Numbers 21 (TOMA)
1 Masagi Alade, Kanaan nui, é ɠɛni zeini lɛkpɛmaʋɛ nu yeezazuʋɛ yooi zu, é mɛnini ga Izilayɛle nuiti ta leʋesu ga Atalime ʋelei. É laalɛɛni ti wu, é tanigaa zo ti zaama ga duɔi. 2 Izilayɛle nuiti ti minazeɠeni Ɠɔoɠɔ GALAGI ʋɛ, ti ɠɛ ma: «Ni ɗa niima nuɓusɛiti dɔɔna gi yeezu, gá ta-laaiti kpein koloɠolo mɛtu.» 3 Ɠɔoɠɔ GALAGI Izilayɛle nuiti gooi zoni, é zobogi ve ti ʋɛ, ti pilɛ sɔlɔɔ Kanaan nuiti ma. Izilayɛle nuiti ti ti zuwuɠaaleʋeni, ti ta-laaiti koloɠolo. Ti naama adaʋɛ laaseigi ʋɛɛni ga Ɠɔɔlema (nii poluʋɛ ga «é ɠoloɠologa»). 4 Izilayɛle nuiti ti zeɠeni Ɠɔɔl gizei ma, ti li ga Seeli Kpoloɗɛi ʋɔ pelei, nii a kɛ ti Edɔme yooi maala. Kɛlɛ nuɓusɛiti iɲɔ ge leʋeni pelei zu. 5 Ti tɔɔzeini ga ɓɔɛa GALA daalɔɠɔma ta Moize, ti ɗa ɠɛ ma: «Lee vaa zu wo gi ɠulaai Ezipete yooi ʋa, wo ʋa ga giye, gi ʋa za teʋebai zu? Mazɔlɔɔ ɓulu la ná, ziɛ la ná, niima maanɔɠɔ laamianigi wɔinzeɠea gi ma!» 6 Názu ɠa Ɠɔoɠɔ GALAGI kaali ɲɔiti teʋeni la nuɓusɛiti daalɔɠɔma, ti ɗa ti ɲi. Izilayɛle nuɓusɛi zaani ga gola. 7 Nuɓusɛiti ti ʋaani, ti Moize ɠa, ti ɠɛ ma: «Gi kotoi ɠɛɛni, siɛgi zu gi ɓɔɛa la Ɠɔoɠɔ GALAGI laalɔɠɔma ta ɗa ɓɔɠɔi. Niizu, soma è Ɠɔoɠɔ GALAGI maanɛɛnɛ, é kaalii tɛiti kula gi ma!» Moize maanɛɛnɛi woni nuɓusɛiti bɛ. 8 Ɠɔoɠɔ GALAGI gooɠaaʋoteni, é ɠɛ ma: «Kaalii ɓɛtɛ ga kɔlui, è sɛlɛ gulu ɠoozagi ʋa. Zɔi nɔpɛ kaali a ɲiina, é ɠaazuwuzeɠe, é wɛlɛ kaalii tɔna ba, naa la zaa.» 9 Moize kaalii ɓɛtɛni ga kɔlu ɓɔigi, é sɛlɛ gulu ɠoozagi ʋa. É zo názu ma, nu nɔpɛ kaalii a la ɲiina, é ɠaazuwuzeɠe, é wɛlɛ kaalii ʋa, é ga kɔlu ɓɔigi, naa la mɔ ɠɛni za. 10 Naa ʋoluma, Izilayɛle nuiti ti zeɠeni ti-ʋuuzuʋɛ, ti li, ti ʋu Wɔɓɔte. 11 Ti zeɠeni miná, ti li Ye-Aɓalime, nii é teʋebai zu, gaaʋotegai Moaɓe yooi ma, folo ɠulazu ʋelei. 12 Naa ʋoluma, ti liini, ti ʋu Zelɛde nɛmɛi zu, 13 naa ʋolu ti liini, ti ʋu ziɛ wolai Aalanɔn ʋoluʋelei, ziɛi naa ɠa é yeizu teʋebai zu, é ɗa ɠula Amool nuiti ta-yooi zu, é ga kwɛpelegi Moaɓe yooi ta Amool nuiti ta-yooi yɔɠɔzu. 14 Naa ɠa é ba, bogɛ é ɠole, Ɠɔoɠɔ GALAGI ná-kɔɔ vaiti ma zɛʋɛi zu ga: «Waɠɛɓe nii é Sufa, ta ma ɓekegiti, ta Aalanɔn, 15 é ɓɔ ma ɓekegiti ba, ti yeizu Aal taai ʋɔ pelei, tiya ɠa ti ga Moaɓe ɠwɛpelegiti.» 16 Ti zeɠeni miná, ti li Ɓeel. Kɔlɔyeɠei naa ná-fai ɠa é kɛɛni Ɠɔoɠɔ GALAGI ɠɛni Moize ma: «Nuɓusɛiti gaalɛ ba, nà ziɛi veezu ti ya.» 17 Izilayɛle nuiti ti niima wuyei looni, ti ɠɛ ma:«Ziɛi ɠula kɔlɔyeɠei zu, é lɛ!