Numbers 18 (TOMA)
1 Ɠɔoɠɔ GALAGI ɠɛni Aalɔn ma: «Ɗa-o, è-loun zunuiti-yo, ta è-ɠɛɛ mavofodaiti, faaɠaaza golaiti kpein ti ɠɛɛzu seizu ɲadegai laalɔɠɔma, ma ɠasɔi ɠa la wo unma. Ɗa-o, è-loun zunuiti-yo, faaɠaaza golaiti kpein ti ɠɛɛzu, wa-zalaɠa ɠula wotii ma ziɛgi zu, wa ɠa naama ɠasɔi a la wo unma. 2 È-ɠɛɛleaiti maaɓuɠa ɓɔɠɔ ʋa, Levi ná-bolodai, è-ɠɛɛ ná-bolodai, ti ɠili è ʋa, ti ɓɔ è ʋa, wa è-loun zunuiti wo ɠɛ botii zu seɠe ʋɛlɛi wu, nii zeele woo ɠesui bu. 3 Ta ɗa-levei zo, ti ɗa seɠe ʋɛlɛi kpein makɛ, kɛlɛ ti la maaɓuɠaa seizu ɲadegai ma zɔɔlaiti ba, anɛɛ zalaɠa ɠulazuʋɛ ɓalaa, wa ʋa lia zaazu, tiya-o, wa-o. 4 Ta ɠɛ wo ʋa, ɗa-wotii zu, ta ɠɛ GALA daaɠomi seɠe ʋɛlɛi wu wotii kpein su, ti ɗa botii pɛ kɛ, nii maanɛai ga ti kɛ. Kɛlɛ nu ɠili nɔpɛ ge la maaɓuɠaa wo ʋa. 5 Wa ɠa seizu ɲadegai ma ɠasɔi a ɠɛ wo unma, ta zalaɠa ɠulazuʋɛ, nà-ziiɠaawanai loko la leʋea naazu, é ʋa yei Izilayɛle nuiti daalɔɠɔma. 6 À wɛlɛ, gè yiimazeɠeni ga wo-ɠɛɛleaiti, Levi nuiti, Izilayɛle nui zɔiti saama, ta ga nɔ̀nɔi, gè ti veeʋɛ wo ya ga ti GALA daaɠomi seɠe ʋɛlɛi ma wotii ɠɛ. 7 Ɗɔun ɗa Aalɔn, wa è-mavofodaiti, wa wa-zalaɠa ɠula wotii ɠɛ, naa kpein su nii é ʋilɛsu zalaɠa ɠulazuʋɛ ʋa, ta nii é ada ɲadega wolai, kwɛpele seɠezuɠoozagi ʋoluʋɛ, wo-ɠasɔi ɠana. Gè wa-zalaɠa ɠula wotii veeʋɛ wo ʋɛ ga faanɛɛi. Zɔi nɔpɛ a maaɓuɠana ná ʋa, ga wo ɠɛʋele, ta naama nui ʋaa.» 8 Ɠɔoɠɔ GALAGI ɠɛni Aalɔn ma: «Woilo, nii dɔin Izilayɛle nuiti ti kulazu vebɛani ɲadegaiti ba, nà ɓɔɠɔi gè naa makɛ vai ɠaliva è ma. Gè fea è ʋɛ, wa è-mavofodaiti, wɔnɔi ɠa ná, naa ɠa ɠɛ ga ɠɔoɠɔ tɔgi. 9 Wɛlɛ nii a ɠɛ ga wɔnɔi vebɛani ɲadegaiti su, nii é ga nɔ̀nɔi, naa a zeɠena ba, é ɠala: nii dɔin Izilayɛle nuiti ti kɛɛzu bɛ̀ ga vebɛ zalaɠaiti moloi zu, ta koto gba zalaɠaiti, ta ná-faa zuɓɛtɛ zalaɠaiti, ti ʋaazu ga tiye pɔ̀. Naama ani ɲadega wolaiti ta ɠɛ ga ɗɔnɔ, wa è-loun zunuiti. 