1 Kings 16 (YAPE)
1 Me non SOMOL ko fare profet i Jehu nib mo’on ni fak Hanani ni ba’aray e thin ni yog ni fan ngak Baasha: 2 “Ummoy ndariyfam, machane mu gu tem ni gur e ngam gafaliy e girdi’ rog nu Israel. Ma ke chiney ma ga be denen ni bod Jeroboam kam waliy e girdi’ rog nga fithik’ e denen. Pi denen rorad e ke pug e damumuw rog, 3 ma aram e bay gu chuwegem nge tabnaw rom, nri bod rogon nu gu rin’ ngak Jeroboam. 4 Demturug reb i chon e tabnaw rom nra yim’ u lan e binaw mra longuy e pilis, ma demturug e arorad nra yim’ u daken e tafelfel’ mra longuy e arche’ ni vulture.” 5 Ma gubin e tin i rin’ Baasha nge urngin e tin i rin u fithik’ e muth’an e kan yoloy ngalan Chepin e Pilung nu Israel. 6 Baasha e yim’ min k’eyag u lan yu Tirzah, me fak ni pumo’on i Elah e yan nga luwan nge mang pilung. 7 Fare profet i Jehu e ir e pi’ SOMOL e re thin nem ngak nib togopluw ngak Baasha nge tabnaw rok ni nge thapeg ni bochan e pi denen ni ngongliy Baasha nib togopluw ngak SOMOL. Ir e k’aring e damumuw ngak SOMOL ni gathi kemus ni bochan e kireb ni i rin’, ni bod rogon e tin i rin’ Jeroboam ni i Pilung u m’on, machane ku bochan e thang e pogofan rok gubin gathon e tabnaw rok Jeroboam. 8 U lan e duw ni rliw’ nge nel’ ko gagiyeg rok Asa ni Pilung nu Judah, me mang Elah nib mo’on ni fak Baasha e pilung nu Israel, me yog e thin u lan yu Tirzah ni l’agruw e duw. 9 I Zimri, nreb e tolang ko salthaw rok nib milfan baley ko fapi chariot rok e en ni pilung ngak, e makath nib togopluw ngak Elah. Me yan i reb e rran u lan yu Tirzah, ma be chingnag Elah u lan e tabnaw rok Arza, ni ir e ma guy fare naun ni tafen e pilung. 10 Me yib Zimri ngalan fare naun, nge yib i thang e fan rok Elah, me fek luwan nge par ni ir e pilung. Ran’ey e buch u lan e duw ni rliw’ nge medlip ko gagiyeg rok Asa ni Pilung nu Judah. 11 Yug nap’an e pilung Zimri me thang e fan rok gubin chon e tabnaw rok Baasha. Gubin e pumo’on ni girdi’en nge fager rok ma yi go’ thang e pogofan rorad. 12 Ma aram me yan i aw nrogon nike yog SOMOL nib togopluw ngak Baasha u l’ugun fare profet i Jehu, i Zimri e thang e fan rok ga’ngin fare tabnaw rok Baasha. 13 Ni bochan e yad be tayfan yug boch e got ma ku bochan e yad be waliy yu Israel nga fithik’ e denen, i Baasha nge Elah ni fak ni pumo’on e ra k’arngew e damumuw ngak SOMOL, ni fare Got rok yu Israel. 14 Gubin ban’en ni i rin’ Elah e ni yoloy ngalan Chepin e Pilung nu Israel. 15 U lan e duw ni rliw’ nge medlip ko gagiyeg rok Asa ni Pilung nu Judah, me Zimri e i yog e thin ni medlip e rran u lan yu Tirzah. Fa yu raba’ i salthaw nu Israel e ra m’aged e mael ko fare binaw nu Gibbethon u lan yu Filistia, 16 ma nap’an rrung’aged nike makath Zimri nib togopluw ngak e en ni pilung ma ke thang e fan rok, ma aram u rom e roged riy ni fare ga’ ko salthaw rorad i Omri e ir e nge pilung u Israel. 17 Omri nge yu raba’ i salthaw rok e ra chuwgad u Gibbethon ngranod ra m’aged e mael nga Tirzah. 