À maamusɛi wo! 18 À kɔlɔyeɠei ʋɛtɛ,nii kundiɠiiti ti bɔɔni,nii nu wolaiti ti bɔɔniga ta-lukpɔi ta ta-ɓakɔiti.» Ti zeɠeni teʋebai zu, ti li Matana, 19 ti li Naɠaliyɛle, ta Ɓamɔte. 20 Ti liini nɛmɛi zu, nii é Moaɓe yooi zu, gizei nii daaseigi ga Pizega, naa unmaʋɛ, ʋɛ ná zɛlɛgai teʋebai maazu. 21 Izilayɛle nuiti ti keelaiti teʋeni Amool nuiti ta-masagi Siɠon ma, ti ɠɛ ma: 22 «Va bu, gi leʋe ɗa-yooi zu. Gi la ziɛzu kpalagaa zu, ɓaa kpelea, gi la wa-ɠɔlɔyeɠe ɗɛ ɓɔlezu. Gá ʋilɛsu nɔ pele wolai nɔ ma, eyɛsu gi ɗa-yooi maazuɓudɛ.» 23 Anɛɛ naa ʋe, Siɠon ɠɛlɛni, é la ɓeni ti ʋa, ti ʋa ziɛ ná-zooi zu. É ná-kɔɔɠɔ nuiti pɛ gaalɛɛni ba, é li Izilayɛle nuiti daalɔɠɔma teʋebai zu, é kɔɔi ʋɛɛ ti ʋa Yaɠase. 24 Kɛlɛ Izilayɛle nuiti ti vɔnini ma, ti ná-zooi pɛ seɠe, é zo ziɛ wolai Aalanɔn ma, nu yeezazu ʋelei, é li ziɛ wolai Yaɓɔke ʋɔ pelei, nu ɠɔʋɛzuʋɛ, eyɛsu é li Amɔn nuiti ta-ɠwɛpelemaʋɛ, folo ɠulazu ʋelei, ná makɛga ɠɛni de kpekpe. 25 Izilayɛle Amool nuiti ta-laaiti kpein soni, é zei ti zu, Ɠɛsɛɓon taai la ma mɛɛ, ta maaɠoolii zu geleiti pɛ. 26 Mazɔlɔɔ Ɠɛsɛɓon ɠɛni ga taa wola, ʋɛ Amool nuiti ta-masagi Siɠon ɠɛni zeini ná, é zo naama ziɛgi zu ma, é kɔɔi ʋɛɛni la Moaɓe masagi ʋa, é zooi kpein seɠeni, é zeeli ziɛ wolai Aalanɔn ma. 27 Naa ɠa é ba, faaɠwɛ nuiti ti boni la, ti ɠɛ ma:«À ʋa Ɠɛsɛɓon!Siɠon ná-taai lo ʋolu,é lo ʋolu! 28 Mazɔlɔɔ abui ɠa vukazu, é ɗa ɠula Ɠɛsɛɓon,abuzogi vazaga, é ɗa ɠula Siɠon ná-taazuʋɛ,é Aal ɠala Moaɓe yooi zu,ta Aalanɔn ada ɠaaɠoozagiti maliɠiiti. 29 Maanɔɠɔi ɠa è ʋɛ, Moaɓe!È loa ya, Kemɔse ná-nuɓusɛi!È-loun zunuiti ti ʋela.È-loun anzanuiti ti ɠɛa gaAmool nuiti ta-masagi ná-duɔiti,ungo, Siɠon masagi. 30 Gi gá-mɛɛinti pilini Amool nuiti ma!Niizu zooi pɛ ge ɠoloɠologa,é zo Ɠɛsɛɓon, eyɛsu é zeeli Diɓon.Eyɛsu é li Nofa, é li ɠite Medeɓa,gi ti kpein koloɠoloni!» 31 Zekana Izilayɛle nuiti ti zeini la Amool nuiti ta-yooi zu. 32 Moize zou zuʋɛtɛ nuiti teʋeni, ti li, ti Yazɛɛl taai ʋɛtɛ. Taaiti kpein ti ɠɛni ba, Izilayɛle nuiti ti naati soni, ti Amool nuiti kpɛ ná. 33 Naa ʋolu ti latini, ti li ga Ɓasan ʋele. Ɓasan masagi Wɔge ɠulani, ta ná-kɔɔɠɔ nuiti kpein, ti ti laaɠomi, ti ʋa kɔɔi ʋɛɛ ti ʋa Edeleyi. 34 Ɠɔoɠɔ GALAGI ɠɛni Moize ma: «Mina lua tɔun ba, mazɔlɔɔ gè dɔa è yeezu, ta ná-kɔɔɠɔ nuiti kpein, é ʋɛɛ ná-zooi ʋa. Ɗa so, eɠɛʋelei è Amool nuiti ta-masagi Siɠon zoni da, nii é ɠɛni zeini Ɠɛsɛɓon.» 35 Izilayɛle nuiti ti Wɔge ʋaani ta ná-doun zunuiti, ta ná-kɔɔɠɔ nuiti kpein. Nu ɠila kpalaa ge la ɠulani. Ti ná-zooi zoni.