10 Wa ti mi ada ɲadegai ta. Zunuiti nɔ ɠa ta mi. Ta ɠɛ ga ani ɲadega wolaiti wo ʋɛ. 11 «É ɓudɛ naa maazu, vebɛanii niiti Izilayɛle nuiti ti feezu bɛ̀, ɗa naa ɠilazuʋɛ zeɠe. Gè naa kpein fea è ʋɛ, wa è-loun zunuiti, ta è-loun anzanuiti, naa ɠa ga ɠɔoɠɔ tɔgi. Nuiti kpein ta ɠɛ ɗa-ʋɛlɛi wu, ti la tɔ koloɠoloni, ta zoo ti ta mi. 12 Zooi ʋaalɔnɔ mɔungiti ti feezu bɛ̀, gè naati ɓalaa fea wo ʋɛ, naa ɠa é ga gulɔi, ta dɔɔ niinɛi, ta moloi, 13 zooi ʋaalɔnɔ mɔungi kpein ti ʋaazu la Ɠɔoɠɔ GALAGI ʋɔ. Nuiti kpein ta ɠɛ ɗa-ʋɛlɛi wu, ti la tɔ koloɠoloni, ta zoo ti ta mi. 14 «Nii kpein Izilayɛle nuiti ta konana mà ga nɔ̀nɔi, naa ɠɛa ɓalaa ga wɔnɔ. 15 Doun mɔungiti, ta togani mɔungiti, ta ti ve Ɠɔoɠɔ GALAGI ʋɛ, naati ta ɠɛ ga ɗɔnɔ. Kɛni è doun zunu mɔungi unmɔɔ, è togani yiʋo zinɛ mɔungi ɓalaa unmɔɔ, nii é la zooga é ʋa ɠula ga zalaɠa. 16 Zunu loin unmɔɔ ganii ɠa ɠula, a alu gila sɔlɔɔna, sɔngɔi ɠa ɠɛ ga wali ɠae lɔɔlugɔ, seizu ɲadegai ma valibogi zu, naama wali ɠae ɠilagi ɠa ga galamu puugɔ. 17 Kɛlɛ mina va bu, ti ʋa nikɛ yiʋo mɔungi unmɔɔ, ɓaa baala ziʋo mɔungi, ɓaa boli yiʋo mɔungi, ta ga zalaɠa ani ɲadegaiti. Wa ti-ma ɲamai vaza zalaɠa ɠulazuʋɛ ma, wo ti-ma wulɔi ɠula ga zalaɠai, nii abui galazu, makugi nɛai Ɠɔoɠɔ GALAGI ʋɛ. 18 Ti-ma zuai ɠa ɠɛ ga ɗɔnɔ, eɠɛʋelei zalaɠa zuaiti ta ɗa ɠɛ la, ma ɠekegi ta ma ɓalai é ga zeezazu ʋelei, niiti ti ɠula ga datɛɠɛ vai ma ʋoogi. 19 Ani ɲadegaiti kpein Izilayɛle nuiti ti seɠezu ba Ɠɔoɠɔ GALAGI ʋɛ ta-vebɛaniiti su, gè naati fea wo ʋɛ, ɗa-o, è-loun zunuiti-yo, è-loun anzanuiti-yo, naa ɠa ga ɠɔoɠɔ tɔgi. Toɠa ga minazeɠegi é la ɠoloɠologa ta é la valiboga, wo yɔɠɔzu wa Ɠɔoɠɔ GALAGI ta è-mavofodaiti.» 