1 Kings 11 (YAPE)
1 Solomon e ba’adag bo’or e ppin u boch e nam. Miki le’engiy e ppin nu Hittite, Moab, Ammon, Edom, ngu Sidon, ni aram rogon ni kabay fare bpin ni fak e pilung nu Egypt ni le’engin. 2 I le’engiyrad ni yug aram rogon nike yog SOMOL ngak piyu Israel ndab ra mabgolgad ngak e pi girdi’ ney, ni bochan e yad ra pingeg yu Israel ngar tedfan yug boch e got. 3 I le’engiy Solomon 700 e ppin ni pifak e pilung nge ku yug boch e ppin rok ni yad 300. Yad tapgin me pi’ keru’ ngak Got, 4 ma nap’an ni pilbithir ma kar waliyed ke un i tayfan yug boch e got. Ma daki yul’yul’ ngak SOMOL ni Got rok, ni bod David ni chitamngin ni i par. 5 I tayfan Astarte, nib got rok yu Sidon, nge Molek ni ba got ni ba sonogor nu Ammon. 6 I denen nib togopluw ngak SOMOL ma daki par nib yul’yul’ ngak ni bod ni i par David ni chitamngin. 7 Mu daken e burey ko ngek u Jerusalem e ubung bangi ban’en riy ni ngu’un tayfan Kemosh riy, ni fare got ni sonogor nu Moab, nge bang ni ngu’un tayfan Molek riy, ni fare got ni sonogor nu Ammon. 8 Miki ngongliy yungi tagil’ e tayfan ni ngi i urfiy urngin fapi ppin nu yug boch e nam ni le’engin e incense nge maligach ko tirorad e got riy. 9 9-10 Yug aram rogon nike yib SOMOL ni Got rok yu Israel i m’ug ngak Solomon ni l’agruw yay keyog ngak ni dabki tayfan yug boch e got. Me Solomon e de fol rok SOMOL me cheal rok nga orel. Maaram me damumuw SOMOL ngak Solomon 11 me ga’ar ngak, “Bochan e ri tafinay rom ni ngam th’ab fare m’ag u thildow ni dab mu fol ma dab mu rin’ e tin kugog, ma aram e gu be micheg ni bay gu chuweg e gagiyeg ko pilung u pa’am nggu pi’ ngak reb e pi tolang ko salthaw rom. 12 Machane bochan e chitamam David ma aram e dab gu rin’ e ren’ey nnap’an ni kagab fos, machane gu ra rin’ ko ngiyal’ ni be gagiyeg e re pumo’on ni fakam. 13 Ma dab gu chuweg e gagiyeg ko pilung ni ga’ngin u pa’; ya bay gu pag ta’reb e ganong ngi i gagiyegnag ni bochan e tapigpig rog i David ma ku fan nga Jerusalem ni gag e gu turguy ni nge milfan ngog.” 14 Ma aram me tay SOMOL Hadad, ni be’ ko fare tabnaw nib pilung u Edom, ni nge togopluw ngak Solomon. 15 15-16 Ma kab kakrom ko ngiyal’ney, nnap’an ni mael David nga Edom nge kol, me yan Joab ni ir e ga’ ko salthaw rok ngaram ni nge k’eyag e pi’in karm’ad. Me par Joab nge pi salthaw rok u Edom ni nel’ e pul, ma ngiyal’nem e ra thanged e fan rok gubin e pumo’on nu Edom 17 ma kemus ni Hadad nge ku boch e pi tapigpig rok e chitamngin ni bogi Edomite e dan li’rad, ya ra milgad nga Egypt. (Ngiyal’nem e ka bochi tir Hadad.) 18 Ra chuwgad u Midian ngranod nga Paran, ni aram e gin ni un boch e pumo’on riy ngorad. Ma aram miyad milekag nga Egypt ngranod ngak e en pilung, ni ir e pi’ ngak Hadad yungi binaw nge bogi naun me pi’ e ggan ngak. 19 Me par Hadad ni fager rok fare pilung, me pi’ fare pilung be’ ni bpin ni walagen le’engin ni aram e en ni pilung nu Tahpenes, ni nge le’engiy Hadad. 20 Me diyennag bochi pagel ni fak Hadad ni Genubath fithingan, ni i chugliy fare pin ni pilung u lan fare naun ni tafen e pilung, aram e gin ni i par fachi pagel riy u fithik’ e pi’in pagel ni fak fare pilung. 21 Nap’an ni taw e thin ngak Hadad nga Egypt nike yim’ David nge Joab ni tagafaliy e yu raba’ i salthaw, me ga’ar Hadad ngak e en ni pilung, “Mu pageg nggu sul ko nam rog.” 22 Me fith fare pilung, ni ga’ar, “Ni mangfan? Mog, kabay ban’en ndawori yag ni gu pi’ ngom? Ere aram fan ni ga ba’adag ni ngam sul nga tafnam?”Me fulweg Hadad lungun fare pilung, ni ga’ar, “Kemus ni ngam pageg nggu wan.” Ma aram me sul ko nam rok. 23 Miki tay Got Rezon nib mo’on ni fak Eliada ni nge togopluw ngak Solomon. I Rezon e ke mil rok e masta rok, ni aram Hadadezer ni Pilung nu Zobah, 24 ma kemang tagagiyeg u barba’ i girdi’ nma togopluw ko motochiyel ko nam. (Ran’ey e buch nga tomuren nike gel David ngak Hadadezer ma ke thang e fan rok e piyu Syria ni ur folgad ngak.) Me yan Rezon nge fa raba’ i girdi’ rok ngar pired u Damaskus, ni aram e gin ni pilungnag pichongin riy, nge mang pilung nu Syria. 