnɔ, ta vebɛ zalaɠaiti, ta ansansegi. 10 Gè mɛnini ɓalaa ga Levi nuiti kɔnɔgi la mɔ ɠɛni veezu, naa maaʋele ma Levi nuiti ta guye loo nuiti ti ɠalega ma, ti li ta-lii ɠɛɛzuʋɛti. 11 Gè zelii loni kundiɠiiti ma, gè ɠɛ ti ma: «Leeni vaa zu wo GALA sei ʋɛlɛi laaloai?» Gè Levi nuiti ta guye loo nuiti gaalɛɛni ba, gè ti ʋilɛ ta-wotii ma ʋolu. 12 Zuda nuiti ti tɔɔzeini ʋolu, ti ɗa ʋa ga puusiɛiti, ga moloi, ta dɔɔ niinɛi, ta gulɔi, ti pu ti makɛ ʋɛlɛi wu. 13 Gè yeeloni nui tanigaa ʋa ga ti ɗa wɛlɛ pɛlɛi naati ma, naama nuiti ti ɠɛni ga: zalaɠa ɠula nui Selemiya, sɛʋɛ ɠɛ nui Sadɔke, ta Levi nui Pedaya, naa ʋoluzeigi ɠɛni ga Zakuul ná-doun zunui Ɠanan, Matania ná-dounloin. Ɛsɛ pɛ ge zolooni ma ga nui niiti ta ga lada nua. Ta-wotii ɠɛni ga ti ɗa vebɛaniiti gaaɠwɛ ti-wɔɔlaiti ba. 14 Ee, nà-GALAGI, ɠizɛ naa kpein su, nii gè kɛa, mina yeema wooɠɛɠiladai naa ma, nii gè botii ɠɛa la GALA sei ʋɛlɛi vaa ma, ta nii kpein é ɠɛɛzu bu. 15 Naama ziɛgi zu, gè nui tanigaa ɠaani Zuda, ti ɗa leezɛn waai ɠolo dɔɔ ɗɛi ɠulazuʋɛ dooɠo foloi. Tanigaa ti ɗa moloi mɛɛn dooɠo foloi, ti ɗa ta-zoovalegiti kasɔɠili ga dɔɔi, ta leezɛn waai, é ʋɛɛ kooleɠoole gwaai ʋa, ta kasɔi ma zii pɛ, ti ʋa lɛ ga tiye Zeluzalɛme dooɠo foloi. Gè ti lɛnɛni voloi ti ɠɛni ta-yaaɠo aniiti pɔdizu la. 16 Naa ʋoluma Tiil nui niiti ti ɠɛni zeini Zeluzalɛme, naati ti ɠɛni ʋaazu ga kaleiti ta yaaɠo ani ɠiligiti, ti ɗa pɔdi Zuda nuiti ma ta Zeluzalɛme dooɠo foloi. 17 Gè zelii loni Zuda ɠundiɠiiti ma, gè ɠɛ ti ma: «Lee ʋe wo niima vaa ɲɔi ɠɛɛzu ɠani, wo ɗa dooɠo foloi maaɲɛɛi ʋu ma? 18 Naa nɔ lɛi wo-ɠɛɛni ti kɛɛni? Naa maaʋele ɠa é kɛa ada-ƓALAGI niima maanɔɠɔiti seiɗa ade ma, ta taai nii ma. Wɔun wa-ɠololalai maaʋele ma dooɠo foloi ʋɛ, wa ta ʋɛɛzu ná-ziiɠaawanai ʋa Izilayɛle laalɔɠɔma.» 19 Naa ʋoluma, gè devei veeni ga fitiligi ɠa ʋɛɛna nɔ feya, ti Zeluzalɛme taa ziɠidaʋɛti daaɠulu, aisa dooɠo foloi ʋa zeeli, ti laa mina lao, kɛni dooɠo foloi a leʋena. Gè nà-botiɠɛ nui tanigaa zeini taa ziɠidaʋɛti koba, ga ti ɗa wɛlɛ náti ma, nii a kɛ kasɔ nɔpɛ ge mina lɛ Zeluzalɛme dooɠo foloi. 