2 Chronicles 11 (YAPE)

1 Nap’an ni taw Rehoboam ni Pilung nga Jerusalem, me pining nga ta’bang 180,000 e salthaw nth’abi cheag ko fa gal ganong rok Benjamin nge Judah. Ke leamnag ni ngaranod ko mael ngar sulweged e pi ganong nu ley ni lel’och yu Israel nga tan pa’. 2 Machane me yog SOMOL ngak fare profet i Shemayah 3 ni nge pi’ e re bug i thin ni ba’aray ngak Rehoboam ni Pilung nge ngak urngin e girdi’ ko ganong rok Judah nge Benjamin: 4 “Dab m’aged e mael ngak e girdi’ romed. Mu sulod ni gimed gubin nga tafenmed. N’en ke buch e gag e kug gagiyegnag.” Miyad fol ko n’en keyog SOMOL ma aram e daranod ni mael ngak Jeroboam. 5 Me par Rehoboam u Jerusalem me yog ni pi binaw ni ba’aray ko fagal ganong rok Judah nge Benjamin e go’ ngan yororiy ni fan ko mael: 6 yu Bethlehem, Etam, Tekoa, 7 Bethzur, Soko, Adullam, 8 Gath, Mareshah, Zif, 9 Adoraim, Lakish, Azekah, 10 Zorah, Aijalon, ngu Hebron. 11 I yog ni ngan yororiy fapi binaw ni fan ko mael me turguy e en nge ga’ ko salthaw u gubin fapi binaw, mra reb fapi binaw ma ke kunuy e ggan, nge gapgep ni olive, nge wayin, nga langgin, 12 ma ku er rogon e yungi shield nge sarey. Aray rogon ni tay yu Judah nge Benjamin u tan pa’. 13 Ga’ngin yang e nug nu Israel ni yib e pi prist nge pi Levite riy ko yimuch nga Judah. 14 Me n’ag e pi Levite e yungi flang ni yad ma chugliy e gamanman riy nge ku boch e binaw ngranod ra pired nga Judah ngu Jerusalem, ni bochan Jeroboam ni Pilung nu Israel nge pi pumo’on ni pifak e ka ra chuweggedrad ko pi pigpig ko prist ngak SOMOL. 15 Jeroboam e mel’eg boch e girdi’ ngar manged e prist rok ni ngu’ur pigpiggad ko fa yungi tagil’ e tayfan rok e pi’in ndar nanged Got ma yad be tayfan e mo’onyan’ nge bogi liyos ni ya’an pifak e garbaw ni pumo’on nike ngongliy. 16 Ma gubin e girdi’ nu lan fapi ganong nu Israel nriyul’ ni yad ba’adag ni ngu’ur liyorgad ngak SOMOL ni Got nu Israel, e go’ ra leked e pi Levite nga Jerusalem, ya nge yag ni ngar pi’ed e pi maligach ngak SOMOL ni Got rok e pi chitamngirad. 17 Ren’ey e i pi’ gelngin fare nam nu Judah, ma dalip e duw ni ur ayuweged Rehoboam nib mo’on ni fak Solomon mu’ur pired ni bod ni ur pired u tan e gagiyeg rok David ni Pilung nge Solomon ni Pilung. 18 Rehoboam e le’engiy Mahalath ni chitamngin e Jerimoth nib mo’on ni fak David ma chitiningin Abihail, ni be’ ni bpin ni fak Eliab nib mo’on ni fak Jesse. 19 Dalip e pagel ni fakrow, Jeush, Shemariah, nge Zaham. 20 Miki bingiyal’ me le’engiy Maakah ni be’ ni bpin ni fak Absalom, miyow fakay aningeg e pagel: Abijah, Attai, Ziza, nge Shelomith. 21 I Rehoboam e ragag nge meruk pi le’engin ma nel’ i ragag e kuboch e ppin rok, ma rliw’ nge meruk e pagel ni pifak ma nel’ i ragag e ppin. U fithik’ gubin pi le’engin nge ku yug boch e ppin rok ma Maakah e th’abi t’uf rok u fithik’rad, 22 me Abijah nib mo’on ni diyennag Maakah e ir e th’abi t’uf rok Rehoboam u fithik’ urngin pifak, me mel’eg ni ir u fak e nge yan nga luwan nge mang pilung. 23 Rehoboam e ba gonop u rogon ni pi’ e pi maruwel ngak e fapi pagel ni pifak me gararegrad u lan e nug ko ganong rok Judah nge Benjamin ko fapi binaw ni kan yororiy nib gel ni fan ko mael. Ma rib fel’ pa’ ngorad ni yad gubin miki m’ag taban e ppin ni yo’or ni ngar le’engiyed.

2 Chronicles 11 (YAPE)

In Other Versions