18 Nap’an ni guy Zimri ni nge waer fare binaw, me yan nga langgin e yoror ni fan ko mael ko fare naun ni tafen e pilung, me yip’ e nifiy ko fare naun, me yim’ u fithik’ e daramram. 19 I buch e ran’ey ni bochan e i denen nib togopluw ngak SOMOL. Ni bod rogon e denen ni i rin’ Jeroboam, miki kirebnag laniyan’ SOMOL ko pi denen rok miki waliy yu Israel nga fithik’ e denen. 20 Gubin e tin kabay ni rin’ Zimri, nib dachug ko fare makath ni tay e go’ kan yoloy ngalan Chepin e Pilung nu Israel. 21 Me ruw raba’ e girdi’ nu Israel: bochi yad e ba’adag ni nge mang Tibni e pilung nib mo’on ni fak Ginath, ma bochi yad e ba’adad Omri. 22 Me tomuren, ma tin ni fol ngak Omri e ra gelgad; me yim’ Tibni me mang Omri e pilung. 23 Ere u lan e re duw ni guyey nge ta’reb ko gagiyeg rok Asa ni Pilung nu Judah, me mang Omri e pilung nu Israel, me gagiyeg ni ragag nge l’agruw e duw. Nel’ ni som’on e duw e gagiyeg u Tirzah, 24 ma aram me chuw’iy fachi burey nu Samaria nga 6,000 yang e silber rok fare mo’on ni fithingan e Shemer. Me yororiy Omri fachi burey, me ubung bochi binaw u rom, me tunguy fithingan ni Samaria, ni aram e bod fithingan Shemer, ni facha’ ni immoy ni tafen e chi burey nem. 25 Me denen Omri nib togopluw ngak SOMOL nib thum’ ngaru’ rok e pi’in ku ur gagiyeggad. 26 Bod Jeroboam ni immoy ni bm’on rok, i k’aring e damumuw ngak SOMOL, ni fare Got nu Israel, ni bochan e pi denen rok nge ir ni i waliy e girdi’ nga fithik’ e denen nge tayfan ni i tay ngak yug boch e got. 27 Gubin e tin kabay ni i rin’ Omri nge urngin e pin’en ni i thognag e go’ kan yoloy ngalan Chepin e Pilung nu Israel. 28 Me yim’ Omri min k’eyag u Samaria, me Ahab nib mo’on ni fak e yan nga luwan nge mang pilung. 29 Lan e bin guyey nge meruk e duw ko gagiyeg nike tay Asa ni Pilung nu Judah, me mang Ahab ni fak Omri e pilung nu Israel, me par u Samaria ngi i gagiyeg ni rliw’ nge l’agruw e duw. 30 Mi i denen nib togopluw ngak SOMOL, ni kab gel e kireb rok ko pi pilung ni yad ba m’on rok ko pilung u Israel. 31 Gathi kemus ni i rin’ e kireb ni i rin’ Jeroboam ni Pilung; ya ki leay Jezebel, ni fak Ethbaal ni Pilung nu Sidon, me un i tay fan Baal. 32 Me toy ba tempel ni fan ngak Baal u Samaria, me ngongliy ba altar ni fan ngak, me tay ngalan e re tempel nem. 33 Miki suweg ba ley i gek’iy ngalang me tay nib machmach ni ngu’un tayfan fare got ni bpin riy ni Asherah fithingan. Kireb ni i ngongliy e k’aring e damumuw ngak SOMOL ni Got nu Israel, ya ba pire’ e kireb ni ngongliy ngak urngin e pilung nu Israel ni yad ba m’on rok. 34 Ngiyal’ ni ir e be gagiyeg me Hiel nu Bethel e ngongliy rogon bayay fare binaw nu Jeriko. Fa’ani tay pa’ ko maruwel, me yim’ Abiram ni bin nganni’ i fak ni pumo’on, ma fa’ani ngongliy rogon e pi garog nu Jeriko, me yim’ Segub, ni bin th’abi bitir i fak ni pumo’on, ni bod rogon ni yi’iynag SOMOL u l’ugun Joshua ni fak Nun.