Proverbs 31 (TOMA)

1 Masagi Lemuwɛle laawooiti. Kalagiti dee ti woni da. 2 Lee ɠa nà bo è ma, dòun zunu?Lee ɠa nà bo è ma, kòozu loin?Lee ɠa nà bo è ma, dòun zunu, gè minazeɠeni ga gè sɔlɔɔ? 3 Mina è-zuvikɛi ve anzanuiti zea,ta ɗa-ʋeleiti, naati zea, niiti ta ɗa masagiti kaka. 4 É la zolooni masagiti ma, Lemuwɛle,é la zolooni masagiti ma, ga ti ʋa dɔɔi ɓɔle,ɓaa naati, niiti ti kundiɠilai ɠɛɛzu, ti ʋa gaazulati gani ɓɔle. 5 Mazɔlɔɔ a ti zona, ti mina yeema tɔgi laawooiti ma,ta ti mina maawɔin nuiti ta-ɠaamai maavalibo. 6 Nu gaazulati kpɔle anii ve naa ya, nii undaa ʋaazu ʋilisu,ta dɔɔi ve maawɔin nui ya. 7 É kpɔle, é yeema ná-baladai ma,é mina ɠitoo ná-maanɔɠɔi zu. 8 Laalao è ɓɔɛ, è naati maalobo, niiti ti la zooga ti ʋa ɓɔɛ,è naati kpein maalogi wo, niiti kɛlɛbai wogai ga tiye. 9 Laalao è ɓɔɛ, è tukpɔi ɠaaleʋe ga telebodai,è maanɔɠɔi nui maalobo ta bala nui. 10 Undaanɛ nu ɠa ga naa, nii a anzanu zɔɓelamai zɔlɔɔ,tosuʋɛ wɔɔlɔʋɛ kɔbu ani ʋagɔiti sɔngɔi ʋa. 11 Sinigi laaʋɛ da,ani ʋagɔ nɔpɛ ge la ʋalaga ná-pɛlɛi wu. 12 É la ɗa ga kazemazu vaa nɔpɛ kɛ ga sinigi,kɛni faa ʋagɔi nɔ, sii ma voloiti pɛ su. 13 Toɠa ɗa baala deɠai ɠaiziɛ ta gezei,é ɗa boti ɠɛ ga zeeiti ga koozunɛɛi. 14 Eɠɛ yaaɠo ɓatoi,toɠa ɗa zeɠe ga ɠɔnɔgi ɠoozama. 15 Toɠa ɗa wuzeɠe ga kpidiɓidigi,é daamianigi ve ná-pɛlɛyeɠei ya,é ná-deveiti fe ná-botiɠɛ anzanuiti zea. 16 É ɠisiɛ kpalagi ta zu, é geya,é leezɛn ɓelei leʋe ba, ga ná-botii zulɔnɔgi. 17 Toɠa ɗa botii ɠɛ ga suvikɛi pɛ,zea la ʋalaga ɠɔ. 18 Toɠa pɛtɛsu ga zeavaiti su ɠa ɓɛtɛzu,toɠa ɗa ɠaazuɓa, é ɗa botii ɠɛ kpidii, abu zezei ɠa. 19 Toɠa ɗa kenagi zo ga yeei, é ɗa gezei ɓali,é kena kpakui zo ga yeeɓeɠaiti. 20 Zeei maalegɛ maanɔɠɔ nuiti ta-ɓɔba vai ma,toɠa ga faanɛɛ ɠɛ nu bala nuiti bɛ. 21 É la lua kɔɔlɛ ʋa, é ʋilɛ ná-pɛlɛi ʋa,tɔɔzei seɠe ʋagɔiti ta ti pɛ zea. 22 Toɠa ɗa dasuzeɠeiti kpɛtɛ tɔ ɓɔɠɔi,geze ɓɔi seɠeiti ta zea. 23 Sinigi ɠa ga seizumaanɛgi ɛsɛ pɛ ge kwɛɛ, ti ɗa unfe ma,tiya ɠa ta ɗa zei taa vaawo bosuʋɛti. 24 Toɠa ɗa seɠeiti fɛlɛ, é ɗa ti ʋɔdi,é ɗa saamaɠiligiti fe yaaɠoiti zea. 25 Zɛbɛi ta unfemai, ta bɛ ga maaɠili zɔɔlai,toɠa ɗa ɲɛɛ laa ɠakama, a ɠɛna ɠisiaa ʋelela ʋele vaiti su. 26 Toɠa ɗa ɓɔɛ ga ɠimalai,soogɛ kalagi wosu ga wooɠɛɠiladai. 27 Toɠa ɗa wɛlɛ fai kpein ma, é ziɛzu ná-pɛlɛyeɠei wu,é la looɠoga botii ʋa. 28 Ná-dointi ta ɗa wuzeɠe, ti ʋa ti ɗa maamusɛ.Maamusɛ vai ɠa ɗa ɠɛ ga guyei sinigi la. 29 É ɠɛ ma: «Anzanui mɔinʋɛ, ti-losuʋɛti bɔɔlɔai,kɛlɛ ɗɔun ɗa, è ɓudɛʋɛ ti pɛ maazu.» 30 Zaalai ɠa ga yaava ani, padai ɠa ɗa leʋe,kɛlɛ anzanui é luazu Ɠɔoɠɔ GALAGI ʋa, naa ɠa maanɛai ga é maamusɛi zɔlɔɔ. 31 À kpɔlɔzuʋɛ ma lɔnɔgi ve zea!Wo maamusɛ vaiti bo, taazuʋɛ ɲɛgɛlɛin é ʋilɛ kɛɛwotiiti pɛ ba!

Proverbs 31 (TOMA)

In Other Versions