20 Naa ɠɛai ma, yaaɠoi tanigaa ti ɲiini ga gila ɓaa felegɔ Zeluzalɛme ziɠigi ʋoluʋelei. 21 Gè ɓaazaɠani ti ma, gè ɠɛ ma: «Lee vaa zu wo ɲiizu siɠigi laaʋɛ? Wa ta ɠɛɛna nii ʋoluma, nà yeeʋɛɛ wo ma.» É zoni názu ma pa, ti la mɔ ɠɛni ʋaazu dooɠo foloi ma. 22 Naa ʋoluma, gè boni Levi nuiti ma ga ti ɓɔɠɔ ɲade, ti li, ti ɗa wɛlɛ taa ziɠidaʋɛti ma, nii a kɛ ti dooɠo foloi maaɲɛ.Ee, nà-GALAGI, ɠizɛ sù, è gàazumaawɔinɠa ɗa-wooɠɛɠilada wolai maaʋele ma! 23 Naama ziɛgi nɔ zu, gè Zuifui tanigaa ɠaani, ti anzaiti fuluai Asadɔde, Amɔn, ta Moaɓe nuiti saama. 24 Ti-lointi gilazuʋɛ kpein ge ɠɛ ɓɔɛzu ga Asadɔde wooi nɔ, zɔiti ti ɗa zii woo ɠiligiti bo. Kɛlɛ ti tanɔpɛ ge la ɠɛni zooni Eɓulu wooi wosu. 25 Gè zelii loni ti ma, gè ti ɠoto, gè tanigaa loɠa, gè ɗa tɔundeɠaiti folofolo ma. Naa ʋoluma, gè ɠɛni ti ma, ti ɠona GALA daaseigi ma, ga ti mina mɔ ti-loun anzanuiti fe ga vulu zii ɠiligiti ti-loun zunuiti bɛ, ta ti mina mɔ zii ɠili anzanu vulu ti-loun zunuiti bɛ, ɓaa tiya ɓɔɠɔ ʋɛ. 26 Gè ɠɛni ti ma: «Naa nɔ lɛi é ɠɛɛni ga Izilayɛle masagi Salomɔn ná-kotoi? Zii ɠiligiti kpein saama, kɛɠala masa ge la ɠɛni ná, ná-GALAGI nɛɛni ʋɛ, naa sei Izilayɛle unda ga masagi. Kɛlɛ naa pɛ ge ɠɛɛni, zii ɠili anzanuiti ti tooni kotoi zu. 27 Gi la mɔ pɔ gi mɛni ga wa naa ɠɛɠala ɠoto ɲɔuɲɔugi ɠɛɛzu ta wa ga wooʋalada nuiti ada-ƓALAGI laalɔɠɔma, wo ʋa ɗa zii ɠili anzanuiti sei.» 28 Yoyada ná-doun zunui gila ge ɠɛni ná, zalaɠa ɠula ɠundiɠi wolai Eliasiɓe ná-dounloin, é ɠɛni ga Ɠɔlɔnayime nui Sanebalate nɛkoi, naa ɠa é kɛɛni gè kpɛɛni, gè maaɠooza ɓɔɠɔ ʋa. 29 Ee, nà-GALAGI, mina yeema ti ma. Mazɔlɔɔ ti zalaɠa ɠula vai ma maaɲɛɛi ɠoloɠologɛ, ta minazeɠegi nii é wo yɔɠɔzu wa zalaɠa ɠula nuiti, ta Levi nuiti. 30 Nii kpein é ga wɛɛn ɠani, gè naati kulani ti zaama. Nii kpein maanɛai ga zalaɠa ɠula nuiti ta Levi nuiti ti kɛ, gè naa laa ga ga zɛbɛ, ɛsɛni ta tosu. 31 Naa ʋoluma koʋii ma vebɛanii nii maanɛai ga é ɗa ve, é zoloo ɛsɛ ná-yeeɠɛɠalai ma, ta zooi ʋaalɔnɔ mɔungiti fee vai, gè naa ɓalaa laani ga ʋolu.Ee, nà-GALAGI, ɠizɛ sù ga pagɔ!