25 I par nib to’ogor rok yu Israel u n’umngin nap’an e yafos rok Solomon. 26 Reb e girdi’ ni cheal nge togopluw ngak Solomon ni Pilung e reb e tolang ni bay u tan pa’, ni aram Jeroboam nib mo’on ni fak Nebat nu Zeredah u lan yu Efraim. Zeruyah ni chitiningin e ke yim’ e pumo’on rok. 27 Ba’aray murung’agen e re togopluw nem.I Solomon e suguy e but’ nga bangi ban’en ni bay ko ngek u Jerusalem me thuthuy e pi rungrung ko fare binaw. 28 Jeroboam e be’ ni kab pagel nib salap ko maruwel, ma fa’ani guy Solomon feni pasig ko maruwel me tay ni ir e ngi i gagiyegnag urngin e maruwel nike yog ni ngan rin’ u lan e nug ko ganong rok Manasseh nge ganong rok Efraim. 29 Reb e rran ni chuw Jeroboam u Jerusalem me yan ko milekag, miyow mada’ Ahijah ni profet ni be’ u Shiloh u kanawo’ u daken e ted ni go’ yow. Ma ke chuw Ahijah nga ba mad nib n’uw ma bbe’ech; 30 me luf u daken nge guchthuy nge yan i par ni ragag nge l’agruw yang. 31 Me ga’ar ngak Jeroboam, “Mfek ragag yang, ya SOMOL ni Got rok yu Israel e be ga’ar ngom, ‘Nggu chuweg e gagiyeg u pa’ Solomon, ma bay gu pi’ ngom ragag e ganong. 32 Mi Solomon e ta’reb e ganong ni bayi par rok, ni bochan e tapigpig Rog i David nge bochan yu Jerusalem, ni fare binaw ni gag e gu turguy u lan e nam nu Israel ni nge milfan ngog. 33 Nggu rin’ e ren’ey ni bochan e ke n’igeg Solomon be tay fan Astarte ni got rok yu Sidon; nge Kemosh ni got rok yu Moab; nge Molek ni fare got rok yu Ammon. Solomon e dakir fol rog; ke rin’ e kireb ma dakir tay e motochiyel rog nge thin rog u gil’, ni gathi aram rogon ni i rin’ e chitamngin i David. 34 Machane dab gu chuweg e re nam ney ni ga’ngin u pa’ Solomon, ya bay gu tay ngi i gagiyeg u n’umngin nap’an e yafos rok ni bochan e tapigpig rog i David ni gag e gu duwgiliy, mi i par ni be fol ko pi motochiyel rog nge thin rog. 35 Bay gu chuweg e gagiyeg u pa’ fak Solomon, mu gu pi’ ragag e ganong ngom ngu’um gagiyegnag. 36 Bay gu pag ta’reb e ganong nge par u pa’ fak Solomon, ya gubin ngiyal’ ni ngi i par reb i owchen e tapigpig rog i David ni be gagiyeg u Jerusalem, ni fare binaw ni ku gu turguy ni ir e ngu’un liyor ngog riy. 37 Me gur Jeroboam e bay gu tem ngam mang pilung nu Israel, ma bay um gagiyegnag ga’ngin e nam ni ga ba’adag ni ngam gagiyegnag. 38 Fa’an ga ra par ni ga be fol rog, ma ga be fol ko pi motochiyel rog, ma gab fel’ u wun’ug ni bochan e ga be rin’ e tin kugog ni bod ni i rin’ e tapigpig rog i David, ma gubin ngiyal’ ni bay ug par rom. Bay gu tem ni gur e pilung nu Israel mu gu tay ni pi’in owchem e bay urbad nga luwam ngu’ur gagiyeggad, ni bod ni ku gu rin’ ngak David. 39 Bay gu gechignag pi’in owchen David ni bochan e denen nike ngongliy Solomon, machane bay n’umngin nap’an.’” 40 Ma aram me guy Solomon rogon ni nge thang e pogofan rok Jeroboam, machane me mil ngak Shishak ni Pilung nu Egypt, me par u rom nge mada’ ko ngiyal’ ni yim’ Solomon. 41 Urngin ban’en ni i rin’ Solomon nge gagiyeg ni i tay, nge gonop rok e urngin ni ka ni yoloy ngalan fare babyor ni Chepin Solomon. 42 Aningeg i ragag e duw ni i par u Jerusalem ni ir e pilung ni be gagiyegnag yu Israel ni ga’ngin. 43 Me yim’ mi ni k’eyag u Jerusalem, me yan Rehoboam ni fak nga luwan nge pilung.