20 Ɠɔoɠɔ GALAGI ɠɛni Aalɔn ma: «È la zou zɔlɔɔga, ga è ɓɔɠɔ gele, Izilayɛle yooi zu, ɗɔnɔ nɔpɛ ge la ɠɛa ná, ti zaama. Nà ɠa gè ga ɗɔnɔi ta ɗa-ɓɛtɛi Izilayɛle nuiti saama. 21 «Puusiɛi nii kpein Izilayɛle nuiti ti kulazu, gè naa vea Levi nuiti bɛ ga tɔnɔ, botii vaa zu ti kɛɛzu, nii ti kɛɛzu GALA daaɠomi seɠe ʋɛlɛi wu. 22 Izilayɛle nuiti ti la mɔ maaɓuɠaa GALA daaɠomi seɠe ʋɛlɛi ʋa, ti ʋa koto zeɠe, ti ʋa za. 23 Levi nuiti nɔ ɠa ta ɠɛ GALA daaɠomi seɠe ʋɛlɛi wu wotiiti kɛɛzu, ni faaɠaaza gola ɠa ɠɛɛna ná, tiya ɠa ma ɠasɔi a la ti unma. Toɠa ɠɛ ga ɠɔoɠɔ tɔgi, wo-mavofodaiti kpein bɛ. Ti la zou zɔlɔɔga Izilayɛle nuiti saama, 24 mazɔlɔɔ nà puusiɛi kpein feezu Levi nuiti bɛ ga tɔnɔ, nii Izilayɛle nuiti ti kulazu Ɠɔoɠɔ GALAGI ʋɛ. Naa ɠa é kɛa, gè boni ti ma ga ti la zou zɔlɔɔga Izilayɛle nuiti saama.» 25 Ɠɔoɠɔ GALAGI ɠɛni Moize ma: 26 «Bo Levi nuiti ma ga: ‹Siɛgi zu Izilayɛle nuiti ti ʋaazu ga puusiɛiti wo ʋɔ, gè feezu wo ya ga wɔnɔ, wa puusiɛi ɠula ba ga vebɛanii Ɠɔoɠɔ GALAGI ʋɛ, naa ɠa é ɠɛɛzu ga puusiɛi ma ʋuusiɛi. 27 Wɔnɔ ma ɠuladai naa ɠa levezu ga, eɠɛʋelei naa la, nii é ɠulazu molo loɠazuʋɛ ta dɔɔ ɓɛtɛzuʋɛ. 28 Pele ɠana wa ta ɠula da la, wa ɓalaagi, é ɠɛ ga vebɛanii Ɠɔoɠɔ GALAGI ʋɛ, é ɠula puusiɛi kpein ba, wo sɔlɔɔsu Izilayɛle nuiti zea. Wa fe zalaɠa ɠula nui Aalɔn ya, é ɠɛ ga zalaɠai Ɠɔoɠɔ GALAGI ʋɛ. 29 Faanɛɛi kpein wo sɔlɔɔsu, wa vebɛanii zeɠe ba Ɠɔoɠɔ GALAGI ʋɛ, wa ma ʋagɔi zeɠe ba, é ɠɛ ga ma ʋagɔ ɲadegai seɠeai ba yɛ.› 30 «Ɗa ɠɛ ti ma mɔnɔ: ‹Wa ma ʋagɔi ɠulana ba, mɔtai ɠa ɠɛ wo ʋɛ, Levi nuiti, eɠɛʋelei naa la, nii é ɠulazu molo loɠazuʋɛ ta dɔɔ ɓɛtɛzuʋɛ. 31 Wa mi, ʋɛ nɔpɛ ná nɛai wo ʋɛ, wa wa-ʋɛlɛyeɠeiti, mazɔlɔɔ wo-zalai ɠana, botii kpein faa zu nii wo kɛɛzu GALA daaɠomi seɠe ʋɛlɛi wu. 32 Wo la faaɠaaza nɔpɛ kɛa ga naa, tɔɔzei wo ma ʋagɔi zeɠeʋɛ ba bɛ̀. Naazu wo la Izilayɛle nuiti ta-vebɛani ɲadegaiti kɔzɔa ɲɛgɛlɛin, wo ʋa za.› »